Монголбанк 2014 оны эхний зургаан сарын төлбөрийн тэнцлийн урьдчилсан гүйцэтгэлийг гаргалаа. Урсгал тэнцэл 603.6 сая ам.долларын алдагдалтай гарсан нь өнгөрсөн оны мөн үеэс 62 хувиар буюу 1,004.3 сая ам.доллараар буурсан үзүүлэлт юм. Үүнд барааны гадаад худалдааны дансны алдагдал 113 хувиар буурч 86.0 сая ам.долларын ашигтай гарч, үйлчилгээний худалдааны алдагдал 11 хувиар буурч 649.8 сая ам.долларт, орлогын дансны алдагдал 51 хувиар буурч 143.4 сая ам.долларт, урсгал шилжүүлгийн ашиг 81 хувиар өсч 103.5 сая ам.долларт тус тус хүрсэн нь нөлөөлжээ.
Хөрөнгө, санхүүгийн тэнцэл 29.8 сая ам.долларын ашигтай гарсан нь өнгөрсөн оны мөн үеэс 97 хувиар буюу 884.9 сая ам.доллараар буурсан үзүүлэлт бөгөөд энэ нь Монгол Улсад орох гадаадын шууд хөрөнгө оруулалтын ашиг 70 хувиар буюу 873.2 сая ам.доллараар багасч, бусад хөрөнгө оруулалтын дансны алдагдал 129 хувиар буюу 465.5 сая ам.доллараар өссөнөөр тайлбарлагдаж байна.
Бусад хөрөнгө оруулалтын алдагдал өнгөрсөн оны мөн үетэй харьцуулахад ийнхүү өсөхөд аж ахуйн нэгж, байгууллагуудын гадаад худалдааны авлага 209.5 сая ам.доллараар өсч, гадаад зээл цэвэр дүнгээр 187.3 сая ам.доллараар буурсан нь нөлөөлжээ.
Улаанбаатар
Баянхонгор аймгийн Баян-Өндөр суманд Идрэнгийн нурууны орчимд Ашигт малтмалын газрын гурван ажилтан энэ сарын 24-нд төөрч, хоёр хүн нь олдож нэг ажилтан нь ор сураггүй болсон. Эрлийн багийнхан АМГ-ын геологчийг олоогүй байгаа аж. Эрэл үргэлжилж байгаа юм байна. Өчигдөр геологичийн мөр болон зарим хувцсыг олсон боловч эрэлд дөхөм болоогүй гэнэ. Машиных нь гурван дугуй хагарах үед нэг мэргэжилтэн нь GPS буюу байрлал тогтоогч аван “Шинэжинст ойрхон байна” гээд түрүүлж алхаад холбоо тасарчээ. 
Булган аймгийн Хутаг-Өндөр суманд Засгийн газрын ээлжит хуралдаан болж байна. Өнөө өглөө 10.00 цагаас эхэлсэн хуралдаанаар арав шахам асуудал хэлэлцэхээр төлөвлөжээ. Аймгуудыг Улаанбаатар хоттой холбох авто замын ажлын явц ямар шатанд байгаа талаар мэдээлэл сонсох аж. Мөн “Шинэ сумын төв” төслийн хэрэгжилт, дулаан хангамжийг хэрхэн шийдэж байгаа, хөдөөгийн хүн амд үзүүлэх эрүүл мэндийн тусламж үйлчилгээний талаар хэлэлцэнэ. Үүнээс гадна Үйлдвэр хөдөө аж ахуйн яамнаас хэрэгжүүлж байгаа төсөл хөтөлбөрийн талаар хэлэлцэхээр болжээ. Засгийн газрын хуралдаанд бүх сайдууд оролцож байна. 
АНУ-ын Пенсильвани мужийн Филадельфи хотод буудалцаан болж нэг хүн амиа алдаж хоёр хүн шархадсан байна. Цагдаагийн газраас мэдээлсэнээр гурван үл таних этгээд гал нээсэн бөгөөд тэднийг хууль сахиулах байгууллагынхан хайж байгаа гэнэ. 
