Эзгүй хээр талд биш түм түжигнэж, бум бужигнасан хотын төвд олон түмний нүдэн дээр нэгэн эр хэнэг ч үгүй морь харж зогсжээ. Төрийн ордны ойролцоо, “Туушин” зочид буудлын үүдэнд юм шиг байна. Хэн нэгэн түүний зургийг хэдийнэ аваад фейсбүүк ертөнцөөр түгээв. Хүмүүс түүнийг элдвээр хэлж, буруушааж байна. “Соёлт хүмүүн болоход нэг сая жил зарцуулсан. Харин буцаад сармагчин болохын тулд ганц цаг л байхад хангалттай юм байна” гэх мэтээр халаглацгаажээ. Мэдээж түүнийг шүүмжлэх нь түмэн зөв. Малаас дор аашилж байгаа тэр эрийг хараах, гайхах, жигших ч багадмаар.
Гэхдээ энд нэг л зүйл тодорхой байна. Тэнэг л биш бол эрүүл хүн хэзээ ч ингэж авирлахгүй. Ухаанаа алдсан хүн л айх, ичихийг мэдэхгүй, соёл, хүмүүжил гээчийг мартдаг. Тэгвэл яавал ухаанаа алддаг нь ойлгомжтой. Савнаасаа бусдыг дийлдэг сархад л ухамсарт хүн төрөлхтнийг энэ мэт ухаангүй болгож байна. Тэр эр шинэ жил тэмдэглээд согтуу байсан учраас л ингэж шившиглэсэн байж таараа. Одоо энд тэндгүй шинэ жил тэмдэглэж, шилэн өргөмжлөлүүд тэвэрсэн хөлчүү залуус олширч байна. Архиа бага уухгүй бол өнөөдөр энэ эрийг шүүмжилж, хэлэх үгээ барж суугаа танд ч ингээд зогсч байх өдөр ирэхгүй гэх баталгаа алга, монголчууд минь. Шинэ жил яахав солигддогоороо солигдоно, архиа л багасгая.
Я.мӨНгӨНЦЭЦЭг
“Single Ladies” инээдмийн киногоор дэлгэцийн урлагт нэгэн шинэ өнгө нэмсэн жүжигчин Г.Ундармаа удахгүй ээлжит уран бүтээлээ дэлгэх нь ээ. Тэрээр энэ удаад монголын балетын урлагийг дэлгэцнээ мөнхлөхөөр “Тютю” киног бэлэн болгоод байгаа юм. Жүжигчин, продюсер, найруулагч Г.Ундармаагийн бүтээж буй “Тютю” кинонд балетчин бүсгүйн амьдралын жаргал зовлонгийн талаар өгүүлэх бөгөөд гол дүрд ОХУ-д балетын чиглэлээр суралцдаг Б.Билгүүн гэх бүсгүй сонгосон байна.
Монголын спортын шилдэг тамирчдыг тодруулдаг “Бөртэ чоно 2014” наадмын санал асуулга дуусах шатандаа оржээ. Монголын спортын сэтгүүлчдийн холбоонд гишүүнчлэлтэй 100 орчим сэтгүүлч энэ удаагийн санал асуулгад оролцож байгаа бөгөөд 70 сэтгүүлч саналаа ирүүлээд байгаа ажээ.
“Алдарт эх”-ийн одонгийн мөнгийг хавтгайруулан олгодог тогтолцоог энэ Засгийн газар өөрчлөх бололтой. Учир нь төрүүлсэн хүүхдүүд нь өөрсдөө ээж эмээ, аав өвөө болсон ч “Алдарт эх”-ийн одонгийн мөнгийг үргэлжлүүлж авсаар байдаг аж. Тиймээс энэ байдлыг халж үр хүүхдүүд нь 0-18 настай алдарт эхчүүддээ л мөнгийг нь өгдөг зөв зарчимтай тогтолцоонд шилжэх талаар Ерөнхий сайд Ч.Сайханбилэг мэдээллээ.
Нийслэлийн Засаг даргын захирамжийн дагуу нийслэлийн ЗДТГ, Хүүхэд, гэр бүл хөгжлийн газартай хамтран “Нийслэлийн шилдэг хүүхэд” шалгаруулах ёслолын арга хэмжээг энэ сарын 26-ны өдөр зохион байгуулах гэж байна. Уралдааны эхний шатанд дүүрэг тус бүрээс шилдэг хүүхдүүдийг шалгаруулах бөгөөд дүүргүүдээс шалгарсан хүүхдүүдийн материалыг энэ сарын 22-ны дотор нийслэлийн Хүүхэд, гэр бүл хөгжлийн газарт ирүүлнэ. Тэмцээнийг “Шилдэг тамирчин хүүхэд”, “Шилдэг авъяаслаг хүүхэд”, “Шилдэг бүтээлч хүүхэд”, “Шилдэг оюунлаг хүүхэд”, “Шилдэг манлайлагч хүүхэд” гэсэн 5 төрөлд шалгаруулж урамшуулах юм. 
Украины Ерөнхийлөгч Петр Порошенко өнгөрсөн долоо хоногт 2020 оны эхээр “НАТО” болон Европын холбоонд элсэхээ мэдэгдсэн юм. Тэрбээр мэдэгдлийнхээ үеэр “НАТО”-ийн гишүүн орнуудаас Украинд зэвсэг нийлүүлэхийг хүсч, 10 гаруй орон руу хүсэлт илгээсэн” гэдгээ хэлсэн билээ. Харин “НАТО”-ийн ерөнхий нарийн бичгийн дарга Йенс Столтенберг “Украин “НАТО”-ийн гишүүн болж, албан ёсоор баталгаажсан өдрийг хүртэл зэвсгийн тусламж үзүүлэхгүй. Украины Засгийн газарт “НАТО”-ийн гишүүн орнууд зэвсэг нийлүүлсэн тохиолдолд гишүүнчлэлийн эрхийг нь цуцлах болно” гэж мэдэгджээ.
Нийслэлийн Засаг Даргын А/1037 дугаартай захирамжийг хэрэгжүүлэх ажлын хүрээнд Нийслэлийн Хүүхэд гэр бүлийн хөгжлийн газартай хамтран “Гэр бүлээсээ дайжин хараа хяналтгүй яваа, хараа хяналт сул, хөдөлмөр эрхлэгч хүүхдүүдийг илрүүлэх, бүртгэлжүүлэх, тэднийг гэмт хэрэг, зөрчилд өртөх, осгох, хөлдөх аюулаас урьдчилан сэргийлэх” зорилгоор “Хараа хяналтгүй хүүхдийг илрүүлэх” нэгдсэн арга хэмжээг халамж асрамжийн “Донбоско” төвд зохион байгуулан ажиллаа.
Цагдаагийн байгууллагаас өгсөн мэдээллээр энэ оны эхний 12 сарын байдлаар согтуугаар тээврийн хэрэгсэл жолоодсон 25766 хэргийг цагдаагийн байгууллага илрүүлэн шалгаж байгаа аж.
Дорнод аймгийн Засаг дарга аймгийн нийт нутаг дэвсгэрт гурван сарын хугацаанд мотоциклийн хөдөлгөөнийг түр зогсоох захирамж гаргажээ.
Монголын Залуучуудын холбоо, “Оргил уулын дугуйн клуб”, “Монголын Залуучуудын Аялал жуулчлалын хөгжлийн төв”-ийнхөн хамтран “Дугуйтай Санта-2014” сайн үйлсийн аяныг өчигдөр зохион байгууллаа.
