Month: January 2015

Улсын Их Хурлын дарга З.Энхболдод өнөөдөр /2015.01.14/ Сонгогдсон болон томилогдсон төрийн өндөр албан тушаалтанд хариуцлага хүлээлгэх тухай хуулийн төслийг Монгол Улсын Ерөнхийлөгчийн Хуулийн бодлогын зөвлөх Ч.Өнөрбаяр өргөн барилаа.

Монгол Улсын Үндсэн хуулийн Нэгдүгээр зүйлийн 2 дахь хэсэгт “Ардчилсан ёс, шударга ёс, эрх чөлөө, тэгш байдал, үндэсний өв, эв нэгдлийг хангах, хууль дээдлэх нь төрийн үйл ажиллагааны үндсэн зарчим мөн” гэж заасан байдаг. Үндсэн хуулийн энэхүү зарчим нь төрийн албаны чиг, үүрэг, үйл ажиллагааны суурь мөн. Өнөөдөр хүчин төгөлдөр үйлчилж буй 70 орчим хуульд төрийн албан хаагчийг төрийн албанаас чөлөөлөх, огцруулах үндэслэлийг заасан нь төрийн албаны үндсэн зарчим зөрчигдөхөөс сэргийлж, төрийн албанд хариуцлагыг бэхжүүлэх чухал нөхцөл болсон.
Гэсэн хэдий ч төрийн эрх мэдэл хуваарилах зарчим, сонгогдсон албан тушаалтан болон төрийн өндөр албан тушаалтны эрхзүйн байдлын онцлог зэргээс хамаарч Төрийн албаны тухай хуульд заасан сахилгын хариуцлагын тогтолцоо төрийн албаны бүх хүрээнд үйлчилдэггүй, албан тушаалтныг огцруулах, чөлөөлөх зохицуулалт нь бодит байдал дээр хэрэгждэггүй явдал байдаг.

Иймд сонгогдсон болон томилогдсон төрийн өндөр албан тушаалтанд хариуцлага тооцох үндэслэл, журмыг тодорхой болгож, төрийн хэвтээ түвшинд улс төрийн хариуцлагын тогтолцоог бүрдүүлэх үүднээс 6 бүлэг, 24 зүйлтэй энэхүү хуулийн төслийг боловсруулсан байна хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

Улсын Их Хурлын гишүүн, Аж үйлдвэрийн сайд Д.Эрдэнэбат эхлээд яамны бүтэц зохион байгуулалтын талаар танилцуулж, цаашид тус яамнаас хийж хэрэгжүүлэх бодлогын талаар Байнгын хорооны даргад дэлгэрэнгүй мэдээлэл өглөө. Мөн тэрээр Аж үйлдвэрийн яам шинээр байгуулагдсантай холбогдуулан Аж үйлдвэрийн тухай, Жижиг дунд үйлдвэрийн тухай, Чөлөөт бүсийн тухай, Худалдааны тухай зэрэг хэд хэдэн хуулинд өөрчлөлт оруулах шаардлага гарч байгааг онцлоод Байнгын хорооны даргаас эдгээр хуулиудын хэлэлцүүлгийн явцад анхааран ажиллахыг хүссэн юм.

Түүнчлэн арьс, шир үйлдвэрлэгчдэд илүүтэйгээр анхаарал хандуулан ажиллахаа дуулгаад эх орондоо үйлдвэрлэж байгаа бүтээгдэхүүнээ импортоор авахгүй байх хэрэгтэй байгаа талаар хэлж байсан юм. Аж үйлдвэрийн яам байгуулагдаад нэг сар болж, энэ хугацаанд бодлогын бичиг баримтуудаа боловсруулж дууссан. Одоогийн байдлаар стратеги төлөвлөлтийг 15 жилээр төлөвлөн боловсруулах ажил хийгдэж байна гэдгийг салбарын сайд дурдсан юм.

