Month: December 2014

Өглөө.мн сайт халдлагад өртсөнтэй холбогдуулан Монголын Сайтын холбооноосмэдэгдэл гаргалаа. Уг мэдэгдэлд ” Өнгөрсөн долоо хоногт Монгол улсад улс төрийн томоохон акц болж өнгөрсөн бөгөөд шийдлийн Засгийн газар байгуулагдсан энэхүү онцгой цаг үетэй давхцан Монгол улсад үйл ажиллагаа явуулж буй цахим мэдээллийн хэрэгслүүд, тухайлбал Оллоо.мн, Өглөө.мн, Үндэстэн.мн, Баабар.мн зэрэг вэбсайтууд кибер халдлагад өртөж олон жилийн сэтгүүлчдийн нөр их хөдөлмөр, мэдээллийн бааз нь устлаа. Энэ хэрэг улс төрийн чухал үйл явдлуудтай давхцсан нь Хэвлэл мэдээллийн хэрэгслүүдийн олон нийтэд бодит үнэнийг мэдээлэх үүргээ биелүүлэхэд нь зориудаар саад хийсэн үйлдэл байж болзошгүй хэмээн Монголын Сайтын Холбоо үзэж цахим мэдээллийн хэрэгслүүдийг хакердсан халдлагыг эрс эсэргүүцэж байгаагаа мэдэгдэж байна. Мөн Монголын Сайтын Холбооны гишүүн вэбсайтууд болон нийт цахим мэдээллийн хэрэгслүүдийг аюулгүй байдлаа сайтар хангаж, системийн хамгаалалтаа найдвартай хийж аливаа халдлагаас урьдчилан сэргийлэхийг сэрэмжлүүлэн сануулж байна.Өглөө.мн, Үндэстэн.мн зэрэг халдлагад өртсөн манай гишүүн сайтууд кибер халдлагын ард хэн байв гэдгийг илрүүлэн тогтоолгохоор Тагнуулын Ерөнхий Газрын Кибер аюулгүй байдлын газар, Эрүүгийн Цагдаагийн Газрын Цахим гэмт хэрэгтэй тэмцэх албанд хандаад байна. Хууль хүчний байгууллагууд хурдан шуурхай ажиллаж энэ хэргийн бодит үнэнийг олж тогтооно гэдэгт итгэлтэй байна. Монголын Сайтын Холбоо нь гишүүн сайтуудынхаа болон бусад цахим мэдээллийн хэрэгслүүд, Монгол улсад үйл ажиллагаа явуулж байгаа бүх хэвлэл мэдээллийн хэрэгслүүдийн нийтлэг эрх ашгийг тууштай хамгаалан зогсох болно” гэжээ.

ЦЕГ-ын цахим гэмт хэрэгтэй тэмцэх албанаас сэрэмжлүүлэг гаргажээ. Уг сэрэмжлүүлгийг бүрэн эхээр нь хүргэе.

Ял шийтгэл гэдэг таны амьдралд авч болох хамгийн том хар толбо учраас хэсэгхэн зуурын уур бухимдал, үзэн ядалтаас болж насан туршдаа харамсах зүйл хийхгүйн тулд өөрөө болон найз нөхөддөө энэ талаар сануулж байгаарай.

Та яг одоо хэн нэгний зургийг нь зөвшөөрөлгүйгээр хуулж авч өөр зүйлд ашиглах гэж байна уу, эсвэл хэн нэгэнд уурласандаа болон өөр бусад шалтгаанаар түүний талаар таагүй мэдээллийг олон нийтэд тараах гэж байна уу, тэгвэл энэ үйлдэл тань зөв эсэхийг дахин дахин бодож үзэхийг зөвлөе.
Та хууль зөрчсөн юм биш биз таны дээрх буруу үйлдэл хуулинд юу гэж зохицуулагдсныг үзье.
Монгол улсын Эрүүгийн хуулийн 110 дугаар зүйл “Доромжлох”
110.1.Бусдын нэр төр, алдар хүндийг олон нийтийн өмнө доромжилсон бол хөдөлмөрийн хөлсний доод хэмжээг хориос тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах ял шийтгэнэ.
111 дүгээр зүйл “Гүтгэх”
111.1.Хүний нэр төр, алдар хүндийг гутаах зорилгоор илт худал гүжирдлэг тараасан бол хөдөлмөрийн хөлсний доод хэмжээг хориос тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах ял шийтгэнэ.
111.2.Гүтгэлгийг олон нийтэд тараасан, эсхүл доромжлох, гүтгэх гэмт хэрэгт урьд ял шийтгүүлсэн этгээд үйлдсэн бол хөдөлмөрийн хөлсний доод хэмжээг тавин нэгээс нэг зуун тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл гурваас дээш зургаан сар хүртэл хугацаагаар баривчлах ял шийтгэнэ.
Ял шийтгэл гэдэг таны амьдралд авч болох хамгийн том хар толбо учраас хэсэгхэн зуурын уур бухимдал, үзэн ядалтаас болж насан туршдаа харамсах зүйл хийхгүйн тулд өөрөө болон найз нөхөддөө энэ талаар сануулж байгаарай.

