Ховд аймгийн Дуут сумын нутагт орших дуунд мөнхөрсөн “Дуут нуур”-ын ойролцоох булгийн дэргэд ширэг гэнэт хагарч байгалийн усан оргилуур бүхий өвөрмөц үзэгдэл бий болжээ. Гэнэт их дуу чимээ гарч газар хагаран хоёроос гурван метр өндөрт гүний цэнгэг ус оргилан гарсан байна. Үүнийг нутгийн иргэд анх харж мэдээлсэн бөгөөд Дуут сумын засаг даргын тамгын газраас хүн очиж зургийг нь авч, энэ ховор үзэгдлийг олон нийтэд мэдээлжээ.
Эдийн засгийн форумын зохион байгуулагчид дөнгөж сая мэдээлэл хийлээ. Эдийн засгийн форумд 1500 оролцогч бүртгэгдсэн байна. Үүнээс 200 орчим нь хэвлэл мэдээллийнхэн гэнэ. Шинээр гадаадын хөрөнгө оруулагчдыг уриагүй аж. Учир нь суурь асуудлуудаа шийдэхийг зорьжээ. Харин Монголд ажиллаж, амьдарч байгаа гадаадын компанийн төлөөлөгчид оролцож байгаа юм байна. Эдийн засгийн форумыг зохион байгуулагчид хариуцсан асуудлынхаа талаар мэдээлсэн юм.
Эдийн засгийн форумын зохион байгуулагч н.Эрдэнэбат: -Эхний өдрийн хуралдаан ид дундаа явж байна. Хуралдаанаар макро эдийн засгийн нөхцөл байдал ямар байгаа, цаашдаа ямар шийдэлд хүрэх вэ гэдгийг үндсэн илтгэлээр шийдлээ. Чуулган өмнөх хуралдаануудаасаа онцлог нь дотоод асуудалдаа түлхүү орж байгаа юм гэлээ.
Зохион байгуулагч Амартүвшин: Эдийн засгийн форумын үндсэн асуудал нь мэтгэлцэх. Төрийн хяналт шалгалтын асуудал дээр их мэтгэлцэж байна. Төр, бизнесийн байгууллага хоорондоо зөв мэтгэлцэх хэрэгтэй. Татвар, гааль, мэргэжлийн хяналтын байцаагчид бизнесийнхэнд хяналт шалгалт хийхдээ тодорхой тогтолцоо байдаггүй юм байна. Тиймээс энэ нь эрүүгийн хэрэг болоод явчихдаг. Асуудалд суббьектив чанартай, бусдын, өрсөлдөгчдийн захиалгаар явуулж байгаа тохиолдолд байна. Энэ нь шүүх дээр очоод хэрэгсэхгүй болгодог. Гэтэл шалгах хугацааны хохирлыг хэн барагдуулах вэ? Төрийн хяналт шалгалтыг тодорхой болгож, оношоо зөв тогтоолоо гэж харж байна гэлээ.
Зохион байгуулагч н.Батсайхан: -Сүүлийн үед манай зээлжих зэрэглэл муудаж байгаа. Учир нь гадаадын хөрөнгө оруулагчид зээлжих зэрэглэлийг нь сонирхдог байна. Тиймээс энэ удаагийн форумаар зээлжих зэрэглэлийг хэлэлцэхээр шинээр тусгалаа.Манайх зээлжих зэрэглэлийн үзүүлэлтээр хандлага нь сөрөг талтай гарсан байна. Bбуюу хөрөнгө оруулалт хийхэд өндөр эрсдэлтэй түвшинд хүрсэн.
МҮИС-ийн дэд захирал Д.Нэргүй: -Уур амьсгал, дэлхийн дулаарал, экологийн өөрчлөлт эдийн засагт хэрхэн тусч байгаа талаар судалжээ. Агаарын өөрчлөлт 3 хувиар өсөхөд экологид 60 хувийн өөрчлөлт гарчээ. Монгол Улс цэвэр усны нөөцөөр хомс. Гэтэл өнөөдөр орон сууцны оршин суугч өдөрт 250 литр ус хэрэглэдэг бол 20 жилийн дараа 25 литр ус хэрэглэх тооцоо гарсан. Тиймээс бид энэ бүхнээс шийдэл эрхийлж, ямар алхам хийх талаар төвлөрүүллээ. Монгол Улс экологийн зөв зүйтэй асуудлаа тусгах хэрэгтэй.
