Ерөнхийлөгч Ц.Элбэгдорж өнөөдөр Мянганы сорилтын корпорацийн /МСК/ Ерөнхийлөгч хатагтай Дэйна Хайд тэргүүтэй төлөөлөгчдийг хүлээн авч уулзав. Хатагтай Дэйна Хайд энэ өдрүүдэд Монгол Улсад айлчилж байгаа юм.Уулзалтын үеэр Монгол Улсын Ерөнхийлөгч Ц.Элбэгдорж, МСК-ийн Ерөнхийлөгч хатагтай Дэйна Хайд нар хоёр дахь компакт гэрээний онцлог, Засгийн газраас хэрэгжүүлэх шаардлагатай үйл ажиллагааны талаар санал солилцлоо. Уулзалтаар Монгол Улсын Засгийн газраас АНУ-ын МСК-тай хоёр дахь компакт гэрээ байгуулах асуудлаар хэлэлцээ хийх, хэрэгжүүлэх төслүүдийг тохиролцох ажлыг хариуцсан Ажлын хэсэг, компакт гэрээг боловсруулах ажлыг удирдан зохион байгуулах үүрэгтэй Үндэсний ажлын алба байгуулаад байгаа талаар ярилцлаа.
МСК нь хоёр дахь компакт гэрээг харьцангуй цөөн улстай байгуулдаг. Тийм учраас уг гэрээг хэрэгжүүлэх улс орны хувьд тавигдах шаардлагууд нэмэгддэг юм байна. Уг гэрээг боловсруулахад 2 жил орчим хугацаа шаардагдах бөгөөд компакт гэрээ хүчин төгөлдөр болсны дараа 5 жилийн хугацаанд төслүүдийг хэрэгжүүлдэг болох талаар уулзалтын үеэр хатагтай Дэйна Хайд танилцуулав.
МСК-ийн зүгээс санхүүжилт хийх төсөл, хөтөлбөр хэрэгжүүлэх салбарыг тодорхойлохын өмнө Монгол Улсын эдийн засгийн өсөлтөд нөлөөлж буй хүчин зүйлсийн талаар судалгаа хийх юм байна. Уг судалгааг Үндэсний ажлын алба эхлүүлсэн байна. МСК-ийн шугамаар буцалтгүй тусламж авах орны Засгийн газар компакт гэрээ хэрэгжүүлэх эрмэлзэл, үүрэг амлалтаа батлах, гэрээ боловсруулах, хэрэгжүүлэх үе шатанд МСК-ийн шалгуур үзүүлэлтүүдийг хангаж байх нь чухал юм байна.
Компакт гэрээ байгуулах улс орныг шалгаруулах шийдвэр гаргахдаа тухайн улсын ардчилсан засаглалыг бэхжүүлэх, эдийн засгийн эрх чөлөөг хөгжүүлэх, авлигатай тэмцэх бодлого, үйл ажиллагаа зэрэг хүчин зүйлсийг харгалзан үздэг аж. Өнгөрсөн 2 жилийн хугацаанд Монгол Улс эдгээр үзүүлэлтийг амжилттай биелүүлж чадсан тул ийнхүү МСК-тай хоёр дахь компакт гэрээ байгуулах боломжтой орноор шалгарчээ.
“Монголын мэргэжлийн анчдын холбоо”, “Идлэг шонхор хамгаалах сан” төрийн бус байгууллагынхан Шонхор шувууг Гадаад хэргийн яам, улс төрчдөөс хол байлгахыг уриалж мэдээлэл хийлээ. Тэд “2013 оны Засгийн газрын 15 дугаар тогтоолоор идлэг шонхор шувууг үндэсний бахархалт шувуу болгон зарлаж, арилжаа худалдааны зорилгоор гадаад гаргахыг таван жилээр хориглосон. Гэвч энэ наанаа шонхор шувууг хамгаалж буй мэт боловч, цаанаа цөөн хэдэн сайд, улстөрчдийн дан бизнес болж буйд эмзэглэж байна” гэв. Тиймээс энэхүү тогтоолоо хүчингүй болгож арилжааны чиглэлээр гадаадад гаргаж болно гэсэн хуулийн заалтыг сэргээхийг Монголын байгаль орчны иргэний зөвлөлөөс хүс байгаа аж. 2009 оноос идлэг шонхорыг гадаадад гаргах нь эрс нэмэгдэж, өнгөрсөн хугацаанд нийтдээ 300- 385 шонхор гадагшаа гарсан гэв.
