Month: April 2015

УИХ-ын чуулганы нэгдсэн хуралдаанаар Хүүхдийн эрхийн тухай конвенцийн “Мэдээлэл хүргүүлэх журмын тухай” нэмэлт протоколыг соёрхон батлах тухай хуулийн төслийг хэлэлцээд гишүүдийн 80.4 хувийн саналаар дэмжин баталлаа.

Дээрх асуудлыг хэлэлцэх шатанд гишүүд сургуулиуд гурван ээлжээр хичээллэх, зарим тохиолдолд нэг ангид 60 уулаа сууж хичээллэж байгаа нь хүүхдийн суурь эрхийг зөрчиж байна гэсэн асуудлыг хөндөж байв. Боловсрол, соёл, шинжлэх ухааны сайд Л.Гантөмөрийн тайлбараар нэг ангид 60-уулаа хичээллэсэн нь зөвхөн нийслэлийн нэгдүгээр сургууль дээр яригддаг аж. Эцэг, эхчүүд сайн сургуульд зөвхөн хүүхдээ оруулна гээд Нийслэлийн нэгдүгээр сургуульд оруулдаг. Улмаар боловсролын салбарт энэ нь хавтгайрсан юм шиг ойлгуулдаг тул эцэг, эхэд зарчмын шаардлагаа тавиад явах аж.

Харин гурван ээлжээр хичээллэдэг байдлыг 2016 оны хичээлийн шинэ жил эхлэхээс халах юм байна.

Одоо УИХ-ын чуулганы нэгдсэн хуралдаанаар Төрөөс тэтгэврийн шинэчлэлийн талаар баримтлах бодлого батлах тухай Улсын Их Хурлын тогтоолын төслийг хэлэлцэж байгаа юм.

УИХ-ын гишүүн, Өргөдлийн байнгын хорооны дарга О.Баасанхүү БНХАУ-аас Монгол Улсад суугаа Онц бөгөөд Бүрэн эрхт Элчин сайд Ван Саолуныг өнөөдөр хүлээн авч уулзлаа.

Ноён Элчин сайд Ван Саолун уулзалтын эхэнд Байнгын хорооны дарга О.Баасанхүүг цаг зав гарган хүлээн авч уулзаж буйд талархал илэрхийлээд, хоёр улсын харилцаа хамтын ажиллагаа өндөр түвшинд хүрсэн, тэр дундаа боловсролын салбарын хамтын ажиллагаа ажилттай хэрэгжиж байгааг дурдлаа. Мөн тэрээр, цаашид боловсролын салбарт хэрэгжсэн төсөл, хөтөлбөрүүдийг үргэлжлүүлж, сургуулиудын сургалтын орчин нөхцөлийг сайжруулахад анхаарлаа хандуулан ажиллана гэдгээ дуулгасан юм.

Байнгын хорооны дарга О.Баасанхүү Элчин сайд Ван Саолунтай уулзаж буйдаа талархаад, боловсролын салбарт түлхүү хамтран ажиллах саналыг дэмжиж буйгаа илэрхийлэв.

Ерөнхий сайдын дэргэдэх Эдийн засгийн зөвлөл 15.00 цагт хуралдана. Уг хуралд Ерөнхий сайд Ч.Сайханбилэг оролцоно. Тус зөвлөл өнөөдрийн хурлаараа эдийн засгийн чиглэлийн цаг үеийн асуудлыг хэлэлцэхээс гадна Татварын өршөөлийн хуулийн талаар ярилцах юм байна.

Гэр бүлийн хүчирхийлэлтэй тэмцэх тухай хуулийн төслийг саяхан УИХ-д өргөн барьсан. Тэгвэл УИХ-ын эмэгтэй гишүүд энэ хуулийг батлуулахын төлөө дэмжиж ажиллана гэдгээ мэдэгдлээ.

