Олон улс, дэлхийн хэмжээнд судалгаа явуулж, сонирхолтой дүгнэлт гаргадаг хүмүүс байх юм. Саяхны нэгэн жишээг дурдахад дэлхий дээрх амьд организмуудын хөгжлийг авч үзжээ. Дэлхийн сээр нуруутан хийгээд хөхтөн, өвсөн тэжээлтэн болоод махан идэштэн амьтад байгалийнхаа хуулиар шинэ үеэ төрүүлж хувьсч байдаг гэсэн судалгаа гарч. Товчхондоо эдгээр амьтад дэлхийн уур амьсгалын өөрчлөлт явагдах бүрт дасан зохицсон шинэ үеэ байнга төрүүлдэг гэжээ.
Мөн нян бактериудыг устгахын тулд хүн төрөлхтөн жил, хагас жилд нэг нээлт хийдэг бол нян бактер нь 20 минут тутамд шинэ үеэ төрүүлэн гаргадаг байна. Энэ нь хүний биеийг идэгч, эд эрхтэнг устгагч бактертай тэмцэхээр бид хагас жилийн турш ажиллаж нэг эм гарган авлаа гэхэд 20 минутын дараа үр дүнгүй болж тэр эмэнд дасалтай бактерийн шинэ үе төрдөг гэсэн үг юм.
Харин улс орны буюу угсаатны шинэ үе, хөгжлийг судлахад харьцангуй өөр өөр хугацаа гарсан байна. Сонгуулиас сонгуулийн хооронд хөгжин өөрчлөгдөж байдаг улс орон энэ цагт бий болсон бол мянган жилийн турш өөрчлөгдөөгүй угсаатан ч байгаа гэнэ. Бас нэг зуун, нэг жаран гээд өөр өөр хугацаанд шинэчлэгдэн өөрчлөгддөг тухай ч сонстож байна. Манай улсын хувьд “хувьсан өөрчлөгдөх, шинэ үе төрж хөгжлийн дараагийн шатанд гарах үйл явц хэт удаан өрнөдөг” орнуудын жагсаалтад орсон бололтой. Гвинейн хүний махан идэштэн, төв Азийн малын махан идэштэн гээд урагшилж өөдөлдөггүй орнууд нэг мянганд шинэ үеэ төрүүлдэг гэж тодотгосон бололтой.
Л.МӨНХТӨР
Аргын тооллын арваннэгдүгээр сарын 5. Буд гариг. Билгийн тооллын 14. Дэлгэрүүлэгч одтой, цагаан луу өдөр. Өдрийн наран 08.04 цагт мандан, 17.48 цагт жаргана. Тухайн өдөр хулгана, бич жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр эм, эмнэлгийн элдэв үйл үйлдэх, хагалгаа хийлгэх, биеийн тамирыг сэргээх, хөгжмийн зэмсэг урлахад сайн. Гүүр тавих, газар малтах, гөлөг тэжээхэд муу. Өдрийн сайн цаг нь бар, луу, могой, бич, тахиа, гахай болой. Хол газар яваар одогсод зүүн урагш мөрөө гаргавал зохистой. Үс шинээр үргээлгэх буюу засуулбал эд мал арвижна. 
Иранд эрэгтэйчүүдийн гар бөмбөгийн тэмцээн үзэх гэснээс болж хоригдсон Иран бүсгүй хоёр дахь удаагаа өлсгөлөн зарлажээ. Тэрээр өнгөрөгч зургадугаар сарын 20-нд хэдэн бүсгүйчүүдийн хамт Иран,Италийн гар бөмбөгийн эрэгтэй багийн тэмцээн үзэх гэж байгаад баривчлагдан өлсөглөн зарлаж байжээ. Гончех Гхавами өөрийг нь хууль бусаар цагдан хорьж, хэргийг нь авч хэлэлцэхгүй байгааг эсэргүүцэн өлсгөлөн зарлаад байгаа талаар түүний ээж “ББС” агентлагт өгсөн ярилцлагадаа онцолжээ. Харин түүний өмгөөлөгчийн мэдээлснээр шүүхээс Гончех Гхавамиг төрийн эсрэг ухуулга суртал тараасан хэмээн буруутгасан баримт нотолгоог үзүүлсэн аж. Гэсэн хэдий ч төв шүүхээс түүнд оноосон ялыг баталгаажуулаагүй бөгөөд хэргийг прокурорт шилжүүлсэн байна. Гончех Гхавами нь Иран,Их Британи хоёр иргэншилтэй бөгөөд Их Британийн тал энэ хэрэгт ихээхэн анхаарал хандуулж байгаа аж. Хэдийгээр Иран хоёр улсын иргэншлийг зөвшөөрдөггүй ч Их Британид зөвшөөрдөг байна.
