Month: April 2015

-БЕРНХАРД ЛОЙ: НИЙГМИЙН ХАРИУЦЛАГАА ӨНДӨР ТҮВШИНД ХЭРЭГЖҮҮЛЭХ НЬ КОМПАНИЙН СОЁЛЫН ЧУХАЛ ХЭСЭГ БАЙДАГ-

Германы “Денкфарм” компани анагаахын их, дээд сургуулийн оюутнуудын дунд хоёр дахь жилдээ зарласан тэтгэлэгт хөтөлбөрийнхөө шалгаруулалтыг энэ сарын 14-ний хийж шалгарсан оюутнуудад тэтгэлэг гардууллаа. Анагаахын их, дээд сургуулийн дөрвөөс дээш курсад суралцдаг, 3.2 хувиас голч дүнтэй, нийгмийн идэвхитэй шилдэг оюутнууд тэтгэлэгт хөтөлбөрт оролцсон бөгөөд “Сошиал медиаг ашиглан иргэдийн эрүүл мэндийн боловсролыг хэрхэн сайжруулах вэ” сэдвээр эсээ бичиж өрсөлджээ. Тэтгэлэг гардуулах ёслолын үеэр “Денкфарм” компанийн удирдлагууд “Дэлхийн 80 гаруй оронд бүтээгдэхүүн үйлчилгээгээ экспортолж байгаа манай компаний хувьд нийгмийн хариуцлагаа өндөр түвшинд хэрэгжүүлэх нь компаний соёлын чухал хэсэг байдаг. Ийм ч учраас хэд хэдэн оронд боловсрол болон эрүүл мэндийг дэмжих төсөл хөтөлбөрийг хэрэгжүүлээд байна. Хэд хэдэн улс оронд бага боловсролыг дэмжих хүрээнд сургуулийн төслүүд дээр дэмждэг үзүүлж ажиллаж байгаа. Харин Монгол Улсад энэхүү тэтгэлэгт хөтөлбөрийг хоёр дахь жилдээ амжилттай зохион байгуулж байна. Эрүүл мэндийн салбарт ажиллаж байгаа эмч, мэргэжилтнүүдийн судалгаа хийх боломж олгох, мэдлэг чадвараа сайжруулах, өвчтөнүүдэд үзүүлж буй үйлчилгээг сайжруулахад дэм болох зорилгоор тэтгэлэг зарласан. Мөн ирээдүйн эмч нарыг чанаржуулах, урам өгөх үүднээс оюутнуудын дунд тэтгэлэг зарладаг. Энэ удаагийн тэтгэлэгт хөтөлбөрт ирүүлсэн бүтээлүүдээс шилдэгүүдийг шалгаруулна гэдэг үнэхээр хүнд ажил байлаа. Оролцсон оюутнууд болон эмч нарын бүтээл гайхалтай байсан гэдгийг тэмдэглэн хэлмээр байна” гэв.

Сургалтын төлбөрийн тэтгэлэг гардуулах ёслолд “Денк фарм” компанийн удирдлагууд, Анагаахын шинжлэх ухааны үндэсний их сургуулийн удирдлагууд болон хөтөлбөрт эсээгээ явуулсан оюутнууд оролцсон юм. Тус компанийн Зүүн Европ болон Азийн бүс хариуцсан захирал Бернард Лой “Денкфарм” компани 1948 онд байгуулагдсан, Германы эм үйлдвэрлэгчдийн анхдагчдын нэг. Одоогоор 80 гаруй улс оронд бүтээгдэхүүнээ экспортолж байгаа бөгөөд Монгол Улсад 15 дахь жилдээ үйл ажиллагаа явуулж байна. Манай компаний хамт олон эрүүл мэндэд чанарыг чухалчилдаг. Чанар гэдэг ойлголтод зөвхөн бүтээгдэхүүний чанар орохгүй. Эрүүл мэндийн салбарт чанартай бүтээгдэхүүнээс гадна чанартай боловсон хүчин шаардлагатай. Ингэж байж чанартай эрүүл мэнд бүрдэнэ. Тиймээс бид чанартай бүтээгдэхүүн, үйлчилгээгээ улс орнуудад түгээхээс гадна нийгмийн хариуцлагыг өндөр түвшинд хэрэгжүүлэхийг зорьдог. Энэ жил бид Монгол улсын хэмжээнд Улаанбаатар хот болон орон нутгийн эмч нарыг дэмжиж дөрвөн эмчид тэтгэлэг гардуулсан бол энэ удаад шилдэг оюутнуудад сургалтын төлбөрийн тэтгэлэг гардуулж байна. Тодруулбал, цахим ертөнцөд нийгмийн эрүүл мэндийг сайжруулах талаар санаачилгатай ажиллаж, иргэдэд мэргэжлийн зөвлөгөө өгдөг идэвхитэй оюутнуудыг дэмжлээ. Шалгарсан оюутнууд маш сайн суралцахын хажуугаар эмнэлэгт дадлагажигч эмчээр ажиллаж практик мэдлэгээ сайжруулж байгаа нь сайшаалтай байна. Хөтөлбөрөө уламжлал болгон аль болох олон хүнийг хамруулахыг зорьж байгаа” гэсэн юм.

