Казахстаны Алматы хотноо энэ сарын 8-нд хүндийг өргөлтийн Дэлхийн аварга шалгаруулах тэмцээн эхэлсэн билээ. Энэ удаагийн дэлхийн аваргад эрэгтэй 404, эмэгтэй 279 туйванч хүчээ сорьж байна.
Энэ сарын 16-ныг хүртэл тус тэмцээнд эх орноо төлөөлөн эрэгтэйчүүдийн 62 кг-д Э.Мөнхдөл, 69 кг-д В.Оргилсайхан, 77 кг-д М.Гантулга, -105 кг-д Т.Төмөрбаатар, эмэгтэйчүүдийн 53 кг-д В.Анхзаяа, О.Баярцэцэг, Э.Эрдэнэтуяа, 58 кг-д Б.Дэнсмаа, А.Отгонжаргал, 69 кг-д Б.Энхтамир, М.Анхцэцэг нар оролцож байна. Дасгалжуулагчаар Ч.Дөрвөнжин, Ц.Хосбаяр, Д.Чинзориг, шүүгчээр Олон улсын шүүгч Б.Гансүх ажиллаж байна.
Тэмцээний эхний өдрүүдэд хөнгөн жингийн аваргууд тодорч байна. Эмэгтэйчүүдийн 53 кг-д өрсөлдсөн манай тамирчин ОУХМ О.Баярцэцэг (“Аврагч”) 148 кг (65+83), В.Анхзаяа (“Аврагч”) 143 кг (63+80)-ийг өргөсөн амжилтаар 31, 32-р байрт шалгарчээ. Энэ жинд Тайваний Хсю Шу-Чин 232 кг-аар алтан медаль хүртсэн бол Тайванийн Хсю Шу-Чин (218 кг), БНХАУ-ын Ли Яжунь (214 кг) нар мөнгө, хүрэл медалийг хүртжээ.
“Алматы 2014”-ийг БНХАУ (3 алт, 3 хүрэл), БНАСАУ (2 алт, 1 мөнгө, 1 хүрэл), Казахстан (1 алт) улсууд медалийн тоогоор тэргүүлж байна.
Хэдхэн хоногийн өмнө Солонгосын Инчён хотод болсон Азийн наадамд оролцсон Монголын баг тамирчдын фото агшинг дэлгэн харуулсан үзэсгэлэн нээлтээ хийж байсан билээ. 
NBA-гийн “New Orleans Hornets, “Atlanta Hawks” багуудад тоглож байсан Карлделл Жонсон өнөөдөр “Чингис хаан” онгоцны буудалд газардлаа. Түүнийг Монголын үндэсний сагсан бөмбөгийн холбооны удирдлагуудын төлөөлөл тосч авсан байна.
Монгол улсын өсөх идэр начин, бөхийн жүдо, самбо барилдааны спортын мастер Ж.Чулуун агсны нэрэмжит 2014 оны үндэсний бөхийн барилдааны залуучуудын улсын аварга тэмцээн ирэх арванхоёрдугаар сарын 5-7-ны өдрүүдэд Дархан-Уул аймагт болно.
МУГЗ, ОХУ-ын Буриад улсын СГЗ, хөгжмийн зохиолч, удирдаач Дамбадоогийн Нацагдоржийн “Нутагтаа өргөх аялгуу” уран бүтээлийн цэнгүүн энэ сарын 14, 15-нд “Саран хөхөө” театрт болно. Тоглолтод урилгаар Эрдэнэт хотын Хөгжимт драмын театр, Говьсүмбэр аймгийн Дуу, бүжгийн “Боржигон” чуулга, ОХУ-ын Улаан-Үд хотын Дуурийн театр, Соён гэгээрүүлэгч Данзанравжаагийн нэрэмжит “Саран хөхөө” театрын уран бүтээлчид оролцон тоглоно.
Цэнгэг усны нөөц, байгаль хамгаалах төв “Багшийн хөгжлийн ордон”-той хамтран орон нутгийн багш нарт экологийн боловсрол олгох хоёр өдрийн сургалтыг зохион байгуулсан байна. Энэ удаагийн сургалтад 21 аймгийн физик, математик, газар зүйн хичээлээр сургалт явуулдаг 150 гаруй багш хамрагджээ. Дээрх багш нарт тус төвийн байгаль орчны боловсрол хариуцсан мэргэжилтэн Б.Сарантуяа болон “Жайка” олон улсын байгууллагын сайн дурын ажилтан Хироки Ёкояама нар “Орон нутагт хэрхэн нөхөрлөл байгуулж хог хаягдлыг эдийн засгийн эргэлтэд оруулах, ангилах, дахин боловсруулах” талаар лекцийн болон хөгжөөнт тоглоомын хэлбэрээр сургалт явуулж, гарын авлага, мэдээлэл авч болох цахим хуудсуудын талаар зөвлөгөө өгчээ. 
