Ипотекийн санхүүжилтэд өөрчлөлт оржээ. Энэхүү өөрчлөлт нь зөвхөн аймаг сумдад үйлчлэх юм. Харин тавигдах шаардлага нь хөгжлийн ерөнхий төлөвлөгөөний дагуу, орон сууцны хотхон, хорооллын хэсэгчилсэн ерөнхий төлөвлөгөөний дагуу эрх бүхий байгууллагын шийдвэрээр ашиглалтад орсон байх ёстой гэнэ. Үүнд, дэд бүтэц цахилгаан дулаан, ус хангамж, ариутгах татуургын шийдэл бүхий орон сууцыг хамруулах юм байна.
Одоогийн байдлаар нийслэлд нийт хүн амын 60 гаруй хувь нь төвлөрсөн ч иргэдийн хот руу чиглэсэн шилжилт хөдөлгөөн саарахгүй байгааг иргэний бүртгэлийн байгууллагуудын тоо бүртгэл харуулдаг. Харин Монголбанкнаас хэрэгжүүлж эхэлж байгаа энэ ажил нь хүн амын төвлөрлийг сааруулахаас гадна тав тухтай орчныг иргэд сонгох боломжуудыг нээж өгч байгаа юм байна.
Ирэх оны төсөв хэлэлцэж байгаа энэ үед УИХ дахь нам эвслийн бүлгүүд төсвийн төсөлтэй холбогдуулж санал дүгнэлтээ төсвийн байнгын хороогоор дамжуулан чуулганы нэгдсэн хуралдаанаар хэлэлцүүлж байна. Эдийн засгийн хүндрэлтэй байгаа энэ нөхцөлд ирэх онд монголчууд бүсээ чангалахаас өөр гарц байхгүй гэдгийг хууль тогтоогчид сануулсан. Төрийн албан хаагчдын орон тоог багасгах урсгал зардлуудаа танах гээд төсвийн үр ашигтай зарцуулалтыг дээшлүүлэх тал дээр хууль санаачлагчид няхуур хандаж байна. Ирэх онд цалин тэтгэвэр тэтгэмжийг нэмэгдүүлэхэд зориулж 500 тэрбум төгрөгийг төсөвт суулгасан. Харин энэхүү хөрөнгийг танах шаардлагагүй энэ хэвээр нь батлах нь зүйтэй гэдэгт парламент санал нэгджээ.
Өмнөговь аймагт иргэдийн эрүүл аюулгүй орчинд амьдрах эрхийн хэрэгжилтийг сайжруулах зорилгоор Хүний эрхийн Үндэсний Комисс Өмнөговь аймгийн Иргэдийн Төлөөлөгчдийн Хурал хамтран ажиллахаар өнөөдөр Санамж бичиг байгуулав. Хамтын ажиллагааны хүрээнд Монгол Улсын Үндсэн хууль, олон улсын гэрээ, конвенц болон үндэсний хууль тогтоомжоор баталгаажсан иргэдийн эрүүл, аюулгүй орчинд амьдрах эрхийн хэрэгжилтийн байдалд судалгаа, дүн шинжилгээ хийх, Өмнөговь аймагт уул уурхайн хайгуул, олборлолтын үйл ажиллагаа явуулж байгаа аж ахуйн нэгж, байгууллагын үйл ажиллагаанд хүний эрхэд нөлөөлөх байдлыг үнэлэх, иргэдийн эрүүл, аюулгүй орчинд амьдрах эрхийн хэрэгжилтийг хангахын тулд шаардлагатай тохиолдолд нийтийн эрх ашгийг хамгаалан төлөөлөн нэхэмжлэл гаргах, нөлөөллийн үйл ажиллагаа явуулах зэрэг ажлыг зохион байгуулах юм.
Нийслэлийн ИТХ-ын Тэргүүлэгчдийн ээлжит хуралдаан болж, Чингэлтэй дүүргийн ЗДТГ-ын балансад бүртгэлтэй 13-р хорооны Мэнд-Арвижих өрхийн эмнэлгийн барилга, Чингэлтэй дүүргийн ЗДТГ-ын балансад бүртгэлтэй 15-р хорооны барилга, Налайх дүүргийн ЗДТГ-ын балансад бүртгэлтэй 4-р хорооны улаан булангийн барилга, Баянгол дүүргийн балансад бүртгэлтэй бүртгэлтэй 4-р хороонд байрлах Авто гражийн барилгыг хөрөнгө бүртгэлээс хасах тухай асуудлыг хэлэлцлээ.
Энэ жил Нийслэлийн иргэдийн хэрэгцээнд нийт 14 мянган тонн нөөцийн мах бэлтгэн нийлүүлэхээр төлөвлөсөн бөгөөд Тэгвэл бэлтгэн нийлүүлэх компаниуд тодорхой болжээ. Тухайлбал 12 мянган тонн мах нийлүүлэх компаниудын сонгон шалгаруулалтыг ахин зарлахад “Баатрууд тэнгэр”, “Махимпекс”, “Ай энд Ди Эм”, “Мах маркет” компаниуд шалгарчээ. Эдгээр компаниуд тус бүр 3000 тонн мах багцлан бэлтгэж Улаанбаатар хотын иргэдийн хэрэгцээнд нийлүүлэх юм. Мөн өмнө нь нөөцийн мах бэлтгэж байсан Дархан-Уул аймгийн “Дархан мийт”, Орхон аймгийн “Эрдмийт” компани тус бүр 1000 тонн нөөцийн мах бэлтгэн нийлүүлэхээр болсон байна.
ОХУ-ын Ерөнхийлөгч В.Путины манай улсад хийсэн ажлын айлчлалын хүрээнд гарын үсэг зурсан баримт бичгүүд эхнээсээ хэрэгжиж эхэллээ. ОХУ болон Монголын иргэд харилцан визгүй зорчих хэлэлцээр өнөөдрөөс албан ёоор хэрэгжиж байна. Ингэснээр Орос, Монголын иргэд 30 хоногийн хугацаанд харилцан визгүй зорчих юм. Визгүй зорчих нийлбэр хугацаа нь тухайн иргэн анх орсон өдрөөс эхлэн 180 хоног буюу зургаан сарын хугацаанд 90 хоногоос илүүгүй байна. Харин 30 хоногоос дээш хугацаагаар зорчих, оршин суух, хөдөлмөр буюу арилжааны үйл ажиллагаа эрхлэх бол зохих журмаараа виз авна.
Сонгинохайрхан дүүргийн 118 дугаар бүрэн дунд сургууль өндөр үр ашигтай, хүчин чадал сайтай халаалтын зуухтай болжээ. Монгол, Япон улсын Байгаль орчны яамны хамтын ажиллагааны “Нүүрстөрөгч багатай хөгжлийн түншлэл”-ийн хүрээнд хүлэмжийн хийг бууруулах өндөр бүтээмж бүхий нам даралттай халаалтын зуухыг нийлүүлэн, суурилуулж байгаа аж. “Сүүри Кэйкакү”, “Ану сервис” компаниуд хамтран гүйцэтгэсэн халаалтын зуух нь халаалтын зориулалттай халуун усаар дулаанаа хангах юм байна. Ингэснээр нүүрсний хэрэглээ эрс багасгаж, тэр чинээгээр нүүрстөрөгчийн ялгаруулалтын хэмжээг бууруулж агаарын бохирдлыг багасгах аж.
Их мастер цолны болзол хангасан А.Энхтуул ФИДЕ-гээс цол тэмдгээ албан ёсоор хүлээн авчээ.