Байнгын хорооны дарга дээрх хуулиудад ажлын хэсэг байгуулан ажилладаг зарчмаараа цаашид явна гэдгийг хэлээд байнгын хорооны зүгээс бүхий л боломжоороо хамтарч, нэгэн зүгт харж ажиллах болно гэдгийг дуулгалаа. Мөн Эдийн засгийн байнгын хороогоор Чөлөөт бүсийн тухай, Зөвшөөрлийн тухай хуулийн төслүүдийн анхны хэлэлцүүлгийг хийх шатанд тус яамны зүгээс саналаа өгч, хамтран ажиллах үүрэг чиглэл өглөө хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв

Аймгийн удирдлагуудтай хийсэн 2015 оны эхний цахим хурлын үеэр Монгол Улсын сайд, ЗГХЭГ-ын дарга С.Баярцогт төсвийн тодотголд тусгасан гол гол өөрчлөлт, шинээр хэрэгжиж буй хуулиудтай холбоотой мэдээлэл өглөө.

Ирэх сарын 2-3-нд ЗГХЭГ-аас аймаг, нийслэлийн ИТХ-ын дарга, Засаг дарга нартай уулзалт, сургалт хийнэ. Аймаг, орон нутгийн удирдлагуудын 2014 оны ажлыг дүгнэж, 2015 оны үйл ажиллагааны гэрээ байгуулна. УИХ-ын чуулганаар одоо хэлэлцэж буй 2015 оны төсвийн тодотгол батлагдсаны дараа төсвийн зарцуулалттай холбоотой олон асуудлыг нарийвчлан тайлбарлана гэж С.Баярцогт сайд хэллээ.

Оны эхнээс хэрэгжиж буй Шилэн дансны хуулийн дагуу төсвийн захирагчнар 10 сая төгрөгөөс дээш үнийн дүнтэй гүйлгээ бүрээ цаг тухайд нь олон нийтэд мэдээлэх үүрэгтэй. Энэ ажлыг цалгардуулалгүй гүйцэтгэхэд Засаг дарга нар анхаараарай. Засгийн газраас өнгөрсөн онд шинэчилсэн журмын дагуу энэ жилнийт 53 малчин, тариаланч, фермерийг шалгаруулна. Улсын сайн малчин, тариаланч, фермерүүдийн цол, тэмдгийгуламжлал ёсоор сар шинийн баяраар Улаанбаатар хотноо гардуулан өгнө. Мөн энэ сард төрнө гэж тооцоолж байгаа Монгол Улсын 3 сая дахь иргэн, түүний чацуутнуудыг аймаг бүр тодруулах ажлыг зохион байгуулахдаа бүртгэл тэмдэглэлийг сайтар хөтөлж, хариуцлагатай ажиллаарай гэж ЗГХЭГ-ын дарга аймгийн удирдлагуудад анхаарууллаа.

Хүүхдүүдийг эцэг эхэд нь туслуулах, нөгөө талаар мал маллагааны анхан шатны мэдлэг, соёлыг өвлүүлэх зорилгоор сурагчдын амралтыгмал төллөх үеэр тохируулсан. Энэ хичээлийн жилийн 2 дугаар улирлын амралтын хувьд,

– I-V ангийн сурагчид1.10-наас 2.1-нийг дуустал 3 долоо хоног;

– VI-IX ангийн сурагчид 1.10-наас 25-ныг дуустал 2 долоо хоног;

– X-XII ангийн сурагчид 1.10-наас 18-ныг дуустал 1долоо хоног амрах бол 3 дугаар улирлын амралт:

– I-V ангийн сурагчид 3.21-нээс 4.12-ныг дуустал 3 долоо хоног,

– VI-IX ангийн сурагчид 3.21-нээс 4.5-ныг дуустал 2 долоо хоног,

– X-XII ангийн сурагчид 3.14-нөөс 3.29-нийг дуустал 2 долоо хоног тус тус амарна. Үүнтэй холбогдуулан аймаг, орон нутгийн зүгээс холбогдох зохицуулалт хийхийг мөн даалгалаа.

Засгийн газрын өнгөрсөн хуралдаанаар яамдын бүтцийн өөрчлөлттэй уялдуулан аймгийн ЗДТГ-ын бүтэц, орон тоог шинэчлэн баталсан, хөдөөгийн эмч, багш нарт жилд нэг удаа үзүүлдэг буцалтгүй тусламжид ямар нэг өөрчлөлт ороогүй, “Гудамж” төслийн хүрээнд энэ жил Архангай, Увс, Хэнтий аймгуудын төвд гудамж, зам өргөтгөн шинэчлэх ажил хийнэ зэрэг мэдээллийг цахим хурлын үеэр орон нутгаас тавьсан асуултын мөрөөр тайлбарлалаа гэж Засгийн газрын Хэвлэл мэдээлэл, олон нийттэй харилцах албанаас мэдээллээ.

