Month: June 2014

Categories
мэдээ нийгэм

200 өрх гэрэл гэгээтэй боллоо

Сүхбаатар дүүргийн 15 дугаар хорооны нутаг дэвсгэр Ар хустай, Шадивлан орчимд гэрэл, цахилгаангүй амьдардаг 200 өрх, хамгийн хүндрэлтэй байгаа цахилгааны асуудлыг шийдвэрлэж өгөх хүсэлтийг нийслэлийн Засаг даргын Хот  байгуулалт, хөрөнгө оруулалтын асуудал хариуцсан орлогч С.Очирбатад тавьжээ.

Уг хүсэлтийн дагуу судалсны дүнд Улаанбаатар цахилгаан түгээх сүлжээ ТӨХК-тай хамтран 200 айлыг цахилгаанд холбожээ. Мөн 782 өрхийн хүчдэлийг нэмэгдүүлэх ажлыг шинэ техник, технологи ашиглан хийсэн байна. НЭнэ ажлын хүрээнд агаарын 6 дэд станцад их засвар хийж, 0.4 кВ-ын 452 ширхэг модон тулгуур болон эрчим хүчний алдагдал багатай байгальд ээлтэй технологи болох төмөр бетон тулгууруудыг шинээр суурилуулж, цахилгаан дамжуулах агаарын шугамын 11.6 км АС утсыг бүрээстэй СИП утсаар сольж татчээ. Мөн 1044 өрхийг бүрэн электрон тоолуураар өдөр шөнийн үнэ төлбөргүй тарифт холбуулж зургаан ширхэгээр багцлан 197 тоолуурын нэгдсэн хайрцагт суурилуулсан байна. 

Categories
гадаад мэдээ

Хөлбөмбөг үзээд харих замдаа осолд орж амиа алджээ

Дэлхийн аварга шалгаруулах хөлбөмбөгийн тэмцээн үзэж яваад харих замдаа зам тээврийн осолд орж, амиа алдсан хэрэг нийслэлд гарсан байна. Энэ харамсалтай явдал өнөөдөр 05.00 цагийн орчимд гарсаныг цагдаагийн газраас мэдээллээ.

Эх сурвалж энэ мэдээллийн талаар “Талийгаач нь хоёр найзын хамт гадуур хөлбөмбөг үзсэнийхээ дараа нэг найзыгаа МУБИС-ийн орчимд буулгасан байна.  Харих замдаа буюу III эмнэлгийн ойролцоо “Гранд марк 2” автомашинтайгаа осолд орж, амиа алдлаа. Харин түүнтэй хамт явсан залууг  эмнэлэгт хүргэсэн. Биеийн байдал таруу байгаа гэнэ.

Categories
мэдээ улс-төр

Аж ахуйн нэгжийн орлогын албан татварын хуульд нэмэлт оруулах хуулийн төслийг үргэлжлүүлэн хэлэлцэв

УИХ-ын өнөөдрийн чуулган 40 гишүүнтэйгээр хуралдлаа. Засгийн газраас энэ оны нэгдүгээр сарын 24-ний өдөр өргөн мэдүүлсэн Аж ахуйн нэгжийн орлогын албан татварын тухай хуульд нэмэлт оруулах тухай хуулийн төслийн анхны хэлэлцүүлгийг үргэлжлүүлэв. Хуулийн төслүүдийг анхны хэлэлцүүлэгт бэлтгэсэн талаарх байнгын хорооны санал, дүгнэлттэй холбогдуулан УИХ-ын гишүүн А.Бакей, С.Дэмбэрэл, Д.Зоригт нар Төсвийн байнгын хорооны дарга болон ажлын хэсгээс асуулт асууж тодруулав.

