Хот, хөдөөгийн 228 сургууль хими, физикийн 456 лабораторитой болжээ. Энэ талаар БСШУ-ны яамны хэвлэлийн төлөөлөгчөөс тодруулахад “Манай яам өнгөрсөн хугацаанд сурагчдын сурах орчинг сайжруулах зорилгоор хэд хэдэн төсөл, төлөвлөгөө боловсруулж, шинэчлэл хийлээ. Тухайлбал, салбарын сайд Л.Гантөмөрийн санаачлагаар хот, хөдөөгийн 228 сургуульд хими, физикийн 456 лаборатори олголоо. Уг лабораторид 70 төрлийн туршилт хийх боломжтой иж бүрдэл багаж, төхөөрөмжтэй. Мөн багш сурагчдын туршилтын долоон ширээтэй. ЕБС-ууд лабораторитой болсноор хүүхдүүд өөрсдөө гараараа барьж, хичээлдээ оролцож, өөрсдөө туршингаа суралцана гэсэн үг юм” гэв.
Month: January 2015
ОХУ өвлийн улиралд өмсдөг байсан “Валенки” гутлынхаа үйлдвэрлэлийг сэргээсэн байна. Олон жилийн турш өмсөж ирсэн “Валенки” гутлаа хатгамал, чимэглэл, шинэ хэв загвартайгаар урлаж, худалдаалахаар болсон талаар тус улсын төв хэвлэл “Moscow times” мэдээллээ. Өмнө нь энэ гутал нь хүйтэнд дааруулдаггүй, маш дулаан байсан ч ус нэвтэрдэг сул талтай байсан бол шинээр үйлдвэрлэх “Валенки” нь ус нэвтрүүлэхгүй бөгөөд -40 хэмийн хүйтэнд ч хайрахгүй, дааруулахгүй байхаараа давуу талтай гэнэ. Түүнчлэн тус гутал өмнө нь нэг л өнгөөр үйлдвэрлэгддэг байсан бол одоо саарал, бор гээд өнгөний сонголттой байх ажээ.
Монголын Үндэсний Бөхийн холбооны тэргүүн Р.Нямдорж Монгол Улсын Ерөнхийлөгч Ц.Элбэгдоржоор лекц уншуулах хүсэлт тавьжээ. Тэрээр “Ерөнхийлөгч-1000 бөх” уулзалтыг Төрийн ордонд хийж бөхчүүдэд лекц уншуулах хүсэлтэй байгаагаа дахин уламжлья гэсэн байна. Энэхүү хүсэлтийг өмнө нь 2013 оны 11 дүгээр сард тавьж байжээ. Тус уулзалтад улс, аймаг, сумын цолтой болон залуу бөхчүүдийг монгол дээл, малгай, одон тэмдгээр нь жигдрүүлэн хүндэтгэлтэй оролцоно гэдгээ ч мэдэгджээ.
Өмнөд Америкийн нутагт үргэлжилж буй энэ жилийн “Ралли Дакар” уралдаанд дахь анхны золгүйтэл өнгөрөгч шөнө гарлаа. Аргентины Сан-Хуан, Чилесито тосгонуудын хооронд төв замаасаа 300 орчим метрийн зайнд Польшийн мотоцикльч Михал Херник хамгаалалтын малгай нь үгүй ч гэлээ унаа унш нь бүрэн бүтэн эвдрэлгүй, аваарт орсон байх анхан шатны ямар ч шалтгаан байхгүй амь үрэгдсэн байдалтайгаар олджээ. Дакар нэгдүгээр сарын 4-нд эхэлж өнөөдөр гуравдугаар гараа нь зохиогдож байсан бөгөөд аялалын замын 206 дахь км-т дээрх золгүй явдал тохиолджээ. Өмнөд Америкын нутаг дэвсгэрт 2009 оноос эхлэн энэ уралдааныг явуулах болсон нь аюулгүй ажиллагаатай холбоотой гэж тайлбарладаг гэлээ ч тэр жилээс өнөөг хүртэл хугацаанд уралдааны замд амь насаа алдаж буй тав дахь хүн нь Херник болж байна.
