Month: June 2014

Нийслэлийн
удирдах ажилтнуудын ээлжит шуурхай зөвлөгөөний үеэр  зарим дүүргийн Засаг дарга нар тулгамдаж буй
асуудлаа танилцууллаа.

Сонгинохайрхан дүүргийн 27-р хорооны нутаг дэвсгэрт байрлах 11 орон сууцны 400
гаруй өрхийг дулаан, усаар хангадаг “Ар жанар” ХХК цаашид үйл ажиллагаа явуулах
боломжгүй болсон гэдгээ мэдэгдсэн гэж тус дүүргийн Засаг дарга М.Чинболд
хэллээ. Ийм нөхцөл  үүссэн тул сэрүүний
улирал болохоос урьтаж энэ асуудлыг шийдвэрлэхгүй бол дээрх айлууд ус,
дулаанаар хангагдахгүй болох эрсдэл бий болно гэлээ. Сонгинохайрхан дүүргээс
холбогдох газруудад асуудлаа танилцуулсан байна. Гэвч тухайн компани нь
Ус  сувгийн удирдах газар, “Улаанбаатар Дулааны шугам сүлжээ” ХК-т
төлбөрийн өртэй байгаа тул нийслэл асуудлыг шууд шийдвэрлэхэд хүндрэл гарчээ. Нийслэлийн Засаг дарга уг асуудлыг Нийслэлийн
удирдлагын зөвлөлийн хуралдаанд танилцуулж, хэлэлцүүлэхээр боллоо.
Харин Налайх дүүргийн Засаг дарга Х.Болдбаатар “Улаанбаатарын Баянзүрх
товчоогоос Налайх дүүрэг хүртэлх авто замыг шинэчлэн, засварлах шаардлагатай
байна. Тус замд багагүй эвдрэл үүссэнээс жолооч нар зорчиход хүндрэлтэй байгаа
талаар гомдол ирсээр байна. Хамгийн гол нь осол  гарах нь ихэссэн бөгөөд он гарсаар 10 хүн амь
насаа алдсан харамсалтай тохиолдлууд байна” гэлээ.
Шуурхай зөвлөгөөний үеэр нийслэлийн Засаг дарга бөгөөд Улаанбаатар хотын
Захирагч Э.Бат-Үүл нийслэлийн удирдах ажилтнуудад дараахь үүрэг, даалгавар
өглөө.
Нийслэлийн нутаг дэвсгэрт зам барилгын ажил хийхдээ замын хөдөлгөөний аюулгүй
байдлыг хангахгүй, иргэдэд зориулсан тэмдэглэгээ хийхгүй  байгааг анхаарч
аж ахуйн нэгжүүдэд шаардлага хүргүүлэх, шаардлагыг хүлээж авахгүй бол  үйл
ажиллагааг нь зогсоох үүргийг Нийслэлийн Цагдаагийн газрын харъяа Замын цагдаагийн
газар, Мэргэжлийн хяналтын газар өглөө.
Үндэсний их баяр наадмыг угтаж орон нутгийн хөгжлийн сангийн хөрөнгөөр хийх
ажлыг эрчимжүүлж, гудамж талбайн тохижилтын ажлыг хугацаа алдалгүй хийхийг
дүүргийн Засаг дарга нарт үүрэг болголоо.
Наадмын үеэр Дунд голоос Хүй 7 худаг руу Railbus явуулахаар төлөвлөж байна. Үүнтэй
холбогдуулан Төв цэнгэлдэх хүрээлэнгээс Дунд гол руу нийтийн тээвэр явуулах шаардлагатай байгаа
тул Нийслэлийн Тээврийн газар, Замын цагдаагийн газарт тусгай маршрут гаргахыг
үүрэгдлээ гэж Нийслэлийн Хэвлэл мэдээлэл, олон нийттэй харилцах хэлтсээс
мэдээллээ.