Засгийн газрын үйл ажиллагааны хөтөлбөрт тусгагдсан зорилтыг хэрэгжүүлэх, бизнест ээлтэй орчин бүрдүүлэх замаар тодорхой салбарт үйл ажиллагаа эрхлэгч, татвар төлөгчдийг татварын бодлогоор дэмжих зорилгоор уул уурхай, ашигт малтмал, нефтийн бүтээгдэхүүний импорт, газрын тосны экспорт, үүрэн холбооны операторын үйлчилгээ, архи, спирт, тамхи зэргээс бусад салбарт үйл ажиллагаа явуулдаг, жилийн борлуулалтын орлого нь 1.5 тэрбум төгрөгөөс илүүгүй аж ахуйн нэгжид төсөвт төлсөн аж ахуйн нэгжийн орлогын албан татварын 90 хувийг буцаан олгохоор Аж ахуйн нэгжийн орлогын албан татварын тухай хуульд нэмэлт оруулах тухай хуулийн төслийг боловсруулсан байна.

 Энэ хуулийн дагуу албан татвар ногдуулах орлогыг тодорхойлохдоо үйл ажиллагааны чиглэл болон тусгай зөвшөөрөл тус бүрээр тусгаарлан тооцох бөгөөд хуулийн 8.1.1-д заасан орлогын дүн нь 1.5 тэрбум төгрөгөөс ихгүй, Монгол Улсад байнга байрладаг албан татвар төлөгчийн төлсөн албан татварын 90 хувийг хуульд заасан шаардлагыг зэрэг хангасан тохиолдолд буцаан олгохоор төсөлд тусгажээ. Уг асуудлыг зохицуулсан хуулийн зүйл заалт нь 2019 оны 01 дүгээр сарын 01-ний өдрийг хүртэл хүчинтэй байхаар тусгажээ. 

Харин Засгийн газрын үйл ажиллагааны хөтөлбөрт тусгагдсан зорилтын хүрээнд нэмэгдсэн өртгийн албан татвар төлөгчөөр бүртгүүлэх босгын хэмжээг өнөөгийн эдийн засгийн өсөлттэй уялдуулан өөрчлөх үүднээс Нэмэгдсэн өртгийн албан татварын тухай хуульд өөрчлөлт оруулах тухай хуулийн төслийг боловсруулжээ. Манай улс 1998 оноос Нэмэгдсэн өртгийн албан татварын тухай хуулийг мөрдөж ирснээс хойш нэмэгдсэн өртгийн албан татвар төлөгчөөр бүртгүүлэх борлуулалтын орлогын хэмжээг 10 сая төгрөгөөр тогтоож өнөөг хүртэл 16 жил өөрчлөлт оруулалгүй хэрэгжүүлж ирсэн. Харин энэхүү 10 сая төгрөгийн суурийг эдийн засгийн нөхцөл байдал, тухайлбал бараа бүтээгдэхүүний үнийн өсөлттэй уялдуулан өөрчлөх шаардлагатай байгаа аж. Сангийн яамнаас гаргасан тооцоогоор 2013 оны жилийн эцсийн байдлаар нийт НӨАТ төлөгчдөөс 10 сая хүртэл борлуулалтын орлоготой татвар төлөгч 21 хувийг эзэлж байхад 50 сая хүртэл борлуулалтын орлоготой татвар төлөгч 45 хувийг эзэлдэг байна. 

Иймээс Нэмэгдсэн өртгийн албан татварын тухай хуулийн 6.4.1 дэх заалтын “80 хувьд” гэснийг “20 хувьд” гэж, 4.1.10, 5.2, 6.11, 7.2, 13.7 дахь хэсгийн “10.0 сая” гэснийг “50.0 сая” гэж тус тус өөрчлөх, уг хуулийг 2015 оны 01 дүгээр сарын 01-ний өдрөөс эхлэн дагаж мөрдөхөөр төсөлд тусгажээ. Нэмэгдсэн өртгийн албан татварын тухай хуульд өөрчлөлт оруулснаар нэмэгдсэн өртгийн албан татвар төлөгч жижиг, дунд бизнес эрхлэгчдийн 50 орчим хувь нь нэмэгдсэн өртгийн албан татварын тайлан гаргах, бүртгэл хөтлөх, падаан цуглуулах үйл ажиллагаанаас чөлөөлөгдөх юм байна.

