УИХ-ын Тамгын газрын дарга Д.Болдбаатар, УИХ-ын даргын ахлах зөвлөх С.Ламбаа, Хэвлэл мэдээлэл, олон нийттэй харилцах хэлтсийн дарга О.Батханд нар өнөөдөр сэтгүүлчдэд мэдээлэл хийв.
Монгол Улсын Их Хурал түүний Тамгын газраас эрхлэн Улсын Их Хурлын албан ёсны цахим хуудас www.parliament.mn болон мэдээлэл, сурталчилгааны http://open.parliament.mn цахим хуудсуудаар хууль тогтоох үйл ажиллагаатай холбогдолтой албан ёсны бүхий л мэдээ, мэдээллийг олон нийтэд хүргэдэг. Сүүлийн жилүүдэд иргэд, олон нийтийн зүгээс сошиал медиа буюу мэдээллийг интернэтээр олон нийтэд түгээх хэрэгсэлийг идэвхитэй ашиглах болсонтой холбоотойгоор хуурамч нэр ашиглан иргэдэд андуу, ташаа мэдээлэл хүргэх сөрөг үйлдлүүд ихээр гарах болсон.
Саяхан “Монгол Улсын Их Хурал, political organization” нэрийн дор фэйсбүүк хуудас ашиглан “Та Монгол Улсын 28 дахь Ерөнхий сайдад УИХ-ын гишүүн Сайханбилэгийг дэмжиж байна уу?” гэсэн санал асуулга явуулж 300 гаруй хэрэглэгчийг хамруулсан тохиолдол гарлаа.
Улсын Их Хурлын Тамгын газрын зүгээс 28 дахь Ерөнхий сайдтай холбоотой ямар нэгэн санал асуулга явуулаагүй бөгөөд хуурамч нэр ашиглан санал асуулга явуулж буй энэхүү үйлдэл нь ёс зүйгүй үйлдэл болохыг онцлон дурьдав. Иймд иргэд, олон нийт дээрх байдлыг анхаарч хуурамч мэдээлэлд хөтлөгдөлгүй, Улсын Их Хурлын албан ёсны мэдээ, мэдээллийг доорх хаягуудаас авч байхыг мэдэгдэж байна гэв. Үүнд:
Facebook олон нийтийн сүлжээний хувьд ParliamentMN нэршлээр, Twitter, Google plus, YouTube, Flikr болон Instagram-ийн хувьд “Монгол Улсын Их Хурал” нэршлээр тус тус нэвтэрч албан ёсны мэдээ, мэдээллийг авах боломжтой юм хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.
УИХ дахь МАН-ын бүлгийн хуралдаан өнөөдөр 11.45 цагийн орчимд эхэлж, УИХ-ын дарга З.Энхболд, Ерөнхий сайдад нэр дэвшигч Ч.Сайханбилэг нар оролцсон. Тэд дөнгөж сая УИХ дахь МАН-ын бүлгийн хуралдаан болсон танхимаас гарлаа. Бүтэн зургаан цаг үргэлжлээд байгаа тус бүлгийн хуралдаан одоо ч үргэлжилж байна. Бүлгийн гишүүд Ерөнхий сайдаар Ч.Сайханбилэг гишүүнийг томилуулах эсэхээ санал хураалтаар шийднэ. Үүний дараа мөн Удирдах зөвлөл нь хуралдах бололтой.
Монголын үндэсний сагсан бөмбөгийн холбоо, Соёл, спорт аялал жуулчлалын яам хамтран зохион байгуулж буй “Үндэсний супер лиг” 2014-2015 оны шинэ улирлын нээлт маргааш 18.00 цагаас Спортын төв ордонд эхлэх гэж байна. Спортын төв ордонд өнөөдөр МҮСБХ болон зарим багийн тоглогч, дасгалжуулагч, шүүгчдийн төлөөлөгчдөөс сэтгүүлчдэд мэдээлэл хийлээ.
Нийслэлийн Эрүүл мэндийн газар, БНСУ-ын Руйсанса ХХК , Хотын хөгжлийг дэмжих шинэ тосгон хөдөлгөөн хамтран Руй эрүүл мэндийн хөтөлбөрийн гэрээнд маргааш 10:00 цагт Хангарьд ордны хүндэтгэлийн танхимд гарын үсэг зурна. Энэ хөтөлбөрийн хүрээнд Улаанбаатар хотын 140 өрхийн эмнэлгүүдэд анхан шатны үзлэг оношлогоо хийх аппарат, дагалдах хэрэгслийг нийлүүлэх юм байна. Ингэснээр шээсний шинжилгээний 10 гаруй үзүүлэлтээр хариуг багцлах цахим системтэй болох аж. 
