Азийн оюутны аварга шалгаруулах сагсан бөмбөгийн эрэгтэйчүүдийн V тэмцээн Тайванийн Тайпей хотноо өнөөдөр эхэллээ.
Манай улсаас эх орноо төлөөлөн оролцож буй шигшээ багийн бүрэлдэхүүнд О.Цэлмэг, Б.Дархантөгс, А.Гансүх, Г.Цэнгүүнбаяр, Э.Цэрэнбаатар, О.Очирбат, Э.Дөлгөөн, Б.Батзолбоо, Г.Чинбат, Б.Тамжид, Б.Билэгт, А.Бямбадорж нар багтаж байна. Тэмцээнд оролцогчид насны хувьд 1990-1996 онд төрсөн 17-25 насны залуу тамирчид байгаа юм. Мөн Олон улсын сагсан бөмбөгийн холбооны шүүгчээр Б.Ганзориг, МҮСБХ-г төлөөлж С.Тулга, Н.Батсуурь нар, багийн ахлагчаар Монгол Улсын Гавьяат багш Д.Гоошоохүү, багийн ахлах дасгалжуулагчаар Ж.Отгондарь, дасгалжуулагчаар Г.Өсөхбаяр нар ажиллаж байна.
Тус тэмцээнд БНХАУ, БНСУ, Хонгконг, Малайз, Филиппин, Монгол зэрэг 10 орчим орны баг тамирчид өрсөлдөж байгаа.Манай оюутны шигшээ баг хэсэгтээ БНХАУ, Тайвань, Макаотой таарчээ. Тэд эхний тоглолтоо өнөөдөр БНХАУ-ын шигшээ багтай хийж байна.
“Харанга” хамтлагийнхан Европийн улсуудад аялан тоглолт хийхээр болжээ. Тэд өөрсдийн 25 жилийн ойн хүрээнд гадаадад амьдарч байгаа Монголчууддаа ийнхүү бэлэг барихаар болсон байна.
Улсын дуурь бүжгийн эрдмийн театраас энэ жил үндэсний сонгодог бүтээлүүдээ түлхүү сурталчилж, монгол хөгжмийн зохиолчдоо алдаршуулахаар ажиллаж байна. Энэ сарын эхний үзвэр нь Төрийн хошой шагналт, хөгжмийн зохиолч Л.Мөрдоржийн “Хөхөө Намжил” дуурь боллоо. Шинэчлэгдэн тавигдсан энэхүү дуурийг өнгөрөгч амралтын өдрүүдэд буюу арваннэгдүгээр сарын 1-2-нд тоглолоо.
Дуурийн концертместр Б.Алунгоо хэлэхдээ: “Дуучидтайгаа үргэлж тайзан дээр хамт байгаа мэт ажиллалаа. Энэхүү дуурь 3 дахь удаагаа тайзнаа тоглолоо. Тиймээс дандаа шинэ дуучид дуулж, шинэчлэгдсэн найруулагаар тавигдлаа. Дуурийн сургуулилалт энэ оны дөрөвдүгээр сараас эхэлсэн. “Хөхөө Намжил” дуурь бол домгоос сэдэвлэгдсэн бүтээл. Манай үндэсний уламжлалт хоёр чавхдастай хорвоог уйлуулдаг морин хуур хөгжим маань яаж үүссэн тухай өгүүлдэг. Намжил гэдэг залуугийн унаж байсан далавчтай морийг хайртай эмэгтэй нь хардах сэтгэлээсээ болоод болчимгүй зүйл хийж, түүнийг хорлох гэсэн хүмүүсийн гарт өгдөг. Тэгээд дараа нь буруу зүйл хийснээ мэдэж, түүндээ харамсаж, мориных нь яс, сүүл, арьсаар энэхүү хөгжмийг бүтээж байгаа домогтой юм.” гэв. 
“Амжилтаа ахиулъя” төрийн бус байгууллагын санаачлагаар Монголын хөлбөмбөгийн холбооны дэмжлэгтэйгээр “Нэг сэтгэл” уриатай хандивын заалны хөлбөмбөгийн спорт өдөрлөг тун удахгүй болох гэж байгаа билээ. Тус өдөрлөгийн ивээн тэтгэгч байгууллагаар “Tiger” брэнд ажиллах нь ээ. “Tiger” брэнд нь энэ жил хоёр дахь удаагаа “Tiger Street Football” олон улсын тэмцээнийг амжилттай зохион байгуулсан бөгөөд хөлбөмбөгийн спортыг идэвхитэй дэмждэг гэдгээр нь хөлбөмбөг сонирхогч залуус андахгүй сайн мэдэх биз ээ. Хоёр дахь удаагаа “Tiger” брэндээс зохион байгуулсан тус тэмцээнд Монголчууд амжилттай оролцож Сингапур улсад болсон тоглолтноос хоёрдугаар байрыг эх орондоо авчирч чадсан юм. Мөн өнгөрсөн жил буюу 2013 онд эл компанийхан Италийн хөлбөмбөгийн шигшээ багийн ахлагчийг Монголд авчирсан бол энэ жил Португалийн шигшээ багийн алдарт тамирчин Деког авчирсан юм. Тиймээс энэ удаад ч мөн энэ жилийн хамгийн анхны заалны хөлбөмбөгийн тэмцээний дэмжигч байгууллагаар оролцож байгаа юм.