Б.Хулан
Монголын зохиолчдын эвлэлийн оны шилдэг бүтээл шалгаруулах “Алтан өд” наадмын шагнал гардуулах ёслол нэгдүгээр сарын 9-нд Улсын филармонийн их танхимд болох гэж байна. Оны шилдэг бүтээл шалгаруулах наадмын хүрээнд нэгдүгээр сарын 9-ний 15.00 цагаас зохиолч, яруу найрагчдын ном, бүтээлийн үзэсгэлэн гаргаж, гарын үсэгтэй номын худалдаа солилцоо явуулах бол “Алтан өд 2014” хүндэтгэлийн арга хэмжээ 17.00 цагт эхлэх юм байна.
Оны шилдэг бүтээлийн эзэд тодорход хоёр өдөр үлдлээ.
Өнөөдөр Төрийн ордонд 13 цагаас хуралдах байсан Аюулгүй байдал гадаад бодлогын байнгын хорооны хуралдаан тодорхойгүй шалтгааны улмаас хойшилжээ. Уг нь тус байнгын хороо Дэд хорооны даргыг сонгох байсан ч хуралдсангүй. Харин одоо Байгаль орчин, хүнс, хөдөө аж ахуйн байнгын хорооны хуралдаан “Б” танхимд эхлэх гэж байна. Тус байнгын хороо Агаарын бохирдлыг бууруулах дэд хорооны бүрэлдэхүүнд өөрчлөлт оруулах тухай асуудлыг хэлэлцэх юм.
Э.ЭНХ
Мэргэжлийн сумогийн дэвжээнд эх орныхоо нэрийг цуурайтуулж яваа их аварга Какурю Ананд сүй тавьсан тухайгаа албан ёсоор мэдээлжээ. Харин хуримын товоо хараахан зарлаагүй байна.
Өдгөө 29 настай М.Анандын сүйт бүсгүй нь 23 настай Д.Мөнхзаяа гэх бүсгүй юм байна. Хосууд 2013 онд Улаанбаатар хотод анх танилцаж байсан ба өнгөрсөн оны наймдугаар сараас эхлэн Токио хотноо хамт амьдарч эхэлжээ.
71 дэх их аваргын сүйт бүсгүй хөл хүнд бөгөөд ирэх тавдугаар сард амаржих юм байна.
Нийслэлийн Засаг даргын 2013-2016 оны үйл ажиллагааны хөтөлбөр, 2015 оны Нийгэм, эдийн засгийн зорилтод тусгасан зорилтыг хэрэгжүүлэхээр экологи, ногоон хөгжлийн салбарт 2014 онд дараахь ажлуудыг хийхээр төлөвлөжээ.
Агаарын бохирдлыг бууруулах чиглэлээр
Дулааны алдагдал багатай, дулааны эх үүсвэрээ төвлөрсөн, хэсэгчилсэн болон бие даасан дэвшилтэт технологиор шийдвэрлэсэн амины орон сууц барих, худалдан авах иргэдийг орон сууцны ипотекийн зээлд хамруулах ажлыг Монголбанктай хамтран хэрэгжүүлэх бөгөөд тус ажлыг хэрэгжүүлснээр гэр хорооллыг барилгажуулах ажил эрчимжиж, утаат өрхийн тоо багасах боломж бүрдэнэ.
Мөн “Нийслэлийн агаарын чанарын сайжруулах бүсэд мөрдөх журам”-ын хэрэгжилтийг хангах ажил хийгдэнэ. Энэ журмын хэрэгжилтийг хангаснаар тухайн бүсэд амьдарч байгаа бүр айл өрх заавал сайжруулсан зуух, боловсруулсан түлш хэрэглэх бөгөөд хэрэглээгүй тохиолдолд зохих хариуцлага тооцох болно.
Жайка Олон Улсын төслийн нэгжтэй хамтран авто машинаас үүдэлтэй агаарын бохирдлын эсрэг арга хэмжээг авч ажиллана.
Байгаль орчны чиглэлээр
Ой зохион байгуулалтын төлөвлөгөөний дагуу нийслэлийн ногоон бүсэд 230 га тайлбайд ойжуулалт, ой нөхөн сэргээх ажил, 80000 га тайлбайд ойн хөнөөлт шавьж, өвчний судалгаа хийж, 5000 га талбайд тэмцлийн ажил явуулна.
