Month: May 2015

Үндэсний бүтээн байгуулалт болох “Алтанбулаг – Улаанбаатар – Замын-Үүд чиглэлийн хурдны авто зам төсөл”-д үндэсний компаниудыг оролцуулах, зам барилгын ажилд оролцох Монгол ажилчдын тоог нэмэгдүүлэх, үндэсний мэргэжилтэй инженер, техникийн ажилтан бэлтгэхэд хамтран ажиллах зорилгоор “Чингис Лэнд Девелопмент Групп”, Монголын Үндэсний Худалдаа Аж Үйлдвэрийн Танхим, Монголын Авто Замчдын Холбоо харилцан ойлголцлын санамж бичигт гарын үсэг зурах ёслол өнөөдөр боллоо. Санамж бичиг байгуулснаар төсөл хэрэгжих хугацаанд манай улсын үндэсний аж ахуйн нэгж компаниуд уг бүтээн байгуулалтад оролцон, олон улсын томоохон корпорациудтай хамтран ажиллах боломж бүрдэх аж. Цаашдаа бүс нутгийн томоохон төслүүдэд оролцох туршлага хуримтлуулж, хүчин чадлаа нэмэгдүүлнэ гэж үзэж байна. Зам барилгын ажлын явцад нийтдээ 20-30 мянган түр ажлын байр, амралт үйлчилгээний цогцолбор, замын байгууламжуудын хэсгүүдэд 3000-5000 ажлын байр, зам дагуу бий болох шинэ суурьшлийн бүсүүдийг дагаад 50 мянга хүртэл ажлын байр бий болно гэж тооцжээ.

Энэ жил зуслангуудын дундаж үнэ 175 мянган төгрөг гэж Хүүхэд, гэр бүл хөгжлийн газраас мэдээллээ. Зуслангууд ирэх сарын 4-нөөс бүртгэлээ хийж эхлэх гэнэ. Улаанбаатар чуулгын нэг давхарт бүртгэл хийгдэх нь. Өмнөх жилүүдэд иргэд бүртгэл хийлгэснийхээ дараа эрүүл мэндийн хуудсаа өгдөг байсан. Тэгвэл энэ жилээс иргэд хүүхдээ зусланд бүртгүүлэхээр ирэхдээ эрүүл мэндийн хуудсаа бөглүүлж авчрах хэрэгтэй гэдгийг санууллаа. Эрүүл мэндийн хуудсыг child.gov.mn хуудаснаас татаж авах боломжтой юм байна. . Эрүүл мэндийн хуудсыг хувийн эмнэлгүүдээр бөглүүлэхгүй. Заавал өөрийн оршин суугаа дүүргийн эрүүл мэндийн нэгдлээр бөглүүлэн, тамгуулах ёстой. Иргэдийн хувьд дүүргийн эмнэлэг оочертой гэх шалтгаанаар хувийн эмнэлгээр тамга даруулах явдал байдаг. Тэгвэл энэ жилээс зөвхөн дүүргийнхээ эмнэлгээр л бөглүүлэх шаардлагыг тавьж эхэлжээ. Иргэд зуслангийн талаар дэлгэрэнгүй мэдээллийг Хүүхэд, гэр бүл, хөгжлийн газрын www.child.gov.mn сайт руу орж, зуслан гэх холбоосоор авах боломжтой юм. Нийслэлийн зуслангуудын хаяг, байршил, холбоо барих утасны жагсаалтыг хүргэе.

ЗУСЛАНГУУДЫН ХАЯГ БАЙРШИЛ

Тавдугаар сарын 24-ны ням гаригт баруун гурван аймгаас бусад аймаг болон Улаанбаатар хот даяар гэрэл цахилгаан тасалдсан. ТӨХ-ноос хохирлын хэмжээг урьдчилсан байдлаар гаргажээ. Хохирлын хэмжээ нь 2,2 тэрбум төгрөг юм байна. Хамгийн их хохирол амссан газар нь Эрдэнэт уулын баяжуулах үйлдвэр гэнэ. Тоггүйгээс болж уг үйлдвэрт 1,1 тэрбум төгрөгийн хохирол учирсан байна. ТӨХ-ноос уг хэрэгт хэвлэлээр мэдээлж байсан шиг Цахилгаан дамжуулах үндэсний сүлжээний захирал асан Ж.Равдандоржийг буруутай гэж үзэхгүй байгаа аж. Эрчим хүчний яамнаас цахилгаан тасалдах болсон шалтгаан, учирсан хохирлыг нарийвчлан тогтоох ажлын хэсэг байгуулжээ.

