Month: December 2014

Нийслэлийн Иргэдийн Төлөөлөгчдийн 2013 оны 10/39 дүгээр тогтоолоор батлагдсан Иргэдэд гэр бүлийн хэрэгцээний зориулалтаар газар шинээр өмчлүүлэх 52 байршлын 2 дугаар ээлжийн цахим бүртгэл эхлэхэд бэлэн боллоо.

Энэ удаад Сонгинохайрхан дүүргийн Эмээлт уулын Баруун хоолой, Баянзүрх дүүргийн Улиастай, Их цуурайн ам, Баянзүрх дүүргийн Улиастай, Бага цуурайн ам, Багануур дүүргийн Тариан булгийн 2-р хэсэг, Багахангай дүүргийн Хангайн хөндийн 1-р хэсэгт нийттэй 2245 га газарт 14,490 иргэнд олгох юм байна. Мөн өмнөх таван байршлаас Сонгинохайрхан дүүргийн Соёондын ам, Багахангай дүүргийн Бор үзүүр, Багануур дүүргийн Тариан булгийн 1-р хэсэгт нийт 1203 га газарт 1329 иргэнд цахим системээр газар өмчлүүлэхээр болсон байна.

Цахим системээр иргэдээс газар өмчлөх хүсэлт хүлээн авах бүртгэлийн ажиллагаа арванхоёрдугаар сарын 10-нд эхэлнэ.

Алдуул мал, бусдын алдаж гээсэн эд зүйлийг авч ашиглаж, үрэгдүүлснээс үүдэж гэмт хэрэгт холбогдох нь ихэсчээ. Монгол Улсын Эрүүгийн хуулийн тусгай ангийн 151 дүгээр зүйлд “Алдуул мал, гээгдэл буюу санамсаргүй олдсон эд хөрөнгийг завшсан бол хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах ял шийтгэнэ.” гэж заасан байдаг. Энэ заалтыг зөрчсөн тохиолдол цагдаагийн байгууллагад бүртгэгддэг. Голдуу иргэд энэ хууль дүрэм заалтыг мэдэхгүй зөрчсөн тохиолдол их.

Цагдаагийн ерөнхий газрын Мэдээлэл технологийн төвөөс авсан гэмт хэргийн судалгааг сүүлийн 5 жилийн байдлаар он тус бүрээр харуулбал: 2010 онд 142, 2011 онд 128, 2012 онд 247, 2013 онд 319, 2014 оны эхний 9 сарын байдлаар 306 хэрэг тус тус цагдаагийн байгууллагад бүртгэгдэн шалгагдсан аж.

Бүртгэгдсэн нийт гэмт хэргийн ихэнх нь хэрэг бүртгэлт, мөрдөн байцаалт, прокурор, шүүхийн шатанд хэрэгсэхгүй болж, Захиргааны хариуцлагын тухай хуулийн дагуу шийдвэрлэгддэг боловч 2013 онд 10, 2014 оны эхний 9 сарын байдлаар 7 иргэн дээрх хуулийн дагуу шүүхээс баривчлах болон хорих, торгох ял авчээ.
Хэрэгт холбогдон шүүхээс ял авсан 17 иргэний 15 нь хөдөө, орон нутгийн иргэд байдаг ба алдуул мал завшсан болох нь хэрэг бүртгэлт, мөрдөн байцаалтын шатанд нотлогдсон байна.
Дээрх нөхцөл байдалд дүгнэлт хийхэд иргэд хууль эрх зүйн мэдлэг хангалтгүй, бусдын эд хөрөнгийг хулгайлаагүй л бол гэмт хэрэг биш гэсэн ойлголттой байдгаас энэ төрлийн гэмт хэрэгт холбогдож, улмаар шүүхээс хуулийн хариуцлага хүлээх нөхцөл байдал үүсдэг.
Гээгдэл эд хөрөнгө, алдуул мал, дарагдмал үнэт зүйлсийг олсон иргэн Монгол Улсын Иргэний хуулийн 116, 117, 118 дугаар зүйлд заасны дагуу холбогдох төрийн захиргааны байгууллагад мэдэгдэх, хүлээлгэн өгөх үүрэгтэй ба эд зүйлийн тодорхой хувийг урамшуулал, шагнал болгон авах, хуульд заасан хугацаанд эзэмшигч нь тогтоогдоогүй тохиолдолд өөрийн эзэмшлийн болгох зэрэг эрхтэй байдаг ажээ.

