Month: November 2014

Categories
онцлох-нийтлэл туслах-ангилал

Ч.Сайханбилэг Ерөнхий сайдаар томилогдлоо

Өнөөдөр 10:20 цагт УИХ-ын чуулганы нэгдсэн хуралдаан хуралдаж, Ерөнхий сайдад нэр дэвшигчийг томилох эсэх асуудлыг хэлэлцлээ. Монгол Улсын Ерөнхий сайдыг томилох тухай асуудлыг хэлэлцэхтэй холбогдуулж Монгол Улсын Ерөнхийлөгч Ц.Элбэгдорж, Төрийн байгуулалтын байнгын хорооны дарга А.Бакей нар Ерөнхий сайдад нэр дэвшигчийн талаар танилцуулсан юм. Дараа нь гишүүд нэр дэвшигчээс асуулт асууж, хариулт авав. Ингээд санал хураахад хуралдаанд нийт 44 гишүүн оролцсоноос 42 нь дэмжиж, 95.5 хувийн саналаар шинэ Ерөнхий сайдыг баталлаа.

Ийнхүү УИХ-ын гишүүн Чимэдийн Сайханбилэг Монгол Улсын 28 дахь Ерөнхий сайдаар томилогдов. Ч.Сайханбилэг нь 1969 онд Дорнод аймгийн Сүмбэр суманд төрсөн. 1986 онд Нийслэлийн 10 жилийн 45 дугаар дунд сургууль, 1991 онд Москва хотын Хүмүүнлэгийн их сургуулийг түүхийн багш мэргэжлээр, 1995 онд Монгол Улсын Их Сургуулийг хуульч мэргэжлээр, 2002 онд АНУ-ын Вашингтон хотын Жорж Вашингтоны их сургуулийг тус тус төгссөн юм байна.

Тэрбээр Монгол Улсын үндэсний эрх ашиг, ард иргэдийнхээ сайн сайхны төлөө ажиллана гэдгээ хэлж байв.

Categories
мэдээ нийгэм

Замын-Үүдээс Алтанбулаг хүртэл 3G сүлжээнд холбогдсон байна

Монгол орны урд хилээс хойд хил хүртэл буюу Замын-Үүдээс Алтанбулаг хүртэлх Олон улсын болон улсын чанартай А зэрэглэлийн зам дагуу 1007км тасралтгүй 3G сүлжээ нэвтэрлээ. Уг төслийг Бүх нийтийн үйлчилгээний үүргийн сангийн санхүүжилтээр “Юнител” групп хэрэгжүүлж өчигдөр Төв аймгийн Баянчандмань сумын Хар модотын даваанд нээлтээ хийжээ.

Бүх нийтийн үйлчилгээний үүргийн сан нь Мэдээлэл харилцаа холбооны үйлчилгээг хүн амын байршил амьжиргааны түвшнээс үл хамааран хүргэхээр ажиллаж байна. Энэ төслийн үр дүнд Замын-Үүд – Улаанбаатар – Алтанбулаг гэсэн 1007 км үргэлжлэх авто замын уртад 15 газарт сайтын бүтээн байгуулалтын ажлууд хийгдэж 93.47 хувийг 3G сүлжээгээр хангасан байна. 3G сүлжээг нэвтрүүлснээр А зэрэглэлийн авто замын дагуу хаана ч явсан гар утсаараа ярих, интернэт ашиглах гээд байнгын харилцаа холбоотой байх боломжтой боллоо.

Categories
мэдээ нийгэм

Хуульчийн мэргэжлийн шалгалтад 312 хүн тэнцжээ

Хуульчийн мэргэжлийн шалгалтыг энэ сарын 12, 13, 14-нд зохион байгуулж өчигдөр олон нийтэд дүнг танилцууллаа. Тус шалгалт нь эрх зүйн ерөнхий мэдлэг сорьсон сорилго ба эрх зүйн тохиолдол шийдвэрлэх бодлого гэсэн хоёр үе шаттай явагдсан бөгөөд нийт 1698 эрх зүйч бүртгүүлснээс 1506 хүн сорилгын шалгалтад оролцож түүнээс 747 нь тэнцэн, бодлогын шалгалтад оролцох эрхтэй болсон байна. Үүнээс бодлогын шалгалтын дүнг нэгтгэсэн байдлаар гаргахад 312 хүн шалгалтын босго 70 оноонд хүрч тэнцжээ. Энэ нь нийт шалгалтад оролцогчдын 20 орчим хувь нь тэнцсэн үзүүлэлт юм. Шалгалтад тэнцсэнээр эдгээр хүмүүс цаашид шүүхэд хэрэг, маргаан хянан шийдвэрлэх ажиллагаанд үйлчлүүлэгчийн эрх, хууль ёсны ашиг сонирхлыг төлөөлөх, өмгөөлөгчөөр оролцох, нэхэмжлэл, хүсэлтийг шийдвэрлэх зэрэг хуульчийн мэргэжлийн үйл ажиллагаа эрхлэхээр болжээ. Энэ удаагийн хуульчийн мэргэжлийн шалгалт нь Монгол Улсад анх удаа ийм олон тооны оролцогчтойгоор нэгэн зэрэг цахим хэлбэрээр явагдсан юм. Ингэснээр хүний нөлөөлөл орох бололцоог хязгаарлан, түргэн шуурхай, шударгаар дүгнэх боломжийг бүрдүүлжээ. Мөн шалгалтын үеэр “Бүх нийтийн боловсролын төлөө” Иргэний нийгмийн үндэсний эвслийн гишүүн төрийн бус байгууллагын төлөөлөл хянагчаар ажиллаж иргэний хяналтыг хэрэгжүүлсэн байна.