 Төсвийн байнгын хороо хуулийн төслүүдийн анхны хэлэлцүүлгийг энэ оны 1 дүгээр сарын 28-ний өдрийн хуралдаанаараа хийж, зарчмын болон найруулгын шинжтэй зарим санал гаргасныг санал хурааж шийдвэрлэх явцад гишүүд саналын үндэслэлээ тайлбарлалаа. Байнгын хорооноос дэмжлэг аваагүй гишүүн С.Бямбацогт, Д.Дэмбэрэл, Ж.Эрдэнэбат нарын гаргасан хуулийн төслийн 1 дүгээр зүйлийн 2 дахь заалтын “буцаан олгоно” гэснийг “хөнгөлнө” гэж өөрчлөх буюу аж ахуйн нэгжийн орлогын албан татварын хувь хэмжээг 1 хувь болгох буюу 90 хувиар хөнгөлөх саналыг чуулганы нэгдсэн хуралдаанд оролцсон гишүүдийн 66 хувь нь дэмжсэн юм. Ингэснээр байнгын хорооноос гаргасан найруулгын шинжтэй саналын томъёоллоор санал хураалгах боломжгүй болж буйг УИХ-ын дарга хэлж, хуулийн төслийн хэлэлцүүлгийг дуусгалаа. 

Categories
онцлох-нийтлэл туслах-ангилал

ТОСК-д газар эзэмших эрх олголоо

Нийслэлийн Засаг даргын “Газар эзэмших эрх олгох тухай” А/483 дугаар захирамжаар төрөөс хүн амыг хямд үнэтэй, чанартай орон сууцаар хангах, зорилтот бүлгийн иргэдийг орон сууцаар хангах хөнгөлөлтийн бодлого баримталдаг.

Тэгвэл Монгол улсын Засгийн газраас хэрэгжүүлж байгаа “Шинэ Улаанбаатар” төслийг хэрэгжүүлэхэд зориулж нийслэлийн нутаг дэвсгэрт “Төрийн орон сууцны корпораци” Төрийн өмчит үйлчилгээний газрын байршлыг тогтоож, газар эзэмших эрх олгожээ.

Тухайлбал, Хан уул дүүргийн 10 дугаар хорооны нутаг дэвсгэрт Иргэний нисэхийн урд талд байршуулан 2.0 га газар, 15.0 га газар, Хан-Уул дүүргийн 10 дугаар хорооны нутаг дэвсгэрт Спорт цогцолборын урд талд байршуулан 3,65 га газар, мөн тус дүүргийн 10 дугаар хорооны нутаг дэвсгэрт Морингийн гэр хорооллын  замын урд талд байршуулан 50,0 га газрыг тус тус орон сууцны цогцолборын зориулалтаар 15 жилийн хугацаатай эзэмшүүлэх эрх олгосон байна.

Categories
мэдээ нийгэм

Алтан гулдмай хилээр нэвтрүүлэхийг завджээ

Гаалийн ерөнхий газрын харьяа
Гашуунсухайт дахь гаалийн улсын байцаагч нар  энэ сарын 11-ний  өдөр
Монгол Улсын хилийг нэвтрэхээр гаалийн хяналтын бүсэд нэвтэрсэн 35-69
ӨМА улсын дугаартай фургон маркын авто машинд хяналт шалгалт хийсэн
байна.

