Month: February 2015

МАХН-ын дарга Н.Энхбаяр эцэг эх, элгэн садантайгаа золгохоор эх орондоо ирсэн гэнэ. Тэрбээр өнөөдөр намынхаа гишүүд дэмжигчид болон ахмадуудаа хүлээн авч золголоо.
МАХН-ын золголтын үеэр Н.Энхбаяр “XVII жарны модон хонь жил сайхан гарч байна. Эх орондоо ирж элгэн садан, ахмад настнууд, гишүүд дэмжигчид та бүхэнтэйгээ хамт сар шинийн баяраа тэмдэглэж байгаадаа баяртай байна. Бид хонь жилдээ зорилгодоо хүрч эв эеэр бүхнийг шийдэж, сайн сайхан бүхнийг цогцлоохын ерөөлийг дэвшүүлье” гэжээ.

Золголтод ирсэн ахмад настнууд ерөөлийн үгээ хэлж, МАХН-ын дарга, Монгол Улсын гурав дахь Ерөнхийлөгч Н.Энхбаярыг эх орондоо ирсэнд баяртай буйгаа илэрхийлжээ.
Золголтын үеэр Монгол Улсын сайд, МҮАН-ын дарга М.Энхсайхан намын удирдлагуудын хамтаар ирж Н.Энхбаяртай золгон хүндэтгэл үзүүлсэн юм.

МАХН-ын удирдлагууд мөн “Шударга ёсны төлөө” хүндэт тэмдэгээр намын гишүүдээ шагнасан байна.

Монголын нэрт хөгжмийн зохиолч, Ардын жүжигчин, Төрийн соёрхолт С.Гончигсумлаагийн мэндэлсний 100 жилийн ой энэ онд тохиож буй. Түүхт ойд зориулж хүндэтгэлийн концерт, эрдэм шинжилгээний хурал, фото үзэсгэлэн зэрэг олон арга хэмжээ зохион байгуулагдах ажээ.

Эрдэм шинжилгээний хурал, фото үзэсгэлэн нь маргааш 11:00 цагт ХБК-ийн концертын “А” танхимд болох бол хүндэтгэлийн концерт 25-ны 18:00 цагт Дуурь бүжгийн эрдмийн театрт болно. Ийнхүү их хүмүүний түүхт ойг түүний нэрэмжит “Хөгжим бүжгийн коллеж”-ын хамт олон зохион байгуулж байгаа бөгөөд тус сургуулиас төрөн гарсан хэн бүхнийг түүхт ойн арга хэмжээнд хүрэлцэн ирэхийг урьж байна лээ.

Өнөөдөр ОХУ-ын “Эх орноо хамгаалагчдын өдөр” тохиож байна. Энэхүү хүндэтгэлийн өдрийг тохиолдуулан Батлан хамгаалахын сайд Ц.Цолмон, дэд сайд А.Баттөр болон Батлан хамгаалах яамны Төрийн нарийн бичгийн дарга, хошууч генерал З.Болдбаатар, ЗХЖШ-ын дарга, дэслэгч генерал Ц.Бямбажав тэргүүтэй Монгол Улсын Батлан хамгаалах яам, Зэвсэгт Хүчний Жанжин Штабын албан хаагчид ЗХУ-ын дөрвөн удаагийн баатар, БНМАУ-ын баатар Г.К.Жуковын хөшөөнд цэцэг өргөж, хүндэтгэл үзүүллээ. Оросын талаас ОХУ-аас Монгол Улсад суугаа Онц бөгөөд Бүрэн эрхт Элчин сайд И.К.Азизов тэргүүтэй төлөөлөгчид хүндэтгэл үзүүлсэн.

Батлан хамгаалахын сайд Ц.Цолмон өнө удаан жилийн ах дүүгийн найрамдалт харилцаатай явж ирсэн Оросын ард түмэнд хүндэтгэл үзүүлэхийн зэрэгцээ эх орныхоо төлөө үнэнчээр зүтгэж ирсэн үе үеийн цэрэг дайчид, зэвсэгт хүчнийхэнд энэхүү аугаа өдрийн мэнд хүргэж байгаагаа ноён Элчин сайдаар дамжуулан уламжиллаа. ОХУ-ын Элчин сайд И.К.Азизов энэхүү хүндэтгэлийн арга хэмжээнд сэтгэл хангалуун байгаагаа илэрхийлж, хоёр орны найрсаг хамтын ажиллагаа үеийн үед бэхжин хөгжсөөр байна гэдэгт итгэлтэй байна гэсэн юм. Дашрамд дурдахад, 1918 онд Герман Зөвлөлт Орос улс руу довтолсон үед Псков, Нарвагийн дэргэдэх тулалдаанд байгуулсан ялалтыг мөнхлөн, жил бүрийн 02 дугаар сарын 23-ны өдрийг “Улаан армийн ялалтын баяр” болгон тэмдэглэж байсан бөгөөд 1991 оноос эхлэн “Эх орноо хамгаалагчдын өдөр” болгон, уламжлан тэмдэглэж иржээ. Энэхүү өдрийг Монголын ард түмэн, Зэвсэгт хүчин, Монгол улсад суугаа ОХУ-ын элчин сайдын яам болон оросын байгууллагуудтай хамтран тэмдэглэдэг уламжлалтай.

Сар шинийн баярын үеэр Мэргэжлийн хяналтын ерөнхий газраас улсын хэмжээнд хариуцлагатай жижүүр ажиллуулан, нийслэл, орон нутгийн мэргэжлийн хяналтын байгууллагуудаас тогтмол хугацаанд мэдээлэл авч, удирдлагуудыг тухай бүрт мэдээллээр хангаж ажилласан гэв.