Төв цэвэрлэх байгууламжид яаралтай засвар хийхээр болжээ. Тодруулж хэлбэл ойрын өдрүүдэд төв цэвэрлэх байгууламжийн аэротенкийн хэсгийг яаралтай нөхөх ажлыг эхлүүлэхээр болсон байна. Тэгэхгүй бол энэ зун нийслэлчүүд бохироо гадагшлуулах аргагүйд хүрэх аж. Төв цэвэрлэх байгууламжийн аэротенкийн хэсгийг анх 1979, 1985 онд ашиглалтад оруулж байсан гэнэ. Энэ хэсгээр өдөр бүр нийслэлийн иргэдийн хэрэглэсэн бохир усанд биологийн цэвэрлэгээ хийдэг юм байна. Байгуулсан цагаас хойш огт шинэчлэл хийгээгүйгээс цооролт үүсч, цооролтын хэмжээ ихэссэн аж.

УСУГ-ын дарга С.Үнэн “Газрын даргын хувьд энэ удаагийн засварыг Засгийн газар, нийслэлийнхний гарыг харалгүйгээр яаралтай эхлүүлэхээр шийдээд байна. Гэхдээ засварлахын тулд хоёр сонголтоос нэгийг сонгох хэрэгтэй болсон. Засвар хийх гурав хоногийн хугацаанд иргэдийн хэрэглээний усыг хязгаарлах, эсвэл нийслэлчүүдийн хэрэглэсэн усыг цэвэрлэхгүй шууд Туул гол руу асгах гэсэн сонголт дээр тулаад байна. Иргэдийн усыг хязгаарлах нь боломжгүй асуудал учраас бохир усыг шууд Туул гол руу асгахыг сонгох болов уу” гэсэн юм. Цэвэрлэх байгууламжийн засварыг өнөөдөр, эсвэл маргаашнаас эхлүүлэх гэнэ.

Улсын хэмжээнд худалдаалагдаж байгаа шатахуун дунджаар А80 – 1620, А92 – 1810, А95 – 1890, Дизель – 1790 төгрөгөөр худалдаалагдаж байна. Харин эдгээр шатахууны нөөц мөн улсын хэмжээнд 42 хоногийн нөөц үлджээ. Нарийвчилсан тооцоогоор А-80 шатахуун 45 хоног, АИ-92 шатахуун 59 хоног, дизель түлш 37 хоног, ТС-1 29 хоногийн нөөцтэй байна гэж Уул уурхайн яамнаас мэдээлээ.

Газрын тосны салбараас 2013 онд 187.7, өнгөрсөн жил 285.5 тэрбум төгрөг улсын төсөвт төвлөрүүлжээ. Шатахууны үнэ дэлхийн зах зээл дээр буурч тогтвортой байгаа ч манай үнэ харьцангуй өндөрт тооцогдоно. Цаашид ч олон улсад шатахууны үнэ өсөх хандлагатай байна.

Монголын Үндэсний музей 2014-2015 онд үзмэрийн танхимууддаа засвар, шинэчлэл хийхээр төлөвлөөд байгаа аж. Тухайлбал, XXVII зуунаас XX зууны эхэн үеийн Монгол орон”, “Социализмын үеийн Монгол Улс”, “Монгол нутаг дахь эртний улсууд Түрэгийн хаант улс, Хүннү гүрэн” зэрэг танхимуудыг БНТУ-ын ТИКА байгууллагаас шинэчлэн хүлээлгэн өгсөн байна. Шинэ танхимын нээлтийн ажиллагаа өнөөдөр Монголын Үндэсний музейд боллоо.