Монгол Улсын иргэн Б уг фургон маркын
авто машины эд ангид 800 орчим сая төгрөгийн үнийн дүн бүхий нийт
6.890 кг алтан гулдмайг нуун улсын хилээр хууль бусаар нэвтрүүлэхийг
завдсан үйлдлийг илрүүлж таслан зогсоосон байна.
Уг гэмт хэргийн шинж чанартай үйлдэлд
хойшлуулшгүй ажиллагаа явуулж Цагдаагийн байгууллагад шалгуулахаар
шилжүүлэн өгөөд байна.
Categories
мэдээ нийгэм

Хоёр улсын найрсаг харилцааг б шашин бататгаж байна

Хятад болон Монголын хооронд дипломат харилцаа тогтоосны 65 жилийн ой энэ онд тохиож байна. Мөн 2014 оныг тус хоёр улс найрамдлын солилцооны жил болгосон юм. 1994 онд хоёр улс найрсаг харилцаа, хамтын ажиллагааны тухай гэрээ байгуулснаас хойш хэдийн 20 жил өнгөрчээ.

“Хятад, Монгол хоёр улс бол сайн хөршүүд. Хоёр улс нэг нэгнийхээ ашиг сонирхолтой холбоотой асуудлуудыг харилцан дэмжиж, найрсаг харилцаагаа үргэлжлүүлэх хэрэгтэй” гэж Хятад улсын дарга Си Зиньпин хэлсэн юм.

Энэ хоёр улс нь улс төр, эдийн засаг, боловсрол төдийгүй, шашны салбарт хамтран ажиллаж, харилцсаар ирсэн билээ.

Монголчуудын 90 орчим хувь буддын шашин шүтдэг. Монголын гурван сая орчим хүний нэг сая гаруй нь нийслэл Улаанбаатар хотдоо амьдардаг.

Хятадын Түвдэд болон Монголд буддын шашныг дэлгэрүүлж, хөгжүүлж буй хамтын түүх, бурхны шашинт ард түмэн хоорондын байнгын харилцаа холбоо ч Монгол болон Хятадын харилцааг бэхжүүлж байна.

Өнгөрсөн тавдугаар сард Шанхай хотноо Хятад улсын дарга Си Зиньпинтэй Монгол Улсын Ерөнхийлөгч Ц.Элбэгдорж уулзаж, хэлэлцээ хийхдээ Түвд болон Тайванийн талаарх Хятадын байр суурийг дэмжиж буйгаа бататгасан билээ.

Categories
мэдээ улс-төр

Татварын 90 хувийг буцаан олгох тухай хуулийн төслийг хэлэлцэж байна

УИХ-ын
чуулганы хуралдаан 09.00 цагт эхэлнэ гэж товлогддог ч үргэлж хоцордгийн жишгээр
өнөөдрийн нэгдсэн хуралдаан ч 10.30  цагт эхэллээ.  Чуулганы
хуралдаанаар Аж ахуй нэгжийн орлогын албан татварын тухай хуульд нэмэлт
оруулах, Монгол Улсын эдийн засаг, нийгмийг 2015 онд хөгжүүлэх үндсэн чиглэл
батлах тухай, Гэр бүлйн тухай хуульд нэмэлт оруулах, Галын аюулгүй байдлын тухай
хуулийн төслүүдийг хэлэлцэнэ.  Хуралдааны эхэнд Аж ахуй нэгжийн орлогын
алан татварын тухай хуульд нэмэлт оруулах тухай хуулийн төслийн анхны
хэлэлцүүлэгийг үргэлжлүүлэн хийлээ.

Энэ
хуулийн төсөл нь Монгол Улсад үйл ажиллагаа явуулж буй аж ахуй нэгжүүдэд
татварын 90 хувийг буцаан олгох тухай хууль юм. Хуулийн төсөлтэй холбогдуулан
гишүүд асуулт, тодруулга авч байна.