Хоёрдугаар сарын 18-ны өдрийн 15 цагаас 23-ны өдрийн 09 цаг хүртэл нийт 556 улсын байцаагч, дотоод ажилтан, шинжээч, жолооч бэлэн байдалд ажиллав. Энэ хугацаанд нийтийг хамарсан хоолны хордлого, хордлогот халдвар гараагүй, тайван шинэлжээ.

Мөн НЗДТГ, Нийслэлийн Шуурхай алба, ОБЕГ, ХӨСҮТ зэрэг газруудтай байнгын холбоотой байж, цаг үеийн мэдээлэл солилцон хамтран ажилласан. Нийслэл болон зарим аймагт гал түймэр гарсныг тухай бүр унтраасан, цаг агаар муудсанаас орон нутгийн зарим зам хаагдаж, хөдөлгөөний хязгаарлалт, хорио тогтоосон бөгөөд иргэдээс даралт ихэссэн, ханиад томуу туссан гэсэн дуудлагууд холбогдох газруудад ирсэн байна.

Нийслэлийн 52 байршилд иргэдэд гэр бүлийн хэрэгцээний зориулалтаар 15309 га газарт цахим системээр газар өмчлүүлэхээр болсон. Уг тогтоолын дагуу цахим системээр газар өмчлүүлэх хоёрдугаар ээлжийн бүртгэл 2015 оны 01 дүгээр сарын 26-ны өдрөөс 02 дугаар сарын 09-ний өдрийн хооронд явагдаж дууссан гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Цахим системээр газар өмчилж авахаар сонгогдсон иргэд хоёрдугаар сарын 11-ний өдрөөс эхлэн ажлын 10 хоногт багтаан харъяа дүүргийн Өмч, газрын харилцааны албанд хандаж газар өмчлөх өргөдлөө баталгаажуулж байгаа бөгөөд энэ сарын 26-ны өдөр дуусна. Баянзүрх дүүрэгт газар өмчлөхөөр сонгогдсон иргэд Баянзүрх дүүргийн өмч газрын харилцааны албанд, Сонгинохайрхан дүүрэгт сонгогдсон иргэд Орчлон хорооллын урд 27 дугаар хорооны байранд, Багануур, Багахангай дүүрэгт сонгогдсон Улаанбаатар хотод оршин суудаг иргэд Хан-Уул дүүргийн соёлын төв ордонд очиж өргөдлөө баталгаажуулах юм.
Мөн зарлагдсан 5 байршлын нэгж талбар бүхий эргэлтийн цэг тэмдэг газарт бэхлэх, акт үйлдэн баталгаажуулах ажлыг хийж гүйцэтгэх компаниудыг сонгон шалгаруулсан.
Баянзүрх дүүргийн 20 дугаар хороо Их цуурай, Бага цуурайн ам байршилд “Блюжей ланд” ХХК, Сонгинохайрхан дүүргийн эмээлт уулын баруун хоолойн байршилд “Геоцацраг” ХХК, Багануур дүүргийн тариан булаг 2 дугаар байршилд “Эрдэнэ сүрвэй” ХХК, Багахангай дүүргийн 2 дугаар хороо Хангайн хөндий байршилд “Онч сөрвэй” ХХК ажил гүйцэтгэх аж.

Нийслэлийн Баянзүрх дүүргийн гуравдугаар төрөх эмнэлэгийн шинэ барилга удахгүй нээлтээ хийх гэж байна. Энэхүү төрөх эмнэлэг нь 2011 оноос баригдаж эхэлсэн. Одоогоор барилгын гүйцэтгэл 100 хувь дууссан бөгөөд Баянзүрх дүүргийн эмэгтэйчүүд сайн дурын үндсэн дээр ээлжлэн цэвэрлэгээ хийж байгаа аж. Улсын Их Хурлын гишүүн Д.Арвин тус төрөх эмнэлгийг хүлээлгэн өгөхийн өмнөх их цэвэрлэгээний ажилд өнөөдөр биечлэн оролцлоо.

Өнөөдөр л гэхэд тус дүүргийн 110 гаруй эмэгтэй цэвэрлэгээ хийхээр ирээд байгааг энэ үеэр дуулгасан юм. Төрөх эмнэлэгийн шинэ байр 3 дугаар сарын 8-ны өдөр нээлтээ хийх бөгөөд энэхүү шинэ төрөх эмнэлэг нь зөвхөн Баянзүрх дүүрэгт харьяалагдаад зогсохгүй улсын хэмжээнд үйл ажиллагаа явуулдаг манай улсын томоохон эмнэлэгийн нэг болох ёстой гэдгийг Улсын Их Хурлын гишүүн Д.Арвин энэ үеэр онцолсон юм.

Хуучин 3 дугаар төрөх эмнэлгийн суурин дээр сүндэрлэн боссон эмнэлгийн барилгын гүйцэтгэлийг “Цамхаг” констракшн хийж байна. Тус төрөх эмнэлэг нь 150 эх хүлээн авах хүчин чадалтайн зэрэгцээ ачаалал ихтэй үед 250 ор тавих боломжийг бүрдүүлж, хамгийн сүүлийн үеийн тоног, төхөөрөмжийг суурилуулсан байна.

Түүнчлэн долоон давхар барилга нь зоорийн болон техникийн давхартайгаас гадна 200 гаруй авто машин зогсох талбай, явган хүний зам бүхий тохижилт хийжээ хэмээн Улсын Их Хурлын Тамгын газрын Хэвлэл мэдээлэл олон нийттэй харилцах хэлтэс мэдээлэв.