Эдийн засагч Б.Дөлгөөн: -Эдийн засгийн хүндрэл төлбөрийн тэнцлийн алдагдалтай холбоотой. Тиймээс бид чөлөөт худалдааны асуудлаар хэлэлцүүлгээ өрнүүлнэ. Тийм учраас экспортод бараагаа гаргахын тулд хэрхэн талаар холбогдох яам, агентлаг, төрийн бус байгууллагын төлөөлөл оролцоно.
МСЭ-ийн дэд захирал П.Баярмагнай: -Мэддээллийн ёсзүйн талаар эдийн засгийн форум дээр тусгайлан хэлэлцүүлж байгаа нь сайшаалтай. Бидний хувьд хариуцлага өндөр болж байна. Өнөөдрийн салбар хуралдаан дээр олон талын төлөөлөл оролцлоо. Бид нэг талын мэдээлэл авч, яаран гүйцэтгэх үзэгдэл байдаг. Нөгөө талаар тухайн байгууллага мэдээллээ өгөх нь хойрго байдаг. Уул уурхайн салбарт л гэхэд улстөрчид мэдээллийн эх сурвалж болж, сэтгүүлчид маш олон удаа хөндсөн байна.
Санхүүгийн зохицуулах хорооны ажлын албаны дарга Ц.Энхбаяр: -Үл хөдлөх хөрөнгийн зах зээл ба хөрөнгийн зах зээлийн асуудлаар өргөн хүрээнд хэлэлцлээ. Эдийн засгийн нөхцөл байдал сайнгүй байгаа энэ үед үл хөдлөх зах зээлийн байдал ямар байгаа талаар ярилцлаа. Үл хөдлөх хөрөнгө өөрийн мөчлөгтэй явдаг. Өнөөдөр барилгын нийлүүлэлтэй болсон. Гэр хорооллын дахин төлөвлөлтөөр 80 мянга гаруй айлын орон сууц баригдах төлөвлөгөөтэй байна. Уул уурхайг бодвол өсөлт нь тогтвортой явж байна. Хөрөнгө оруулалтын хэмжээ, хомсдлын талаар маш их ярилаа. Үл хөдлөх хөрөнгийн менежментийн асуудал чухал.
Эдийн засгийн форум үргэлжилж байна.
УИХ-ын гишүүн Г.Батхүүг Монголын үндэсний олимпын хорооны тэргүүн дээд шагнал “Алтан од” одонгоор шагнажээ. Уг шагналыг “Монголын авто машин, мотоциклын холбоо”-ны 50 жилийн ойн хүрээнд тус холбооны удирдах албанд үр бүтээлтэй ажилласан учир ийнхүү шагнасан байна.
УИХ-ын гишүүн Г.Батхүү нь “Монголын авто машин, мотоциклын холбоо”-ны Ерөнхийлөгчөөр 1997 оноос хойш ажиллаж буй гэнэ.
Энэ үеэр УИХ-ын гишүүн Г.Батхүү “Монгол Улсад автомашин, мотоцикл хөгжсөн түүхэн урт хугацаа Монголчуудын хувьд эр зориг, техникийн спортыг хөгжүүлэхэд ололт, амжилтыг хуримтлуулсан он жилүүд байсан. Мотоциклын спорт хөгжөөд 50 жил болж байна. Энэ хугацаанд Монголчууд тив, дэлхийд нэрээ цуурайтуулсан олон тамирчдыг төрүүлж, олон улсын тэмцээнүүдэд амжилттай оролцож байна. Манай улс Азийн аварга шалгаруулах тэмцээнийг улсдаа хоёр удаа зохион байгуулсан. Цаашдаа дэлхийн мотоциклын аварга шалгаруулах тэмцээнийг Монголд зохион байгуулахаар ажиллаж байна. Мотоцикл гэдэг бидний хувьд хөдөөгийн малчид, бүр бүсгүйчүүд ахуй хэрэгцээндээ хэрэглэж байгаа улмаар спорт болон хөгжиж байгаа сайхан спорт билээ. Эр зоригийн энэ спортоор хичээллэдэг үе үеийн тамирчдадаа мотоциклын спорт хөгжсөний 50 жилийн ойн баярын мэнд хүргэе. Монголчууд зөвхөн мориор биш техникээр олон улсад амжилт гаргаж байгаа амжилтаа улам бататгахын төлөө манай холбоо ажиллана ” гэжээ.
