Сүхбаатар аймгийн Түмэнцогт суманд дэгдсэн түймэр аюулын харанга дэгдээд байна. Түймрийн нөхцөл байдал ямар байгаа талаар манай сурвалжлагч М.Ууган-Эрдэнэ газар дээр нь ажиллаж байгаа юм. Түүнтэй холбогдож дараахь мэдээллийг авлаа.
Одоогоор Түмэнцогт сумын 80 гаруй хувь нь түймэрт шатжээ. Мөн 40 гаруй айлын хаваржаа, 30 орчим гэр шатсан байна. Цаг агаарын байдал таагүй, шороон шуургатай байгаагийн улмаас түймэр илүү тархаж байгаа гэнэ. Улмаар Мөнххаан сум руу түймэр орсон байна. Дээрээс Түмэнцогт сумаас зүүн урагш дахин түймэр гарчээ. Түймрийг унтраахаар онцгой байдлын албаныхан болоод орон нутгийнхан ажиллаад дийлэхгүй байгаа аж. Учир нь шороон шуурга, түймэрийн аль нь мэдэгдэхгүй битүү улаанаараа эргэлджээ.
Цагдаагийнхан түймэр тавьсан байж болзошгүй этгээдийг саатуулаад байгаа аж. Түмэнцогт сумын малчин Л-ийг сэжиглэж буй мэдээлэл байна.
Энэ тухай “Өдрийн сонин”-ы баасан гаригийн буюу маргаашийн дугаараас дэлгэрүүлэн уншаарай.
Урин дулаан цаг болж, эцэг эхчүүд бага насны хүүхдүүдээ харгалзах хүнгүйгээр хичээлд нь явуулдаг болсон нь багачууд автомашины осолд өртөх шалтгаан болж байгааг Замын цагдаагаас анхаарууллаа. Өнгөрсөн хоногт гэхэд зам тээврийн осолд хоёр хүүхэд өртсөн байна. ХУД-ийн нутаг Зайсангийн гудамж, Зайсан толгойн арын замд Х.Элентра маркийн авто машины жолооч А нь явган зорчигч 13 настай охиныг мөргөж гэмтээжээ.
Шүүхийн ерөнхий зөвлөлөөс Дээд шүүхийн Иргэний хэргийн танхимын шүүгчээр Г.Алтанчимэг, П.Золзаяаг, Захиргааны хэргийн танхимд П.Соёл-Эрдэнийг, Эрүүгийн хэргийн танхимд Ч.Хосбаяр нарыг томилуулахаар нэр дэвшүүлээд байгаа юм. Тэднийг томилох асуудлыг өнөөдөр чуулганы нэгдсэн хуралдаанаар хэлэлцлээ. Гишүүд нэр дэвшигчдээс асуулт асууж, үнэнч шударгаар ажиллахыг захиж байсан юм. Хэлэлцүүлгийн шатанд УИХ-ын гишүүн Д.Тэрбишдагва “Ч.Хосбаяр гэдэг нөхөр орж ирсэн цагаасаа эхлээд инээгээд, пээдэгнээд байгаа чинь ёс зүйтэй асуудал мөн үү. Оруулж ирж байгаа албан тушаалтнууд Монголд шударга ёсыг тогтооё гэж байгаа юм бол нэг бүрчлэн чихнээс нь чангааж, ажиллах хэрэгтэй байна. Ингэхгүй бол болохгүй байна. Шүүхийн Мэргэжлийн хорооноос хамгийн өндөр оноог н.Данзан, н.Өлзийсайхан, н.Сүнжид, н.Эрдэнбулган авсан байхад, энэ дөрвөн хүний асуудал яригдахгүй байна. Ийм байхад Шүүхийн Мэргэжлийн хороод хуралдаад яах юм. Ийм хариуцлагагүй явдал байна. Шүүгч нарын цалинг өндөр баталсан, гэтэл энэ нэр дэвшигчид дунд “Монгол Улсад хэлмэгдүүлэлтийг таслан зогсоохын төлөө шударга ажиллана гэж ярих хүн нэг ч алга” гэсэн юм.