Засгийн газар өөрөө төрт ёс, хууль дээдлэх зарчимд нийцүүлэн ажиллахыг Иргэний нийгмийн сануулан Монгол улсын Ерөнхий сайд Ч.Сайханбилэгт шаардах бичиг хүргүүлсэн байна. Уг шаардах бичигт: Эрхэм таны амар амгаланг айлтгах дашрамд Танаар толгойлуулсан Шийдлийн Засгийн газар Үндсэн хуулийн үзэл баримтлал, тулгуур зарчим, шударга ёсыг хангаж баталгаажуулахад дорвитой, бодитой арга хэмжээг авч хэрэгжүүлнэ гэдэгт найдаж байгаагаа илэрхийлье.

Жендэрийн эрх тэгш байдлын тухай хуулийн 17 зүйлийн 1 дэх хэсэгт “Монгол улсын Ерөнхий сайдын эрхлэх ажлын хүрээнд жендэрийн эрх тэгш байдлыг хангах асуудал хамаарна” гэж заасан байдаг. Энэ нь жендэрийн эрх тэгш байдлыг хангах асуудал салбар дундын зохицуулалтыг зайлшгүй шаарддагтай холбоотой билээ.

Шинэчлэлийн Засгийн газраас хэрэгжүүлж буй тодорхой өөрчлөлт, зохион байгуулалтын хүрээнд Жендэрийн үндэсний хорооны ажлын албыг Хүн ам, хөгжил, нийгмийн хамгааллын яамны бүтцэд хамааруулж, төсвийг нь уг яамны сайдын багцад багтаах болж байгаа нь дээрх хуулийн заалтыг ноцтой зөрчсөн шийдвэр гэж бид үзэж байна.

Ерөнхий сайдын хувьд Та Жендэрийн үндэсний хороог тэргүүлсэн хэвээр ажилласан ч ажлын албаны бүтэц нь нэг яамны харъяанд багтсан тохиолдолд салбар дундын зохицуулалт хийх боломж хязгаарлагдана.

Дурын шалтаг тоочин хууль зөрчдөг энэ мэт жишгийг Засгийн газар өөрөө тогтоох нь төрт ёс, хууль дээдлэх зарчимд огт нийцэхгүй. Засгийн газар хуулийн хүрээнд аливаа шийдвэрээ гаргаж байх нь хүний эрх, ардчилал, шударга ёсны баталгаа болно.

Монгол Улсын Үндсэн хуулийн 38 дугаар зүйлийн 2 дахь хэсэгт заасны дагуу Засгийн газар нь “…төрийн хуулийг биелүүлж, Үндсэн хууль, бусад хуулийн биелэлтийг улс даяар зохион байгуулж хангах” үүрэгтэй. Иймээс Жендэрийн эрх тэгш байдлыг хангах тухай хуулиар хүлээсэн үүргээ чандлан биелүүлж, Жендэрийн үндэсний хорооны ажлын албаны бүтцийг өөрийн эрхлэх асуудлын хүрээнд бие даасан байдлаар ажиллуулахыг ШААРДАЖ БАЙНА.

Түүнчлэн Жендэрийн эрх тэгш байдлыг хангах тухай хуулийн 16 дугаар зүйлийн 1 дэх хэсгийн 7 дахь заалтад заасны дагуу жендэрийн эрх тэгш байдлыг хангах бодлого, үйл ажиллагааны үр дүнгийн талаар Монгол Улсын Их Хуралд тайлагнахыг ШААРДАЖ БАЙНА.

Иргэдээс төрийн байгууллага, албан тушаалтанд гаргасан өргөдөл, гомдлыг шийдвэрлэх тухай хуульд заасан хугацааны дотор шаардлагын хариуг бидэнд бичгээр өгнө үү” гэжээ.