Categories
мэдээ нийгэм

Ням гаригт “Монгол бахархлын өдөр”-ийг тэмдэглэнэ

Их эзэн Чингис хааны мэндэлсний 852 жилийн ой, “Монгол бахархлын өдөр” өвлийн тэргүүн сарын шинийн 1 буюу энэ арваннэгдүгээр сарын 23-ны ням гаригт тохиож байгаа юм. Ойд зориулан өнөөдөр 10.30 цагаас МУИС-ийн хичээлийн II байрны “А” танхимд эрдэмтэн, судлаачид “Дундад зууны монголчуудын амжилтын үндэс” сэдвээр лекц уншина. Мөн шагайн харвааны тэмцээн, хүчит бөхийн барилдаан зэрэг арга хэмжээ Монгол бахархлын өдрийг тэмдэглэх хүрээнд болно. Дор “Монгол бахархлын өдөр”-ийнхөтөлбөрийг хүргэж байна.

“Монгол бахархлын өдөр”-ийн хөтөлбөр:

Их эзэн Чингис хааны талбайд/11 дүгээр сарын 23-нд/

10.00 цагт Монгол Улсын Төрийн далбаа мандуулах ёслол

10.40 цагт Монголын нэгдсэн тулгар төрийн уламжлалт Их цагаан тугийг цэнгүүлэх ёслол

13.00 цагт Их эзэн Чингис хааны хөшөөнд төрийн өндөр албан тушаалтан, ард иргэд хүндэтгэл үзүүлэх ажиллагаа тус тус болно.

Төрийн ордны Ёслол хүндэтгэлийн Их танхимд /11 дүгээр сарын 23-нд/

11.40 цагт Монгол Улсын төрийн дээд шагнал бөгөөд тэргүүн зэргийн одон “Чингис хаан” одонг дэлхийд нэртэй эрдэмтэн, академич Х.Намсрайд гардуулах ёслол болно.

“Монгол бөхийн өргөө”-нд /11 дүгээр сарын 23-нд/

14.00 цагт Хүчит 128 бөхийн барилдаантай

Categories
мэдээ улс-төр

Ерөнхийлөгч Ц.Элбэгдорж Ерөнхий сайдад нэр дэвшигчийг танилцуулж байна

УИХ-ын чуулганы өнөөдрийн нэгдсэн хуралдаанаар Монгол Улсын Ерөнхий сайдад нэр дэвшигчийг томилох асуудлыг хэлэлцэх юм. Гишүүдийн ирц бүрдэж, нэгдсэн чуулган сая эхэллээ. Яг одоо Ерөнхий сайдад нэр дэвшигч Ч.Сайханбилэгийг Монгол Улсын Ерөнхийлөгч Ц.Элбэгдорж танилцуулж байна. Хуралдаанд МАН-ын гишүүдээс нэг ч хүн орж ирээгүй байна.

Э.ЭНХ

Categories
мэдээ улс-төр

Чуулган эхлээгүй байна

Өнөөдөр УИХ-ын чуулганы нэгдсэн хуралдаан 09:00 цагт эхэлж, Ерөнхий сайдад нэр дэвшигчийг батлах эсэхийг шийдэх ёстой байв. Одоогоор гишүүдийн ирц бүрдээгүй учраас чуулганы нэгдсэн хуралдаан эхлээгүй байна.