Categories
мэдээ цаг-үе

Цувималаас эхлээд ган хүртэл бүгдийг хийнэ

-ДАРХАНЫ ТӨМӨРЛӨГИЙН
ҮЙЛДВЭРТ БҮТЭЭН БАЙГУУЛАЛТ ӨРНӨЖ БАЙНА-

Дарханы төмөрлөгийн үйлдвэрт их бүтээн байгуу­лалтын ажил ид өрнөж
байна. Төмрийн хүдрийг нойтон аргаар баяжуулах үйлдвэр барих ажил хийгдэж байгаа
юм. Сүүлийн хэдэн жил үйл ажиллагаа нь доголдож “амь” тавих дээрээ тулаад байсан  Дарханы төмөрлөгийн үйлд­вэр Монгол Улсын гангийн
дотоодын хэрэгцээг бүрэн хангах хүчин чадалтай цог­цол­бор бий болгохоор ажиллаж
байна. Энэ талаар сурвалжлахаар Дарханы төмөр­лөгийн үйлдвэрийг зорин очсон юм.

ХАЯГДАЛ ТӨМРИЙН НӨӨЦ ДУУСЧЭЭ

Биднийг очих үед хаяг­дал төмрийг дахин боловс­руулж барилгын  арматур цутгах зэрэг анх байгуулагдсан цагаасаа
хийж байгаа бүтээгдэхүүнүүдээ үйлдвэрлэж байв. Биднийг төмөрлөгийн үйлдвэрийн цувих
хэсгээр ороход арматур цувиж байлаа. Уртаас урт улайссан төмрийг үйлдвэрийн цувих
шугам дээгүүр арав гаруй метр секунд хурдтай гулгуулах аж. Улайссан урт төмрийг
хайчлах хэсэгт очихоос өмнө хурдыг саа­руулж, нягтаршуулдаг бай­на. Дараа нь нэгэн
ижил хэм­жээгээр хайчилж байв. Ингээд иржгэр болгож хэвлээд хөргөх хэсэгт байршуулан
хэр чанартай болсныг шал­гах зэрэг ажил хийгдэж бай­лаа. Ингэж барилгын үндсэн бүтээгдэхүүн
арматур буюу туйван бэлэн болох юм.

Дарханы төмөрлөгийн үйлдвэрийн үйлдвэрлэсэн
арматур төмөр Япон улсын технологиор хийгддэг боло­хоор чанарын хувьд маш өндөр
үзүүлэлттэй байдаг гэнэ. Япон улсын хувьд газар хөдлөлтийн идэвхитэй бүсэд байдаг
учир барилгын арматурыг хамгийн чанартай, бат бэх стандартаар хийдэг ажээ. Мөн хуурай
соронзон аргаар төмрийн хүдэр боловсруулах үйлдвэр ашиглалтад оржээ. Харин гол ажлуудын
нэг болох төмрийн хүдрийг ной­тон аргаар баяжуулах үйлдвэрийн ажил хийгдэж байв.
Тоног төхөөрөмжүүдийг нь угсраад дуусах шатандаа оржээ. Цахилгаан станц ашиг­лалтад
орох, мантаж хийгдэх, үйлдвэрийн тоног төхөө­рөмжийн тохиргоог хийх зэрэг ажлууд
хийгдэж байлаа.