Европын хөлбөмбөгийн холбооны хамгийн нэр хүндтэй тэмцээн болох Аваргуудын лигийн хэсгийн дөрөв дэх тоглолтууд манай цагаар шөнийн 01.00 цагаас “Зенит”, “Байер Ливеркүзэн” багуудын тулаанаар эхлэх гэж байна. Энэ тойргийн хамгийн сонирхолтой тулаанаар өнгөрсөн жилийн аварга “Реал” болон Английн алдарт “Ливерпүүл” клубуудын тулаан нэрлэгдэж байна. 
МАН-ын бүлгийн гишүүд мэдээлэл хийж “Эрдэнэс-Таван толгой” компанид хийсэн ажлын хэсгийн шалгалтын талаар танилцууллаа. Өнгөрсөн тавдугаар сарын 24-ны өдөр “Эрдэнэс Таван толгой” компанид шалгалт явуулах ажлын хэсгийг Эдийн засгийн байнгын хорооны тогтоолоор байгуулж, УИХ-ын гишүүн Д.Хаянхярваа ахлан шалгалт явуулсан байна. Шалгалтаар төрийн өмчийн тус компанид олон ноцтой зөрчил илэрчээ. Ажлын хэсгийн ахлагч Д.Хаянхярваа “Төрийн өмчийн оролцоотой компаниудад хууль, хяналт хэрэгжихээ байсан үйлдлүүд их байгааг энэ шалгалтаар нотоллоо. Ялангуяа санхүүгийн тайлан нь маш будлиантай байдаг юм байна. Ер нь төрийн өмчийн компаниуд их үрэлгэн байна. Тухайлбал, “Эрдэнэс-Тавантолгой” компанийн Улаанбаатар дахь оффист л гэхэд нийт 123 хүн ажиллаж байна. Тэд нар нь бүгд сонгуулийн дараа хэн нэгний шахаасаар орсон хүмүүс. Тэр хэрээр үргүй зардал их гарч байгаа нь санхүүгийн аудитын шалгалтаар нотлогдсон” гэлээ.
Нийслэлийн Засаг даргын санаачилга, НЗДТГ-ын дэмжлэгтэйгээр дэлхийн алдарт “Цөмөөхэй” бүжгэн жүжиг ирэх арванхоёрдугаар сард ДБЭТ-ын тайзнаа тоглогдох гэж байна. Энэхүү бүжгэн жүжгийг “Бостон балет” компанийн гоцлооч, гавьяат жүжигчин Д.Алтанхуяг шинэчлэн эх орныхоо тайзнаа амилуулахаар болжээ.
Сонгуулийн ерөнхий хороо Азийн сонгуулийн байгууллагуудын Холбооны удирдах зөвлөлийн гишүүнээр сонгогдлоо.
УИХ-ын Хууль зүйн байнгын хорооны хуралдаан өндөрлөлөө. Хуралдаанаар Монгол Улсын 2015 оны төсвийн төсөлтэй холбоотойгоор тус байнгын хорооноос гаргасан санал, дүгнэлтийг хэлэлцсэн. Мөн гишүүдийн асуултад Хууль зүйн сайд Х.Тэмүүжин хариулж байлаа. Монгол Улсын 2015 оны төсөв хэмнэлтийн горимд шилжсэн ч хууль зүйн байгууллагуудын төсвийг өмнөх жилийнхээс бууруулахгүй байх бодлого баримталсан байна. Энэ нь хуулийн салбарын шинэчлэлийн бодлоготой холбоотой бөгөөд шинэ хууль хэрэгжиж эхлэхтэй холбоотойгоор зарим орон нутагт шинээр байшин барих гэх зэрэг зардлуудыг тусгажээ. Мөн хуралдааны үеэр шүүгчид өөрсдийнхөө цалинг тогтоодог буруу жишиг тогтлоо гэдгийг гишүүд эрс шүүмжилсэн. Тодруулбал, Шүүхийн ерөнхий зөвлөлийн шийдвэрээр энэ онд шүүгчдийн цалин хамгийн багадаа 3.6 сая төгрөг болж нэмэгдсэн юм. Уг нь үүнийг УИХ баталгаажуулах байсан ч өнөөг хүртэл асуудлыг хэлэлцэж амжаагүй байгаагаас хуулийн салбарын бусад байгууллагууд шүүхийнхэнтэй барьцах дүр зураг үзэгдэх болсныг гишүүд шүүмжиллээ.