Гаалийн хяналтын улсын байцаагчид Монголд их хэмжээний галт зэвсгийн сум оруулж ирэх гэж байсан хууль бус үйлдлийг илрүүлсэн талаар албаныхан мэдээллээ. Тодруулбал, Гаалийн ерөнхий газрын Хэрэг зөрчлийн асуудал эрхэлсэн нэгжийн гаалийн улсын байцаагч нар аравдугаар сарын 28-нд АНУ-аас илгээсэн чингэлэг бүхий түүвэр ачаанд нарийвчилсан үзлэг шалгалт хийсэн байна.
Пакистан, Энэтхэгийн хил дээр орших шалган нэвтрүүлэх цэгийн ойролцоо амиа золиослогч тэсрэх бөмбөг дэлбэлсний улмаас 50 хүн амь үрэгдэж, 100 гаруй хүн гэмтэж бэртжээ.Уг халдлага нь Лахоре хотын ойролцоох Вагах хилийн боомт дээр төрийн далбаа буулгах ёслолын ажиллагаа дууссаны дараа болжээ. Пакистаны цагдаа нарын мэдэгдсэнээр биедээ тэсрэх бөмбөг авч явсан этгээд зоогийн газрын гадаа бөмбөг дэлбэлжээ.Амь үрэгдэж, гэмтэж бэртсэн хүмүүсийн олонх нь уг ёслолыг үзэж байсан аж. Пакистаны тал уг халдлагыг талибанчууд үйлдсэн хэмээн буруутгаж байгаа хэдий ч өөр зэвсэгт бүлэглэлүүд холбоотой байж болзошгүй талаар эх сурвалжууд мэдээллээ. Энэтхэгийн Ерөнхий сайд Нарендра Моди уг халдлагыг хулчгар үйлдэл хэмээн мэдэгдсэн ба энэ терорист халдлагын цаана Пакистаны сөрөг хүчний улс төрч Имран Хан байгаа хэмээн үзсэн.Энэтхэгийн аюулгүй албаны мэдээлснээр Энэтхэгийн хилийн боомт тус дэлбэрэлтэд өртөөгүй гэжээ. 
Өнгөрсөн аравдугаар сард Цагдаа болон хууль хяналтын байгууллагад “Бусдад хүчиндүүлсэн” гэх нийт 13 гэмт хэрэг, зөрчил бүртгэгдсэн байна.
“Хүчит шонхор” шонхор зах дээр амралтын өдрүүдэд үхрийн гуяны цул мах кг нь 9000, үхрийн ястай махны үнэ 6800-7000, цул нь 7200-7500 төгрөгийн үнэтэй байв. Мөн адууны ястай мах 5000, цул нь 5300-5500 төгрөгийн үнэтэй байлаа. Хонины ястай махны үнэ кг нь 4000-5500, цул нь 6200, ямааны ястай мах 3800-4000, цул нь 5500-5800 төгрөгийн үнэтэй байв. Тус захын худалдаачид махны үнэ өмнөх жилийнхтэй харьцуулахад 1000-1200 төгрөгөөр буурсан гэж байв. Түүнчлэн махны үнэ цаашдаа ч буурах магадлалтай гэж буй аж. 
Насанд хүрэгчдийн сумо бөхийн Улсын аварга шалгаруулах тэмцээн энэ сарын 8-ны өдөр Монгол бөхийн өргөөнд болох гэж байна. Энэхүү тэмцээнийг Монголын сумо бөхийн холбооноос зохион байгуулж байгаа бөгөөд ерөнхий ивээн тэтгэгчээр нь “Кёкүшю групп” ажиллах юм. 
Өнгөрсөн сарын 24-нд Б,Г,Ц гэгч этгээдүүд Дэлхий байгаль хамгаалах холбооны Улаан дансны ангиллын шалгуураар олон улсын хэмжээнд “устаж болзошгүй”, бүс нутгийн хэмжээнд “устаж байгаа” хэмээн үнэлэгдсэн, нэн ховор зүйлийн амьтан болох соргог бөхөнгийн эврийг хууль бусаар оруулж иржээ. Тодруулба, 81 толгой соргог бөхөнгийн 162 ширхэг эврийг ОХУ-аас хууль бусаар оруулж ирж, худалдаалах гэж байсан аж. Гэмт этгээдүүдийг БГД-ийн нутаг дэвсгэрт тээвэрлэж явсныг Зохион байгуулалттай гэмт хэрэгтэй тэмцэх газрын “Байгаль хамгаалах журмын эсрэг гэмт хэрэг”-тэй тэмцэх хэлтсийн алба хаагч нар илрүүлжээ. Тэдэнд Баянгол дүүргийн цагдаагийн хэлтсээс Эрүүгийн хуулийн тусгай ангийн 203 дугаар зүйлийн 203.2, 175.1-д зааснаар нэн ховор амьтаны түүхий эдийн зүйлийг хадгалсан, худалдан авсан, тээвэрлэсэн үндэслэлээр эрүүгийн хэрэг үүсгэн шалгаж эхэлсэн бөгөөд таслан сэргийлэх арга хэмжээ аван цагдан хорих 461-р ангид саатуулаад байгаа аж.