Монгол Улсын Шадар сайд У.Хүрэлсүхийн тушаалаар Онцгой байдлын ерөнхий газрын дэд даргаар хурандаа Г.Ариунбуянг томилоод байна. Хурандаа Г.Ариунбуян Цэргийн нэгдсэн дээд сургуулийг инженер-эдийн засагч мэргэжлээр төгссөн.
-1989-1999 онд Зэвсэгт хүчний ангид алба, тасгийн дарга, төлөвлөлтийн офицероор ажиллаж байсан.
-2003 онд ХБНГУ-ын Шпайерийн төрийн захиргааны их сургуульд захиргаа, эрхзүй, төрийн удирдлагаар магистр хамгаалжээ. Герман, орос хэлтэй.
-2005-2010 онд Чингэлтэй дүүргийн ЗДТГ-т Төрийн захиргааны удирдлагын хэлтсийн даргаар, 2010-2011 онд Чингэлтэй дүүргийн Засаг даргын зөвлөх,
-2011-2012 онд Чингэлтэй дүүргийн Засаг даргын орлогчоор тус тус ажиллаж байжээ. Мөн дүүргийн Онцгой комиссын гишүүн, онцгой комиссын даргаар ажиллаж байсан ажлын туршлагатай, цэргийн мэргэжилтэй, чадварлаг боловсон хүчин юм.
Гэмтлийн эмнэлэгт өнгөрөгч 31-нээс энэ сарын 6-ны хооронд нийт 1700 орчим хүн ханджээ. Эдгээрийн 40 орчим хувь нь хальтирч унаснаас гэмтэл авсан иргэн байсан талаар мэдээллээ. Харин үлдсэн хэсэг нь согтууруулах ундаа хэрэглэсэн үедээ осолд орсон, зам тээврийн ослоос үүдэлтэй гэмтэл эзэлж байгаа юм.
Нийслэлийн Засаг даргын 2014 оны А/1025 дугаар захирамжийн дагуу нийслэлийн хэмжээнд цэргийн үүрэгтэн, бэлтгэл офицеруудын бүртгэл 152 хороонд явагдаж байна. Цэргийн бэлтгэл үүрэгтний бүртгэлд 60 хүртэлх насны бэлтгэл офицерууд, 18-50 насны эрэгтэйчүүд, цэргийн анги, байгууллагад ажиллаж байгаа генерал, офицер, ахлагч, гэрээт цэргийн алба хаагчид хамрагдаж байгаа бөгөөд бүртгүүлэхдээ цэргийн үүрэгтний үнэмлэх, бэлтгэл офицерын үнэмлэх, цахим үнэмлэх, хэрвээ цэргийн үүрэгтний үнэмлэхгүй бол 3 хувь цээж зурагтай харъяа хороон дээрээ ажлын өдөр 8-20 цаг, амралтын өдөр 10-20 цагийн хооронд очиж бүртгүүлнэ гэж Нийслэлийн ЗДТГ-ын Хэвлэл мэдээлэл, олон нийттэй харидцах хэлтсээс мэдээллээ.
Энэ сарын 7-ны байдлаар Эбола вирусээр дэлхийн 10 улсын 20 мянга гаруй иргэн өвчлөөд байгаа гэх мэдээллийг Дэлхийн эрүүл мэндийн байгууллагаас өгчээ. Мөн Эбола вирусээр 8000 гаруй хүн нас барсан байна.
“Дүнжингарав” худалдааны төвийн баруун урд уулзвараас Улиастайн гүүр хүртэл 6,6 км автозам ашиглалтад ороод удаагүй байгаа билээ. Үүнтэй холбогдуулан Чулуун-Овооны уулзвараас “Нарантуул” олон улсын худалдааны төв хүртэл Нарны замаар зорчих ачааны автомашины хөдөлгөөнийг бүх жин нь 5 тонноос хэтрүүлэхгүй байхаар хязгаарлан, 5 тонноос их жинтэй тээврийн хэрэгслийг шинэ замаар явуулахаар боллоо.
