Тэнхлэг зууч, Актив зууч, Монголиан Пропертис компаниудын консорциум хамтран Монголбанкны захиалгаар энэ оны 11 дүгээр сарын “Орон сууцны үнийн индекс”-ийн судалгааг олон нийтэд танилцууллаа. Уг судалгаанд Улаанбаатар хотод борлуулагдахаар зах зээлд нийлүүлэгдсэн шинэ, хуучин 3600 орчим орон сууцыг жишиг болгон сонгож хамруулсан аж. Өнгөрөгч сард суурь үе буюу энэ оны 1 дүгээр сараас 19,8 хувийн өсөлттэй гарсан байна. Энэ нь өмнөх сарынхаас 1,0 хувиар буурсан үзүүлэлт юм. Жилийн өмнөх мөн үетэй харьцуулвал 0,48 хувийн өсөлттэй гарчээ. Энэ нь сүүлийн 4 сар дараалан орон сууцны үнийн өсөлт буурсан гэсэн тооцоог Монголбанкнаас мэдээллээ.
Орон сууцны үнэ ханшийн хувьд байрлал, хэмжээ, хуучин шинээсээ хамааран харилцан адилгүй байна. Орон сууц борлуулалтын компаниудаас гаргасан үнийн дүнг харьцуулбал:
-Нэг өрөө байрны үнэ 1 мкв – 1.540.000- 1.750.000 төгрөг / Нийт дундаж үнэ – 46,950.000 – 56.200.000 төгрөг /
-Хоёр өрөө байрны үнэ 1 мкв – 1.530.000 – 1.845.000 төгрөг / Нийт дундаж үнэ – 68.850.000 – 118.000.000 төгрөг /
-Гурван өрөө байрны үнэ 1 мкв – 1.500.000 – 1.650.000 төгрөг /нийт дундаж үнэ – 100.500.000 – 133.000.000 төгрөг /
УИХ-ын чуулганы нэгдсэн хуралдаанаар Монгол Улсын 2014 оны төсвийн хуульд өөрчлөлт оруулах тухай болон холбогдох бусад хуулийн төслүүдийн нэгдүгээр хэлэлцүүлгийг хийж дуусган, хоёрдугаар хэлэлцүүлэгт бэлтгүүлэхээр Төсвийн байнгын хороонд шилжүүллээ.
УИХ-ын гишүүн Н.Номтойбаярын хэлснээр УИХ дахь МАН, АН-ын зөвшилцлийн ажлын хэсэг дэд сайдуудын асуудлаар тодорхой тохиролцоонд хүрсэн байна. Тодруулбал, МАН-аас засагт долоон дэд сайд томилох, үндсэн чиг үүргийн яамдад дэд сайдуудыг сөөлжүүлж томилох гэх зэрэг асуудлаар тохиролцсон гэж Н.Номтойбаяр гишүүн хэлэв. Гэвч хэн хэнийг дэд сайдын суудалд томилох вэ гэдэг асуудлыг хэлэлцэж эхлээгүй байгаа аж. МАН-ын зүгээс дэд сайдуудад аль болох мэргэжлийн хүн томилохыг эрмэлзэж байгаа бололтой.
Улсын Их Хурлын чуулганы баасан гараг /2014-12-12/-ийн нэгдсэн хуралдаан Эм, эмнэлгийн хэрэгслийн тухай хуульд нэмэлт, өөрчлөлт оруулах тухай, Эрүүл мэндийн тухай хуульд нэмэлт оруулах тухай хуулийн төслүүдийг хэлэлцэх эсэхийг үргэлжлүүлэн хэлэлцэв.Улсын Их Хурлын гишүүн О.Баасанхүүгийн Улсын Их Хуралд өргөн мэдүүлсэн дээрх хуулийн төслүүдийг гишүүдийн олонхи хэлэлцэхийг дэмжээгүй тул хууль санаачлагчид нь буцаах шийдвэр гаргалаа.
Бусдын биед хүнд гэмтэл учруулсан хэргээр анхан шатны шүүхээс долоон жилийн хорих ял сонссон “Шинэ үе” продакшны жүжигчин Ц.Алдармаа өнгөрсөн долоо хоногт батлан даалтад гарчээ. Анхан шатны шүүхээс долоон жилийн хорих ял сонссон ч тэрээр шүүхийн шийдвэрийг эсэргүүцэн давж заалдах шатны шүүхэд гомдол гаргасан. Уг гомдлыг Нийслэлийн шүүх хэлэлцэж, гэмтлийн зэрэг тогтоогдохгүй байна гэх үндэслэлээр нэмэлт мөрдөн байцаалтад буцаагаад байсан юм. Тэрээр хоёр сарын хугацаанд ШШГЕГ-ын харьяа цагдан хорих 461 дүгээр ангид саатуулагдаад гарч байна.