Монгол Улсын “Автотээврийн өөрөө явагч хэрэгслийн албан татварын тухай хууль, Агаарын бохирдлын төлбөрийн тухай хууль”-ийн дагуу автотээврийн болон өөрөө явагч хэрэгслийг эзэмшиж байгаа хувь хүн, хуулийн этгээд албан татвар төлдөг. Хуульд хувь хүн автотээврийн болон өөрөө явагч хэрэгслийн албан татварыг жилд нэг удаа тухайн жилийн зургадугаар сарын 01-ний дотор төлөх үүрэгтэй бол албан байгууллага, аж ахуйн нэгж эхний хагас жилээр албан татварыг төлөх ба жилийн албан татварыг урьдчилан төлөх боломжтой гэж заасан байдаг.

Уг хуулийг хэрэгжүүлэх, иргэдэд банкинд дараалал үүсгэж цаг хугацаа алдахгүй байх боломжоор хангах зорилгоор автомашины улсын дугаарын сүүлийн оронгоос хамаарч төлөх шинэчилсэн журмыг Нийслэлийн ИТХ-ын Тэргүүлэгчдийн 2015 оны 01-р сарын 26-ны өдрийн 28 дугаар тогтоолоор баталсан.

Тодруулбал, жолооч таны автомашины улсын дугаар :

1, 6 тоогоор төгссөн бол нэгдүгээр сард
2, 7 тоогоор төгссөн бол хоёр дугаар сард
3, 8 тоогоор төгсссөн бол гуравдугаар сард
4, 9 тоогоор төгссөн бол дөрөвдүгээр сард
5,0 тоогоор төгссөн бол тав дугаар сард албан татвар, төлбөр хураамжаа төлнө

Энэ жилийн хувьд нийслэлийн Засаг даргын 2015 оны А/143 тоот захирамжаар байгуулагдсан ажлын хэсэг татвар, төлбөр хураах ажлыг 2015 оны 02 дугаар сарын 10-ны өдрөөс эхэлж зохион байгуулсан. Нийслэлийн хэмжээнд авто тээвэр болон өөрөө явагч хэрэгслийн албан татвар, агаарын бохирдлын төлбөр, авто зам ашигласны төлбөр хураах нэг цэгийн үйлчилгээ нийт 14 байршилд ажиллаж эхэлсэн. Харин 05 сард ачаалал ихсэх төлөвтэй байгаа учраас 7 цэг нэмж байршуулан нийтдээ нийслэлийн 21 байршилд татвар хураалтын ажлыг эрчимжүүлсэн байдлаар явуулж байна. Мөн оношлогооны цэгүүд ажлын болон амралтын 2 өдөр уртасгасан цагаар ажиллаж байна. Ингэснээрээ энэ жилийн татвар хураалтын ажил ачаалал багатай, иргэдэд хүндрэлгүй явагдаж байгаа учираас хугацаандаа татвараа төлнө үү. Хэрэв заасан хугацаанд татвараа төлөөгүй тохиолдолд Замын цагдаагийн алба нь өөрийн эрх хэмжээ, хуулийн хүрээнд авто тээврийн эзэмшигчдэд хариуцлага тооцож, замын хөдөлгөөнд оролцуулахгүй гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Энэ удаагийн хүүхдийн эрхийг хамгаалах баярын арга хэмжээнд нийтдээ 144 сая 600 мянган төгрөгийг төсөвлөсөн байна. Үүнийг баярын арга хэмжээний зохион байгуулалтад зарцуулахаас гадна, асран хамгаалагчгүй, эмзэг бүлгийн, ял эдлэж байгаа хүүхдүүдэд гарын бэлэг өгөхөд зарцуулахаар төлөвлөжээ. Энэ жилийн хувьд томоохон талбай, үзвэр үйлчилгээний байгууллагуудад нэгдсэн арга хэмжээ зохион байгуулахаар Нийслэлийн соёл урлагийн газраас хөтөлбөр боловсруулсан байна. Гэхдээ ихэвчлэн задгай талбайд баярын арга хэмжээг зохион байгуулах юм. Учир нь Улаанбурхан өвчний тархалт их байгаа. Тиймээс аль болохоор задгай талбайд баярын арга хэмжээ зохион байгуулах зөвлөмжийг эрүүл мэндийн газраас хүргүүлжээ.

Зургаадугаар сарын нэгэнд 11:00-14:00 цагийн хооронд “ХҮҮХДИЙН БАЯР” арга хэмжээг Чингис хааны нэрэмжит талбайд зохион байгуулна.