Нийслэлийн 375 жилийн ойн баярын хямдралтай худалдааны нэгдсэн тайлан гарсан гэж Улаанбаатар хотын Захирагчийн Ажлын албанаас мэдээллээ. Тайланд дурдсанаар “Их хотын хямдрал 375” худалдаа хоёр дахь жилдээ Чингис хааны талбайд болон нийслэлийн зургаан дүүргийн томоохон талбайд өргөн цар хүрээтэй болжээ. Нэгдсэн тоон мэдээнээс үзэхэд Чингисийн талбай дээр нийт 100 гаруй аж ахуй нэгж байгууллага нийслэлийн иргэддээ зориулж бараа бүтээгдэхүүндээ 10-80 хувь хүртэл хямдрал зарлан бэлэгтэй, сугалаатай худалдаа явуулсан байна. Энэ жилийн хямдралтай худалдаанд шинээр олон аж ахуй нэгжүүд оролцжээ. Хямдралтай худалдаанд ойролцоогоор 300 орчим мянган иргэн оролцож,тэрбум орчим төгрөгийн худалдан авалт хийсэн байна. Нийт худалдан авалт хийсэн иргэдээс 375 азтанг тодруулж, аж ахуй нэгж байгууллагууд шагнан урамшуулсан гэнэ. Энэ өдөр өндөг хамгийн доод үнээр буюу 180 төгрөгөөр, “Дархан нэхий” ХК бүх бараандаа 50 хувийн хямдрал, бусад аж ахуй нэгжүүд үйлдвэрийн үнээр борлуулжээ. Энэ жилийн “Их хотын хямдрал-375” нэгдсэн арга хэмжээнд худалдаа, үйлдвэрлэл, үйлчилгээний салбараас гадна ахуйн үйлчилгээ, соёл урлагийн салбар, кино театрууд 50 хувь, нийслэлээр овоглосон музейнүүд үнэ төлбөргүй, нийтийн тээврийн үйлчилгээ 50 хувиар нийслэлийн иргэддээ хямдралтай үйлчилгээгээр бэлэг барьсанд иргэд сэтгэл хангалуун байгаагаа илэрхийлсэн. Цаашид уг арга хэмжээнд худалдаа, үйлдвэрлэл, үйлчилгээ эрхлэгчдийг өргөнөөр хамруулах эхлэл тавигдсан гэж зохион байгуулагчид нь найдаж байна. 
Монгол Улс 2014 оны эхний 10 сард дэлхийн 131 оронтой худалдаа хийж, гадаад худалдааны нийт бараа эргэлт 9080 сая ам.долларт хүрлээ. Үүнээс экспорт 4605.7 сая ам.доллар, импорт 4474.3 сая ам.доллар болж, тэнцэл 131.4 сая ам.долларын ашигтай гарч байна. Гадаад худалдааны тэнцэл өмнөх оны мөн үед 1.9 тэрбум ам.долларын алдагдал хүлээж байсан бол 2014 он гарсаар алдагдал аажмаар буурчээ. Улмаар аравдугаар сар гэхэд гадаад худалдааны тэнцэл ашигтай гарч эхэлсэн байна. Ханшийн өсөлтийг даган тансаг хэрэглээний бараа, бүтээгдэхүүний импорт буурч, экспорт нэмэгдсэн нь гадаад худалдаа ашигтай гарахад нөлөөлжээ. Цаашдаа худалдааны тэнцэл ийнхүү ашигтай гарсаар байвал ам.долларын ханш төгрөгийн эсрэг сулрах томоохон нөхцөл болох юм. 
Гадаад харилцаа, эдийн засгийн хамтын ажиллагааны яамны Олон улсын байгууллагын газар Женев хотноо төвтэй Биологийн конвенцийг хэрэгжүүлэх нэгж, НҮБ-ын Зэвсэг хураах албатай хамтран “Биологийн зэвсгийг хориглох тухай ковенц”-ийг үндэсний хэмжээнд хэрэгжүүлэх асуудлаар хамтарсан сургалт, семинарыг зохион байгууллаа. 
-Тиймээс Сагсан бөмбөгийн шигшээ багийнхан Азийн элсний наадмыг зорих гэж байна-