Манай улсад хөгжлийн бэрхшээлтэй иргэдийн жолоо барих эрх хаалттай байдаг байсан билээ. Гэхдээ тэд хууль бусаар жолоо барин хөдөлгөөнд оролцдог нь нууц биш. Тэгвэл энэ хавраас хойш Цагдаагийн байгууллага ХБИ-ийг тусгайлан жолооны сургалтанд хамруулж үнэмлэх олгож, тусгай тээврийн хэрэгслээр хөдөлгөөнд оролцохыг зөвшөөрсөн.
Ингэхдээ эмнэлэг, хөдөлмөрийн магадлах комиссын дүгнэлтийг үндэслэн жолооны сургуульд сургах бөгөөд үнэмлэх олгох ажээ. Гэхдээ бусад жолоочийн адил ангилал хамаарч тээврийн хэрэгслийг жолоодох бус автомат ажиллагаатай, буруу талдаа үрүүлтэй, хөгжлийн бэрхшээлтэй иргэдийн зориулалт бүхий тээврийн хэрэгслийг жолоодох эрхтэй юм. Түүнчлэн жолооны үнэмлэх нь “ХБИ” гэсэн тэмдэглэгээтэй байх ажээ. Одоогоор эдгээр иргэдэд чиглэсэн тусгай жолооны сургууль Улаанбаатар хотод нэг, Дархан, Сэлэнгэ аймгуудад тус бүр нэг байдаг юм.
Умард Солонгосын залуу удирдагч Ким Чен Ун өөрийн хамгийн ойрын шадар туслахуудын нэгийг цаазалсан тухай Өмнөд Солонгосын тагнуулын агентлагууд мэдээлжээ.Тодруулбал, Умард Солонгосын эрх баригч намын зохион байгуулалт, удирдлагын газрын орлогч даргын албыг хашиж байсан Ким Хён Укыг энэ сарын эхээр цаазалсан байна. 
Сүхбаатар дүүргийн 20 дугаар хорооны нутаг дэвсгэрт байрлах Сэлбийн голын дагуух талд “Цасангоо” нэртэй шинэ цэцэрлэг нээлтээ хийлээ. Цэцэрлэгийн нээлтэд Нийслэлийн Засаг дарга бөгөөд Улаанбаатар хотын захирагч Э.Бат-Үүл болон холбогдох албаны мэргэжилтнүүд, эцэг эхийн төлөөлөл оролцлоо.
ДЭМБ, “Глобал” сангийн санхүүжилтээр хэрэгжүүлж буй сүрьеэгийн тандалт судалгааны нээлт Дархан-Уул аймгийн “Гос-Хот” өрхийн эрүүл мэндийн төвд боллоо. Эхний ээлжинд Дархан сумын II, IV, X багийн зорилтот бүлгийн 2000 гаруй хүнийг судалгаанд хамруулсан байна. ХӨСҮТ-өөс есөн хүний бүрэлдэхүүнтэй баг тус аймагт ажиллаж байгаа юм. Энэ үеэр “Нүүдлийн рентген” машиныг ажиллуулж байна. 
Бээжин хотноо БНХАУ-ын дарга Си Зиньпин Хонконгийн захирагч Лин Чун-Иентэй уулзаж, тус улсад өрнөж буй оюутан, залуусын эсэргүүцлийн жагсаалын тухай ярилцсаныг БНХАУ-ын Комминуст намын хэвлэлийн албанаас мэдээлсэн байна.
