Аргын тооллын нэгдүгээр сарын 6. Ангараг гариг. Билгийн тооллын 16. Найралт эх одтой, хар морь өдөр. Өдрийн наран 08.40 цагт мандан, 17.10 цагт жаргана. Тухайн өдөр бар, нохой жилтнээ аливаа үйлийг хийхэд эерэг сайн ба бич, тахиа жилтнээ сөрөг муу нөлөөтэй тул элдэв үйлд хянамгай хандаж биеэ энхрийлүүштэй. Эл өдөр худалдаа арилжаа хийх, шинэ ажил эхлэх, хүү сангийн эх хатгах, эд агуурс авах, зээл авах, арвижуулах, дэлгэрүүлэх үйлийг эхлэх, тангараг тавих, гэр байшингийн суурь тавихад сайн. Гэр бүрэх, хэрүүл тэмцэл хийх, улай гаргах, хиншүү хярвас гаргахад муу.
Өдрийн сайн цаг нь хулгана, үхэр, туулай, морь, бич, тахиа болой. Хол газар яваар одогсод хойш мөрөө гаргавал зохистой. Бага хүйтэн болох улирал 00.56 цагт эхэлнэ. Модон хохимой өдөр.
БНАСАУ-ын удирдагч Ким Чен Уны төрсөн дүү Ким Ён Жун Зул сарын баяраар хуримаа хийсэн тухай “Yonhapnews.co.kr” мэдээлжээ. Тэрээр “Хөдөлмөрийн нам”-ын орлогч дарга, Ардын армийн нарийн бичгийн дарга Чүэ Рион Хэгийн хоёр дахь хүү Чүэ Сонтой гэрлэсэн аж. Ким Чен Ун Засгийн эрхийг авсныхаа дараа дүүгээ Чүэ Рион Хэгийн хүүтэй танилцуулжээ.
Нийслэлийн Чингэлтэй дүүргийн 3 дугаар хорооны Мандухай зочид буудлын дэргэд 20 дугаар байрны дээврээс хүн үсрэх гээд байна өчигдөр шөнө онцгойгийнхонд иржээ. Дуудлагын дагуу Нийслэлийн Онцгой байдлын газрын Аврах ангийн албан хаагчид ажиллаж, иргэн Г.Ариунболд /46 нас, эр/ 5 дугаар давхрын дээвэр дээр байхад нь аюулгүй буулган тус дүүргийн Цагдаагийн 1 дүгээр хэлтсийн жижүүрийн бүрэлдэхүүнд хүлээлгэн өгсөн байна. 
Латин Америкийн алдарт дуучин Рикки Мартин үүрийн 04 цагт BMW маркийн автомашинаараа хурд хэтрүүлэн давхиж замын хашлага мөргөжээ. Түүний улмаас машинаасаа шидэгдэн нас барсан талаар Сан Диеэго хотын цагдаагийн газраас мэдээлсэн байна. Гэрчүүдийн мэдээлэхдээ “BMW маркийн машин гэнэтхэн эгнээ солин галзуу мэт хурдтай давхин ирж хашлага мөргөх үед дотроос нь хүн шидэгдсэн. Машинууд зогсож шидэгдсэн хүн дээр очиход тэр маш их цус алдаж, амьсгал хураасан байсан. Удалгүй машинаас гал гарч эхэлсэн” гэжээ. Ослын үеэр гурван хүн хөнгөн гэмтэл авсан байна. Одоогоор шинжээчид ослын шалтгааныг тогтоохоор ажиллаж байгаа аж. Рикки Мартин долоо хоногийн өмнө худалдан авсан шинэхэн машинтайгаа явжээ. 
Өнөөдрөөс дэд дарга, дарга нарын зөвлөхүүд ажилгүй болж байна. Энэ оны төсвийн тухай хуульд хотын даргаас эхлээд агентлаг, аймаг, сумын дарга нарын орлогч, орон тооны бус зөвлөхүүдийг цомхотгохоор заасан. Төсөвт байгууллагын дэд дарга, орлогч дарга, зөвлөхийн орон тоог нийт 345 хүнээр цомхотгож, урсгал зардлыг 2,960.4 сая төгрөгөөр бууруулахаар хуульчилсан юм. Ингэхдээ аймаг, сум, дүүргийн Засаг дарга нэг орлогчтой, Нийслэлийн Засаг дарга хоёр орлогчтой, орон тооны зөвлөхгүй байх юм.
Төв аймгийн Алтанбулаг сумын 2 дугаар багийн нутаг Дунд Хавтгайн энгэр гэдэг газарт энэ сарын 3-ны өдөр малчин С-ийн нохой 3 хүн рүү дайрч гэмтээжээ. Гэмтсэн гурван хүн Төв аймгийн эмнэлэгт боолт хийлгэн вакцин тариулсан байна. Нохойд хазуулсан И 36 настай эрэгтэй, А 20 настай эмэгтэй, С 35 настай эмэгтэй нарын бие одоогоор гайгүй байна. Нохойг устгаж, шинжилгээнд дээж авсан, хариу гараагүй байна.
АН-ын Ерөнхий нарийн бичгийн дарга Ц.Оюундарь МҮОНРТ-ийн Ерөнхий захирлаар томилогдсон. Тэрбээр томилогдсоныхоо дараа “Энэ байгууллага бол миний мэргэжлийн хувьд өсөж торнисон газар. Өнгөрсөн хоёр гаруй жилийн хугацаанд хөндлөнгөөс харж байхад энэ байгууллагыг орхиод явж болохгүй юм байна гэсэн хувь хүний дотоод сэтгэлийн дуудлага байсан. Нөгөө талаас 2015 оны төсөвт УИХ-ын гишүүд энэ байгууллагын төсвийг шууд 50 хувь хассан нь эдийн засгийн хувьд хүнд байдалд оруулж байгаа юм.
Дэлхийн эрүүл мэндийн байгууллагын хамгийн сүүлийн мэдээгээр дэлхийн 9 улсад эбола вируст халдвараар 19560 хүн өвчилж, 7637(39%) хүн нас барсан байна. Нийт 666 эрүүл мэндийн ажилтан өвчилж, 56% (366) нь нас барсан нь өмнөх мэдээллээс хойш 17 хүнээр нэмэгджээ.