Улсын Их Хурлын дарга З.Энхболд өнөөдөр /2014.11.08/ “Монголын ардчилал Японы хэвлэлд” гэрэл зургийн үзэсгэлэнгийн нээлтэд оролцож үг хэллээ. Тус үзэсгэлэнгийн нээлтийн арга хэмжээ Төрийн ордон дахь Төрийн түүхийн музейд 12.00 цагаас эхэлсэн юм.

Мөн Боловсрол, шинжлэх ухааны яамны харьяа Өсвөрийн зохион бүтээгчдийн ерөнхий боловсролын лаборатори ахлах сургуулийн нээлтийн арга хэмжээнд 13.00 цагаас оролцоно.

Залуу техникчдийн ордны суурин дээр ажиллаж байгаа тус сургуулийг хүүхдийн техник сэтгэлгээг хөгжүүлэх, инженер техникийн мэргэжлийн чиг баримжаа олгох сургалтын чиглэлээр лаборатори сургууль болгон их, дээд сургуулиудын дэмжлэгээр сургалтын кабинетууд байгуулж өмнө нь хичээллэж байсан сургалт дугуйлангуудыг сэргээн хичээллүүлж эхэлсэн байна хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.

МҮХАҮТ-ын ээлжит XIX их хурал өнөөдөр Соёлын төв өргөөнд үргэлжилж байна. Тус хурлаар ирэх дөрвөн жилд МҮХАҮТ-ыг удирдах удирдлагуудыг сонгох гэж байгаа билээ. УИХ-ын гишүүн С.Дэмбэрэл өнгөрсөн дөрвөн жилд хийж гүйцэтгэсэн ажлаа хурлын үеэр танилцууллаа. МҮХАҮТ-ын Удирдах зөвлөлийн дарга буюу ерөнхийлөгчид С.Дэмбэрэл, О.Амартүвшин, Б.Лхагважав нар нэр дэвшиж байна. МҮХАҮТ-ын даргад М. Оюунчимэг, Б.Хаш-Эрдэнэ, В.Отгондэмбэрэл, Б.Мөнхцэлмэг нар нэр дэвшжээ. МҮХАҮТ-ын орлогч даргад Ц.Янсанжав, Ч.Нэргүй, Т.Золбоот, М.Сарандаваа, С.Бат-Эрдэнэ нарын хүмүүсийг нэр дэвшүүлжээ.

Монголын хөрөнгийн биржийн шинэчилж баталсан “Бүртгэлийн журам”-тай холбогдуулж холбогдуулж биржид бүртгэлтэй хувьцаат компаниудыг I, II, III гэсэн шинэ ангилалд хуваасан байна. Монголын хөрөнгийн биржийн I ангилалд компани байхгүй бол II ангилалд 89 компани багтжээ. Харин III ангилалд 148 компани багтжээ. Бүртгэлийн I ангилалд компанийн засаглалын зарчмыг үйл ажиллагаандаа нэвтрүүлж, мөрдлөг болгон ажилладаг, зах зээлийн үнэлгээ өндөртэй, хөрвөх чадвар сайтай, нэр хүндтэй хувьцаат компаниуд багтах юм байна. II ангилалд үнэ цаас нь биржээр тогтмол арилжигддаг, компанийн зах зээлийн үнэлгээ нь тодорхой шалгуурыг хангасан, тогтвортой үйл ажиллагаа явуулдаг компаниуд бүртгэгдэж байгаа аж. III ангилалд эрсдэл өндөртэй жижиг дунд хэлбэрийн компаниуд, 100 хувь төрийн өмчит хувьцаат компаниуд болон Санхүүгийн зохицуулах хорооноос арилжааг нь зогсоогоод байгаа арилжааны идэвхи сул компаниуд багтаж байгаа гэнэ.