“Босоо хөх Монгол” бүлгэмийн гурван залуу өнөөдөр мэдээлэл хийлээ. Тэд бидний зорилго болох байгаль орчны төлөөх тэмцлийг буруутгаж, нэр хүндэд халдаж, худал гүтгэсэн мэдээлэл цацсан дараах хүмүүсийг шүүхэд өгөхөөр болсон гэв. Үүнд УИХ-ын дарга З.Энхболд, УИХ-ын гишүүн М.Зоригт, Л.Эрдэнэчимэг, Сүхбаатар аймгийн Засаг дарга Ж.Батсуурь болон “Ногоон хас” ТББ-ын тэргүүн М.Бямбадорж нарыг дурджээ.
“Босоо хөх Монгол” залуус хэлэхдээ “Өнгөрөгч амралтын өдрүүдэд буюу гуравдугаар сарын 28-ны өдөр Бурхан халдун ууланд гарч тахилга үйлдэж байх үеэр Өвөрмонгол, Хятад, Монгол залуустай таарсан юм. Тэнд байсан монгол залуус хятадуудыг сөгдүүлсэн байхад биднийг ийм үйлдэл хийлээ хэмээн цахим сүлжээнд тавьж байгаад харамсаж байна. Энэ нь бидэнд сөргөөр тусаж байна. Иргэд үүнд буруу ойлголттой үлдлээ. Бид үүнд л их бухимдаж байна. Ялангуяа 14-15 насны өсвөр үеийн залуус эсрэг бодолтой байгаад их харамсаж байна. Яруу найрагч О.Дашбалбар гуай хэлсэн байдаг шүү дээ биднийг буруутгах тусам бид дээшээ тэмүүлэх болно. Мөн биднийг буруутгаад байгаа хүмүүстэй халз тулахыг хүсэж байна.” гэсэн юм.
2013 оны 11 дүгээр сарын 02-ны өдрийн Засгийн газрын хуралдаанаар хэлэлцээд Их эазэн Чингис хааны мэндэлсэн өдрийг тохиолдуулан Бурхан Халдун хайрханыг “Монгол түмний “Үндэсний бахархалт хайрхан” гэж зарлахаар болсон. Бурхан Халдун уул нь Хэнтийн аймгийн Өмнөдэлгэр сумын нутагт Хэрлэн голын баруун талын нэгдүгээр цутгал гол болох Богдын голын эхэнд хойд өргөрөгийн 48 045r43”, зүүн уртгарийн 109000r30”- ын солбицолд, далайн түвшнээс дээш 2361.5 метрийн өндөрт оршдог. Бурхан Халдун уулыг Хиад боржигы өвөг Бодончарын үеэс тахиж, Чингис хааны үед Хамаг Монголын хийгээд Монголын их эзэнт гүрний Сүлд уул болгон тайж байжээ. Хамаг Монгол Улсын хэзээний уламжлалт өлгий газар, тухайлбал Бурхан Халдун уул болон гурван мөрний эхэнд бусдыг бүү нутаглуултугай хэмээн онцгойлон дархалж, хаадын шарилын орд бүхий ихсийн газар Их хориг гэх болсон. 1227 онд Их хааны шарилыг Хэнтий нурууны өвөрт Их өтөг гэдэг гакар тээж авчран онголоод урианхан мянгатын ноён Удачи ноёноор Их хоригийг хамгаалуулж байсан байдаг. 13-р зуунд Их хаадыг оршуулж эхэлснээр хүн очихыг хориглож, “Хоригууд” бий болгосон нь Бурхан Халдун уулыг тахидаггүй байсан гэсэн үг биш. Очсон нь Дунд овоонд бөөгийн болон бурханы шашны зан үйлүүдийг үйлдэж, очоогүй нь сэтгэл байвал, газар холдохгүй хэмээн Бурхан Халдунаа гэж бодон түүний бараа харагдах өөр бусад тахилгат уул, овоог сүсэглэн тахидаг байжээ.
