“Mongolian Mining Corporation”-ий охин компани болох “Energy Resources” нь “MCS International”-тэй хамтран Ухаахудагийн цахилгаан станцын төсөлд ажиллах 86.3 тэрбум төгрөг (45.8 орчим сая ам.доллар)-ийн гэрээ байгуулсан талаар Хонконгийн хөрөнгийн бирж мэдээллээ. Гэрээний дагуу “MCS International” нь 18 МВт-ын хүчин чадалтай Ухаахудагийн цахилгаан станцын эрчим хүч түгээх болон халаалтын тоног төхөөрөмж, дизель хөдөлгүүрийн ашиглалт, засвар үйлчилгээг энэ сарын 1-нээс 2017 оныг дуустал гүйцэтгэх бөгөөд цахилгаан, дулааныг эцсийн хэрэглэгчдэд хүргэх ажлыг хариуцах юм байна. “Energy Resources” компани дээрх төлбөрийг гурав хуваан төлөх гэнэ. “MCS International” нь Ухаахудагийн цахилгаан станцын ашиглалт, үйлчилгээний ажлыг 2011 оны тавдугаар сараас өнгөрсөн жилийг дуустал гүйцэтгэсэн бөгөөд өмнөх 2014 оны 8-р сард болсон шалгаруулалтад оролцон дахин сонгогдсон юм байна.
“Energy Resources” компанийн захиалгаар барьсан Ухаахудагийн цахилгаан станцын ерөнхий гүйцэтгэгчээр “MCS International” ажилласан бөгөөд манай улсад анх удаа хуурай хоргөлтийн систем (турбинээс гарах уурыг шууд агаараар хөргөх) ашиглан усны хэрэглээг багасгаж байсан юм.
Таныг өмнүүрээ дайрч байгаа машинд зам тавьж өгөхийг бид уриалдаг. Үүнд та тийм ч дуртай биш байдаг байх гэж заримдаа бид боддог. “Яагаад би үүнд зам тавьж өгөх ёстой юм бэ. Харин ч эсрэгээрээ энэ муу надад зам тавьж өгөх ёстой” гэсэн бодол харван орж ирж байгаа нь мэдээж. Тийм ээ үүнийг бичигч надад ч тийм бодол төрдөг. Тэгвэл яагаад “нэг машин өнгөрөөвөл нэг ажил чинь бүтдэг” гээд уриалаад байдаг юм бэ. Хамгийн гол нь таныг өөрийгөө хүндэлдэг байх аа л гэж бодсоноос ийм уриалгыг бид гаргаад байгаа юм. Та мэдээж аз жаргалгүй, зовлон гуниг, уур унтуу, хэрүүл шуугиан дунд байхыг хүсдэггүй байлгүй. Энэ бүх муу муухай зүйлээс хол байг гэсэндээ л бид ингэж уриалж байдаг юм. Урдуураа ухасхийсэн нэг машин өнгөрөөж байна гэдэг нь та тэр машиныг уучлан өршөөж байна л гэсэн үг. Энэ нь тэр ухасхийгч уучлуулах ерөөлтэй гэсэн үг биш. Түүнийг уучилснаараа та өөрийнхөө хувь заяаг өршөөл уучлал, амар амгалангийн агуу ертөнцтэй л учруулж байгаа хэрэг шүү дээ. Та өөрийгөө хайрладаг, өөртөө хайртай, өөрийгөө хүндэлдэг учраас л тэр ухасхийгчийг уучлан өршөөж өмнүүрээ гаргаж байна. Таны энэ бяцхан өгөөмөр зан таныг маш их гай барьцадаас хамгаалан авч үлддэг. Түүнтэй тэмцэлдэх, түүний өмнүүр өрсөлдөн дайрах ад мөрийн хүсэл нь таныг аз жаргалгүй болгоно. Нэг удаа өрсөөд сайхан эз дийлсэн мэт санагдах ч энэ ямар ч хэрэггүй. Эцсийн дүндээ та дэв давхийсэн, дийлж дарангуйлсан, босчихсон гөрөөс шиг айж цочсон, бас зам дээр түгжирч гацсан, түүндээ уурлаж бухимдсан азгүй амьтан л болно шүү дээ. Та өөртөө хайртай л бол бусдыг уучилж сур гэсэн санаанаас л бид тэгж уриалдаг билээ. 
12:00 цагт Монголын Хэвлэлийн хүрээлэнгийн мэдээллийн танхимд “Шинжлэх ухаанаа аваръя” түр хорооноос албан ёсны мэдэгдэл хийнэ.