Хүний эрхийн өдөр энэ сарын 10-нд тохионо. Үүнтэй холбогдуулан НҮБ-ын Хүний эрхийн дээд комиссараас мэдэгдэл гаргажээ. Мэдэгдэлд “Хүн бүр төрөхөөсөө эрх чөлөөтэй, нэр төр, эрхийнхээ хувьд адил тэгш байна” хэмээсэн нь хүний эрхийн гэрээн дэх хамгийн сонсголонтой, сайхан үгс гэж болно. Хүний эрхийн түгээмэл тунхаглал нь гачигдах зүйлгүй, айх айдасгүй амьдралын тулгуур болох хүн бүрийн эдийн засаг, нийгэм, улс төр, соёлын болон иргэний эрхүүдийг баталгаажуулдаг.

Дээрх эрхүүд нь гагцхүү нэг улсад л эдлэгдэхгүй. Мөн тодорхой нэг эрин үе эсхүл аль нэг нийгмийн бүлэгт хамаарах буюу зөв зан үйлд зориулсан шагнал биш. Хүний эрх нь бүх хүнээс салшгүй, жилийн 365 хоногийн турш цаг ямагт, хаана ч эдэлвэл зохино. Хүйс, нийгмийн анги, давхарга, сүсэг бишрэл, нас, бэлгийн чиг баримжаа, хөгжлийн бэрхшээлээсээ үл шалтгаалан бүхий л арьсны өнгө, угсаа гарвалтай, бүр угсаатны цөөнхөд багтах хүмүүс, иргэн, эсхүл цагаач эсэхээс хамааралгүй эдэлдэг онцлогтой.

Хүний эрхийн түгээмэл тунхаглалаар дамжуулан дэлхий дээрх хүн бүрийн өмнө хүлээсэн үүрэг амлалт нь өөрөө том амжилт билээ. Тодруулбал, хүн төрөлхтний түүхэнд хар толбо үлдээсэн дарангуйлал, ялгаварлан гадуурхалт, хүнийг дорд үзэх, гутаан доромжлох явдлыг эрс эсэргүүцсэн юм. Үүнтэй уялдан уг тунхаглалыг баталснаас хойш үй олон хүн эрх чөлөөтэй болжээ.

Дэлхий дахинд хүний эрх зөрчигдөхөөс урьдчилан сэргийлж байгаагийн зэрэгцээ бие даасан, хараат бус байдлыг олж авлаа. Хүн бүр гэж хэлэхгүй ч маш олон хүн эрүү шүүлтэд өртөх, шударга бусаар шоронд хоригдох, цаазаар авахуулах, хүчээр сураггүй алга болгох, хавчиж шахах, ялгаварлан гадуурхахаас ангид байж, шударга, тэгш байдлаар боловсрол эзэмших, эдийн засгийн боломж эдлэх, соёлын баялаг уламжлалаа хадгалах, хангалттай нөөцөөс хүртэх, эрүүл мэндийн үйлчилгээнд хамрагдах боломжтой боллоо.

Хүний эрхийн олон улсын эрх зүйн хүчирхэг тогтолцоо нь буруу үйлдэлд шударга ёсыг тогтоож, үндэсний болон олон улсын түвшинд хүний эрхийг хамгаалдаг болжээ.

Хүний эрхийн түгээмэл тунхаглалын хүч нь дэлхийг өөрчлөх санаа бодолд оршино. Ялангуяа бидэнд жилийн 365 өдрийн туршид хүний эрх нь чухал, хуваагдашгүй болохыг ойлгуулдаг. Мөн Хүний эрхийн өдөр нь өдөр болгон тохиох буюу хүн бүр тэгш эрх, эрхэм зэрэг, эрх чөлөөтэй байх явдлыг хангахын төлөө бидний ажиллах өдөр.

Нэгдсэн Үндэстний Байгууллагын Хүний эрхийн байгууллага нь дуу хоолойгоо хүргэж чадахгүй байгаа сая сая хүмүүсийн талд зогсдог. Та бүхэн бидэнтэй хэвлэл мэдээллийн хэрэгслээр дамжуулан эсхүл биечлэн нэгдэнэ гэдэгт найдаж байна. Бид хамтдаа шаардах ёстой зүйл бол жилийн 365 хоногийн турш түгээмэл, хуваагдашгүй, салшгүйгээр орших хүний эрхээ баталгаатай эдлэх явдал юм” гэжээ.