Дарханы төмөрлөгийн үйлдвэрийг Японы Засгийн газрын  тусламжтайгаар 1993 онд байгуулж байсан түүхтэй.
Өнгөрсөн жил  20 жилийн ойгоо тэмдэглэсэн
байна. Анх Дархан Сэлэнгийн бүсийн төмрийн ордуудыг түшиглэсэн хар төмөрлөгийн цогцолбор
үйлдвэрлэл хөгжүүлэхээр төлөвлөж байгуулж байжээ. Гэвч төмрийн хүдрийн уур­хайг
огт ашиглаж чадахгүй шахам байсаар өдий хүрсэн юм. Үйлдвэрийг жилд 100 мянган тонн
цувимал бүтээгдэхүүн үйлдвэрлэх хүчин чадалтайгаар барь­сан байдаг гэнэ. Гэвч бай­гуулагдсан
цагаасаа хойш хүчин чадлынхаа 30-60 хувийг л ашиглаж ирсэн байна. Гол түүхий эд
нь  хаягдал төмөр. 1990 оны дунд үеэс
2008 он хүртэл хаягдал  төмрийг иргэд ихээр
тушаадаг байжээ. Газар тариалангийн тоног, төхөөрөмжөөс эхлээд трактор, комбайны
эд анги гээд сайн чанарын хаягдал төмрөөр Дарханы төмөрлөгийн үйлдвэр хангагдаж
байжээ. Харин сүүлийн жилүүдэд хаягдал төмөр тушаадаг хүмүүсийн тоо эрс цөөрч, чанар
ч мөн муудсан байна. Одоо ирж байгаа хаягдал төмөр гэвэл аваарт орсон автомашин,
авто засварын газруудаас ирж байгаа мотор кроп, амортизатор гэнэ. Тиймээс дан ганц
хаягдал төмрөөр үйл ажиллагаа явуулна гэдэг бүтэшгүй зүйл болжээ. Дарханы төмөрлөгийн
үйлдвэр сүүлийн таван жилд дунджаар 50-60 мянган тонн цувимал бүтээгдэхүүн үйлдвэрлэжээ.
Энэ нь  дотоодын хэрэгцээний 20 хүрэхгүй хувийг
хангаж байгаа аж. Хаягдал төмрийн нөөц дуусаад ирэх үед Төмөр­тэй, Төмөртолгой,
Хуст-Уулын төмрийн ордыг 2009 оноос ашиглаж эхэлсэн байдаг. Мөн хуурай соронзон
аргаар баяжуулах үйлдвэрийг ашиг­лалтад оруулсан байна.  Дар­ханы төмөрлөгийн үйлдвэрийн Хөгжлийн бодлого
хариуцсан дэд захирал К.Энхчулууны хамт нойтон аргаар төмрийн баяжуулах үйлдвэрийн
бариг­даж байгааг сонирхлоо. Арав гаруй ажилтан гагнуур хийж байхад нь орлоо. Тоног
төхөө­рөмжийн угсралтын ажил хийгдээд дууссан ч бага зэргийн гагнуур хийх ажил үлдээд
байгаа аж. Ной­тон аргаар төмрийн хүдэр баяжуулах үйлдвэр барьж байгаа ажилтнууд
“Бид Монго­лын тусгаар тогтнолын илэрхийлэл болсон гангийн үйлдвэрийн эхлэлийг угс­раад
байж байна. Удахгүй ашиглалтад оруулна” гэв.

 НОЙТОН АРГААР БАЯЖУУЛЖ, АНГИЖРУУЛСАН
ТӨМӨР ГАРГАН АВАХ  ҮЙЛДВЭР ИРЭХ АРАВДУГААР
САРД АШИГЛАЛТАД ОРНО

Төмөртэйн ордод АНУ-ын “Трио” фирмийн 750 тонн цагийн хүчин чадалтай
үйлдвэр суурилагдаад дуус­сан гэнэ. Хуурай төмрийн хүдрийг соронзон аргаар баяжуулс­ны
дараагийн үе шат нь нойтон аргаар баяжуулах үйлдвэр аж. Энэ үйлдвэр нэг сая тонн
хуурай соронзон аргаар баяжуулсан хүдрээр тэжээгдэж, 650 мянган тон­нын нойтон баяжмал
боловс­руулна гэсэн тооцоо гаргажээ. Төмрийн хүдрийг гурван орд газраас  олборлоод Дарханы төмөрлөгийн үйлдвэр рүү татах. 