.БУЛГАН

Categories
мэдээ нийгэм

Ойрын өдрүүдэд хүйтэрч, цасан шуурга шуурна

Маргаашнаас эхлэн Завхан, Говь-Алтай аймаг, төвийн бүсийн зарим нутгаар, 23-нд зүүн гурван аймгаар цас орж, цасан шуурга шуурах төлөвтэй байна. Эдгээр өдрүүдэд манай орны ихэнх нутгаар салхи 12-14 м/с, зарим газраар 16 м/с хүрч шуурах аж. Ойрын тав хоногийн урьдчилсан байдлаар Баян-Өлгий, Ховд, Увс зэрэг аймгуудад өдөртөө 1-6 хэм, шөнөдөө 15-20 хэмийн хүйтэнтэй бол Завхан, Хөвсгөл, Архангай, Өвөрхангай, Орхон зэрэг Алтай, Хангайн уулархаг нутгаар өдөртөө 6-11 градус, шөнөдөө 23-28 градус, Говь-Алтай, Баянхонгор зэрэг Алтайн өвөр говийн нутгаар өдөртөө 0-5 градус, шөнөдөө 7-12 градусын хүйтэнтэй байна. Харин зүүн аймгийн нутгаар эдгээр хугацаанд өдөртөө 5-10 хэм, шөнөдөө 15-25 хэм хүрч хүйтрэх ажээ. Төвийн бүсийн ихэнх нутгаар өдөртөө 1-6 градус, 18-23 градус хүйтэн бол Дундговь, Өмнөговь, Дорноговь зэрэг говийн аймгуудад өдөртөө 1-4 хэм хүйтэн, шөнөдөө 9-19 хэмийн хүйтрэх юм байна. Иймээс ард иргэд та бүхэн хүүхдээ дулаан хувцаслаж, ханиад томуу хүрэхээс сэргийлнэ үү.

Categories
мэдээ нийгэм

АНУ-ын их, дээд сургуулиудын талаарх зөвлөгөө мэдээллийг төлбөргүй өгч байна

Боловсролын зөвлөгөө мэдээллийн төвөөс арванхоёр дахь удаагийн олон улсын боловсролын өдөрлөгийг энэ долоо хоногт зохион байгуулж байгаа билээ. Америкийн соёл мэдээллийн төвд болж буй энэ удаагийн өдөрлөгөөр Америк, Канад, Япон зэрэг улсад тэтгэлгээр суралцах хүсэлтэй залууст үнэ төлбөргүй зөвлөгөө тусламж үзүүлж байгаагаараа онцлог аж. Өөрөөр хэлбэл оюутан залуус өөрийн сонирхсон мэргэжил болон мэргэшлээр Америкт ямар их дээд сургуулиуд элсэлт авдаг, хэдэн төгрөгийн төлбөртэй, ямар тэтгэлэгт хөтөлбөр зарласан, материалаа хэрхэн бүрдүүлэх зэрэг хэрэгцээт бүх мэдээллийг үнэ төлбөргүйгээр өгөх юм байна. Боловсролын зөвлөгөө мэдээллийн төвөөс өнгөрсөн хугацаанд хэрэгжүүлсэн USAP хөтөлбөрийн хүрээнд 30 гаруй залуус бакалаврын түвшинд Америкт тэтгэлгээр суралцжээ. Зарим оюутнууд нь сургуулиа төгсч ирээд, эх орондоо ажиллаж байна юм байна.

Боловсролын зөвлөгөө мэдээллийн төвийн гүйцэтгэх захирал Д.Саямаа “АНУ-ын Төрийн Департаментын Боловсрол, соёлын хэлтсийн дэмжлэгтэйгээр дэлхийн 170 гаруй оронд 450 гаруй боловсролын зөвлөгөө мэдээллийн төвүүд байгуулагдсаны нэг нь манайх юм. Өөрөөр хэлбэл Монголд зөвхөн манай төв л Америкийн төрийн Департаментийн дэмжлэгтэйгээр үйл ажиллагаа явуулдаг. Манай төвийн гол зорилго нь Монголын залууст гадаадад боловсрол эзэмших боломж, сургалтын тэтгэлэгт хөтөлбөрийн талаарх мэдээллийг цаг алдалгүй хүргэх юм. Манай төв үйлчилгээний хөлсөнд ямар ч төлбөр авдаггүй. Улаанбаатар хотоос гадна Дархан, Эрдэнэт, Ховд, Дорнод, Өмнөговь зэрэг аймгуудад салбартай. Америкт суралцахын тулд эхлээд дөрвөн мянга гаруй их дээд сургуулиас сонгох хэрэгтэй болдог учраас чамгүй хугацаа зарцуулдаг. Хэрэв манай төвд хандвал таны суралцахыг хүссэн чиглэлээр аль мужид ямар их дээд сургууль байгаагаас гадна сургалтын зардал, амьдрах нөхцөл, хамрагдах боломжтой тэтгэлэгт хөтөлбөр зэргээс нь хамаарч 10-15 сургуулийг манай зүгээс санал болгоно. Мэдээж сонгосон сургуулийнхаа элсэлтийн мэдээллийг вэб сайтаар нь орж баталгажуулахаас гадна материал хүлээн авах эцсийн хугацаа, тэтгэлэгт хамрагдахад шаардагдах нэмэлт материал зэргийг сайн судлах хэрэгтэй. Гэхдээ сургуулиудынхаа талаарх дэлгэрэнгүй мэдээллийг авсныхаа дараа дөрвөөс зургаан сургуулийг сонгож, өргөдлөө нэмэлт материалын хамтаар цахимаар эсвэл шуудангаар илгээнэ. Үүний дараагаар мэдээж шалгалтандаа бэлтгэх ёстой. “Тофель”, “Жи эм эй ти”, “Жи ар и”, “Сат” зэрэг аль шалгалт өгөх ёстойгоо мэдэх хэрэгтэй. Ийнхүү эцэст нь тухайн сургууль таны таны илгээсэн материалт болон шалгалтын дүнд үндэслэн элсүүлэх эсэхээ шийднэ. Хэрэв тухайн сургуульд элсэн суралцах шаардлагыг хангасан бол таньд урилга ирнэ. Америкт суралцахыг хүссэн оюутан залуус нэн тэргүүнд англи хэлний өндөр мэдлэгтэй байх ёстой” гэсэн юм.