УИХ-ын дарга З.Энхболд захирамж гаргаж, гавьяат хуульч Б.Чимид агсны нэрэмжит шагналыг олгохоор болжээ. Үндэсний эрхзүйн тогтолцоог хөгжүүлэх чиглэлээр үнэ цэнэтэй, томоохон бүтээл туурвисан судлаачийг дэмжих зорилгоор энэхүү шагналыг бий болгож буй аж. Гавьяат хуульч Б.Чимид агсны нэрэмжит шагналыг ирэх оноос эхлэн олгох бөгөөд Үндсэн хуулийн өдрөөр гардуулж байх гэнэ. 
УИХ дахь МАН-ын бүлгийн хуралдаан гурван цаг гаруй үргэлжилж байна. Тус намын бүлгийн хуралдаанд УИХ-ын дарга, АН-ын дарга З.Энхболд, Монгол Улсын Ерөнхий сайдад нэр дэвшигч Ч.Сайханбилэг нар оролцож, гишүүдийн асуултад хариулж байгаа юм. 
Холливудын нэрт жүжигчин Жорж Клуни Их Британийн өмгөөлөгч Амаль нар хоёр сарын өмнө хуримласан билээ. Залуу хосууд дайн болж буй Сириэс хүүхэд үрчилж авах гэнэ. Энэ тухай “Woman’s Day Magazine” сэтгүүлд бичжээ. Ингэснээр дайны улмаас эцэг эхээ алдсан Сирийн хүүхдүүдэд жаахан ч гэсэн туслах хүсэлтэй гэнэ. Амаль нь хүний эрхийг хамгаалах чиглэлээр мэргэшсэн бөгөөд Wikileaks-ийг үндэслэн байгуулагч Жулиан Ассанжийн өмгөөлөгчөөр ажиллаж байгаа. Мөн НҮБ-ын ерөнхий нарийн бичгийн даргын Сирийн асуудал хариуцсан зөвлөхөөр давхар ажилладаг.
Өнөөдөр ээлжит бус чуулган хуралдаж Ч.Сайханбилэгийг Ерөнхий сайдаар томилох эсэх асуудлыг хэлэлцэхээр товлож байсан ч УИХ дахь МАН-ын бүлгийн хуралдаан сунжирснаас үүдэн өнөөдрийн хуралдааныг цуцлах шийдвэр гарчээ. 
БШУЯ-наас 2013 оноос эхлэн “Зөв Монгол хүүхэд” хөтөлбөр хэрэгжүүлж байгаа юм. Энэ хөтөлбөрийн хүрээнд сурагчдад зорилготой суралцах, үр дүнд хүрэх зан чанар төлөвшүүлэх зорилготой “Зорилготой Монгол хүүхэд” хөтөлбөрийг нийслэлийн 93-р сургууль дээр хэрэгжүүлж эхэллээ.
УИХ дахь эмэгтэй гишүүдийн бүлгийнхэн өнөөдөр Төрийн ордноо “Х ТҮЦ” прадокшны жүжигчин МУГЖ И.Одончимэг, “Шинэ үе” прадокшны жүжигчин МУСТА Г.Ундармаа нарыг хүлээн авч, хийж буй сайн үйлсэд талархал илэрхийллээ. “Х ТҮЦ ” прадокшны жүжигчин И.Одончимэгийн хувьд “Мобиком” компаниас хэрэгжүүлсэн “Зүрх бүхний төлөө” хөтөлбөрийн шилдэг оролцогчоор тодорч “Улаанчулуутын хогийн цэг дээрх хүүхдүүдэд боловсрол олгоход дэмжлэг үзүүлэх” төслөө амжилттай хэрэгжүүлж байгаа. Харин жүжигчин Г.Ундармаа”Итгэлийн танхим-2″ төслөө нээсэн билээ. Энэ үеэр Л.Эрдэнэчимэг гишүүн “УИХ-ын эмэгтэй гишүүд бидний зорьж ажиллаж байгаа нэг зүйл нь сургууль, цэцэрлэгийн хүүхдүүд, мөн эмэгтэйчүүдийн төлөө юм. Тэгэхээр бидэнтэй хүсэл зорилго нэг та бүхэндээ баярлаж байна. Цаашид энэ талаар хамтарч ажиллах болно” гэлээ. Түүнчлэн хоёр жүжигчин бүсгүй сэтгэгдлээ хуваалцсаныг хүргэж байна.