Төрийн ордонд болсон хэвлэлийн бага хурлын үеэр эмэгтэй гишүүдийн хэлсэн үгийг хүргэе. УИХ-ын гишүүн Л.Эрдэнэчимэг: Манай улс Гэр бүлийн хүчирхийлэлтэй тэмцэх хуультай болоод арав гаруй жил болж байна. Гэтэл өнгөрсөн хугацаанд гэр бүлийн хүчирхийлэл улам нэмэгдэх хандлагатай байна. Сүүлийн гурван жилийн хугацаанд гэр бүлийн хүчирхийллээс болж 62 хүн амь насаа алдсан. Монгол Улсын Ерөнхийлөгчийн зүгээс Гэр бүлийн хүчирхийлэлтэй тэмцэх тухай хуулийн төслийг өргөн бариад байна. УИХ дахь эмэгтэй гишүүдийн бүлэг тус хуулийг байнгын хороогоор хэлэлцүүлэх, УИХ-аар батлуулах үүргийг хүлээж байгаа. Өнөөдрийн мөрдөгдөж байгаа хуулиар гэртээ агсам согтуу тавьсан тохиолдолд цагдаа эрүүлжүүлэхэд өгдөг, маргааш нь хохирогч өөрийнхөө мөнгөөр хүчирхийлэл үйлдсэн хүнээ авдаг. Өөрөөр хэлбэл, хохирогч дахин, дахин хохирсоор байгаа юм. Хохирогч гомдол гаргаад шүүхэд хандахад гэмтлийн зэргийг тогтоодог. Ингээд хөнгөн зэргийн гэмтэлтэй байвал ихэвчлэн эвлэрлээр шийддэг. Тиймээс гэр бүлийн хүчирхийллийн эсрэг чамбай хууль шаардлагатай байна.

УИХ-ын гишүүн Д.Сарангэрэл: Гэр бүлийн хүчирхийлэлтэй тэмцэх хуулийн төслийг хаврын чуулганаар хэлэлцэх хүсэлтийг УИХ-ын даргад хүсэлт тавьхад зөвшөөрсөн. Нэгдүгээрт, гэр бүлийн хүчирхийлэлд өртөж байгаа хохирогч заавал өөрөө гомдол гаргах биш, түүний дотны хамаатан садан, найз нөхөд гаргаж болох заалтыг тусгах нь зүйтэй гэж үзэж байгаа. Эмэгтэй хүн нөхөр, найз залуугийнхаа хүчирхийлэлд өртөж байгаа хэрнээ, гомдол гаргахад хойрго ханддаг. Хоёрдугаарт, гэр бүлийн хүчирхийлэл болж байгааг айл хөршийнх нь заавал мэдээлдэг байх заалтыг хуульд тусгах ёстой гэж үзсэн

Энэ заалтыг хуулийн төсөлд суулгаж өгсөнд их талархалтай байна. Хамгийн сүүлд дөрвөн настай охин төрсөн аав, хойд ээждээ зодуулан аврал эрж байхад хөршийнх нь мэдэж байсан хэрнээ мэдээллээгүй. Бид Гэр бүлийн хүчирхийлэлтэй тэмцэх хуулийг нэг тал руу нь авч давхихгүй. Хүүхдээ буруу зүрүү зүйл хийсний төлөө алгадасны төлөө хүчирхийлэл үйлдлээ гэж үзэх заалт орохгүй. Хайр нь дотроо хал нь гаднаа байдаг аавуудын талаар ярихгүй.

УИХ-ын гишүүн З.Баянсэлэнгэ: Өмнө нь хүний бие махбодид ноцтой гэмтэл учруулж, амь нас нь хохироогүй бол гэр бүлийн хүрээний асуудлыг дандаа иргэний журмаар шийддэг байсан. УИХ-д өргөн мэдүүлсэн Гэр бүлийн хүчирхийлэлтэй тэмцэх тухай хуулийн төсөлд хариуцлагын асуудал гурван хуулиар зохицуулагдана. Удаа дараа байнга хүчирхийлэл үйлдсэн бол эрүүгийн хуулиар, хүчирхийлэл үйлдэгдэж байгааг мэдсээр байж мэдээлээгүй бол зөрчлийн тухай хуулиар, хөнгөн буюу нөлөөллийн, урьдчилан сэргийлэх арга хэмжээ авахаар зохицуулсан. Одоо хүчин төгөлдөр мөрдөгдөж байгаа Гэр бүлийн хүчирхийлэлтэй тэмцэх тухай хуульд процессын ажиллагааг тодорхой тусгаагүй, хууль хоорондын уялдаа холбоог хангаагүйгээс хүний амь насанд хохирох хэмжэнд хүндэрч байна.