Мөн элсний нүүдэл цөлжилтөөс хамгаалах зорилгоор Хан-уул дүүргийн нутаг дэвсгэрт Түргэний гол дагуу 10 га талбайд ногоон зурвас байгуулах ажлыг хэрэгжүүлнэ. Түүнчлэн Ойн менежментийн төлөвлөгөөний дагуу 20 га талбайд ойн цэвэрлэгээний ажлыг гүйцэтгүүлэхээр төлөвлөөд байна.
Хүн амын ундны усны эх үүсвэрийг хамгаалах зорилгоор рашаан, булаг тохижуулах, тохижуулсан булгуудын хамгаалалтын хайс, хашааг сэргээн засварлах ажлыг гүйцэтгүүлж, Баянзүрх дүүргийн 20-р хороо Улиастайн голын эх байгалийн нөөц газрын ангиллаар орон нутгийн тусгай хамгаалалтанд авсан газарт хамгаалалтын хашаа барих зэрэг ажлыг хэрэгжүүлнэ.
Үйлдвэр, хөдөө аж ахуйн салбарт
Монгол Улсын Их Хурлын 2012 оны Малчид, үндэсний үйлдвэрлэгчдийн дэмжих зарим арга хэмжээний тухай 74-р тогтоолын дагуу арьс ширний үйлдвэрүүдийг үйлдвэрийн шинэ бүс рүү шилжүүлэх арга хэмжээг 2017 оны 12 дугаар сарын 31-ний дотор үе шаттайгаар зохион байгуулах тухай заалт, Засгийн газрын 2013 оны Арьс ширний үйлдвэрлэлийн талаар авах арга хэмжээний тухай 249-р тогтоолыг хэрэгжүүлэх ажлын хүрээнд өнгөрөгч 2014 онд ҮТП-ийн газрын асуудлыг шийдвэрлэж, Эмээлт болон Налайхын Үйлдвэр Технологийн Парк ОНӨТҮГ-ыг байгуулсан. Энэ онд Арьс ширний үйлдвэрүүдийг нүүлгэн шилжүүлэх бэлтгэл ажлыг хийхээр нийслэлийн 2015 оны төсөвт 2,5 тэрбум төгрөгийг тусгажээ.
Мөн Улаанбаатар хотын сүүний хэрэглээний 80 хувийг дотоодын үйлдвэрлэлээр хангах зорилтын хүрээнд 2014 онд Эрчимжсэн МАА-г хөгжүүлэх дэд хөтөлбөр болон бусад эрх зүйн баримт бичгийг боловсруулж батлуулсан. 2015 онд эдгээр баримт бичгүүдийн хэрэгжилтийг хангах ажлыг зохион байгуулна. Мөн сүүний үйлдвэрлэлийг дэмжиж, Мал хамгаалах сантай хамтран Зээлийн батлан даалтын санг байгуулж, сангаар дамжуулан ферм эрхлэгч, загас, тахианы аж ахуй эрхлэгчдийг хөнгөлттэй зээлд хамруулах ажлыг зохион байгуулна.
Нийслэлийн газар тариалангийн үйлдвэрлэл эрхлэгчдийг чадавхжуулах сургалт, зөвлөмж, үзүүлэх ажлыг зохион байгуулж, цэвэр аюулгүй хүнсний ногоо, эцсийн бүтээгдэхүүнээр хангахад дэмжлэг үзүүлэх ажлыг зохион байгуулна. Түүнчлэн Нийслэл орчмын бэлчээрийн менежментийг сайжруулах, ХАА-н үйлдвэрлэлийг нэмэгдүүлэх төслийг Австри Монголын хамтын нийгэмлэгтэй хамтран 2015 оноос эхлэн 5 жилийн хугацаатайгаар хэрэгжүүлэхээр төсөл хөтөлбөрийг боловсруулан ажиллаж байна.
Жижиг, дунд үйлдвэрлэлийг дэмжих чиглэлээр
“Улаанбаатарт үйлдвэрлэв 2015” төсөл хөтөлбөрийн хүрээнд нийт 14 ажлыг хийж хэрэгжүүлэхээр төлөвлөөд байна. Үүнд:
Улаанбаатарт үйлдвэрлэв 2015 хөтөлбөр хэрэгжүүлэх
Мэдээллийн кластер нэвтрүүлэх, үйл ажиллагааг эрчимжүүлэх
Мэргэжлийн байгууллагуудтай уулзалт зөвлөгөөн зохион байгуулах
Салбарын зөвлөгөөн зохион байгуулна.