МҮХАҮТ-ын удирдлага, тэргүүлэгчид Эдийн засгийн ил тод байдлыг дэмжих тухай хуулийн төслийн талаар өчигдөр хэлэлцүүлэг зохион байгууллаа. Уг хуулийг нэн яаралтай батлуулж, далд байгаа хөрөнгө орлогоос эхлэн хөрөнгө оруулалт, мөнгө санхүүг ил болгож эдийн засгийг тэлж, бизнес эрхлэгчдэд санхүүгийн эрх чөлөөг өгнө гэж үзэж байгаа тухай хэлцгээж байсан юм.
Увс аймагт хувийн хэвшлийн хөрөнгө оруулалтаар 20 ортой хүүхдийн эмнэлэг баригдаж, өнөөдөр үйл ажиллагаагаа эхлүүллээ. Тус аймгийн нэгдсэн эмнэлэгт 40 ортой хүүхдийн тасаг үйлчилгээ үзүүлдэг. Ханиад, томуу зэрэг улирлын чанартай өвчлөлүүдийн үед нэгдсэн эмнэлгийн ачаалал нэмэгддэг. 
Аргын тооллын нэгдүгээр сарын 7. Буд гариг. Билгийн тооллын 17. Үнэг одтой, харагчин хонь өдөр. Өдрийн наран 08.39 цагт мандан, 17.11 цагт жаргана. Тухайн өдөр гахай, туулай жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай хандаж биеэ энхрийлүүштэй. Эл өдөр эм, эмнэлгийн элдэв үйл үйлдэх, хагалгаа хийлгэх, биеийн тамирыг сэргээх, мал худалдан авах, мал түгээх, хийморийн дарцаг хатгахад сайн. Сахил санваар авах, хануур, төөнүүр хийлгэхэд муу. 
Испаний хэвлэлүүдэд шинэ он гараад бичиж байгаа ганц сэдэв нь “Барселона” багийн од Месси болон энэ багийн ахлах дасгалжуулагч Луис Энрике нарын дунд үүсээд байгаа үл ойлголцол, хэн нь дийлэх вэ гэдэг асуудал болоод байна. Он гараад явагдсан анхны тоглолтыг Месси сэлгээний сандлаас эхэлж баг нь Реал Сосьедад багт 0:1-ээр хожигдсон. Үүний дараах өдөр Месси бэлтгэлдээ “өвчтэй байна” хэмээн мэдээ бичээд ирээгүй нь байдал нэг л “но”-той болжээ гэдгийг баталж хэвлэл мэдээлэлийн “ахан дүүс”-ийг энэ чиглэл рүү хөтөлжээ. Тэгвэл Sport.es-ынхэн энэхүү шуугиан үнэн болохыг батлаж Хави, Иньеста, Бускетс нар тэднийг эвлэрүүлэхийн төлөө зуучлагчын үүрэг гүйцэтгэж байгаа гэдгийг дэлгэжээ. Маргааш тоглох цомын тэмцээний өмнө багийнхаа томцуулыг ухаажуулахын тулд багийн “хөгшин бурхиуд” хэрхэн ажиллаж байгааг Испаний хэвлэл бичсэнгүй.
Дэлхийн худалдааны талбаруудад нефтийн үнэ огцом уналаа. Лондонгийн бирж дээр Brent маркийн хоёрдугаар сарын фьючерсийн арилжаа 4,71 хувиар бууран нэг баррель нь 53.14 ам.доллараар зарагдан даваа гаригийн худалдаа төгсчээ.
Монголбанк гадаад валютын нөөц 2014 оны 11 сарын сүүлээр 1,352.1 сая ам доллар байжээ. Тэгвэл оны эцэст 1,650 сая ам доллар болж нэмэгдсэн байна.
“Сангийн далай”, “Грэй гүүс”, “Болор”, “Улаанбаатар” зэрэг архийг гар аргаар үйлдвэрлэн худалдаалж байсныг цагдаагийнхан илрүүлжээ. Энэ хэрэгт хэд хэдэн хүнийг холбогдуулан шалгаж байгаа гэнэ. Эдгээр архийг “Нарантуул” зах болон бусад бөөний төвүүдээр ихэвчлэн худалдаалж байжээ. Тиймээс баталгаагүй газраас хямд үнэтэй хуурамч архи худалдан авахгүй байхыг цагдаагийн байгууллагаас анхаарууллаа.