М.УУГАН-ЭРДЭНЭ

Categories
онцлох-нийтлэл туслах-ангилал

Ч.УРАНБИЛЭГ: “Гоёл” наадам жил ирэх бүр чанаржиж байгаа

Топ модель Ч.Уранбилэгтэй ярилцлаа.

-Монголын загварын ертөнцийн хамгийн том наадам “Гоёл” удахгүй болох нь. Та өнгөрсөн жилийнхэд оролцоогүй. Энэ жил тайзан дээр гарах уу?

-Өнгөрсөн жил хувийн ажил ихтэй байсан болохоор “Гоёл” наадамдаа оролцож чадаагүй. Зарим топууд маань өнгөрсөн жил хүүхэд гаргасан учраас “Гоёл”-ын тайзан дээр гараагүй. Харин энэ жил олонх нь оролцох байх. Ер нь “Гоёл” наадам топ моделиуд төдийгүй загварын ертөнцтэй холбоотой бүх л хүний хувьд хамгийн их хүсэн хүлээдэг наадам байдаг. Миний хувьд “Гоёл-2015”-д оролцох гээд догдлон хүлээж байна.

-Та “Гоёл-2010”-ын топ моделиор тодорч байсан. Тэр жилийн “Гоёл”-ыг эргээд дурсахгүй юу?

-Яг шагнал авсан мөч үнэхээр гоё байсан. Хэзээ ч мартагдахгүй байх. Одоо ингээд тэр үеийг санахад өчигдөр болсон мэт тод санагдаж байна. “Энэ жилийн топ моделийн эзэн Ч.Уранбилэг” гээд зарлахад чихэндээ итгээгүй. Уг нь өөрийнхөө нэрийг сонсчихоод байдаг. Гэвч хөөрч догдолсондоо буруу сонсчихсон байх вий дээ гэж эмээгээд шуудхан яваад оччихож чадаагүй. Хажууд зогсож байсан загвар өмсөгчид гар, гар гэхэд нь л очиж шагналаа авсан. Тэр өдөр би ямар их баярласан гээч. Шөнө нь орондоо хэвтээд байгаа хэрнээ нойр хүрэхгүй байсан. Миний амьдралд хөөрч баярлах өдөр олон байсан л даа. Гэхдээ шөнөжин унтахгүйгээр баярлаж үзээгүй.

-Хэдэн оноос эхлэн “Гоёл”-д оролцож эхэлсэн юм бэ?

-Би 1998, 1999 оноос “Гоёл” наадамд оролцож эхэлсэн. 2000 оны наадам “Бөхийн өргөө”-нд болж байсан. Тэр үед би 15 настай байлаа. Тэрнээс хойш өнөөдрийг хүртэл “Гоёл” наадамд оролцох гэж догдлон хүлээдэг хэвээрээ байна. Анхны “Гоёл” наадамд есдүгээр ангийн хүүхэд байхдаа оролцож байсан.

-Тэр үед загвар өмсөгчийн агентлаг одоогийнх шиг элбэг байсангүй. Яаж яваад загвар өмсөгч болов?

