Реппер Цэцэ хүүхэд багачуудад зориулсан хандивын тоглолт хийх гэж байна. Тус тоглолтод Opozit, 3 охин, Дөлгөөн, BX “Хувьсал” продакшн, Vanquish зэрэг хамтран уран бүтээл хийсэн хамтлаг, дуучид оролцох ажээ.
“Ном ба ирээдүй” нэртэй хандивын тоглолтын бүх орлогыг Нацагдоржийн нэрэмжит Улаанбаатар хотын төв номын санд байрлаx 1-6 насны хүүхдүүдэд зориулсан номын санд хандивлах юм байна.
Улстөрч У.Хүрэлсүхийн ахалсан “Андууд” хамтлагийн амьд хөгжмийн тоглолт өнөөдөр Тусгаар тогтнолын ордны Их танхимд болно. Унаган багаасаа нөхөрлөж ирсэн андуудынхаа хамт жинхэнэ амьд тоглолтоор зочдынхоо сонорыг мялааж, сэтгэлийг баясгах ажээ.
Тэгвэл Чингэлтэй дүүргийн Засаг даргын орлогч асан Г.Ариунбуян “Андууд” хамтлагийн басс гитарчин, цөмийн энергийн газрын дарга асан Г.Манлайжав бөмбөрчин нь гэнэ. “Айзам” хамтлагийн Хүрэлбат, “Рок мангас” Ч.Мөнхсайхан нар хамтлагийн уран сайхны удирдаач нь ажээ.
У.Хүрэлсүхийн тоглолтод хоёр гавьяат ирж ая дуугаа өргөх аж. “Чингис хаан”-ы Жагаа “Анд нөхдийн дуу”, “Хундагаа өргөе” дуунуудаараа танхимд цугларсан олны цөсийг хөөргөнө гэж “Андууд” хамтлагийнханд амласан байна. Гандан бууршгүй эрос хатагтай Т.Ариунаа болон дуучин Наран нар амьд хөгжмийн гайхамшиг дор хоолойн чадлаа гайхуулах нь ээ.
Тоглолтод МАН-ын үе, үеийн дарга нар, Ерөнхий нарийн бичгийн дарга нар ирж үзэгчдийн суудалд тухлах гэнэ. Монгол ардын нам “Зөвлөхүүдийн танхим” нэрийн дор үе, үеийн удирдлагуудаа нэгтгэн өнөөгийн үйл ажиллагаандаа санал зөвлөмжийг нь хэрэгжүүлж эхэлсэн байна. Тэгвэл “Зөвлөхүүдийн танхим”-аас Ерөнхийлөгч асан Н.Багабанди, Ерөнхий сайд асан С.Баяр нарын лидерүүд тоглолтод ирэх бололтой.
У.Хүрэлсүхийн урлагийн авьяас ийнхүү тодорч буй ч улс төрөөс холдох нь юу л бол. Түүнд “Гавьяат жүжигчин амлаад ч намаас нь салгаж чадахгүй” гэх яриа Ардын намын цагаан ордонд ид хүчээ авч байна.
Монголын хөлбөмбөгийн холбооныхон ойрын өдрүүдэд ачаалал ихтэй байгаа сурагтай. Шинэ Ерөнхийлөгчийг сонгохоос өмнө FIFA-гаас ирүүлсэн удирдамжийн дагуу шинэ дүрмээ боловсруулахаар түр хороог байгуулан ажиллаж байгаа бөгөөд 11 хүний бүрэлдэхүүнтэй түр хороо аль хэдийн ажилдаа орсон гэнэ.
Хэдхэн хоногийн өмнө Ерөнхийлөгчийн үүргийг түр гүйцэтгэж буй А.Ганбаатарыг хүлээн зөвшөөрч буйгаа илэрхийлэн FIFA-гийн албан ёсны цахим хуудаст түүний мэдээллийг оруулжээ.
А.Ганбаатар нь саяхан Монголын хөлбөмбөгийн холбооны санхүүд аудит шалгалт оруулах хүсэлт гаргасан тухай баттай эх сурвалж мэдээлж байна. Өмнөх хүнийхээ санхүүгийн асуудлыг нэг мөр цэгцэлж дүрэм батлах хурал хүртэл санхүүгийн болон бүх шийдвэрээ нээлттэй ил тод болгохоо тэрээр хөлбөмбөгчдөд амалсан ажээ.
МХБХ-ны ерөнхийлөгчид нэр дэвшсэн ХХБ-ны Б.Мэдрээ, “Шар айраг” хамтлагийн дуучин Г.Ганхүү нараас “Морь” Ганболдыг ялж чадах ганц хүн нь Ерөнхийлөгчийн зөвлөх А.Ганбаатар гэж хөлбөмбөгчид үзэж байгаа гэнэ.