Монгол Улсад элэг нэгт, Монголоо гэсэн сэтгэлтэй өвөрмонгол иргэдийн эрх зөрчигдөж байгаа талаар “Монгол хүн монгол хүндээ туслая” төрийн бус байгууллага болон Хохирогчдын холбооны тэргүүн Х.Оюунцэцэг нар өнөөдөр мэдээлэл хийлээ. Монголд одоогоор 1000 орчим Өвөрмонгол иргэн ажиллаж, сурдаг аж. Гэтэл тэднийг шуудайтай мөнгө шиг харж байна хэмээн тэд ярьсан юм. Тухайлбал, Хөлөнбуйр аймгаас ирсэн С.Билигбаатарыг Монголын гурван иргэн хужаа хэмээн зодсон бөгөөд амиа аврахын тулд тэрээр хоёр давхараас үсэрч хугархай хөлтэй цэргийн ангийн хашааг давсан байна. Түүнийг цэргүүд барьж аван түргэн дуудахад эмч нь нутагтаа очиж яаралтай мэс засал хийлгэхгүй эд эс нь үхжиж байна гэжээ. Гэтэл түүнийг хэргээс мултрахын тулд хөлөө хугалж, биеэ хөх няц болгож өөрийгөө гэмтээсэн, цэргийн анги руу нэвтэрсэн хэмээн хэрэгт холбогдуулах гэж байхад нь хүний эрхийг хамгаалагчид хэргийг нь хэрэгсэхгүй болгуулж нутаг руу нь явуулжээ. Мөн тэрээр хүчнийхнээс амь аврагдахын тулд гомдолгүй гэж мэдэгдээд, хохирч үлдсэн байна.
Хуульчийн эрх зүйн байдлын тухай болон Захиргааны хэрэг хянан шийдвэрлэх тухай хуульд, хуульчийн мэргэжлийн хариуцлагын асуудал эрхэлсэн хорооны шийдвэрийг Захиргааны хэргийн давж заалдах шатны шүүх шууд давж заалдах шатны журмаар шийдвэрлэхээр зохицуулсан байгаа ажээ. Энэ нь Монгол Улсад шүүх эрх мэдлийг гагцхүү шүүх хэрэгжүүлэх, шүүхийг зөвхөн Үндсэн хууль, бусад хуулийн дагуу байгуулах тухай Үндсэн хуулийн заалтуудыг зөрчсөн байна гэсэн мэдээллийг нэр бүхий иргэд Үндсэн хуулийн цэцэд ирүүлсэн билээ.
УИХ-ын Аюулгүй байдал, гадаад бодлогын байнгын хорооны хуралдаан Төрийн ордны “А” танхимд хаалттай горимоор үргэлжилж байна.
“Эх орны хүнс-Эрүүл хүнс” үндэсний үйлдвэрлэгчдийн өдөрлөг яг одоо Эрх чөлөөний талбайд болж байна. Энэхүү өдөрлөг энэ сарын 25-28-ны хооронд болох юм. 
УИХ-ын Төсвийн байнгын хороооны өнөөдрийн хуралдаанаар Эдийн засгийн ил тод байдлыг дэмжих тухай хуулийн төслийг хэлэлцсэн ч гишүүдийн олонхи нь төслийн хэлэлцүүлгийг хойшлуулах санал гаргаж, дэмжлэг хүлээлээ.