Төв аймгийн нутгийг дайран өнгөрдөг засмал зам дагуу сүүлийн таван жилийн байдлаар 275 хүн авто ослын улмаас амь насаа алдсан байна. Автомашин жолоодож замын хөдөлгөөнд оролцож яваа жолооч нарын хариуцлага, анхаарал болгоомжгүйгээс болж ихэнх хэрэггарсан гэсэн судалгаа гарчээ. Төв аймгийн Прокурорын газраас ийм шалтгааны улмаас энэ төрлийн гэмт хэргээс урьдчилан сэргийлэх, таслан зогсоох зорилгоор жолооч нарт хандан сэрэмжлүүлэг гаргажээ. Уг сэрэмжлүүлэгт “Жолооч нараа, хөдөлгөөнд оролцохдоо замын хөдөлгөөний дүрмийн заалт, шаардлагыг чанд сахин биелүүлж хөдөлгөөний аюулгүй байдлыг хангаж ажилла. Тээврийн хэрэгслийн хурдыг тогтоосон хэмжээнээс хэтрүүлэх, огцом эргэх зэрэг нь осол гарах шалтгаан болдогийг анхаар. Таны өмнө замын саад, өөдөөс ирж буй тээврийн хэрэгсэл байгаа гэдгийг ямагт санаж замын турш хөдөлгөөний хурдаа тохируулж эгнээгээ барьж анхаарал болгоомжтой яв. Согтууруулах ундааны зүйл хэрэглэсэн, өвчтэй, ядарсан үедээ замын хөдөлгөөнд бүү оролц. Зөвшөөрөгдсөн тэмдэг, тэмдэглэгээнээс бусад газарт урдаа яваа тээврийн хэрэгслийг гүйцэж түрүүлэхгүй байж дүрмээ баримтал. Замд гарахын өмнө тээврийн хэрэгслийн бүрэн бүтэн байдлыг заавал шалга. Зорчигчид оо, таны сууж яваа автомашин техникийн хувьд бүрэн бус, зөвшөөрөгдсөн хэмжээнээс илүү хүн тээвэрлэсэн, жолооч нь согтууруулах ундааны зүйл хэрэглэсэн байвал цагдаагийн байгууллагад хандан иргэнийхээ үүргийг биелүүлж, өөрийнхөө болон бусдын аюулгүй байдал, амь насыг хамгаалъя” гэж онцолжээ. 
Энэ оны дөрөвдүгээр сард живсэн Өмнөд Солонгосын Севол хөлөг онгоцноос сураггүй алга болсон есөн зорчигчийг хайх ажлыг зогсоосон талаар “Чусон ильбо” сонин мэдээлжээ. Сураггүй болсон зорчигчдыг хайх ажилд тэнгисийн цэрэг болон эргийн хамгаалалтаас гадна хувийн компаниудыг оролцуулж байсан юм. Хувийн компаниуд эрлийн ажлыг цааш үргэлжлүүлэхээс татгалзсанаа мэдэгдсэн нь хүн хүч дутах шалтгаан болжээ. Эрх баригчид эрлийг зогсоох шийдвэрээ сураггүй байгаа зорчигчдын ар гэрийнхэнд дуулгасан аж. 
Дуучин О.Баянмөнх энэ сарын 25-нд Монгол бөхийн өргөөнд “Тусгаар тогтнол” хэмээх зургаа дахь бие даасан тоглолтоо хийхээр болжээ. Энэхүү тоглолтдоо эзэн Чингис хааны үеэс олон зуун жилийн турш гайхамшигт түүхэн замналыг туулж, Тусгаар тогтнолоо олсоныг магтсан дууны уран бүтээлүүдээс бүрдүүлэх нь. Өөрөөр хэлбэл, хүчирхэг урлагийн баг хамт олонтойгоор энэхүү тоглолтоо театарчилсан шоу хэлбэрээр үзэгчдэд хүргэх юм байна.
НЗДТГазраас толилуулж буй “Цөмөөхэй балет” бүжгэн жүжгийг МУГЖ Д.Алтанхуягийн найрууллагаар шинэчлэн УДБЭТеатрт 2014 оны 12-р сарын 24-нөөс 28-ны хооронд тавих гэж байна. 
Сэлэнгэ аймгийн Баянгол сумын нутагт үйл ажиллагаа явуулдаг “Түмэнбут” ХХК-ийн гахайн фермийн 30 гаруй гахай өнгөрсөн аравдугаар сарын 30-нд халдварт өвчний шинж тэмдэгтэйгээр өвчилжээ. Улсын мал эмнэлэг ариун цэврийн төв лабораторийн шинжилгээгээр 28 гахай “Гахайн мялзан” өвчин туссан болох нь тогтоогдсон байна. Ийм учраас тус суманд 30 хоногийн хугацаатай хорио цээрийн дэглэм тогтоожээ. Шинж тэмдэг илэрсэн 28 гахайг булж устган, ариутгал халдваргүйжүүлэлт хийгээд байна.