Энэ зун нийслэлд шинээр нийт 30 мянган метр квадрат талбайд цэцэг, 200 мянган метр квадрат талбайд зүлэг тарьж, 450 мянга гаруй мод, сөөг нэмж суулгах ажээ. Цэцэгжүүлэх, зүлэгжүүлэх ажлыг энэ сарын 30 гэхэд бүрэн дуусгах  юм байна. Түүнчлэн 16 газрыг тохижуулж, хүүхдийн тоглоомын талбай, амралт зугаалгын газар болгохоос гэр хорооллын гурван байршилд бичил цэцэрлэгт хүрээлэн барихаар төлөвлөсөн аж.  Тэдгээр  тохижуулах газрын гурвынх нь ажлын явцтай танилцав. Эхнийх нь Сүхбаатар дүүргийн I хорооны дөрөв, тав, 33 дугаар байрны дундах тохижилтын ажил. Энд өмнө нь ямар ч хашаа, хайс, цэцэрлэггүй шороон талбай байжээ. Одоо харин энд мянга гаруй метр квадрат газар зүлэг, мод суулгаж, хүүхдийн тоглоомын талбай, сагсны шийд, явган хүний зам, хашаа, хайс барин иж бүрэн тохижуулалт хийж байгаа юм байна. Хүүхдийн гулсуур, тоглоомнуудын дор хүүхдүүдийн аюулгүй байдлыг хангах үүднээс резинэн зөөлөвч дэвсэж өгсөн байна. Нийт 260 гаруй сая төгрөгийн хөрөнгөөр бүтсэн ажил дуусах шатандаа оржээ. 

Дараагийн тохижилтын ажил  Сонгинохайрхан дүүргийн VIII хороонд буюу Баянхошууны гэр хороолол дунд байрлах “Гүнжийн нуур”-ыг тойрсон бичил цэцэрлэгт хүрээлэн. Нийслэлийн Засаг даргын экологи, ногоон хөгжлийн асуудал хариуцсан орлогч дарга Т.Бат-Эрдэнэ ярихдаа “Цаашид гэр хорооллын дундах тохижилт, бичил цэцэрлэгт хүрээлэн байгуулахад анхаарал хандуулан ажиллах болно. Гэр хороолол гэхээр юм бүхнээс хоцроод байдаг тал бий” гэж байв. Тийм ч учраас эхний ээлжинд эл газрыг сонгон авч бичил цэцэрлэгт хүрээлэн барихаар болжээ. “Гүнжийн нуур” нь нийслэл хотод байрлах ганцхан нуур бөгөөд зундаа галуу, цахлай зэрэг усны шувууд ирж зусдаг газар. Нуурын талбай нь 560 метр квадрат, хоёр метр гаруй гүн аж. Тохижилтын хувьд нуурыг тойруулан битүү хашаа барьж, 360 гаруй мод, бут суулган, эргэн тойрон цэцгийн мандал хийж, явган хүний зам, сандал, хогийн сав, гэрэлтүүлэг, гадна машины талбай, харуул хамгаалалтын байр гээд бүгдийг цогцоор нь шийдэж өгөх гэнэ. Түүнчлэн нуур руугаа орсон 30 метр гүүр  барьж, хүүхдүүдийн хүсэлтээр гадна талбайд сагсны шийд босгох аж. Энэ хавийн газар нь нэлээд намгархаг тул цэцэрлэгт хүрээлэн босгох газар хайрга дэвсэж тэгшилжээ. Нийтдээ 440 гаруй сая төгрөгний хөрөнгө орж байгаа бөгөөд долдугаар сарын 10 гэхэд хүлээлгэн өгөх гэнэ. 