Ардчилал, Шударга ёс, Монголын Залуучуудын холбооноос энэ амралтын өдрөөр буюу 11 дүгээр сарын 1-нд өглөөний 09 цагаас Онцгой байдлын Ерөнхий газрын харъяа Аврагч спорт хороонд аймаг, нийслэлийн залуучуудын хооронд сагсан бөмбөг, ширээний теннис, шатарын тэмцээнийг зохион байгуулахаар боллоо. Уг спорт өдөрлөгийн нээлт 11 цагаас болох аж. Нийтдээ хот хөдөөгийн эрэгтэй, эмэгтэй багаас бүрдсэн 300 орчим тамирчид энэ удаагийн спорт өдөрлөгт хамрагдахаар урьдчилсан мэдүүлгээ өгөөд байна. Энэ арга хэмжээг цаашид жил бүр уламжлал болгон явуулахаар төлөвлөсөн байна. Хот хөдөөгийн ялгаа зааг газар авлаа гэж ярих болсон энэ цаг үед хот хөдөөгийн залуусыг нэгтгэсэн энэ мэт спорт өдөрлөгүүд олноор зохион байгуулагдах нь чухал гэдгийг АШЁМЗХ-ны тэргүүн О.Буяннэмэх хэлж байна. Мөн тэрээр энэхүү арга хэмжээгээр дамжуулан залуусыг спиртлэг бус спортлог байхыг уриалж байгаа юм байна.
Арабын нэгдсэн Эмиратын Абу Даби хотноо жүдо бөхийн “Их дуулга” тэмцээн өчигдөр эхэллээ. Дэлхийн 65 улсын эрэгтэй 246, эмэгтэй 155 жүдоч олимпийн эрхийн оноо авахаар өрсөлдөж байна.
Олимпийн эрхийн оноо олгох жүдо бөхийн “Их дуулга” тэмцээний эхний өдөр эмэгтэйчүүдийн 48 кг-д өрсөлдсөн Гавьяат тамирчин М.Уранцэцэг жиндээ тэргүүлж, алтан медаль хүртлээ. “А” хэсгийг тэргүүлэн барилдсан тэрээр эхний тойрогтоо гоц мөргөж улмаар ОХУ-ын бөх Кристинаг юүко үнэлгээгээр ялсан бол хэсгийн аваргын төлөө Испанийн бөх Жулиаг юүкогоор ялж хагас шигшээд БНАСАУ-ын бөхийг ялж финалдсан юм. Харин аваргын төлөө олимп, дэлхийн аваргын хүрэл медальт Унгарын Эва Черновичкиг юүко үнэлгээгээр ялж түрүүллээ. М.Уранцэцэгийн хувьд 2893 оноогоор дэлхийн чансааг тэргүүлж байсан бол ийнхүү “Их дуулга”-д түрүүлж, 500 оноо нэмснээр 3393 оноотой боллоо.
“Их дуулга”-д түрүүлсэн жүдоч олимпийн эрхийн 500 оноо, мөнгөн медаль 300 оноо, хүрэл медаль 200 оноотой болно.
Түүнчлэн тэмцээний эрэгтэйчүүдийн 60 кг-д хүч үзсэн Д.Амартүвшин мөнгөн медаль хүртлээ. Д.Амартүвшин “А” зоог тэргүүлэн барилдаж эхний тойрогтоо гоц мөргөж хоёрдугаар тойрогт Эквадор, Казахстаны бөхчүүдийг дараалан цэвэр ялж хэсгийн аварга болсон юм. Хагас шигшээд тэрбээр Азербайжаны Мушкиев Игарыг 3:18 минутад цэвэр ялж финалд шалгарсан. Алтан медалийн төлөө Азербайжаны Сафаров Орхантай барилдаж вазари үнэлгээ алдснаар мөнгөн медалийн эзэн болов.
Жүдо бөхийн “Их дуулга” тэмцээний эрэгтэйчүүдийн 60 кг-ын жинд Монголын шилдэг хоёр жүдоч өрсөлдөж, хамтдаа медалийн тавцанд зогссон. Энэ жинд Д.Амартүвшинтэй хамт өрсөлдсөн Г. Хэрлэн “Д” хэсгийг тэргүүлэн барилдаж эхний тойрогтоо гоц мөргөж, улмаар Армян, Автсрийн бөхийг ялсан хагас шигшээд шалгарсан юм. Тэрээр Азербайжаны жүдоч Сафаров Орханд хагас шигшээд торгуулиар ялагдаж, хүрэл медалийн төлөө Их Британийн жүдоч Мккензий Эшлиг 2:18 минутад цэвэр ялж хүрэл медаль хүртэв.
