Нийслэлийн Засаг даргын санаачилгаар Засаг даргын Тамгын газраас нийслэлд үйл ажиллагаа явуулдаг 32 асрамж, халамжийн газрын 1000 хүүхдэд зориулан анх удаа “Харшийн сүлд модны наадам”-ыг Найрамдал олон улсын хүүхдийн төвд 12 дугаар сарын 27-ны өдөр зохион байгууллаа. Энэхүү үйл ажиллагаанд Нийслэлийн Засаг дарга бөгөөд Улаанбаатар хотын Захирагч Э.Бат-Үүл, Нийслэлийн Засаг даргын Тамгын газрын дарга Ё.Гэрэлчулуун болон спортын алдартнуудыг төлөөлөн МУ-ын Хөдөлмөрийн баатар, Олимпийн аварга Э.Бадар-Ууган болон холбогдох албаны хүмүүс оролцлоо.
Шинэ жилийн баярын үйл ажиллагааг нээж нийслэлийн Засаг дарга бөгөөд Улаанбаатар хотын захирагч Э.Бат-Үүл “Бага байхад шинэ жилийн ийм гоё тоглолт үзэх боломж олддоггүй байсан. Нийслэлийн Засаг даргын Тамгын газраас зохион байгуулан хүүхдүүд та бүхнийгээ харшийн сүлд модны наадамд оролцуулж байгаадаа баяртай байна. Шинэ жилийн баярт хүрэлцэн ирсэн хүүхдүүддээ шинэ оны мэнд хүргэе. Энэхүү үйл ажиллагааг ирэх жилээс уламжлал болгон зохион байгуулна” гэлээ.
Хүүхдүүд баг болон хуваагдан 8 өртөөгөөр аялаж, нэг өдрийг баяр хөөрөөр дүүрэн өнгөрөөлөө. Тэд оновчтой цохилт, олс таталт, хөгжилтэй бухиа, монгол тоолол, өнгөт бөмбөг, мийнтэй талбай, сантагийн гэр болон удирдлагатай бөмбөг өртөөнүүдээр баг багаараа ээлжлэн 15 минутын хугацаатайгаар аяласан. Мөн Бяцхан хүүхдүүдэд нийслэлийн Засаг дарга гарын бэлгээ гардуулж, Монголын Хүүхдийн ордон, Хөгжим бүжгийн коллеж болон найман аймгийн авъяаслаг уран бүтээлч хүүхдүүд буюу нийт шилдэг 100 гаруй хүүхдүүд оролцсон урлагийн тоглолтоо толилууллаа гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
Нийслэлийн Засаг даргын Тамгын газар болон Замын цагдаагийн газраас амралтын болон бүх нийтээр тэмдэглэдэг баярын өдрүүдэд автомашины дугаарын хязгаарлалт үйлчлэхгүй байх шийдвэр гаргажээ. Үндэсний эрх чөлөө, тусгаар тогтнолоо сэргээсний баярын өдөр буюу энэ сарын 29-нд болон ирэх сарын 1, 2-нд машины дугаарын хязгаарлалт үйлчлэхгүй, бүх авто машин замын хөдөлгөөнд оролцохоор болсон байна.
Хойд Солонгос АНУ-ын Ерөнхийлөгч Барак Обамаг “сармагчин” гэж нэрлэв. Хойд Солонгосын аюулаас хамгаалах хорооны төлөөлөгч “KCNA” агентлагт хийсэн мэдэгдэлдээ “Обама ойн сармагчин шиг үргэлж бодлогогүй үг, үйлдэл гаргадаг” хэмээсэн байна. Түүнчлэн Хойд Солонгост интернэт тасарсан нь Вашингтоны хийсэн хэрэг хэмээн Пхеньян мэдээлжээ. Хойд Солонгост өнгөрсөн долоо хоногийн эхээр /XII.22, 23/ хоёр удаа интернэт тасарч, “3G” гар утасны сүлжээнд доголдол гарсан юм. Хойд Солонгост интернэт тасарсан нь “Sony” компанийг хакердсан хэрэгт Пхеньянийг сэжиглэсэн Вашингтоны явуулга хэмээн Пхеньян мэдээлжээ. Түүнчлэн Хойд Солонгосын удирдагч Ким Чен Уныг хөнөөх хуйвалдааныг өгүүлсэн “Ярилцлага” /The Interview/ киног гаргах “Sony” компанийн шийдвэрт АНУ-ын Ерөнхийлөгч Барак Обама нөлөөлсөн гэж Пхеньян буруутгажээ. “Sony” компани хакеруудын сүрдүүлгээс болж “Ярилцлага” киног гаргахыг цуцлаад байсан ч өнгөрсөн Зул сарын баяраар Америкт нээлтээ хийсэн юм.