-Санамсаргүй, бас азтай тохиолдлоор загварын ертөнцтэй холбогдсон. Би 31 дүгээр сургуулийн сурагч байлаа. Тавдугаар ангид байхдаа нэг өдөр хичээлээ тараад ахынхаараа оров оо. Манай бэр эгч үеийнхээ бүсгүйтэй юм яриад сууж байна. Нөгөө эгчдээ намайг танилцуулаад миний биеийн өндөр, загвар өмсөх дуртай эсэхийг асуулаа. Тухайн үед би ангидаа нэлээн өндөртөө ордог байсан. Зурагтаар Синди Кроуфорд, Клаудия Шифферийг хараад ямар гоё юм бэ гэж мөрөөддөг байлаа. Тэгтэл эгчийн найз бүсгүй “Үнсгэлжин” наадмыг зохион байгуулдаг, Монголын хүүхдийн ордоны загварын дугуйлангийн багш Нармандах байж таарсан. Жаахан охин байхдаа “Үнсгэлжин” наадамд ингэж л оролцсон. Гэрийнхэн маань их дэмжинэ. Усны хувцас авч өгөөд л, нүүр будаж, үс янзлаад л. Харин дараа нь Хүүхдийн ордоны дэргэдэх загварын дугуйланд явж эхэлсэн. Одоогийнх шиг 45 хоног хичээллээд өнгөрөхгүй. Бүтэн жилийн турш хувцас загвартай холбоотой олон төрлийн хичээл үздэг байлаа. Дугуйланд явж эхэлснээсээ хойш хоёр дахь жилдээ “Үнсгэлжин” наадмаас “Ирээдүйтэй модель” шагнал авсан. Түүндээ их урамшиж загварын ертөнцтэй холбогдсон доо.

-“Гоёл” наадмын топ модель болохоосоо өмнө тэргүүн дэд байрт шалгарч байсан байх аа?

-Тэгсэн. 2005 онд дэд тэргүүн байр эзэлж байлаа. Топ модель гэдэг бол загвар өмсөгчдийн оргил амжилт байдаг. Миний өмнөх жил О.Уянга топ модель болж байсан. Ер нь топ модель тийм ч олон биш. Арав гаруйхан байгаа. Хэдэн мянган загвар өмсөгчдийн дундаас шалгарч топ гэдэг цолыг авч байгаа болохоор их нэр хүндтэй шагнал. Тэр хэрээр бидэнд хариуцлага ирдэг.

-Хариуцлагын хэрээр хэл ам бас их байх юм?

-Монголд гэлтгүй дэлхий даяар загварын ертөнц хэл ам ихтэй байдаг. Өрсөлдөөн ихтэй болохоор тэр байх л даа. Гэхдээ олны ярианаас, бусдынхаа хэл амнаас тэгтлээ төвөгшөөж байсангүй.

-Нэгнийхээ хувцсыг урдаг, гутлынх нь өсгийг хугалдаг гэх яриа бий. Тайзны ард иймэрхүү зүйл их тохиолдох уу?

-Яг үнэндээ наадах чинь огт худлаа яриа шүү дээ. Гадны кинон дээр л тиймэрхүү зүйл гардаг байх. Түүнээс биш бодит амьдрал дээр, тайзны ард тийм зүйл болж байхыг харж байгаагүй. Ихэнх нь найз нөхөд болчихсон байдаг. Гутлынхаа өсгийг хугалаад, даашинзаа уруулчихсан зогсоо нэг ч загвар өмсөгчийг харж байгаагүй юм байна. Ер нь загварын ертөнцтэй холбоотой таагүй яриаг биднийг огт танихгүй хүмүүс л гаргадаг. Гаднаас нь хараад олон эмэгтэйчүүд байгаа юм чинь дотроо юм юм л болдог байх гэж бодоод элдвийг зохиодог шиг байгаа юм. Тайзан дээр, олны нүдэн дээр ил өрсөлддөг.

-Топууд ихэнх нь загварын агентлаг байгуулдаг. Таны хувьд?

-Тийм мөрөөдөл надад байхгүй. Миний ганц дуртай зүйл загварын ертөнц. Гэхдээ шавь нараа бэлдээд загварын агентлагтай болъё гэж бодохгүй байгаа.

-Энэ жилийн “Гоёл” наадам хэдхэн хоногийн дараа болох гэж байна. Бэлтгэл хэр хангагдаж байгаа вэ. Ер нь биеийнхээ галбирыг яаж баридаг вэ?