Аялал жуулчлалын бэлэг дурсгалын үйлдвэрлэл эрхлэгчдийн уулзалт, зөвлөгөөн зохион байгуулна.
Олон улсын хүүхдийн эрхийг хамгаалах өдрийн арга хэмжээ зохион байгуулна.
БНХАУ-ын шилийн гол аймгийн олон улсын үзэсгэлэн худалдаа зохион байгуулна.
Монгол, БНХАУ, ОХУ-ын эдийн засаг, худалдаа хамтын ажиллагааны форум-2015 үзэсгэлэн худалдаа зохион байгуулна.
Ахмад үйлдвэрлэгч арга хэмжээ зохион байгуулна.
Кантон файр үзэсгэлэн худалдаа зохион байгуулна.
“Улаанбаатарт үйлдвэрлэв-2015” үзэсгэлэн худалдаа зохион байгуулна.
UB BRAND-2015 шалгаруулах ёслолын арга хэмжээ зохион байгуулна.
Улаанбаатарт үйлдвэрлэв худалдааны төвийг төслийг боловсруулан хэрэгжилтийг ханган ажиллах бөгөөд нийт 444 хүнд хүрч ажиллахаар зорин ажиллаж байна.
Мөн дүүргүүдийн жижиг дунд үйлдвэрийг дэмжих төвүүдийн үйл ажиллагааг эрчимжүүлж, Баянгол дүүргийн жижиг дунд үйлдвэрийг дэмжих төвийн барилгын ажлыг 2015 онд эхлүүлнэ. ЖДҮ эрхлэгчдийн чадавхийг дээшлүүлэх сургалтанд 1220 иргэн, аж ахуй нэгжийг хамруулж, 2800 орчим жижиг дунд үйлдвэрлэл эрхлэгчдэд зөвлөх үйлчилгээ үзүүлж, 3500 орчим үйлдвэрлэл эрхлэгчидтэй хамтран ажиллахаар зорьж байна.
Мал, амьтны гоц халдварт болон халдварт, паразит өвчнөөс урьдчилан сэргийлэх ажлын хүрээнд
Нийслэлийн нутаг дэвсгэрт мал, амьтны гоц халдварт болон халдварт, паразит өвчнөөс урьдчилан сэргийлэх, эмчлэх зорилгоор давхардсан тоогоор 1707,1 мянган толгой мал, амьтныг энэхүү арга хэмжээнд хамруулж, хүнсний аюулгүй байдал, нийгмийн эрүүл мэндийг хамгаалах зорилгоор 1637,2 мянган м2 талбайд мал эмнэлгийн урьдчилан сэргийлэх ариутгал халдваргүйтгэл хийж, мал, амьтны халдварт өвчнийг оношлох оношлогоо шинжилгээнд 6122 толгой мал, амьтан, хүнсний аюулгүй байдлыг хангах зорилгоор мал, амьтны гаралтай хүнсний бүтээгдэхүүн, түүхий эд, цус, шээсний 31087 дээжинд шинжилгээ хийж, баталгаажуулалт олгохоор төлөвлөөд байна.
Эдгээр мал эмнэлгийн цогц арга хэмжээний үр дүнд мал, амьтны өвчлөлийг 40 гаруй хувиар бууруулж, хүнсний аюулгүй байдал, нийгмийн эрүүл мэндийн байдал сайжирна.
Налайхад Барилгын материалын Үйлдвэрлэл, технологийн паркийг хөгжүүлэх чиглэлээр:
Налайхад шинээр нээгдэх Барилгын материалын үйлдвэрлэл, технологийн парк нь барилгын материалын салбарт шинжлэх ухааны ололт, дэвшилтэт техник технологийг нэвтрүүлэх, импортыг орлох бүтээгдэхүүн үйлдвэрлэлийг нэмэгдүүлэх зорилгоор Нийслэлийн ИТХ-ын тэргүүлэгчдийн 148-р тогтоолоор байгуулагдан үйл ажиллагаагаа эхлээд байна.
Налайх дүүрэг төдийгүй Нийслэл хот, Төвийн бүс, Монгол улсын ойрын ирээдүйн эдийн засаг, нийгмийн хөгжлийг тодорхойлох их бүтээн байгуулалтанд зүй ёсоор орох уг парк байгуулагдсанаар 5 жилийн дотор Монгол улсын барилгын материалын үйлдвэрлэл 1.78 дахин, Налайх дүүргийн үйлдвэрлэлийн хэмжээ 32 дахин нэмэгдэж, шинээр 1500 гаруй шууд ажлын байр бий болох юм.