“Гал үндэстэн холбоо”, “Хамаг монгол төсөл”, “ДМ” нэгдэлийн төлөөлөгчид гуравдугаар сарын 7-ны өдрөөс Чингисийн талбай дээр эхэлсэн аяны талаарөө өнөөдөр сэтгүүлчдэд мэдээлэл хийлээ.
Тэд сонгууль болоход бүгд түмэн олнийг дууддаг, тэр бүхэнд нь түмэн олон очдог. Ардчилал гарсан тэр үеэс хойш түүхэн цаг үед ард түмэн бид нэг удаа тэднийг дуудсан боловч тэд ирсэнгүй. Тэдний ёс зүйгүй, төрийн гурван өндөрлөгөө дууддаг хэн юм бэ? гэсэн хүмүүсийн шаардлагыг хүлээн авч “Ёс зүйтэй” уулзалтыг дөрөвдүгээр сарын 06-ны өдөр хийхээр болсноо мэдэгдлээ. Энэ нь “Төр түмний халз мэтгэлцээн буюу Ёс зүйтэй” уулзалт болох юм байна. Үүнд хөндөгдөх гол хоёр үндэслэл нь :
1. Ерөнхийлөгч Ц.Элбэгдорж Герман улсад айлчлал хийж байхдаа үндэсний аюулгүй байдалд ноцтойгоор заналхийлсэн мэдээллийг тодруулах.
2. Ерөнхийлөгч Ц.Элбэгдорж шүүхийн үйл ажиллагаанд хөндлөнгөөс оролцсон гэсэн дүгнэлтийг “ДМ” нэгдэлд мэдээллэсэнтэй холбогдуулж тодруулах.
Мөн “ДМ” нэгдлийн төлөөлөгчид өөрсдөддөө нэгдэх хүмүүсийг чөлөөтэй угтаж авахаа илэрхийлээд, бид ямарч хүний эрхэнд байдаггүй “ДМ” нэгдлийн гишүүдийн ихэнх нь Монголд, гадаадад их дээд сургууль төгссөн боловсролтой хүмүүс байдаг гэж мэдэгдлээ. Тэд халз мэтгэлцээнд оролцох хүмүүсийг урьж, яагаад Монголд гадаадын иргэд баян хүссэнээрээ амьдарч, монголчууд ядарч зовох ёстойг шийдвэрлэн, хамтдаа Монгол улсаа хөгжүүлэх гарцыг хайж олохыг уриалж байгаа юм байна.
НИТХ-ын 25 дугаар ээлжит хуралдаан 3 дугаар сарын 27-ны өдөр болж Налайх, Багануур дүүрэгт хот байгуулах тухай асуудлыг хэлэлцэх байсан ч НИТХ дахь МАХН-МҮАН-ын “Шударга Ёс Эвсэл”-ээс 5 хоног завсарлага авсан тул Хуралдааны дэгийн дагуу уг асуудлыг 4 дүгээр сарын 3-ны өдөр хүртэл хойшлуулсан. Үүний дагуу НИТХ-ын ээлжит хуралдаан маргааш болж тус дүүргүүдэд хот байгуулах тухай асуудлыг хэлэлцэнэ.
