Улаанбаатар хотод хэрэгжиж байгаа орон сууцны 113 төсөлд судалгаа хийхэд барилгын явц дунджаар 60-95 хувийн гүйцэтгэлтэй байна. Судалгаанд хамрагдсан 113 төслийн 39 нь бүрэн ашиглалтад орсон, 32 нь 80-95 хувийн гүйцэтгэлтэй, 29 нь 60-75 хувийн гүйцэтгэлтэй байгаа ажээ. Мөн барилгын явц өндөр байх тусам борлуулалт сайн байгааг үл хөдлөх хөрөнгийн агентлагууд онцоллоо. Гэхдээ зарим төслүүд олон сарыг борлуулалтдаа зарцуулсан боловч худалдан авалт хангалтгүй байгаа нь тухайн төслийн байршил, маркетингтай холбоотой гэж үзэж байна. Ерөнхийдөө борлуулалтад барилгын явц 19 хувь, байршил 13 хувь, үнэ төлбөрийн нөхцөл есөн хувь, маркетинг есөн хувийн эерэг нөлөө үзүүлдэг болохыг тогтоожээ. Монгол Улсад улирлын онцлогоос хамаарч орон сууцны борлуулалт жилийн дөрвөн улиралд харилцан адилгүй байна.
Сүүлийн зургаан жилийн хандлагаар эдийн засаг хэвийн тохиолдолд 4-6 дугаар сар, 9-12 дугаар сард орон сууцны борлуулалт нэмэгдэж байжээ. Харин жил бүрийн хоёр болон долдугаар сард буурах хандлагатай байгаа аж. Цаашид Улаанбаатар хотод орон сууцны зорилтот төсөл хэрэгжүүлж, нийлүүлэлтийг нэмэгдэхээр байна. Энэ хүрээнд “Нийслэлийн орон сууцны хөтөлбөр”-ийг хэрэгжүүлэх ажлын хэсэг байгуулжээ. Ажлын хэсэг орон сууцны санхүүжилтийн хувилбарыг боловсруулж 12 дугаар сарын 15-ны өдрийн дотор танилцуулах үүрэг авчээ.
НМХГ-аас Улаанбаатар хотын иргэдийн ундны эх үүсвэр Туул голын усны бохирдлын түвшинг тогтоож, бохирдлын шалтгаан нөхцөлийг одруулсан байна. Туул голын ус нь эхэн хэсэгтээ гадаргын усны цэврийн ангиллын нормоор бага бохирдолттой байгаа аж. Харин хотын ахуйн бохир ус цэвэрлэх байгууламжаас гарч буй цэвэршүүлсэн бохир ус нийлүүлж буй Сонгинын гүүрнээс ус нь эрс бохирдож, тавдугаар зэргийн буюу их бохирдолттой ангилалд хамрагдаж байна. Энэ ангилалд хамрагдсан усыг унд, ахуй, үйлдвэрлэл гээд аль ч төрөлд ашиглах боломжгүй байдаг гэж НМХГ-ын Байгаль орчны хяналтын улсын байцаагч Б.Пүрэвжамц ярилаа.
2014 онд хамгийн их орлого олсон дуучдын жагсаалтыг гаргасан байна. Уг жагсаалтын нэгдүгээр нэрт дуучин Бейонсе бичигджээ. Тэрээр өнгөрсөн нэг жилийн хугацаанд 115 сая ам.долларын орлого олсон байна. Бейонсе энэ жилй аялан тоглолт хийж нийтдээ 95 удаа тоглолтоо хийсэн гэнэ. Ингэхдээ нэг хотод хийсэн тоглолтоосоо 2.4 сая ам.долларын ашиг олжээ.
МЗХ-оос жил бүр уламжлал болгон Ерөнхий сайдын ивээл дор “Иргэний андгай өргөх ёслол” зохион байгуулдаг. Үүнтэй холбогдуулан арваннэгдүгээр сарыг 16 настнуудын сар болгон зарлаж байгаа талаар өчигдөр Монголын залуучуудын холбооноос мэдээлсэн юм. 
“Харанга” хамтлагийнхан Европын улсуудад аялан тоглолт хийхээр болжээ. Тэд өөрсдийн 25 жилийн ойн хүрээнд гадаадад амьдарч байгаа Монголчууддаа ийнхүү бэлэг барихаар болсон байна. Тэд өнөөдөр Европыг зорих юм. Эл тоглолтонд “Харанга”-ынхан шилдэг бүтээлүүдээсээ үзэгчдэдээ хуваалцах бөгөөд тоглолтыг гадаадад амьдарч буй монголчууд зохион байгуулж байгаагаараа онцлог ажээ.
НЗДТГ-ын дэмжлэгтэйгээр дэлхийн алдарт “Цөмөөхэй” бүжгэн жүжиг ирэх арванхоёрдугаар сард ДБЭТ-ын тайзнаа тоглогдох гэнэ. Уг бүжгэн жүжгийг “Бостон балет” компанийн гоцлооч, гавьяат жүжигчин Д.Алтанхуяг шинэчлэн эх орныхоо тайзнаа амилуулахаар болжээ. Германы зохиолч Е.Т.А.Хоффманы “Самар цөмөгч” буюу “Хулганын хаан” үлгэрээс сэдэвлэсэн энэ бүжгэн жүжгийн хөгжмийг П.И.Чайковский бичсэн бөгөөд 1892 оны арванхоёрдугаар сарын 6-нд ОХУ-ын Марийнский театрт анх үзэгчдийн хүртээл болсон түүхтэй аж.
ЦЕГ-ын Төв архивын газар, Хэвлэл мэдээллийн төв хамтран тус архивын газарт хадгалагдаж байгаа цагдаагийн байгууллагын хөгжлийн түүхийг харуулсан баримт бичиг, фото зургийг олон нийтэд сурталчлах чиглэлээр үйл ажиллагаа зохион байгуулж эхэллээ. Тус музейд үе үеийн цагдаагийн алба хаагчдын эдлэж хэрэглэж байсан эд зүйлс, хувцас хэрэгсэл, одон медаль, ном товхимол бичиг баримтууд гээд 2000 гаруй үзмэр дэлгэгджээ. 
“Азийн хотуудын нөөцийн цогц менежмент: Хот байгуулалтын NEXUS бүс нутгийн дөрөв дэх удаагийн олон улсын бага хурал Туушин зочид буудалд эхэллээ. Энэ нь ХБНГУ-ын Эдийн Засгийн Хамтын Ажиллагаа, Хөгжлийн Яамны санхүүжилтээр Германы олон улсын хамтын ажиллагааны нийгэмлэг (GIZ) болон НҮБ-ын Ази, Номхон Далайн Эдийн засаг, Нийгмийн Хороо (UN ESCAP)-ноос 2013-2015 онд Ази, Номхон Далайн бүсийн 6 орны (Хятад, Вьетнам, Индонези, Тайланд, Филлипин, Монгол) 10 хотод хэрэгжүүлэх төсөл юм. Тус төсөлд Улаанбаатар хот 2013 оноос хамрагдаж эхэлжээ.