Нийслэлийн Засаг дарга “Зураг төсөв боловсруулах ажлыг зохион байгуулах тухай” А/446 дугаар захирамж гаргалаа. Захирамжаар нийслэлийн төсвийн хөрөнгөөр 2015 онд санхүүжүүлэх шинээр баригдах барилга байгууламж, авто зам, инженерийн шугам сүлжээний зураг төсөв боловсруулах ажлын хөрөнгөнөөс хэрэгжүүлэх барилга байгууламж, инженерийн шугам сүлжээний зураг төсөв боловсруулах ажлын жагсаалтыг нэгдүгээр, авто зам, замын байгууламжийн зураг төсөв боловсруулах ажлын жагсаалтыг хоёрдугаар хавсралтаар тус тус баталлаа.
Батлагдсан төсөл, арга хэмжээний гүйцэтгэгчийг сонгон шалгаруулах Үнэлгээний хороог нийслэлийн Засаг даргын захирамжаар байгуулж, худалдан авах ажиллагааг холбогдох хууль, журамд нийцүүлэн зохион байгуулахыг нийслэлийн Худалдан авах ажиллагааны газарт, Хөрөнгө оруулалтын ажлыг гүйцэтгэлээр санхүүжүүлэхийг нийслэлийн ЗДТГ-ын Санхүү, төрийн сангийн хэлтэс, нэгдүгээр хавсралтаар батлагдсан төсөл арга хэмжээнд захиалагчийн хяналт тавьж ажиллахыг нийслэлийн Хөрөнгө оруулалтын газарт, хоёрдугаар хавсралтаар батлагдсан төсөл, арга хэмжээнд захиалагчийн хяналт тавьж ажиллахыг нийслэлийн Авто замын газарт тус тус даалгав.
Мөн хөрөнгө оруулалтаар бий болсон хөрөнгийг нийслэлийн өмчид бүртгэн авч, эзэмшилт, ашиглалтын байдалд хяналт тавьж ажиллахыг нийслэлийн Өмчийн харилцааны газарт үүрэг болголоо гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
Нийслэлийн засаг даргын 2015 оны 02 дугаар сарын 09-ний өдрийн А/121 дүгээр захирамжаар баталсан “Найрсаг Улаанбаатар” хөтөлбөрийн хүрээнд жил бүр зохион байгуулагддаг “Улаанбаатар марафон-2015” энэ оны 06 дугаар сарын 06-ны өдөр болно.
Монголын Залуучуудын Холбоо 2012 оны хоёрдугаар сараас эхлэн “Спирт үү, Спорт уу” аяныг орон даяар эхлүүлж байсан билээ. Энэхүү аяныг эхлүүлснээр “Залуу дугуйчин”, Nice bike клуб, “Залуучуудын аялал жуулчлалын төв”-ийг байгуулахын зэрэгцээ “Нийслэлийн машингүй өдөр”-ийг тохиолдуулан дугуйн парад, долоо хоног бүрийн амралтын өдрөөр явган аялал болон дугуйтай аялал тогтмолыг зохион байгуулж залуусаа спортлог давалгаанд нэгтгэж чадсан юм. Тэгвэл уг аяны 2015 оны нээлт ирэх 6 дугаар сарын 6-нд болох гэж байна. Энэ нь Нийслэлийн “Автомашингүй өдөр” болж байгаа бөгөөд энэ өдөр бүх нийтийг биеийн тамираар хичээллэх өдрийг бий болгох, нийслэл хотоо дэлхий нийтэд сурталчлах зорилгоор “Улаанбаатар марафон” болохоос гадна МЗХ-ны зохион байгуулдаг унадаг дугуйн парад ч мөн болох юм. Унадаг дугуйн параданд оролцогчдын тоо жилээс жилд нэмэгдэж байгаа бөгөөд залуусын хүсэн хүлээдэг сонирхолтой арга хэмжээний нэг болоод байна.
АНУ-ын Төрийн нарийн бичгийн дарга Жон Керри Францад Альпийн нуруунд дугуй унаж яваадтүнхээ хугалсан билээ. Түүнийг нисдэг тэргээр Швейцарьт эмнэлэгт авчири яаралтай тусламж үзүүлсэн юм. Харин өчигдөр Ж.Керри Бостонд очиж нисэх онгоцны буудлаас шууд эмнэлэгт очсон байна. 