Багануур, Налайх дүүрэгт иргэдийн оролцоотойгоор хот байгуулах шийдвэр гаргах, хотын дүрэм батлуулах ажил өнгөрсөн оны 11 дүгээр сард эхэлсэн бөгөөд тус дүүргүүдийн иргэдээс Хот байгуулах асуудлаар санал асуулгыг Багануур дүүрэгт 01 дүгээр сарын 22, 23, Налайх дүүрэгт 01 дүгээр сарын 22-ны өдөр зохион байгуулсан. Багануур дүүргийн иргэдийн 95 хувь нь, Налайх дүүргийн иргэдийн 96 хувь нь хот байгуулахыг дэмжсэн гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
Үндэсний супер лигийн Плэй-оффын эхний шатанд гарсан цорын ганц 5 дах тоглолт Спортын төв ордонд болж лхагва гаригт/04,01/ болж өндөрлөлөө. “Их Өргөө Аравтууд” болон “Эрдэнэдрийлинг Ригс” багуудын хожсон нь дараагийн шатанд шалгарах эрхээ авах байсан юм.
УВС ЭРДЭНЭДРИЙЛИНГ РИГС vs ИХ ӨРГӨӨ АРАВТУУД – 81:73
Хожигдох эрхгүй чухал тоглолт учраас багууд эхнээсээ тун нямбай, хичээсэн тоглолтыг үзүүлж байлаа. Эхнээсээ хамгаалалтад чиглэсэн тоглолт өрнөж, алдаа их хийж байсан бөгөөд алдааны асуудалд ч хэд хэдэн тоглогч орсон юм. Эхний хагаст багууд тун бага оноо авсан бөгөөд Аравтуудаас Dean Hadley, A.Williams нар сайн байсан бол Ригсээс энэ цувралд тааруу байсан Бадрах туршлага зааж, өөрийн сайн тоглолтыг үзүүлж байлаа. Тэнцүүхэн өндөрлөсөн эхний хагасын дараа 3-р үед багууд харилцан довтолж эхэлсэн юм. Ригсээс өмнөх тоглолтонд талбайд огт гараагүй Өрнүүнбилэг энэ өдөр сэлгээнээс гарч тоглон, тоглолтын хувь заяаг өөрчилсөн гэхэд болно. Тэр энэ өдөр 12 оноо, 9 самбараас бөмбөг авалт хийсэн юм. Аравтуудын хувьд Hadley сайн байж 28 оноо авсан ч багийн лидер Мөнхтүвшин тааруу байж ердөө 7 оноо авчээ. Мөн Аравтууд торгуулийн шидэлтээ тун тааруу гүйцэтгэсэн бөгөөд багаараа ердөө 51%-тай шидсэн нь энэ хожигдлын гол шалтгаан болсон юм. Тоглолтын чухал үед A.Williams шүүгчтэй маргалдаж, техникийн алдаагаар торгуулснаар тоглолт эргэсэн гэхэд болно. Түүнээс хойш Ригс довтолгоонуудаа оновчтой болгож, эцсийн мөчид Бадрах торгуулийн шидэлтүүдээ оноо болгож байснаар багаа хожилд хүргэж, дараагийн шатанд шалгарлаа. Бадрах энэ өдөр багаа тэргүүлэн 19 оноо, 7 самбараас бөмбөг авалт хийсэн бол төвийн тоглогч Desmond Blue ч будагтай талбайд чухал оноонуудыг авч 17 оноо, 18 самбараас бөмбөг авалт хийжээ. Мөн Золжаргал 15 оноо, Will Giddings 10 оноогоор багтаа тус хүргэсэн юм. Аравтуудаас Сэдбазар 15, A.Williams 13 оноо, 17 самбар авсан ч багийн бусад тоглогчид хангалттай байсангүй.