-Энэ жилийн “Гоёл-2015” наадам энэ сарын 26-нд эхэлнэ. Долоохон хоног үлдсэн байна. Сүүлийн үед загварын долоо хоногоор эхэлж байгаа. Энэ жил ч бас загварын долоо хоног болно. “Blue sky”-д загвар зохион бүтээгчид маань шилдэг бүтээлээ олонд танилцуулна. Харин шилдгийн шилдгийг шалгаруулах гран-при наадам ирэх сарын 3-нд Соёлын төв өргөөнд болох юм. Миний хувьд “Гоёл” наадамд хувийн бэлтгэлээ хангаад оролцоно. Энгийн үед биеийн галбираа үргэлж хадгалж байдаг. Ялангуяа топ моделийн нэрийг дааж яваа хүн өөртөө байнга анхаарах ёстой. Усан бассейнаар хичээллэдэг. Хоолны дэглэм харин тэгтлээ бариад байхгүй дээ.

-Тухайн жилийн “Гоёл” наадмын дараа юу болдог юм бэ?

-“Гоёл” наадам загвар өмсөгчид, загвар зохион бүтээгч, загварын холбоо, агентлагийн хувьд жилийн хамгийн чухал өдөр нь байдаг. Жил, жилийн топ моделиуд маань “Гоёл” наадмаараа уулзаж сонин хачнаа бас ярина. Наадмын дараа хүлээн авалт болдог юм. Шинэ топдоо баяр хүргэнэ. Удаан уулзаагүй хүмүүс нэг үдшийг баярлаж өнгөрөөдөг.

-Сүүлийн үед “Гоёл” наадмын талаар загвар өмсөгчид янз бүрээр л ярьж байна. Оролцвол заавал Мянганбаяртай холбогдох хэрэг гарна гэж ч ярих юм?

-Тэр бол хувь хүний л бодол байх. Топ модель болж чадаагүй хүмүүсийн гаргасан яриа болов уу. Яг үнэндээ “Гоёл” наадам жилээс жилд сайжирч байгаа. Зохион байгуулалтын хувьд ч, оролцож байгаа загвар зохион бүтээгчид, загвар өмсөгчдийн хувьд ч ялгаагүй. Улам сайжраад байгаа шүү дээ. Шүүлтийн тухайд аль нэг хүнтэй холбож ярьж болохгүй ээ. Топ модель болж байгаа загвар өмсөгчид олон жил загвар өмссөн, хөдөлмөрлөсөн хүмүүс байгаа шүү дээ. Олон жилийн хичээл зүтгэл, шантрахгүй явж байгаа зоригийг ингэж үнэлэх зохимжгүй.

-Топ модель болсныхоо дараахан морь уяна гэж ярилцлага өгч байсан. Морио уяж байна уу?

-Тэр ташаа ойлголт байсан юм аа. Нэг ярилцлага авсан сэтгүүлч моринд дуртай юу, морь руу орох бодолтой юу гэж асуухаар нь тиймээ л гээд хэлчихсэн. Тэгсэн чинь морь уяна гээд гарчиглачихсан. Түүнээс биш миний морь уяна гэж юу байхав дээ. Монгол хүн юм чинь морь малд хайртай л байж таараа.

-Бас эмэгтэйчүүдээс нэлээн хол барилгын салбарт ажилладаг гэсэн. Хэвээрээ юу?

-Хүн хүнд дуртай ажил гэж байдаг даа. Би дуртай юмаа л хийж байгаа. Барилгын засвар хийгээд тав, зургаан жил болж байна. Дотоод засал чимэглэл хийдэг компанитай. Уг нь анх барилгын дизайн, интерьер хийнэ гэж бодож байгуулж байлаа. Ажлын явцад засвар руу орчихсон. Интерьерээ бараг хийж байгаагүй юм байна.

-Ажил хэр байх вэ. Захирал нь топ модель гэдэг утгаараа танай компанийг илүү сонирхдог болов уу?

-Ажил бол ажил шүү дээ. Яахав найз нөхдийн захиалга орж ирнэ. Өмнөх захиалгаа цагт нь амжуулах гэж шаргуу зүтгэдэг болохоор гадны саналыг тэр бүр авч амждаггүй юм.

-Таныг нэг хэсэг Ким Инхагийн дүрээрээ алдартай Солонгосын жүжигчинтэй найзууд гэж шуугисан?

-“Гоёл-2010” наадмын топ модел болсныхоо дараа Сөүлд болсон “Asia model festival award” наадамд оролцсон юм. Азийн 13 орны төлөөлөл оролцсон, өргөн цар хүрээтэй наадам. Ким Инхад тоглосон Ли Бүн Хён гран-при шагналыг нь авч байлаа. Би “Asian star model” шагнал авсан. Энэ наадмын хүлээн авалт дээр Солонгосын алдартай жүжигчинтэй хамт суугаад зургаа авахуулсныг ташаа ойлгочихсон байна лээ.

-Гэр бүлтэй болж байна уу?