Эстони улсын нийслэл Таллинн хотноо болж буй зуун буудалт даамын өсвөрийн Дэлхийн аварга шалгаруулах тэмцээний сүүлийн 9 дэх өрөг өнөөдөр болж, аваргууд тодрох юм. Тэмцээнд 14 орны 128 өсвөрийн даамчид оролцож байгаагаас манай улсаас 12 тамирчин дэлхийн үеийн шилдгүүдтэй өрсөлдөж байна.
Тэмцээний найман өргийн дараах байдлаар охидын 8-10 насанд өрсөлдөж буй Б.Мөнхжин 6 хожил, 2 хожигдолтой авснаар 12 оноогоор II байрт бичигдэж байна. Тэрээр өнөөдөр сүүлийн өргөө 11 оноотой IV байрт жагсаж буй Казахстаны Кассум Алимтай тоглох юм. Энэ насанд 28 даамчин өрсөлдөж байгаагаас Беларусын тамирчин Часнакова 7 хожил, 1 тэнцээ хийснээр 15 оноотой болж, түрүүлэх болзлоо хангаад байгаа бол манай тамирчин Б.Мөнхжин удаалж байгаа бол Б.Өнөржаргал VII, Б.Мишээл XI байрт бичигдэж байна.
Мөн охидын 11-13 насанд Г.Дүүрэнбилэг VI, Э.Маргад VIII, С.Энхтүвшин Х байрт жагсаж байна.
Харин хөвгүүдээс 8-10 насанд Э.Үйлстөгөлдөр 11 оноогоор V, Б.Сүхбат 10 оноогоор VII, Б.Баярмагнай XV, 11-13 насанд Ц.Чинзориг, С.Мөнх-Оргил нар XVII, XVIII байр, М.Лувсандорж XXIX байрт жагсаж байна.
9 дэх өргийн дүн өнөөдөр Улаанбаатарын цагаар 21.00 цагт гарах юм. Тэмцээний мэдээллийг http://championship2014.kabeliit.ee/results.html сайтаас авна уу.
Монголын Хадгаламжийн Даатгалын Корпораци Банкийг өөрчлөн байгуулах, нөхөн төлбөрт гаргасан амжилтаараа Олон улсын Хадгаламжийн Даатгагчдын Холбоо/IADI/-ны 2014 оны Шилдэг байгууллагаар шалгарлаа. Тус Корпораци нь Хадгаламж банкийг Төрийн банкинд нэгтгэсэнтэй холбогдуулан Төрийн банкинд нийт 204,9 тэрбум төгрөгийн дэмжлэгийг үзүүлж санхүүгийн салбарын тогтвортой байдлыг ханган ажилласан үр дүнгээрээ нийт 77 орны хадгаламжийн даатгалын корпорациудаас шалгарсан байна. Энэхүү шагналыг хүртсэнээр Монгол Улсыг олон улсын санхүүгийн салбарт таниулахаас гадна хадгаламж эзэмшигчдийн банкинд итгэх итгэлийг нэмэгдүүлэх аж.
Түүнчлэн Хадгаламжийн Даатгалын Корпораци нь дэлхийн “Хуримтлалын өдөр”-ийг тохиолдуулан Монголын Банкны Холбоо, арилжааны банкуудтай хамтран анх удаа нэгдсэн “Санхүүгийн Нээлттэй Өдөрлөг”-ийг зохион байгууллаа. Уг өдөрлөг 2014 оны 10 дугаар сарын 31-ны өдрийн 12:00 цагт “Блю Скай” цамхагт зохион байгуулагдаж сурлага хөдөлмөрөөрөө тэргүүлэгч, авьяас чадвартай хагас болон бүтэн өнчин хорин хүүхдийг сонгон авч тэдгээр хүүхдүүдэд 50,000 төгрөгийн ваучерийг гардуулав. Өдөрлөгийн хүндэт зочноор ардын уран зохиолч, МУСГЗ П.Бадарч уригдан оролцож хүрэлцэн ирсэн хүмүүст өөрийн зохиолын дээжисээр бэлэг барьлаа. Мөн эдийн засгийн ухааны доктор, профессор Л.Оюун хуримтлалын талаар олон нийтэд зориулсан илтгэл тавьсан зэрэг олон сонирхолтой үйл ажиллагаа зохиогдон ирсэн зочид бүр гарын бэлэгтэй буцлаа. Өдөрлөгийн ач холбогдол нь ард иргэдэд хуримтлалтай байхын давуу тал, түүнийг хэрхэн үүсгэх талаар мэдлэг өгөхөд оршиж байв.