2016 оноос эхний ээлжний үйлдвэрүүдийг байршуулж эхлэхээр төлөвлөөд байгаа бөгөөд энэ онд үйлдвэрүүдийн бүтээн байгуулалтыг эхлүүлэх бэлтгэлийг хангах ажлын хүрээнд дэд бүтцийн зураг төсөв, түр баазын бүтээн байгуулалт болон эхний ээлжний үйлдвэрүүдийн сонгон шалгаруулалтыг хийх зорилго дэвшүүлэн ажиллаж байна.
Хөнгөн үйлдвэрлэлийн үйлдвэрлэл технологийн парк байгуулах ажлын хүрээнд:
Эмээлтийн хөнгөн үйлдвэрлэлийн үйлдвэрлэл технологийн парк нь 2015 онд 182 тэрбум төгрөгийн бүтээн байгуулалтын ажил хийхээр төлөвлөснөөс:
Паркийн хашаа барих, түр хүчдэл, түр усан хангамж татах ажлыг нийслэлийн төсвийн 1,6 тэрбум төгрөгөөр;
103 мгв хүчин чадалтай дулааны станцыг хувийн хэвшлийн 30 тэрбум төгрөгөөр; Хоногт 20000 м3 ус цэвэршүүлэх цэвэрлэх байгууламжийг Европын сэргээн босголтын банкны 30 сая еврогийн хөрөнгө оруулалтаар;
Инженерийн шугам сүлжээг байгуулах ажлыг Улсын Их Хурлын 74 дүгээр тогтоолоор батлагдсан бондны үлдэгдлээс /75 тэрбум/ санхүүжүүлж 2015 оны бүтээн байгуулалтын ажлыг хийж дуусгахаар төлөвлөөд байна.
Үндэсний цэцэрлэгт хүрээлэнгийн бүтээн байгуулалтын ажил:
Үндэсний цэцэрлэгт хүрээлэн НӨҮГ нь 2015 онд Эко танхим, Хүүхдийн номын сан байгуулж, Цагдаагийн талбайн орчны тохижилтын ажлыг хийж, Сөүл хотын нэрэмжит хүүхдийн тоглоомын талбайн ажлыг эхлүүлэхээр төлөвлөж байна.
Минж нутагшуулах чиглэлээр:
2015 онд Туул голд минж нутагшуулах, эрүүл чийрэг бүл бий болгох зорилт тавин ажиллаж байна
Туул голд минж нутагшуулах ажил 2011 оноос эхэлж, эхний ээлжийн 16 толгой минжийг Зааны голд нутагшуулсан. Цаашдаа Зааны гол болон түүнтэй холбоотой Тэрэлж, Туул голуудад минж нэмж нутагшуулах зорилготой байна. Энэ зорилгын үүднээс Зааны гол, Тэрэлжийн гол, Туул голууд тэдгээрийн эрэг орчмын нутгийн хөхтөн амьтдын зүйлийн олон янз байдал, тархац, байршил, тоо толгойд жил бүр мониторинг судалгаа хийхээр төлөвлөн ажиллаж байна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
ОХУ-ын Улаан-Үд хотод болж буй футзалын “Кубок Горсовета” тэмцээний хагас шигшээд “Улаанбаатар унаганууд” баг шалгараад байна. “Улаанбаатар унаганууд” клуб шилдэг наймд үлдээд байсан бөгөөд өчигдөр “Фианет 2” багтай учраа таарч, 5:4-өөр хожсоноор хагас шигшээд шалгарээ.
Ес дэх жилдээ зохион байгуулж буй “Кубок Горсовета” тэмцээнд ОХУ, БНХАУ, Монголын 17 баг хурд хүч сорьж байгаагаас манай улсаас “Улаанбаатар унаганууд” (Улаанбаатар их сургууль), “Хоромхон”, “Дэрэн” болоод Эрдэнэт хотын “Хангарьд” зэрэг мини хөлбөмбөгийн баг оролцож байна. “Хангарьд” клуб тэмцээнээ дуусгасан бол “Дэрэн”, “Хоромхон” клуб XIII байрын төлөө өнөөдөр тоглох юм.