Мөн гэр хорооллын голд байх Тасганы овооны тохижилттой танилцлаа. Эндхийн ажил хараахан эхлээгүй бөгөөд одоо зургийн ажлыг хийж дуусгаад гүйцэтгэлийн тендер зарласан байна. Гандантэгчилэн хийдийн зүүн талд байдаг Гэсэр сүмийн Тасганы овооны ойр орчны талбай нь өвс ногоо ургах боломжгүй, маш хатуу чулуулагтай газар. “Эндхийг тохижуулахдаа элдэв тоглоомын талбай байшин сав барилгүйгээр байгалиар нь тохижуулахыг бид зорьж байгаа. Битүү зүлэгжүүлэн, ургамалан буюу модоор тойруулан хашлага барина. Овоонуудыг тойруулан чулуун зам барьж, буддын зан үйл үйлдэхэд тохиромжтой болгон, толгодын бэлд машины зогсоол барьж, Тасганы овоо руу гарах чулуун зам хийх юм байна. Мөн доод хэсэгт хатуу хөрстэй, усжуулалт бордоогүй газар хэрхэн ногоо тарьж болохыг судлах зорилгоор туршилтын найман талбай хийхийг зорьж байгаа ажээ. Эхний ээлжинд тэндээ монос, чацаргана, үхрийн нүд зэрэг моднуудыг тарьж үзнэ” хэмээн Нийслэлийн байгаль орчин ногоон хөгжлийн газрын дарга Г.Болортуяа ярьсан. Энэ хавийн газрыг Дэлхийн банкнаас Нийслэлтэй хамтран тохижуулж байгаа бөгөөд бүх хөрөнгийг Дэлхийн банкнаас гаргажээ. Нийт 900 мянган ам.доллар  төсөвлөснөөс 400 мянган ам.долларыг судалгааны ажилд зарцуулаад байгаа аж. Тохижилтын ажил ирэх  аравдугаар сард дуусна. 

Э.НОМИН-ЭРДЭНЭ

Нийслэлийн Засаг даргын Экологи ногоон хөгжлийн асуудал
хариуцсан орлогч Т.Бат-Эрдэнэ Улаанбаатар хотын тоосжилтыг бууруулах зорилгоор
сул шороон хөрс бүхий гудамж талбайг хайрган хучилттай болгож тохижуулж  байгаа
ажил болон гэр хороололд баригдаж буй цэцэрлэгт хүрээлэнгийн ажилтай танилцлаа.

Энэ зун нийслэл
хотын хэмжээнд 11 газарт тохижилт хийхээс гурав нь гэр хорооллын дундах бичил
цэцэрлэгт хүрээлэн юм.  Үүний  нэг бол Сонгинохайрхан дүүргийн VIII хорооны
нутаг дэвсгэрт байрлах “Гүнжийн нуур” цэцэрлэгт хүрээлэн.  “Гүнжийн нуур” нь Улаанбаатрын гэр хорооллын дунд байрлах
ганц нуур бөгөөд хоёр метр гаруй гүн, 2.2 га талбайг эзлэн байдаг.  Өнөөдрийн байдлаар уг нуурыг
тохижуулах ажил 50 гаруй хувьтай байгаа бөгөөд
нийслэлээс 441 сая төгрөгийг зарцуулж байна. Долдугаар сарын 10 гэхэд хүлээлгэн
өгөхөөр төлөвлөж байгаа аж. 