Дархан-Уул аймгийн Шарын гол сумын нэгдүгээр багийн 7-р байрны 48 тоотод мөнгөн ус илэрлээ гэсэн мэдээллийн дагуу сумын Засаг даргын Тамгын газар, мэргэжлийн хяналт, онцгой, цагдаагийн байгууллагын төлөөлөл бүхий ажлын хэсэг газар дээр нь ажиллажээ. Мэргэжлийн байгууллагаас томилогдсон ажлын хэсэг тухайн айлын угаагуурын ирмэгт шар будааны хэмжээтэй мөнгөн ус байсныг илрүүлсэн байна. Ингээд сумын ундны усны эх үүсвэрийн худаг, усан сан, хуваарилах сүлжээ, мөн айлын халуун, хүйтэн ус, бохирын шугам, өргөх станцын бохир уснаас 19 дээж авчээ. Дээжийг МХЕГ-ын Хүнсний аюулгүй байдлын үндэсний лавлагаа лабораторид шинжлэхэд ундны усны эх үүсвэрийн худаг, усан сан, хуваарилах сүлжээ, тухайн айлын халуун, хүйтэн усанд мөнгөн усны агууламж нь ундны усны эрүүл ахуйн шаардлага, түүнд тавих MNS 0900:2005 стандартын шаардлага хангаж байгаа нь тогтоогдсон байна. өн тухайн айлын угаалгын өрөөний тосгуур, байрны зоорийн давхар, бохир усны шугам, насосны станцаас авсан бохир усанд хийсэн шинжилгээгээр мөнгөн усны агууламж илрээгүй, тухайн айлд байсан таван хүнд мөнгөн усны хордлогын ямар ч шинж тэмдэг илрээгүй байна.
ЭДИЙН ЗАСГИЙН ЧУУЛГАН-2015
Тав дахь жилдээ уламжлал болон зохион байгуулагдаж буй “Эдийн засгийн форум-2015” арга хэмжээ Төрийн ордноо үргэлжилж байна.
“Институцын засаглал ба хамтын ажиллагаа” сэдвийн дор өрнөсөн хэлэлцүүлэгт оролцогсод төрийн тогтворгүй бодлого нь бизнес эрхлэгчдийг хөрөнгөөр нь шатааж итгэл эвдэж байгаа тухай хөндлөө.
Иргэний агаарын тээврийн салбарт амжилттай ажиллаж байсан “Изинис эйрвэйз” компани дампуурлаа зарласан нь төртэй холбоотой аж. 2012 он хүртэл МИАТ компани гадаад руу нислэг үйлддэг, жижиг компаниуд дотооддоо нислэг үйлддэг байсан ч шинэ сайд томилогдож зөвшөөрлийг нь цуцалснаар үйл ажиллагаагаа үргэлжлүүлэх боломжгүй болжээ. Үүний улмаас тус компани 80 тэрбум төгрөгийн хохирол амссан тухай энэ үеэр хөндөгдлөө. Мөн төрийн буруугаас болж энэ мэтээр хэчнээн аж ахуйн нэгж хохирсныг хэлэх боломжгүйг ч хэлэлцүүлэгт оролцогчид хэлж байгаа юм.
Үүний зэрэгцээ Засгийн газар солигдох бүрийд яамдын ажил хариуцсан албан тушаалтнууд солигддог нь хувийн хэвшлийнхэнд улам дарамт учруулдаг аж. Ажил мэддэг хүн байдаггүй, эцэстээ сайдад хандахад хүргэдэг. Өмнө ажил хариуцаж байсан албан тушаалтан хаачсан бэ гэхээр намын даалгавраар явсан, оронд нь сайдын эхнэрийн дүү, сайдын хамаатан садан ирсэн гэдэг тайлбар л дагалддаг аж. Дээр нь татварын байгууллага байсхийгээд шалгалт хийдэг. Шалгалтын мөн чанарыг ойлгуулна гэхээсээ энэ компани заавал нэг төдий хэмжээний татвар нуусан байгаа, түүнийг нь илрүүлнэ гэсэн хандлагаар ханддаг. Энэ мэтээр төр нь иргэнийхээ, аж ахуйн нэгжийнхээ итгэлийг эвдэж, зарим үед багтрах ч багадмаар хүнд суртал, дарамт шахалт тулгадаг тогтолцоо хэвээр байгааг санууллаа.