Нийслэлийн хэмжээнд 2014 оны 11 сарын байдлаар согтууруулах ундаа худалддаг, түүгээр үйлчилдэг аж ахуйн нэгж байгууллагуудад давхардсан тоогоор 3174 удаа хяналт шалгалт явуулж нийт 1532 иргэн, аж ахуй нэгжийг Монгол Улсын “Архидан согтуурахтай тэмцэх тухай” хууль болон бусад хууль тогтоомжийн дагуу торгуулийн болон үйл ажиллагаа явуулах зөвшөөрлийг цуцлах арга хэмжээ авчээ.
Улаанбаатар хотын цагдаагийн газрын мэдээлснээр нийслэлд 2014 оны эхний 11 сарын байдлаар бүртгэгдсэн 550 гэмт хэрэгт 570 хүүхэд холбогджээ. Харин гэмт хэргийн улмаас 867 хүүхэд хохирчээ. Энэ тоон баримтыг өмнөх оны мөн үеийнхтэй харьцуулахад насанд хүрээгүй хүмүүсийг үйлдсэн гэмт хэрэг 9.8 хувиар, холбогдогч 5.4 хувиар хохирогч 5.9 хувиар тус тус өссөн үзүүлэлттэй байна. 
Чадал, чансаагаараа Аваргуудын Лигийн дараа жагсдаг Европын лигийн хэсгийн тоглолтууд урд шөнө өндөрлөж ирэх жилийн хавар хасагдах шатанд тоглох азтай 16 багийн нэрс тодорлоо. Эдгээр багууд нь хэсгийн тоглолтод хэрхэн наадаж ямар байр эзэлснээсээ шалтгаалан хоёр хэсэгт хуваагдан сугалаанд оролцох бөгөөд Аваргуудын Лигийн хэсгийн тоглолтод хэсэгтээ гуравдугаар байр эзэлсэн багууд мөн тэдэн дээр нэмэгдэн плей-оффын тэмцээнүүдэд наадах болно. Сугалаа даваа гаригийн 20 цагт Ньон хотод эхлэх ба багууд чансаагаараа хэрхэн хуваагдсаныг танилцуулъя 
НҮБ-ын Хүн амын сангийн Дэлхийн хүн амынбайдал тайлангаас үзвэл Монгол улс “Шилжилтийн хожуу үед орсон”орнуудын ангилалд хамаарч байгаа бөгөөд эдгээр орнууд эдийн засгийн өсөлтийг эрчимжүүлж,залуучуудын хөдөлмөр эрхлэлтийг дараах замаар нэмэгдүүлэх хэрэгтэй гэж үзэж байна. Үүнд, макроэдийн засгийн менежмент, нээлттэй худалдаа, сайн засаглал, хөдөлмөрийн болон санхүүгийн зах зээлийн үйл ажиллагааг сайжруулах арга зам байгаа аж. Манай улсын нийт хүн амын 38.5 хувийг 15-34 насны залуучууд эзэлж байна. Эдгээр залуучуудынажилгүйдлийн түвшин 16.6 хувь байгаа бөгөөд 228.5 мянган залуучууд ямар нэгэн шалтгаанаар хөдөлмөр эрхлээгүй байгаа нь нийт залуучуудын 24.1 хувийг эзэлж байна. Түүнчлэн 125,9 мянган залуу малаж ахуй эрхэлж байгаа нь нийт залуучуудын 13,1 хувийг эзэлж байна гэсэн тоон үзүүлэлт гарчээ. Монгол Улсын Засгийн газар, Хүн амын хөгжил, нийгмийн хамгааллын яам залуучуудын хөгжилд анхаарлаа хандуулан сүүлийн 20 жилд анх удаа залуучуудын асуудлыг дагнан хариуцсан “Залуучуудын хэлтэс” -ийг байгуулан ажиллаж байна. Энэ хүрээнд Залуучуудын Төрийн бус байгууллагуудтай тогтмол уулзаж залуучуудын тулгамдсан асуудлуудыг хэлэлцэж, Засгийн газрын хөтөлбөрүүдэд тусгахад анхаарч байна.