Энэ хорвоод мэндлээд удаагүй хүүхдээ гудамжинд орхин явсан хэрэг Сүхбаатар дүүрэгт гарсан талаар мэдээлж байсан. Гудамж хаягдсан нярай нас барсан бөгөөд СХД-гийн 19-р хороонд түр оршин суугч Говь-Алтай аймгийн харьяат 19 настай оюутан эмэгтэй болох нь тогтоогджээ. Эцэг, эх асран хамгаалах үүргээ биелүүлээгүй улмаас хүүхдийн амь нас, эрүүл мэндэд хохирол учруулсан тохиолдолд 5-10 жилийн хорих ялаар шийтгэдэг хуультай юм.
“Монголын эмэгтэйчүүдийн хөдөлмөрийг дэмжих холбоо”-ноос Боловсрол, шинжлэх ухааны сайд Л.Гантөмөрт хандан албан бичиг хүргүүлснийг нь цахим ертөнцөд ихээхэн дэмжлэг аваад байна. Агуулга нь цэцэрлэгийн тарах хугацааг нэг цагаар хойшлуулбал олон мянган эцэг эхчүүдийн асуудал шийдэгдэх тухай аж.
Тус албан бичигт “Бид цэцэрлэгт сурч байгаа 75 мянга гаруй хүүхдүүдийн эцэг эхийн нэрийн өмнөөс дараах хүсэлтийг танд хүргэж байна. Төрийн өмчийн цэцэрлэгүүд 17.00 цагаас тардаг нь ажил албатай аав ээжүүдийн хувьд хүүхдээ цэцэрлэгээс нь цагтаа амжиж авах эсвэл ажлаа таслах сонголтод хүргэж байна.
Үүнээс болж гэр бүлийн гишүүд болон ажилтан ажил олгогчдын дунд үл ойлголцол үүсэх зэрэг таагүй хүндрэлүүд үүсгэсээр багагүй хугацаа өнгөрлөө. Энэхүү асуудлыг “18.00 цагт цэцэрлэг тардаг” болгон өөрчилбөл олон аав, ээж ажлаа тайван хийх нөхцөл бүрдэнэ. Дээрх шийдвэрийг гаргахад төсөвт ямар нэг хүндрэл гарахгүй.
Цэцэрлэгийн ангийн багш нар ээлжлэн өглөөд нэг цагаар хойш ирж, оройд нэг цагаар хойш ажиллахад шийдэгдэнэ гэдэгт итгэлтэй байна” гэсэн аж. Тус холбооныхон энэхүү уриалгаа Нийслэлийн боловсролын газарт мөн хүргүүлсэн бөгөөд “боломжгүй” гэх товчхон хариулт аваад буй аж. Харин сайд Л.Гантөмөрт хаягласан хүсэлтийн хариу одоогоор гараагүй байгаа гэнэ.
Монголын Залуучуудын Холбооноос жил бүр, уламжлал болгон Монгол Улсын Ерөнхий сайдын ивээл дор 12 дахь удаагийн “Иргэний андгай өргөх ёслол”-ын ажиллагаа зохион байгуулахтай холбогдуулан арваннэгдүгээр сарыг 16 настнуудын сар болгон зарласан байна. Монгол улсад 16 нас хүрсэн хүн иргэний үнэмлэхээ гардан авч, Монгол улсын иргэн боллоо гэж үздэг.
Нийгмийн амьдралд оролцох оролцоо боломж нь нэмэгдэж хариуцлага үүргээ илүү ухамсарлах хүний амьдралын хамгийн сайхан үе хэмээн ирэх сарыг 16 настнуудын сар болгон орон даяар аян өрнүүлж, олон сонирхолтой арга хэмжээнүүдийг зохион байгуулах аж.
Тухайлбал, 16 настнууддаа “Миний мөрөөдөл-Миний зорилго” мөрөөдлөө зорилго болгох алхам, сургалт лекцүүд, “Спортлог залуу нас” спортын арга хэмжээ, “Эрүүл идэвхтэй амьдрал” 16 настнуудын явган аялал, “Эдийн засгийн харилцаа”-нд мэдээлэл сургалт, 16 настнуудад санхүүгийн хадгаламжийн үйлчилгээг хэвшүүлэх, “Иргэний андгай өргөх ёслол” зэрэг ажлуудыг зохион байгуулах юм байна. Энэхүү аян маргааш буюу арваннэгдүгээр сарын 1-нд эхлэх бөгөөд албан ёсны нээлт нь Багахангай дүүрэгт болох аж.