Чингис хааны нэрэмжит талбайн баруун талд буюу Нийслэлийн Засаг даргын тамгын газрын урд хэсэгт тайзыг байрлуулах юм. Тайз нь хүүхдийн баярыг илтгэхүйц онцлогтойгоор засах юм байна. Мөн талбайг тойруулан 12 жилийн амьтдыг байрлуулна. Ингээд 12 жилийн амьтад бүр дээр өртөө удирдагч багш болон чиглүүлэгчид ажиллаж, уралдаан тэмцээн зохион байгуулах, талбайд цугласан хүүхэд багачуудыг баярлуулах идэвхжүүлэлтийн ажлыг гүйцэтгэхээр болжээ.

Харин Жангарын баатруудыг талбайн төв хэсэгт Сүхбаатарын хөшөөний баруун, хойд, өмнөд талд байрлуулан фото зураг авхуулах, уралдаан тэмцээн зохион байгуулах зэргээр талбайн үйл ажиллагааг төв тайзнаас гадна дээрх амьтад, баатруудын хөшөөний хамтаар цогц байдлаар зохион байгуулах юм.

Мөн “Хүүхдэд ээлтэй найрсаг Улаанбаатар” уриа бүхий парадыг Хүүхдийн байгууллага үүсч байгуулагдсаны 90 жилийн ойн хүрээнд Монголын сурагчдийн зөвлөл, “Халуун сэтгэл” ТББ хамтран зохион байгуулахаар төлөвлөжээ. Парад Ерөнхий сайд Амарын гудамжнаас эхлэн СТӨ, ДБЭТ –ийн урдуур нар зөв талбайг тойрно.

Талбайн хоёр талын автомашины хөдөлгөөнийг хаана. Хүүхэд багачууд, иргэдийн аюулгүй байдал, замын хөдөлгөөний зохицуулалт, яаралтай түргэн тусламжийн үйлчилгээг төрийн байгууллагууд хариуцан ажиллах юм.

Энэхүү баярын арга хэмжээг 11-14 цагийн хооронд Монголын Үндэсний Олон нийтийн телевиз, UBS телевиз “Чингис хааны нэрэмжит талбайгаас улс орон даяар шууд дамжуулна.

Энэ удаагийн баярын арга хэмжээний ерөнхий Найруулагчаар ДБЭТ –ийн найруулагч Е. Сарантуяа, Зураачаар ДБЭТ -ийн ерөнхий зураач Г.Ганбаатар нар ажиллах тухай Нийслэлийн соёл урлагийн газраас мэдээллээ.

Прага дахь Монголын ЭСЯ-наас Чех Улсын хорих ангиудад ял эдэлж буй иргэдээ эргэж, консулын уулзалт хийсэн байна. Энэ сарын байдлаар манай улсын 3 иргэн тус улсад ял эдэлж, 1 иргэний хэрэг мөрдөн байцаалтын шатанд шалгагдаж байгаа юм. Эдгээрээс хүний амь бүрэлгэсэн хэргээр 1 хүн, бусдын биед гэмтэл учруулсан хэргээр 2 хүн хоригдож байгаа бөгөөд 1 хүн хар тамхи зөөвөрлөсөн хэргээр мөрдөн байцаалтын явцдаа байна. Консулын уулзалтын үеэр хорих ял эдэлж буй иргэдийн нөхцөл байдлын талаар тодруулахад хорих ангийн удирдлага, харгалзагч нараас болон бусад хоригдлуудын зүгээс ямар нэгэн дарамт, шахалт үзүүлдэггүй, хэвийн нөхцөлд ялаа эдэлж байгаа тухай ярьжээ. Ял эдэлж байгаа 3 иргэд бүгд 1-р зэргийн хүмүүжигч гэсэн үнэлгээтэй байгаа нь тэднийг хорих анги дотроо ажил хийх болон хугацаанаасаа өмнө суллагдахад дөхөм болдог байна.Консулын уулзалтын үеэр ял эдэлж буй иргэдэд тус бүр 40 ам.доллартай тэнцэх мөнгөн тусламж үзүүлсэн байна.