-Би нөхөртэй. Сайхан монгол залуу бий. Ойрын үеийн төлөвлөгөөнд хүүхэд бий. Нэг их удахгүй хүүхэдтэй болно гэж бодож байгаа.

С.АЛТАНЦЭЦЭГ

Categories
мэдээ цаг-үе

Анд минь аян замынхаа тэмдэглэлийг тэрлэх гээд л алсыг зорьж дээ

Анд минь аян замд гарч дээ. Холын холд аян замын тэмдэглэлээ тэрлэх гээд явчихлаа. “Сайн яваад ирээ­рэй” гэж үддэг байсансан, сайхан нийтлэл бичихээр ган­зага дүүрэн ирдэгсэн. Аялж л явбал улам өнгө ороод байдаг, явж ирээд нүдэнд харагдаж, гарт баригдтал, амт үнэртэй, өнгө, аялгуутай нь хамаг биений шар үс бостол хачин мэдрэмж төрүүлтэл бичнэ. Уншиж байгаа хүн өөрийн эрхгүй инээнэ. Эсвэл толгой сэгсэрнэ. Нүдэнд нулимс дүүрнэ. Бичсэнийг нь уншиж байгаа хүнийг ийм хачин үйлдэл хийгээд байхаар өөрийн эрхгүй асуу­на. “Юу уншаад инээж хөхрөөд янз бүр болоод байгаа юм” гэвэл “Гангаагийн бичсэнийг л” гэж хариулаад цааш үргэлжлүүлнэ. Нээрээ л хээрийн салхийг ч үгээр урлаж, үс хийсгэж мэднэ шүү. Түүнийг аян замын тэмдэглэл бичсэний дараа нэг хэсэгтээ л өөр газар очоод ирсэн мэт хачин сайхан мэдрэмж төрдөг юм.

Одоо бид олон сайхан зүйлээ хуваалцаж ярихгүй болжээ. Хаа нэгтээ бодлогошрон, яаран алхаж байгаа мэт. Ихээ хол явсныг нь дуулаад итгэж ядлаа. Яг хэзээнээс бид тэгж дотно нөхөрлөж эхэлснээ санадаггүй юм. Надаас үе мултарсан олон ах л даа. Бидний нөхөрлөл нас хүйс харгалзахгүй “чи, би” гэж хэлсээр он жилийг ардаа орхиж дээ. Бид хамтдаа нэг өрөөнд хоёулхнаа суух болж, орчлонгийн хамаг л юмыг хамж шимэн ярина. Хорвоогийн үйл явдал барагдах биш дээ. Түүний гэргий, хүүхэд нь, манай гэрийнхэн ч бидний нөхөрлөлийг андахгүй. “Надаас олон цагийг чамтай өнгөрүүлж байгаа ч чамтай би хардахгүй ээ” гэж гэргий нь бидний нөхөрлөлийг, өдрийн ихэнхийг хамтдаа нэг өрөөнд өнгөрөөдгийг минь шоглон хэлдэг. Ямар сайндаа ээж минь “Дүүтэй чинь адилхан нэртэй болохоор андуураад байдаг юм, “ажлын” гэж өмнө нь заавал хэлж бай” гэхэв дээ.

Тэр “Миний нэр Гангануур байсан юм, Гангаа л болчихсон болохоос” гэж хэлнэ. Өөр бусдад тэр бүр хэлээд байсныг мэдэхгүй. Нутгийн маань Ганга нуурын нэртэйгээ л надад хэлж саймширч байгаа нь тэр. Хамт нэг өрөөнд сууж байгаад өглөөний хурал дээр намайг нүүр улалзтал шүүмжилчихээд хурлын дараа орж ирэхгүй алга болчихно. Нэлээд байж байгаад орж ирэхдээ нэг л аргадангуй, тайвшруулах аястай юм яриад ороод ирдэгсэн. Ажлын хэдэн залуусыг тойруулж баахан дөгөөж, инээд наргиан болж яваад зориг ордог юм уу, намайг шүүмжилснээ мартдаг юм уу, инээд алдсаар ороод ирнэ. Эхэндээ анзаардаггүй байсан ч сүүлдээ мэддэг болчихлоо. Янзыг нь үзээд ингэж орж ирэхэд нь заримдаа дуугүй л байна. Нэлээд хойно Гангаа маань хэлж байна. “Айхгүй ч гэсэн аягүй гэж чамайг шүүмжилчихээд өрөөндөө орж ирэхээр халгаад байдаг юм. Уурлахгүйг чинь мэдсээр байж л шууд өрөөндөө ороод явчих хэцүү байдаг” гэж. Бид ингэж л нөхөрлөж ирсэн. Хэн хүнд хэлдэггүй нууцаа ч сэмхэн шивнэлдэнэ шүү дээ. Дараа нь өөр, өөр өрөөнд суудаг болсон ч манай өрөөгөөр оролгүй явна гэж үгүй. Заавал хэдэн үг сольж, тамхиа баагиулж байгаад л гарна.