Олборлосон төмрийн хүдрээ хуурай болон ной­тон аргаар баяжуулан, гарсан баяжмалыг
шууд ангиж­руулсан төмөр болгох юм байна. Ангижруулсан төмөр нь  ган бүтээгдэхүүн үйлдвэрлэх үндсэн түүхий эдтэй
болдог байна. Дарханы төмөрлөгийн үйлдвэр ган үйлдвэрлэх түүхий эд болох ангижруулсан
төмөртэй болох ажил ийнхүү хийгдэж байна. Төмөртэй, Төмөртолгой, Хуст-Уул зэрэг
төмрийн хүдрийн нөөц ихтэй газруудаас олборлосон хүд­рээ хуурай соронзон аргаар
баяжуулаад нойтон аргаар дахин баяжуулан ангиж­руул­сан төмрөөр ган үйлдвэрлэх гэнэ.
Энэ бүгдийг нийлүүлээд “Уул уурхай, металлургийн цогцолбор” гэж нэрлэжээ.  Дарханы Төмөрлөгийн үйлд­вэрийн одоогийн үйл ажиллагааг
өргөтгөн техник, технологийн шинэчлэл хийх, төмрийн хүдрийн баяжмал үйлдвэрлэх хуурай
соронзон сепаратор, нойтон аргаар баяжуулах үйлдвэр, шууд ангижруулсан төмрийн үйлд­вэр
шинээр барих, дэд бүтцийн хувьд уурхайгаас Дарханы төмөрийн үйлдвэрт хүргэх  33.4 км төмөр зам, ачиж буул­гах терминал байгуулах,
уурхай хүртэл 110кВт-ын цахил­гаан дамжуулах 50 км агаарын шугам, өргөтгөл, дэд
станц барих гэсэн нөр их шат дараалсан ажил хийгдэж байна. 

 ГАНГИЙН ҮЙЛДВЭР БАРИХ АЖЛЫН ТЭЗҮ-Г КАНАДЫН “Hatch” КОМПАНИ ХИЙЖ ЭХЭЛЖЭЭ

Монгол ган үйлдвэрлэхэд тохирох технологи, хүчин чадал, ашиглагдах
материал зэргийг нарийвчлан судалсны дүнд Финланд болон Японы технологи тохиромжтой
гэж үзээд  хоёр компанитай гэрээ байгуулан
тоног төхөөрөмж авах гэрээ байгуулан ажиллаж байгаа гэнэ. Нойтон аргаар төмрийн
хүдрийг баяжуулан ангижруулсан төмөр гаргаж авсны дараа өндөр хүчин чадал бүхий
гангийн үйлдвэр барих гэнэ.  Шууд ангижруулсан
төмрийн үйлдвэрийн ТЭЗҮ-г Канадын “Hatch” компаниар хийлгэх ажил эхэлжээ.
“Hatch” компанийн хувьд гангийн салбарт дэлхийд тэргүүлдэг компани гэсэн. Гангийн
үйлд­вэр барих туршлагын  дэлхийд алдартай
компани юм байна. Дээрх ажлуудыг 2017 он хүртэл хийж гүйцэтгээд цогцолбор болгон
ашиглалтад оруулах төлөвлөгөөтэй аж.