“ЦАХИМААР ЭРҮҮЛ МЭНДИЙН БОЛОВСРОЛ ОЛГОХОД АНХААРНА”

Тэтгэлэг гардсан оюутнууд бүгд ингэж ярьсан юм. Эрүүл мэндийн салбарын эмч, оюутнууд цахим ертөнцөөр иргэдтэй холбоотой байж эрүүл мэндийн боловсрол олгож, мэргэжлийн зөвлөгөө өгөхийн давуу талыг эсээндээ онцолжээ.

Тэтгэлэгт хөтөлбөрт шалгарч сургалтын төлбөрөөр шагнуулсан Анагаахын шинжлэх ухааны үндэсний их сургуулийн Био анагаах, судлаачийн 401 дүгээр хэсгийн оюутан Б.Солонго “Би молекул биологийн чиглэлээр нарийн мэргэжил эзэмших сонирхолтой. Бүх өвчлөлийн үндэс суурийг нь судалдаг учраас энэ чиглэлээр мэргэших зорилго тавьсан. Эмч нар өвчтөнүүдтэйгээ эргэх холбоотой байх ёстой гэдэг санааг эсээндээ онцолсон. Ижил өвчтэй хүмүүс хоорондоо сошиал медиагаар холбогдож үзэл бодлоо хуваалцдаг, эмчтэйгээ ярилцдаг байвал сэтгэл санааны хувьд ч, эдгэрэлтийн хувьд ч давуу талтай. Бүх эмнэлэг вэб сайт, facebook-т өөрийн хуудсаараа үйлчлүүлэгчтэйгээ холбогдож, харилцдаг байхыг санал болгосон. Жишээлбэл, БЗХӨ-өөр өсвөр үеийнхэн, залуучууд их өвчилж байна. Тэд эмнэлэгт очихоосоо эмээдэг, болгоомжилдог. Ийм тохиолдолд эхний ээлжинд эмч нартайгаа цахимаар холбогдож өвчнийхөө шинж чанарыг тайлбарлаж холбоо тогтоож эхэлбэл харилцахад дөхөмтэй гэдэг саналыг гаргасан. Энэ саналыг минь дэмжиж сургалтын тэтгэлэг олгосон “Денкфарм” компанийн хамт олонд баярлалаа” гэлээ. Мөн Анагаахын шинжлэх ухааны үндэсний их сургуулийн 540 дүгээр хэсгийн оюутан Э.Ринчиндорж “Би өнгөрсөн жилээс эхлэн тэтгэлэгт хөтөлбөрт оролцож байгаа. Монголын анагаахын их, дээд сургуулийн оюунуудын боловсролыг дэмжсэн том хөтөлбөр хэрэгжүүлж байгаа Денкфарм компанийн хамт олонд баярлалаа. Сошиал медиагаар иргэдэд эрүүл мэндийн боловсрол түгээхдээ хэрхэн аюулгүй, үр бүтээлтэй байх вэ гэдгийг эсээндээ онцолсон. Олон улсын туршлагыг судалж өөрийнхөө улстай харьцуулж бичсэн нь давуу тал болсон. Цахим ертөнц олон хүнд, хурдан хугацаанд түгдэг. Тиймээс бага зардлаар чанартай мэдээллийг хүргэх шаардлагатай. Нотолгоонд суурилаагүй мэдээлэл түгээвэл эрсдэл учрах аюултай. Тиймээс мэргэжлийн байгууллагуудаар хянагдсан, баталгаатай мэдээллийг түгээх нь чухал гэдэг саналыг дэвшүүлсэн” гэж ярилаа.

Нүүр ам судлалын сургуулийн дөрөвдүгээр курсын оюутан А.Даваасүрэн “Мэдээллийн хурдыг эрүүл мэндийн салбарт ашиглахгүйгээр энэ салбар хөгжихгүй. Түгээмэл өвчний талаарх мэдээлэл, урьдчилан сэргийлэх арга, өвчилсөн бол баримтлах дэглэм гээд мэдээллийг цахим ертөнцөөр олон хүнд түгээж байж урьдчилан сэргийлэх, өвчлөл буурах боломжтой. Би өөрөө шүдний эмч болно. Тиймээс “Эрүү нүүрний мэс заслын клуб” нэртэй facebook хаягаар иргэдэд зөвлөгөө өгдөг. Мөн өөрийн гэсэн блогтой. Эрүүл мэндийн салбарт ажилладаг хүмүүс энэ байдлаар иргэдтэй холбоотой байгаасай гэж хүсч байна” гэлээ. Мөн Анагаахын шинжлэх ухааны их сургуулийн Нүүр ам судлалын тавдугаар курсын оюутан Э.Отгонбилэг ч ийм саналыг эсээндээ чухалчилжээ.

Сургалтын тэтгэлэг гардсан дөрвөн оюутнаас гадна найман оюутан “Денкфрам” компанийн тусгай шагнал хүртсэн юм. Оюутнуудын санаачилгыг амьдралд хэрэгжүүлэх талаар хамтран ажиллахад бэлэн гэдгээ “Денкфарм” компанийнхан онцоллоо.

Ц.ӨРНӨХ