Э.Номин

-112 МЯНГАН ТӨГРӨГИЙН ҮНЭТЭЙ СОЛОНГОС ТАРВАС-

Өнгөрсөн долоо хоногийн хамгийн их шуугиан тарьсан мэдээллээр 120 мянган төгрөгийн үнэтэй тарвас байлаа. Уг мэдээллийг хамгийн анх олон нийтийн сүлжээ болох фэйсбүүкийн нэгэн хэрэглэгч “Дэлхийн хамгийн үнэтэй тарвасыг “Home Plaza” худалдааны төвд зарж байна. Монголчууд баян юм, би Европт олон жил амьдрахдаа ийм үнэтэй жимс хараагүй. Жирийн нэг тарвас 112 мянган төгрөгийн үнэтэй байна” гэж өөрийн сэтгэгдлээ бичсэн байсан юм. Бид энэ удаагийнхаа “Олны үг ортой эсэхийг шалгалаа” булангаар “айхавтар” үнэтэй тарвасыг сурвалжлахаар “Оддын хотхоны” урд байрлах “Home Plaza-2” худалдааны төвийг зорилоо. Уг худалдааны төвийн барааны үнэ бусад дэлгүүрээс жаахан үнэтэй гэдэг нь хэдхэн ширхэг өргөн хэрэглээний хүнсний бүтээгдэхүүнийг харахад л мэдрэгдэж байлаа. Гол худалдан авагч нар нь бидний хэлж заншсанаар баячуудын хороолол буюу Зайсангийнхан. Тийм болоод ч тэр үү бараа бүтээгдэхүүн нь өндөр үнэтэй байдаг бололтой.

“Home Plaza” худалдааны төв долоо хоног бүрийн лхагва гаригт уг тарвасыг БНСАУ-аас онгоцоор тээвэрлэж авчирдаг юм байна. Килограммыг нь 14900 төгрөгөөр зардаг учраас нэг бөөрөнхий тарвас 6-7 кг байдаг учраас ойролцоогоор 100 гаруй мянга болдог гэж заалны зохион байгуулагч Б.Пүрэвсүрэн бидэнд хэлсэн юм. Мөн “Манай худалдааны төв Солонгос улсаас химийн ямар нэгэн бодис ороогүй тарвасыг оруулж ирж байгаа. Бид хэрэглэгчдийг заавал бүтнээр 100 гаруй мянган төгрөгөөр тарвас худалдаж ав гэж шаардахгүй. Хэрэглэгч хүсвэл зүсүүлээд авч болно” гэв. Энэ тарвас нэлээн их борлуулалтай байдаг гэсэн шүү. Харин Солонгос улсад энэ тарвасыг килограммыг нь 5000 воноор зардаг бол Европийн холбооны улсуудад ойролцоогоор 3.50 евроогоор зарагддаг аж. Мэдээж манай улсад онгоцоор ирдэг учраас тээвэрлэлтийн хөлс, гаалийн татвар орох нь ойлгомжтой.

Барс зах дээр БНХАУ-аас оруулж ирсэн тарвас килограмм нь 2000-2500 төгрөгөөр зарагддаг бол томоохон худалдааны төвүүдэд 4000-4500 төгрөгийн үнэтэй байна.

Эх сурвалж www.medee.mn

М.АМАРЖАРГАЛ

Боловсролын үнэлгээний
төвөөс мэдэгдэл гаргажээ.  МОНГОЛ
ХЭЛ БИЧИГ -ийн шалгалтаас хоцорсон шалгуулагчид бусад сонгосон хичээлүүдийн
шалгалтанд орж болох бөгөөд дахин Монгол хэл, бичгийн  шалгалтанд хамрагдана гэж үүнд дурдсан байна. Дахин шалгалтыг
Элсэлтийн ерөнхий шалгалт  дууссан хойно
авах юм байна.   Дахин шалгалтын  товыг  БҮТ-өөс мэдэгдэнэ гэлээ. Дашрамд дурдахад Боловсролын үнэлгээний төв бууриа сэлгэж,
Арслантай гүүрний дэргэд “Оюуны ундраа” –гийн байранд нүүж орсон байна лээ.

ШАЛГАЛТЫН
ХУВААРЬ

“Харанга” хамтлагийн
бөмбөрчин, Монголын бөмбөрийн холбооны тэргүүн Н.Пүрэвдашийн “Харанга
& Пүүжээ” тоглолт өнгөрсөн бямба
гаригт  “UB palas”-т болсон юм. Пүүжээ энэ үеэр “Лазер” брэндийн 25 мянган
ам долларын үнэтэй бөмбөрийнхөө ид шидийг үзүүлсэн юм. Энэ тухай  манай сурвалжлагч Ц.Мягмарсүрэнгийн гэрэл
зургийн сурвалжлагаас тольдоно уу.