Тэмцээн маргааш буюу нэгдүгээр сарын 8-д өндөрлөнө.
Монголын Үндэсний бөхийн холбооноос 2014 оны улсын баяр наадмын өмнө “Дархан аварга” цол хүртсэн Г.Өсөхбаяр, А.Сүхбат аваргуудын цолны эрэмбийн талаар тайлбар нийтлэжээ. Учир нь хоёр аварга наадмын барилдааны үеэр жигүүрээ булаалдан хэсэг зогссон нь тэдний эрэмбийн асуудлаар үзэгч олныг талцуулахад хүргэсэн байдаг. Ингээд МҮБХ-ны тайлбарыг бүрэн эхээр нь нийтлэж байна.
Дархан аварга Г.Өсөхбаяр, А.Сүхбат нарыг хэрхэн эрэмбэлсэн тухай
Г.Өсөхбаяр, А.Сүхбат нар ижилхэн даян аварга цолтой байх үедээ нэг өдөр дархан аварга цолыг зарлигаар авсан. Энэ хоёр бөхийг эрэмбэлэхдээ Монгол Улсын Засгийн газрын 2003 оны 164 дүгээр тогтоолоор баталсан “Үндэсний их баяр наадмын үндэсний бөхийн барилдааны дүрэм”-ийн 3.6.1-д “Ижил цолтой бөхчүүдээс тухайн цолны болзлоо олон биелүүлснийг, энэхүү нөхцөл ижил байвал доод давааг олон давсныг эхэнд нь … эрэмбэлнэ” гэсэн заалтыг баримталсан. Энэ заалт нь бөхийг эрэмбэлэхдээ түрүүлж цолны болзол хангаснаар нь биш, харин хэн нь илүү амжилт гаргасныг нь өмнө нь эрэмбэлэхээр журамласан заалт юм.
Дээрх хоёр бөхийн тухайд ижилхэн даян аварга цолтой байхдаа нэг өдөр, нэг цаг хугацаанд дархан аварга цолыг зэрэг авч байгаа учраас өмнөх амжилтыг нь харгалзан эрэмбэлэх нь туйлын ойлгомжтой юм. Өмнө нь хоёр бөх хоёулаа ижилхэн даян аварга цолтой, гэхдээ Г.Өсөхбаяр улсын наадамд гурван удаа 8 давсан, дөрвөн удаа 7 давсан, А.Сүхбат улсын наадамд 8 даваагүй, гурван удаа 7 давсан амжилттай байсан учраас Г.Өсөхбаяр А.Сүхбатын өмнө эрэмбэлэгдэх нь хэн ч эргэлзэх зүйл биш билээ.
Үндэсний их баяр наадмын тухай хуулийн 7.9-д “Энэ хуулийн 7.8-д заасан амжилтын эрэмбээр ам авах заалт нь дархан аварга цолтонд хамаарахгүй” гэж заасан байдаг. Энэ заалт дархан аварга цол хүртсэний дараа барилдаж үзүүлсэн амжилтаар бөхчүүдийг дахин эрэмбэлэхгүй, хуучин эрэмбийг хадгална гэсэн утгатай зохицуулалт юм. Ийхүү бид дээрх хоёр бөхийн эрэмбийг тогтоохдоо одоо хүчин төгөлдөр мөрдөж буй хууль, дүрмийн заалтыг баримталснаа дахин албан ёсоор нотолж байна.
Дашрамд тэмдэглэхэд, улсын наадамд түрүүлсэн амжилтыг тооцохдоо нэг удаа 10 давж аварга болсныг, нэг удаа 9 давж арслан болоод дахин 9 давж аварга болсонтой адилтган үздэг бөгөөд дээрх байдлаар тооцсон амжилтаараа улсын аварга Д.Сумъяабазар О.Балжиннямын өмнө, О.Балжинням С.Мөнхбатын өмнө, С.Мөнхбат Г.Эрхэмбаярын өмнө эрэмбэтэй байгаа болно.
Энэхүү тайлбарыг Монгол Улсын Ерөнхийлөгч Ц.Элбэгдоржид 2014 оны 7 дугаар сарын 17-ны өдөр хүргүүлсэн болно.
Монголын үндэсний бөхийн холбоо