Наймдугаар сарын 20-нд УИХ-ын хүндэтгэлийн чуулган болох юм байна. БНХАУ-ын дарга Си Зиньпин Монгол Улсад айлчлахтай холбоотойгоор хүндэтгэлийн чуулган зарлах гэнэ. Одоогоор УИХ-ын даргын ээлжийн амралт дуусаагүй тул хүндэтгэлийн чуулган зарлах захирамж гараагүй байгаа аж. Спикер ирэх долоо хоногт ажилдаа ороод албан ёсоор захирамж гаргах бололтой. Хүндэтгэлийн чуулганы дараа ээлжит бус чуулган хуралдана гэсэн мэдээлэл ч байна. 
Сүүлийн үед төр хувийн хөрөнгийг дээрэмдэхдээ “уучлаарай” ч гэхгүйгээр иргэдийнхээ эрхэнд халддаг болж. Жишээ татвал өчнөөн баримт жагсаах хэрэг гарна. Саяхны жишээ гэхэд л өнгөрсөн хавар хэд хэдэн ТҮЦ-ийг эвдэлж нураагаад хамаг барааг нь гаргаад шидэлж байв. Гэртээ амраад өглөө ирэхэд нь хамаг юмыг нь сүйдлээд хаяхдаа манай төр харин ч нэг гаршсан даа. Зүй нь эзнийг нь байхад хэл үгээ ололцоод асуудлыг нэг тийш нь шийдэх учиртай. Хөрөнгөө гаргаж барьсан ТҮЦ-ийн чинь мөнгийг өгье, үлдсэн барааг чинь худалдаж авъя гэдэг ч юм уу, заавал дээрэмчин царайлахгүйгээр асуудлыг шийдэх түмэн гарц төрд бий. Бидний үлгэрлэн дуурайх дуртай, бидэн шиг чөлөөт зах зээлийн эдийн засагтай, бидэн шиг ардчилсан засаглалтай Америк, Германд лав төр нь ийм дээрэмчин авир гаргадаггүй. 
Улаанбаатар хотын банкнаас орон сууцны зээл олгож байгаа талаараа мэдэгдэл гаргажээ. Уг мэдэгдэлд “Улаанбаатар хотын банк нь Монгол улсын Засгийн газар, Монгол банкнаас хэрэгжүүлж буй жилийн найман хувийн хүүтэй ипотекийн зээлийг өөрийн салбар, нэгжээрээ дамжуулан хэвийн хэмжээнд олгож байгаа. Гэтэл хэвлэл мэдээллийн зарим хэрэгсэлээр тус банкийг жилийн найман хувийн хүүтэй ипотекийн зээлийг олгохгүй байхаар шийдвэрлэсэн мэтээр үндэслэлгүй, ташаа мэдээ, мэдээлэл цацагдаж байгаад харамсаж байна.Тус банк нь цаашид харилцагч нарын эрэлт хэрэгцээнд нийцсэн банкны бүтээгдэхүүн, үйлчилгээг тасралтгүй, найдвартай, эрсдэлгүйгээр хүргэн ажиллах болно” гэжээ. 
NASA буюу Америкийн сансар судлалын агентлаг нь Марс нэгэн ер бусын төхөөрөмжийг илгээхээр ажиллаж байна. Түүний тусламжтайгаар зургаан жилийн дараа Марсаас хүчилтөрөгч гаргаж авах гэнэ. “Марс 2020” төслийн хүрээнд хийгдэх ажлын тусламжтайгаар Марс гаригийн талаар олон зүйл тодорхой болох юм байна.
Шинэчлэлийн засгийн газрын сайн ажиллаж байгаа Засаг дарга нарын нэг болох Сүхбаатар аймгийн Засаг дарга Ж.Батсуурь ажлын өрөөндөө төрийн бус байгууллагын хэд хэдэн хүнийг зодож танхайрсан байна. Энэ талаар зодуулсан иргэд нь гомдолтой байгаагаа мэдэгдэж хуулийн байгууллагад хандсанаа мэдэгдлээ. Түүнчлэн түүний өрөөндөө хэрхэн авирласан талаар зодуулсан иргэд мэдээлэл хийхээр болжээ.