Манай улс өнгөрсөн онд БНХАУ-д дулааны аргаар боловсруулсан үхэр, хонь, ямааны мах, махан бүтээгдэхүүн экспортлох хүсэлтээ илэрхийлсэн. Энэхүү хүсэлтийн дагуу өнгөрсөн онд БНХАУ-ын Чанарын хяналт шалгалт, хорио цээрийн ерөнхий газрын Гэрчилгээ, бүртгэлжүүлэлтийн газраас мэргэжилтнүүд ирж мах нядалгааны болон боловсруулах үйлдвэрүүдэд тандалт судалгаа, эрсдлийн үнэлгээ хийгээд буцсан юм.
Дайны ялалтын 70 жилийн ой, Москва хотын Улаан талбайд болох ялалтын баярын парадад монгол цэргийн бие бүрэлдэхүүн улсаа төлөөлөн оролцохоор болсон нь бахархууштай. Жагсаалын бэлтгэлийн ажилтай Ерөнхийлөгчийн Тамгын газрын дарга П.Цагаан, Гадаад харилцааны сайд Л.Пүрэвсүрэн болон Батлан хамгаалахын сайд Ц.Цолмон, ЗХЖШ-ын дарга, дэслэгч генерал Ж.Бямбажав нар танилцсан юм. Харин энэ үеэр буюу парадад алхаж байсан нэгэн цэргийн гутал сугарч хоцорсон талаарх зураг олон нийтийн сүлжээгээр цацагдаад байгаа. Тэгвэл энэ асуудалд Батлан хамгаалах яамнаас албан ёсны тайлбар хийжээ.
Ерөнхий сайд асан С.Баярын гадаад дахь үл хөдлөх хөрөнгийг УИХ-ын гишүүн Г.Уянга олны өмнө дэлгэж, шуугиан дэгдээсэн. Тэгвэл энэ асуудалтай холбоотой АТГ-аас Г.Уянга гишүүнийг дуудаж мэдүүлэг авчсан байна. Энэ талаар Г.Уянга гишүүн “Өчигдөр өглөө АТГ-аас ирж Ерөнхий сайд асан С.Баяртай холбоотой мэдээллийг шалгаж эхэлснийг мэдэгдээд надаас тодруулга авлаа. Миний бие golomt.org байгууллагаас ирүүлсэн дараагийн нэмэлт баримтыг гаргаж өглөө. Нью Йорк хотын Бүртгэл Мэдээллийн Агентлагийн вебсайт дээр ийм дөрвөн баримт байна.
Улаанбаатар хотын үерийн хамгаалалтын барилга байгууламжид энэ онд хийх ажлын төлөвлөгөө гарлаа. Төлөвлөгөөний дагуу Чингэлтэй дүүрэгт 8, Баянгол дүүрэг 6, Сүхбаатар дүүрэг 2, Сонгинохайрхан дүүрэг 4, Баянзүрх дүүрэгт 2 нийт 22 байршилд далан сувгийн цэвэрлэгээ хийгдэнэ. Энэ ажилд 558 сая 900 мянган төгрөг зарцуулах юм. Он гарсаар “Нийтийн үйлчилгээний Улаанбаатар нэгтгэл” Дэнжийн мянгын 2-р суваг, Чингэлтэй дүүргийн үерийн хамгаалалтын туслах сувгуудыг цэвэрлэсэн. Мөн Дэнжийн 1000-ын 1, 3-р сувгийн булгийн мөсийг ухаж, халиа үүсэхээс сэргийлэх арга хэмжээг авч,Толгойт Бөмбөгөрийн үерийн далан сувгийн халиаг багасган, мөсийг нь зөөж суваг татан тодорхой газруудад тунгаагуурын цэвэрлэгээг тогтмол хийж байна.
УИХ-ын чуулганы өнөөдрийн нэгдсэн хуралдаанаар нийтдээ найман хууль, тогтоолын төсөл хэлэлцэхээр төлөвлөжээ. Үүнээс хамгийн түрүүнд Казиногийн тухай хуулийн төсөл түүнтэй холбоотой хуулийн төслөөр санал хураахад гишүүдийн 81,2 хувь дэмжиж анхны хэлэлцүүлэгт бэлтгүүлэхээр холбогдох байнгын хороонд шилжүүллээ. Яг одоо Улсын дээд шүүхийн шүүгчид нэр дэвшигчдийг томилох тухай асуудлыг хэлэлцэж байна.