Харин дээрх хэлэлцүүлэгт оролцсон Засгийн газрын хэрэг эрхлэх газрын дарга С.Баярцогтын хариултаар бол ардчилал тогтсон 25 жилийн хугацаанд 14 Засгийн газар солигджээ. Засгийн газар солигдох бүрийд яамдын бүтэц өөрчлөгддөг. Энэ нь эргээд төрийн тогтвортой бодлогод нөлөөлж байгаа учраас Монгол Улсын парламентын засаглалыг боловсронгуй болгох, Монгол Улсын Үндсэн хуульд өөрчлөлт оруулах зайлшгүй шаардлага үүсч байгаа тухай онцолсон юм.
Харин УИХ-ын гишүүн М.Батчимэгийн хариултаар бол мөн л тогтолцоо нөлөөлж байна. Герман улс 1992 оноос хойш гурван Ерөнхий сайдыг томилсон бол Монголын хувьд 10 гаруй Ерөнхий сайдын нүүр үзсэн. Тиймээс УИХ нь Засгийн газраа байгуулдаг тогтолцоог өөрчилж, зөвхөн Ерөнхий сайдыг томилоод, Ерөнхий сайд нь Засгийн газраа бүрдүүлдэг тогтолцоо руу шилжих нь бодлого тогтвортой үргэлжлэх суурь болох аж. Нөгөө талдаа төрийн албаны маш сайн хууль баталж, улс төрийн намаас хамааралтай хийгдэж байгаа томилгоог зогсоож, зөвхөн ур чадварт түшиглэдэг болох. Үүний тулд намууд гэрээ байгуулаад, энэхүү Төрийн албаны тухай хууль нь сонгуулиас сонгууль хооронд өөрчлөгдөх ёсгүй гэдгийг баталгаажуулах нь чухал аж. Ингэж чадвал 10-15 жилийн дараа үр дүн гарна. Дээр нь Үндсэн хуулийн өөрчлөлт чухал болохыг онцоллоо.
Өмгөөлөгч Г.Батбаяр Захиргааны хэргийн шүүхэд өгсөн нэхэмжлэлээ эргүүлэн татжээ. Тэрбээр “80 жилийн түүхтэй Монголын өмгөөлөгчдийн холбоо гэсэн нэрийг хэсэг хүмүүс дураараа авч ашиглаж байж болзошгүй байна. Хуучин ажиллаж байсан байгууллагын нэр, байр, түүнд хадаглагдаж байсан мэдээллийн бааз, олон оронтой тогтоосон байсан холбоо, сүлжээ зэргийг Монголын хуульчдын холбооны дэргэдэх Өмгөөллийн хороо эзэмших ёстой. Түүнээс биш одоо эзэмшиж ашиглаж буй хүмүүст хуулийн дагуу өв залгамжлах эрх үүсээгүй” хэмээн үзэж, МӨХ гэсэн нэрийг хүчингүй болгуулахаар өнгөрсөн сард Захиргааны хэргийн шүүхэд хандаж байсан юм.
Гэвч тэрбээр энэхүү нэхэмжлэлээ шүүх хурал товлогдсон өдөр гэнэт татжээ. Харин Г.Батбаяр өмгөөлөгч ямар ашиг сонирхол, далд нөлөөний улмаас нэхэмжлэлээсээ татгалзсан нь ойлгомжгүй байгаа юм. Харин уржигдар Монголын өмгөөлөгчдийн холбоо, Г.Батбаяр өмгөөлөгч нарын хоорондох маргааны талаарх иргэний хэрэг хянан шийдвэрлэх бас нэгэн шүүх хуралдаан болж өнгөрсөн байна. Гэсэн хэдий ч хурлын шийдвэр хэрхэн яаж гарсан, хэнийх нь эрх ашиг хамгаалагдсан талаарх мэдээлэл тодорхойгүй байгаа юм.
Дашрамд дурдахад, Монголын өмгөөлөгчдийн холбоо хэмээх олон жилийн түүхтэй байгууллага нэрээ өөрчилж, МХХ-ны Өмгөөллийн хороо нэртэйгээр үйл ажиллагаа явуулж байгаа аж.