УИХ-ын гишүүн Л.Эрдэнэчимэгийн ахалсан Тавантолгойн ажлын хэсэг өнөөдөр 13.00 цагаас “А” танхимд хуралдах гэж байна. Тавантолгойн гэрээний төслийг УИХ-аар хэлэлцэх эсэхэд дүгнэлт гаргах уг ажлын хэсэг Засгийн газар болон холбогдох яамдаас зарим баримт бичгийг авах хүсэлтээ илгээснээ өмнө нь мэдээлж байсан юм. Тодруулбал хөрөнгө оруулагчийг сонгон шалгаруулсан дүнг хэлэлцсэн Засгийн газрын хуралдааны тогтоол, яамдаас авсан саналыг хүсээд байгаа билээ. Үүнээс гадна Тавантолгойн гэрээний төслийн англи хувилбартай танилцах хүсэлт тавьсанаа саяхан мэдээлж байв. 
Хятадын Янцы буюу Хөх мөрөнд даваа гаригийн орой “Дорнын од” нэртэй хөлөг онгоц живсэн байна. “Синхуа”-гийн мэдээлснээр хөлөг онгоцонд 458 хүн зорчиж явжээ. 
ОУХХ-ны ерөнхий нарийн бичгийн дарга Жером Валькег 2008 онд тус холбооны данснаас дэд ерөнхийлөгчөөр ажиллаж байсан Жек Уорнерийн данс руу 10 сая ам.доллар шилжүүлсэн байна.АНУ-ын эрх баригчид үүнийг маш том хээл хахуулийн хэрэг хэмээн үзэж байгаа талаар “New York Times” сонинд бичжээ. Энэ хэрэг нь ОУХХ-ны нөлөө бүхий гишүүдийг баривчилах үндсэн шалтгаан нь болсон байна. Үүнээс үзэхэд тус холбооны ерөнхийлөгчөөр тав дахь удаагаа сонгогдсон Йосеф Блаттер нь хээл хахуулийн хэрэгт холбоотой гэдэг нь гарцаагүй бололтой. 
Улаан бурхан өвчний дэгдэлт нэмэгдэж, 9200 сэжигтэй тохиолдолд бүртгэгдээд байгаа тул олон нийтийг хамарсан нэгдсэн арга хэмжээ зохион байгуулахгүй, оролцохгүй байхыг ХӨСҮТ-өөс анхааруулж буй. Үүнтэй холбоотойгоор энэ сарын 4-нд эхлэхээр товлосон хүүхдийн зуслангийн үйл ажиллагаа түр хойшилж магадгүй нь. ЭМСЯ-ны дэд сайд ийм зөвлөмж гаргасан байна. Гэхдээ яг хэзээнээс, хэд хоногоор хойшлуулахыг Нийслэл, аймгийн засаг дарга нар шийдэх гэнэ. 
Увс аймгийн 90 жилийн ойн хүрээнд есөн метр номон пирамид босгох талаараа “Шинэ тэмүүлэл” залуучуудын клубын залуус хэвлэлийн хурал хийж байсан билээ. Тэд Увс аймгийн 90 жилийн ойг угтаж “Booк challange” номын хандивын аян эхлүүлсэн бөгөөд ном бэлэглэсэн хүн дараагийн хоёр хүнийг “Booк challange”-д дуудах замаар өрнөх уг аян цахим ертөнцөд багагүй дэлгэрсэн. Улмаар аяны хүрээнд цугларсан номоор эх үрсийн баярын үеэр Увс аймгийн төв Цэдэнбалын талбайд есөн метр пирамид босгох талаараа мэдээлж байсан. Харин өчигдөр энэ санаачлага ажил хэрэг болж, сар гаруй хугацаанд өрнүүлсэн #bookchallenge аянаа хааж, амласан ёсоороо пирамидаа босгожээ. Хүүхдийн баярыг номын баяр болгож тэмдэглэж пирамид босгосон нь ном өрсөн явдал биш хүүхдийн оюунд пирамид босгох эрхэм зорилготой юм хэмээн “Шинэ тэмүүлэл” залуучуудын клубын залуус хэлж буй юм. Пирамид босгосны дараагаар номуудыг тус аймгийн ерөнхий боловсролын 29 сургуульд бэлэглэх юм байна.