Month: December 2014

Шинжлэх ухааны ажилтны өдрийг тохиолдуулан Сансар од эрхсийн ордонд Монгол Улсын сансрын нисгэгч, Хөдөлмөрийн баатар, Шинжлэх ухааны гавьяат зүтгэлтэн, доктор профессор М.Ганзоригт зориулан өнөөдөр Хүндэтгэлийн самбар босголоо.
Самбарын нээлтэд БШУЯ, ШУА, Одон орон, геофизикийн судалгааны төв, Информатикийн хүрээлэн, “Сансар-81” ТББ-ын төлөөлөл хүрэлцэн ирж оролцов.
Энэхүү самбар нь Монгол хүн сансарт нисэхэд хэрхэн бэлдэж байсан талаар болоод түүний ажил амьдрал, бүтээл туурвилыг олонд танилцуулж, уг ордноор зочлогсдод өргөн мэдлэг болохуйц бүтээл болсон юм.
“Интеркосмос” сансрын хамтарсан нислэгт Монголын анхны сансрын нисгэгч,ЗХУ-ын Баатар, Монгол Улсын БаатарЖ.Гүррагчаатай гурван жилийн хугацаанд хэрхэн бэлтгэл хийж байсан тухай, Монгол Улсын шинжлэх ухаанд түүний оруулсан хувь нэмэр, Монголд анхирж байсан АНУ-ын нисгэгч Клаев Мэйрийн хамт авахуулсан түүхэн зураг,түүний хамт олон, монгол орны газарзүйн байрлалыг сансраас авч байсан зураг зэргийг байршуулсан байна.

Улсын Их Хурлын дарга З.Энхболд өнөөдөр Монголд ардчилсан хувьсгал өрнөсний 25 жилийн ойд зориулсан “Түүчээ цаг” үзэсгэлэнгийн нээлтэд оролцов.

Улсын Их Хурлын дарга З.Энхболд үзэсгэлэнг нээж хэлсэн үгэндээ, Ардчилсан хувьсгалын ойг энэ жилийн 12 дугаар сарын 20-оос ирэх жилийн 12 дугаар 20-ны өдрийг хүртэлх нэг жилийн хугацаанд тэмдэглэн өнгөрүүлнэ. Өмнө нь Ардчилсан намын ой, Монголын ардчилсан холбооны ой гэж хоёр тусдаа болдог байсан бол энэ жилээс нэг л ой тэмдэглэдэг болсон. Энэ бол ардчилалд элэгтэй хүн бүхний баяр хэмээн онцлон тэмдэглэв.

Зураач Л.Хадбаатар, Г.Нороврагчаа нарын энэхүү үзэсгэлэн Соёл, спорт, аялал жуулчлалын яам, Соёл урлаг хөгжүүлэх сангийн дэмжлэгтэйгээр зохион байгуулагдаж байна. Зураач Л.Хадбаатар нь ардчилсан хувьсгалд оролцож явсан учраас 1989-1990 онд социалист нийгмийг өөрчлөн Монгол Улсыг ардчилсан орон болгохоор тэмцэж байсан журмын нөхдөө, тухай үеийн бүх үйл явдлыг уран зурагт буулгахаар дөрвөн жил ажилласан хэмээн “Түүчээ цаг” хөрөг зургийн үзэсгэлэнгийн нээлтийн үеэр хэлэв.

Занабазарын нэрэмжит дүрслэх урлагийн музейд дэлгэсэн “Түүчээ цаг” үзэсгэлэнд ардчилсан хувьсгалд түүхэн гавьяатайгаар оролцсон С.Зориг, Э.Бат-Үүл, С.Цогтсайхан, Баабар, Р.Гончигдорж, Ц.Элбэгдорж тэргүүтэй 404 хүний хөргийг бүтээснээ дэлгэн үзүүлсэн байв. Мөн “Хонх” хамтлагийн дуучин С.Цогтсайхан, Н.Энхбаяр нар “Хонхны дуу”-гаар ард түмнийг ардчилалд уриалж буйг, 1990 оны 12 дугаар сарын 10-ны анхны цуглаан, МУГЖ Д.Сосорбарамын илтгэл тавьж буй хаврын жагсаал, анхдагчид МАХН-ын Төв хороонд өргөх бичиг барихаар явж байгаа зэрэг түүхэн үйл явдлуудыг дүрсэлжээ хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.

Монголын Хөрөнгийн биржээс нэр бүхий 18 компанийн арилжаанд оролцох эрхийг түр хязгаарлажээ. Компанийн тухай хууль болон Хөрөнгийн бирж төрийн өмчит хувьцаат компанийн дүрэм, “Гишүүнчлэлийн журам”, Төлөөлөн удирдах зөвлөлийн тогтоол зэргийг үндэслэн энэ сарын 3-ны өдрөөс эхлэн дараах үнэт цаасны компаниудын арилжаанд оролцох эрхийг хязгаарласан байна. Ингэснээр тус компаниудын Засгийн газрын үнэт цаасны арилжаанд оролцох эрх ч давхар хязгаарлагдах аж.

Нийслэлийн Статистикийн газраас гаргасан мэдээллээр Улаанбаатар хотод 11 дүгээр сарын сүүлийн 7 хоногт хонины ястай мах нэг килограмм нь дунджаар 5705 төгрөг, үхрийн ястай мах нэг килограмм нь дунджаар 7425 төгрөгийн үнэтэй байна. Үхрийн ястай махны үнийг өмнөх долоо хоногтой харьцуулахад 85 төгрөгөөр, үхрийн цул мах 315 төгрөгөөр тус тус буурчээ. Өнөөдрийн байдлаар үхрийн мах “Хүчит Шонхор” хүнсний захад хамгийн хямд буюу 7200 төгрөг, “Номин” супермаркетад хамгийн өндөр үнэтэй буюу 9000 төгрөг байна. Харин хонины ястай махны үнийг өмнөх долоо хоногтой харьцуулахад 145 төгрөгөөр, хонины цул мах 60 төгрөгөөр буурч, хонины мах “Хүчит Шонхор”, “Хархорин” хүнсний захуудад хамгийн хямд буюу 5500 төгрөгөөр, “Меркури” хүнсний захад хамгийн өндөр үнэтэй буюу 8000 төгрөгөөр худалдаалж байна.

Монголын залуучуудын холбооноос өнөөдөр эхэлж буй арванхоёрдугаар сарыг “Авлигын эсрэг сар” болгон зарлажээ. Тус холбоо 2012 оноос эхлэн “Авлигын эсрэг би авахгүй, би өгөхгүй” аяныг эхлүүлж, www.avliga.mn хаягийг нээн, авлигын эсрэг “Авлигагүй тоолуур”-ыг ажиллуулан 10 мянга гаруй залуучуудыг хамруулж чадсан юм. Энэ сарыг “Авлигын эсрэг сар” болгон зарласнаар олон ажил хийхээр төлөвлөжээ. Тухайлбал, “Авлигын эсрэг аяныг авлигачдын мөнгөөр санхүүжүүлэхгүй” уриатай таван цуврал зурагт хуудсыг гаргасан байна. Энэхүү хуудсыг иргэн, байгууллага бүр авч нааж “Авлигын эсрэг би авахгүй, би өгөхгүй” аянд өөрсдийн хувь нэмрээ оруулах боломжтой аж. Энэхүү зурагт хуудаснаас олсон орлогоор 2015 онд авлигын эсрэг, шударга ил тод байдлын төлөө зориулах гэнэ.