Худалдаа аж үйлдвэрийн танхим Өвөр Монголын Ардын Засгийн газартай хамтран үйлдвэрлэгч, импортлогчдын эдийн засгийн хямралыг даван туулахад, бараа бүтээгдэхүүний экспортыг дэмжих зорилгоор энэ сарын 24-28-ний өдрүүдэд “Цагаан сар-2015” сэдэвт үзэсгэлэнг БНХАУ-ын Эрээн хотноо зохион байгуулах гэж байна. Тиймээс тус үзэсгэлэнд оролцох байгууллагуудыг энэ сарын 20-ныг хүртэл бүртгэхээр болжээ.
Шилэн дансны тухай хуулийг 2015 оны 01 дүгээр сарын 01-ний өдрөөс эхлэн дагаж мөрдсөнтэй холбогдуулан бэлтгэл ажлыг хангах, жигдрүүлэх үүрэг бүхий Ажлын хэсгийг ЦЕГ-ын Дэд даргын 2014 оны 141 дүгээр тушаалаар байгуулагдсан.
Манай улсад хоёр хөршийн төрийн тэргүүн ойр ойрхон айлчилж сүйд болсон. Үүний дараа бид зунжингаа “Талын зам”, хурдны замын төсөл ярьж хөөрцөглөв. Хойд урд хоёр хөрш маань манай нутгаар транзит бүх урсгалаа явуулж бид нэг болж авах нь хэмээн итгэж баярласаар явлаа. Гэтэл хоёр хөрш маань биднээс хэрхэн даялан зуларч байгааг энэ зурагнаас харж байгаа биз дээ. Хоёр өдрийн өмнө ОХУ-ын телевизийн томоохон бүх сувгаар “Москва-Бээжин өндөр хурдны галт тэрэг” төсөл хөтөлбөрийг орон даяараа танилцуулсан байна. ОХУ-ын Ерөнхийлөгч В.Путин өөрийн байр сууриа хатуу илэрхийлж уг төмөр замыг өөрийн нутгаар дайруулах нь эдийн засгийн болоод аялал жуулчлалын томоохон ач холбогдолтой хэмээн үзэж байгаагаа ОРТ1 сувгаар тодорхой мэдэгджээ. Олон улсын зарим шинжээчдийн үзэж буйгаар Ерөнхийлөгч В.Путин “Өөр улсыг тэжээхгүй” хэмээх байр суурин дээрээ үлдлээ хэмээн бичицгээж байна. Харин Хятадын тал энэ асуудлаар албан ёсны байр сууриа илэрхийлээгүй байна. Москва-Бээжинг холбох ОХУ-аас БНХАУ руу чиглэсэн баруун ба зүүн чиглэлийн хийн хоолой ба төмөр замын төслийн тодорхой зургийг та бүхэнд хар үгээр тайлбарлая. Монголын баруун хязгаар Баян-Өлгий аймгийн цаахна Казахстан улс бий. Казахстан-Монгол хоёрын дундуур 50-хан км зайгаар тусгаарлагдсан ОХУ-ын нутаг дэвсгэр оршдог. Энэхүү 50 км хоолойгоор л оросууд төмөр замаа Хятадын нутаг руу оруулж улмаар Бээжинтэй холбох нь. Зурган дээрээс харахад Монголын баруун аймгуудын нутгаар туушиндаа явуулчихад хамаагүй шулуун ойр, зардал бага гарах, нутаг дэвсгэрийн байршил зүйн хувьд бэрхшээл бага байхаар байгаа биз. Тэгсэн тэгдэггүй юм байна аа. Гэхдээ үүнд монголчууд гоншигнох хэрэггүй. 
Олон хүүхэд төрүүлж өсгөсөн эхчүүдэд одонгийн мөнгө гэж жилдээ ганцхан удаа 100-200 мянган төгрөг л өгдөг. Уг нь өнөө жил алдарт эхчүүдэд 29.9 тэрбумыг олгоно гэж төсөвлөөд байв.Тэгвэл Шийдлийн Засгийн газар 2015 оны төсвөөс нэг их наяд төгрөг танасан төсөл оруулж ирэхдээ одонгийн мөнгөний 50 хувийг нь хассан. Мөн хүүхдийн мөнгөний 246 тэрбумаас 40 хувийг нь өгөхгүй гэнэ.