“Бөмбөгөр” худалдааны төв дээр цай зарж амьдралаа залгуудаг 90 настай Хорлоо эмээд туслах аян “Монгол тусгал залуусын нэгдэл” ТББ-ын санаачилгаар эхэлсэн юм. Аяны хүрээнд Хорлоо эмээг байшинтай болгохоор зорьсон билээ. Сайхан сэтгэлийн үүднээс эхлүүлсэн уг аяны явцын талаар мэдээлэх хэвлэлийн бага хурал өнөөдөр “Өдрийн сонин”-ы Асуух эрхийн танхимд болов. Хорлоо эмээд туслах аяны явцыг мэдээлсэн уг хуралд”Монгол тусгал залуусын нэгдэл” ТББ, тусалж байгаа барилгын компанийн төлөөлөл оролцлоо. “Монгол тусгал-Залуусын нэгдэл” ТББ-ын тэргүүн Б.Ням-Эрдэнэ, тус байгууллагын ТУЗ-ийн гишүүн Ц.Сувд-Эрдэнэ, О.Түвшин, Ж.Цэцэгдарь нар хэвлэлийн хуралд ирсэн юм. ХЮОН консалтингийн зөвлөх Б.Ууганцэцэг, Барилга угсралт хариуцсан менежер Э.Энхбилгүүн, төсөл хариуцсан межежер Б.Мөнх-Эрдэнэ нар мөн оролцсон. “Монгол тусгал-Залуусын нэгдэл” ТББ-ын тэргүүн Б.Ням-Эрдэнэ “Манай байгууллага хүнд хэцүү амьдралтай ч сайхан амьдралын төлөө тэмүүлж яваа хүмүүст сэтгэлийн дэм хайрлах зорилготой нийгэмд үйлчлэх залуусын сайн дурын нэгдэл юм. Анх 2011 онд сайн үйлс хийх хүсэлтэй хэсэг залуус онлайнаар нэгдэж хүнд хэцүү амьдралтай хүмүүст туслах зорилгоор ажлаа эхэлсэн. Одоогийн байдлаар зуу гаруй хүнд тусалсан. Манайхан Хорлоо эмээд туслах санаачлага гарган байшин барьж өгөхөөр болсон юм. Байшин маань ард түмний хүчээр босч байгаа” гэж ярилаа.

Нийслэлийн удирдлагын зөвлөлийн ээлжит хуралдаан болж, Нийслэлчүүдийн шинэ жилийн нэгдсэн үйл ажиллагааг зохион байгуулах ажлын талаар танилцууллаа. Хуралдаанд асуудлыг нийслэлийн Засаг даргын Нийгмийн хөгжлийн асуудал хариуцсан орлогч, Шинэ жилийн үйл ажиллагааг зохион байгуулах ажлын хэсгийн дарга Ц.Энхцэнгэл танилцууллаа. Нийслэлчүүддээ зориулан он солигдох мөчийг Их эзэн Чингис хааны талбайд хамтдаа угтан, өнгөрүүлэх, хүүхэд багачуудаа баярлуулах зорилгоор жил бүр нэгдсэн шинэ жилийн үйл ажиллагааг зохион байгуулдаг уламжлалтай. Энэ жил төв талбайн сүлд модыг шар гэрлээр чимэх бөгөөд нийслэлчүүдтэйгээ хамт 12 дугаар сарын 15-ны өдөр гэрэл асаана. Д.Сүхбаатарын хөшөөг тойруулан цэнхэр өнгийн гэрлээр сүлд модны хэлбэртэй дөрвөн ширхэг торшёрт байрлуулахаар төлөвлөж байна. Харин шинэ жилийн үдшийн цэнгүүн 12 дугаар сарын 31-ний өдөр Их эзэн Чингис хааны талбайд болж, рок попын хамтлаг дуучдын урлагийн тоглолт, ёслолын буудлага зэрэг үйл ажиллагааг зохион байгуулна. Шинэ жилийн баярын цэнгүүний төв тайз нь талбайн баруун жишгүүрт НЗДТГ-ын өмнөөс хойш сунасан хэлбэртэй байхаар тооцоолсон байна. Мөн шинэ жилийн баяраар нийслэлийнхээ хүүхэд багачуудад зориулан шинэ жилийн хоёр үйл ажиллагааг зохион байгуулах гэж байна. Нийслэлийн есөн дүүргийн амьжиргааны баталгаажих төвшнээс доогуур орлоготой өрхийн 1000 хүүхдийн баярын арга хэмжээ Монголын Хүүхдийн ордонд, нийслэлд үйл ажиллагаа явуулж буй 32 халамж асрамжийн төв хүмүүжиж байгаа 1000 хүүхдийн “Харшийн сүлд модны наадам” Олон улсын хүүхдийн Найрамдал төвд болох юм. Харин Нийслэлийн Засаг дарга эдгээр үйл ажиллагаанд шаардлагатай хөрөнгийг аль болох нийслэлээс зардлаас гаргахгүйгээр хуульд нийцүүлэн хувийн аж ахуйн нэгжтэй хамтран ажиллаж шийдвэрлэх боломжийг судлахыг зохион байгуулах комисст үүрэг болголоо гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.