УИХ-ын гишүүн Ц.Оюунгэрэл: Гэр бүлийн хүчирхийлэл гэх чөтгөрийн тойргоос эхлээд гарах ёстой. Энэ чөтгөрийн тойргийг таслан зогсоох эхлэл нь хүчирхийллийг үл тэвчих соёл. Хүчирхийллийг үл тэвчинэ гэдэг нь гэр бүлийн хүрээнээс хальж, нийгэм тэр чигээрээ үл тэвчих соёлд суралцахыг хэлж байгаа юм. Бид ардчилсан Үндсэн хууль баталснаас хойш 25 жил хүчирхийлэл бол гэмт хэрэг биш гэж үзэн тэвчиж ирсэн байна л даа.Тэгэхээр гэр бүлийн хүчирхийллийг тэвчсэн, хүлээн зөвшөөрсөн энэ эрхзүйн орчноо яаралтай сольж, хүчирхийлэл бол гэмт хэрэг юм гэдэг нэг мөр ойлголттой болох ёстой. Хүчирхийллийн асуудалд эрүүгийн хэргийг авч хэлэлцдэг шиг хариуцлагатай хандах ёстой. Цагдаа, шүүгч, нийгмийн ажилтан гээд төрийн албан хаагчид хүртэл хүчирхийллийг байж болох, тэвчиж болох мэтээр хандаж ирсэн. Тиймээс хуулиар илүү хүчтэй болгох шаардлагын үндсэн дээр хуулийн төслийг УИХ-д хэлэлцүүлэн батлуулахаар зорьж байна. Анхнаасаа хүчирхийллийг үл тэвчих үзэл дээр суурилж боловсруулагдсан хууль. Нэг өдөр, нэг цаг ч болов хүчирхийллийг үл тэвчихийг уриалж байна.

Монгол Улсын Ерөнхийлөгч Ц.Элбэгдоржийн урилгаар Унгар Улсын Ерөнхийлөгч Эрхэмсэг ноён Янош Адер гэргий Анита Херцегийн хамт Монгол Улсад 4 дүгээр сарын 14-16-ны өдрүүдэд албан ёсны айлчлал хийв. Унгарын Ерөнхийлөгчийн айлчлал өнөөдөр өндөрлөж эх орондоо буцлаа. Эрхэм зочныг “Чингис хаан” олон улсын нисэх онгоцны буудалд Монгол Улсын Гадаад хэргийн сайд Л.Пүрэвсүрэн, Монгол Улсаас Унгар Улсад суугаа Онц бөгөөд Бүрэн эрхт Элчин сайд Т.Ганди, албаны бусад хүмүүс үдэж мордуулав.

Энэхүү айлчлал нь Монгол Улс, Унгар Улсын хооронд дипломат харилцаа тогтоосны 65 жилийн ойн хүрээнд хэрэгжиж буйгаараа онцлог болсон юм. Уг айлчлал ихээхэн үр дүнтэй болсныг Монголын тал онцолж байгаа юм. Тухайлбал, Унгарын Ерөнхийлөгчийн албан ёсны айлчлалын үеэр Монгол Улсын Боловсрол, соёл, шинжлэх ухааны яам, Унгар Улсын Боловсон хүчний яам хооронд боловсрол, соёл, шинжлэх ухааны салбарт 2015-2017 онд хамтран ажиллах хөтөлбөрт гарын үсэг зурлаа. Ингэснээр Унгарын Засгийн газрын тэтгэлгээр жил бүр Монголын 100 хүртэл оюутан тус улсад суралцах боломж нээгдэж байгаа юм.

Унгарын тал Монгол Улстай байгаль орчин, ус цэвэршүүлэх, мод тариалах, мал аж ахуй зэрэг салбарт хамтран ажиллахаа илэрхийллээ. Мөн Сонгино дахь Биокомбинатыг иж бүрэн шинэчлэн Монголын малыг эрүүлжүүлэх эм, бэлдмэл үйлдвэрлэх боломж, нөхцөлийг сайжруулж, био мах, хүнсний бүтээгдэхүүнийг Ази, Европын зах зээлд нийлүүлэх өргөн боломж байгаа гэв. Ингэснээр Унгар Улс Европ дахь Монголын ложистикийн төв байж болно гэлээ.

Мөн ирэх тавдугаар сард Унгарын тал Улаанбаатарт ЭСЯ-аа сэргээн байгуулахаар боллоо.

Айлчлалын үеэр Унгар Улсын Ерөнхийлөгч Янош Адер Монгол Улсын Ерөнхийлөгч Ц.Элбэгдоржтой уулзаж, албан ёсны хэлэлцээ хийв. Мөн Монгол Улсын Их Хурлын дарга З.Энхболд, Ерөнхий сайд Ч.Сайханбилэг нартай тус тус уулзсан юм.