НЗДТГ-аас нийслэлчүүдийнээ баяр дээр баяр нэмж “Улаанбаатарын мөнгөн үдэш” шинэ жилийн цэнгүүнийг 12-р сарын 31-ний үдэш “Их эзэн Чингис хааны талбай”-д зохион байгуулахаар боллоо. Энэхүү арга хэмжээг жил бүр зохион байгуулсаар ирсэн уламжлалтай. Тэгвэл энэ жилийн цэнгүүний найруулагчаар ДБЭТ-ийн найруулагч E.Сарантуяа ажиллаж байгаа бөгөөд шинэ оны үдшийн цэнгүүнд Төрийн соёрхолт дуучин Д.Болд, “Шар айраг”, “Ньюанс”, “3 охин”, Б.Чинбат, С.Наран зэрэг хамтлаг дуучид оролцож ая дуугаа өргөх гэнэ. Мөн хотын удирдлагууд оролцож, Улаанбаатарын мөнгөн үдшээр нийслэлчүүдтэйгээ шинэ оныг хамтдаа угтахаар болжээ.
Дээрхийн гэгээн Далай лам Холливудын алдарт жүжигчин Ричард Гирийг хүлээн авч уулзжээ. Эдүгээ 65 настай Ричард Гир анх 1978 онд Непалаар аялж яваад буддизмыг сонирхох болсон аж. Тэрээр нэг бус удаа Далай ламын ачаар амьдралд итгэх итгэл нь бэхжсэн гэж мэдэгдэж байсан билээ. 
Аливаа баярын үеэр гэмт хэргийн гаралт нэмэгддэг. Ялангуяа дээрэм, танхай, хулгайн хэргээс гадна зам тээврийн ослын тоо өсдөг учраас энэ сарын 29 буюу маргаашнаас цагдаагийн байгууллагууд бэлэн байдалд шилжиж ажиллахаар болжээ. Харин арванхоёрдугаар сарын 31-нээс шинэ оны эхний өдөр хүртэл өндөржүүлсэн бэлэн байдалд ажиллахаар болсон талаар ЦЕГ-аас мэдээллээ. Ялангуяа Сүхбаатарын талбай, Их тойруу, III, IV хороолол, Сансар худалдааны төвийн орчимд цагдаагийн хүчийг нэмэгдүүлэх шаардлагатай байгаагаа ЦЕГ-ынхан онцолж байна.
Нигерийн удирдлагууд хэт даврагч “Боко Харам” бүлэглэлийн явуулж буй алан хядах ажиллагаанаас болж нийслэл болон хэд хэдэн том хотын гол замыг хааж, бүх төрлийн тээврийн хэрэгсэл явахыг хориглосон тухай “Ройтерс” агентлаг мэдээллээ. “Боко Харам” бүлэглэл он солигдох үеэр алан хядах ажиллагаа явуулж, “Нигерийг цусанд живүүлнэ” хэмээн мэдэгдээд буй. Энэхүү мэдэгдлийн дараа Засгийн газар хуралдаж, дээрх шийдвэрийг гаргасан байна. 
БНХАУ-д Энэ сарын 16-ны өдөр шувууны томуугийн А хүрээний (H7N9) вируст халдварын 11 шинэ тохиолдол бүртгэгдэж, таван хүн нас баржээ.