Одоо дахиад ирэхгүй гэж бодож ч чадахгүй ээ. Зүгээр л аян замын тэмдэглэлээ бичихээр хаа нэгтээ удаан хугацаагаар явсан байх. Бэлтгэлийн хувцастайгаа хаа нэгтээ хэнэггүйхэн инээчихсэн алхаж яваа. Ингэж бодож л гунигт бодлыг үргээхээс дээ. Тэр хэзээ ч хээнцэр ганган хувцасладаггүй байлаа. Хэнэггүй л эр дээ. Бие нь өвдөж нэлээд удаан хугацаа өнгөрсөн ч байсхийгээд л ажил дээрээ ирчихсэн нийтлэлээ бичээд, эсвэл бидний нэрлэж заншсанаар арын нүүрээ бичээд сууж байна. Энэ буланг Ж.Гангаа маань л анх бичиж эхэлсэн. Жижигхэн хэмжээтэй ч том санаа агуулдаг энэ бичлэгүүдийг нь манай сонины уншигчид унших дуртай. Саяхан өрөөндөө юм бичээд сууж байхад нь хуучны нэг танил нь орж ирээд их л турж жижигхэн болсныг нь хараад таниагүй бололтой. Манай өрөөнд орж ирээд “Гангаатай уулзах гэсэн юм. Өрөөнд нь өөр хүн сууж байна” гэлээ. Үгүй дээ, өөрөөс нь өөр хүн ширээн дээр нь суух ёсгүй. Та анзаараагүй байлгүй” гэсээр дагуулж очиход өөрөө инээчихсэн юмаа бичээд сууж байна. “Энэ хүн чамайг байхгүй байна гэхээр нь дагуулаад ирлээ гэхэд “Намайг танихгүй болохоор нь “Байхгүй байна” гээд хэлчихсэн юм” гэдгийн байна.

Нөгөө хүн таниагүйдээ тэвдэж баахан тайлбар тавих гэтэл Гангаа тоосон шинжгүй наргиа болгоод л өнгөрөв. Ер нь их хошин мэдрэмжтэй хүн л дээ. Бичихдээ ч, ярихдаа ч нэг тийм аяс цухалзана. Найз нөхдөөр байнга хүрээлүүлнэ. Шинээр ирж байгаа залуус нэг л мэдэхэд Гангаа ах гээд багш шавь болчихно. Тэр олон хүнд уйгагүй зааж сургана. Шинэ залуу сэтгүүлчид байтугай сэтгүүл зүйн луугарууд ч хадаг барьж шавь орчихно шүү дээ. Хүнд урам ч өгнө, шүүмжилбэл ч шүүмжилнэ. Өглөөний хурал дээр Гангаа дарга юу гэж хэлэх бол гэхээс сэтгүүлчид жигтэйхэн сандарна. Шүүмжлэл нь яалт ч үгүй оносон байдаг болохоор хэн ч эсэргүүцэхгүй л дээ. Харин Гангаа магтсан бол тэр хүн нэг хэсэгтээ л додигор явна шүү дээ. Гангаагийн нийтлэлийг унших ямар сайхан гээч. Өглөөний ундаа уухтай адил Гангаагийн нийтлэлийг унших гэж өглөө бүр сонин авч уншдаг гэж нэгэн танил маань хэлж билээ. Дэндүү, дэндүү амттай бичдэг юм чинь дээ, арга ч үгүй биз.

Гудиггүй, гуниггүй анд минь. Дахиж найзынхаа бичсэн сайхан нийтлэлүүдийг уншихгүй болжээ. Түүнтэйгээ ширээний наана цаана, хундага дарс хуваан сууж инээж хөхрөхгүй нь. Байхгүй болсон гэж хүлээн зөвшөөрч чадахгүй ч хорвоогийн хатуу хуулийг яалтай. Өөр амьдрал байдаг бол заавал диваажинд очих ёстой хүн дээ, миний анд. Тэнд ертөнцийн гайхам сониныг, талын салхи ямар үнэртэйг, цэцэгс ямар үзэсгэлэнтэйг, амьдрал ямар амттай бас ямар ээдрээтэйг, гол ус хэрхэн урсдагийг, нөхөрлөл ямар үнэ цэнэтэйг, бүсгүйчүүд ямар сайхныг ярьж өгөөрэй. Энэ дэлхий чамд томилолт өгөөд явууллаа.

Д.МӨНГӨНДАЛАЙ