 МОНГОЛЧУУД 2017 ОН ГЭХЭД ГАНГИЙН ҮЙЛДВЭРИЙН ЦОГЦОЛБОРТОЙ БОЛНО ГЭВ

Манай улсын гангийн хэрэг­цээ жилээс жилд нэмэгдэж байгаа гэдгийг
Дарханы төмөр­лөгийн үйлдвэрийн Хөгж­лийн бодлого хариуцсан дэд захирал К.Энхчулуун
хэлж байв. Түүний хэлснээр  манай улс
2009 онд ган туй­ван­гийн жилийн нийт хэрэглээ 71 мянган тонн байжээ. Харин
2012 онд 290 мянга болж дөрөв дахин өссөн гэх тоог судалгаагаар гаргажээ. Өнөө жилийн
хувьд 300 гаруй мянган тонн ган хэрэглэх тооцоотой байгаа гэнэ. Ган­гийн хэрэглээ
жилээс жилд  нэмэгдэхийн хэрээр гадагшаа гарах
валютын хэмжээ ихэсч байгаа аж. Ган их хэмжээ­гээр гадаад орнуудаас худал­даж авч
байгаагаас үүдэн ам. долларын эрэлт хэрэгцээ нэмэгдэж, үнэ нь өдрөөс өдөрт нэмэгдээд
байгаа гэнэ. Хөгжилд хүрсэн орнуудын өндөр хөгжилд хүрсэн түүхийг судалж үзэхэд
хөрөнгө мөнгөний хуримтлал бий болонгуут гангийн үйлдвэр барьсан. Гангийн үйлдвэрээс
эх үүсвэрээ авч аж үйлдвэрлэл нь хөгждөг байна. Мөн хадаас, халбага, сэрээ, төмпөн
шанага, төмөр утаснаас эхлээд буу, сум, танк, автомашин гээд гангийн үйлдвэр улс
орны тусгаар тогтнолыг зарладаг чухал салбар Дарханы төмөрлөгийн үйлдвэр 2017 он
гэхэд цогцол­бор болон ашиглалтад орс­ноор эхний ээлжинд 38 төрлийн бүтээгдэхүүн
үйлд­вэрлэж эхлэх гэнэ. Энэ талаар  Дарханы
Төмөрлөгийн үйлд­вэрийн дарга Д.Батжавхлантай ярилцснаа дараагийнхаа дугаарт хүргэх
болно.

 Үргэлжлэл
бий

Э.ХҮРЭЛБААТАР

Categories
гадаад мэдээ

Өмнөд Африкаас ер бусын цэнхэр алмааз олджээ

Өмнөд Африкийн нийслэл Претори хотоос 30 орчим км зайтай газраас 123 орчим каратын жинтэй, хэдэн сая доллароор үнэлэгдэх маш ховор цэнхэр алмааз олдсон тухай тус улсын “Куллинан” уурхайн оператор “Petra Diamonds” компани мэдэгдлээ. Тэд “Ийм хэмжээтэй цэнхэр алмааз маш ховор олддог. Энэ бол үнэхээр чухал ач холбогдолтой олдвор” гэжээ. Өнгөрсөн онд “Petra Diamonds” компани  үүнтэй адил шинж чанартай ч ердөө 25.5-хан карат жинтэй цэнхэр алмаазыг Лондоны зах дээр одоогийн ханшаар 17.5 сая доллароор худалдаж байсан юм.

123 орчим каратын жинтэй уг эрдэнийн чулуу нь 1905 оны нэгдүгээр сарын 5-нд олдсон “Африкийн од” дэлхийн хамгийн том алмааз олдсон газраас холгүй зайгаас олджээ.

Алмаазны үнийг өнгө, цэвэр жин болон бусад шалгуураар тогтоодог аж.

Categories
онцлох-нийтлэл туслах-ангилал

Н.Батбаяр сайдын асуудлыг хэлэлцэнэ

Өнөөдөр 14.00 цагт УИХ дахь Эдийн засгийн байнгын хороо хуралдаж, Н.Батбаяр сайдын асуудлыг хэлэлцэнэ. 

МАН-аас эдийн засгийн хямрал, үүссэн нөхцөлд хариуцаж буй салбарын сайд нь буруутай хэмээн үзэж, Н.Батбаярыг огцруулах асуудлыг өргөн мэдүүлсэн. Хуулийн дагуу энэ асуудлыг долоо хоногийн дотор байнгын хороо, чуулганы хуралдаанаар хэлэлцэх ёстой ч гурван удаа хойшилсон юм.

Үүнийг АН-ынхан санаатайгаар хойшлуулж байна хэмээн МАН-ынхан шүүмжилж байгаа. МАН-ын Эдийн засгийн хөгжлийн сайдыг огцруулах асуудлыг хоёр дахь удаа тавьж байгаа бөгөөд өмнө нь олонхийн бүлэг огцруулах шаардлагагүй хэмээн авч үлдэж байсан юм. Харин энэ удаад Н.Батбаяр сайдыг авч үлдэх эсэхийг олонхийн саналаар шийдвэрлэнэ.