Монгол иргэнийг хөнөөж, цогцсыг нь цүнхэнд хийж хаясан байж болзошгүй хэрэг БНСУ-ын Инчон хотын Намданг дүүрэгт гарсан байна. Тус дүүргийн нэгэн цөөрмөөс аялалын том цүнхэнд хийж хаясан, эрэгтэйн цогцос олджээ. Цөөрмийн ойролцоо үйл ажиллагаа явуулдаг үйлдвэрийн ажилтны өгсөн мэдээллийн дагуу шалгаж үзсэнээр аялалын цүнхэн дэх цогцос Монгол иргэнийх болохыг шинжилгээгээр тодруулсан гэнэ. Уг хэргийг тус хотын цагдаагийн ажилтнууд шалгаж эхэлжээ.
С.Нарангарав
Насанд хүрэгчид согтууруулах ундаа болон мансууруулах бодист донтдог шиг хүүхдүүд илчлэг ихтэй хүнсэнд /”junk food”-тэжээллэг чанар бага, тос, сахар, давс зэргийн агууламж өндөр хоол хүнс/ донтох боломжтой гэж АНУ-ын судлаач мэдэгдлээ.
АНУ-ын Мичиганы их сургуулийн судлаач Эшли Жеархардтын үзэж буйгаар, өндөр хэмжээнд боловсруулсан бүтээгдэхүүн иддэг хүүхдүүдэд хяналтаа алдах, тэвчээргүй болох зэрэг донтолтын сонгодог шинж тэмдгүүд ажиглагдаж болзошгүй.
Тархинд нь өдөөгч хянагч бий болоогүй байдаг учраас насанд хүрсэн хүмүүсээс илүү нярай хүүхдүүд донтолтод илүү өртөмтгий байж магадгүй гэж тэрбээр тайлбарлалаа. Хүүхдүүдийг эрүүл байлгах хамгийн зөв арга бол “junk food” идүүлэхгүй байж, жимс, хүнсний ногоо түлхүү хэрэглүүлэх гэж Жеархардт зөвлөв.
Ажлынхаа хөлсийг нэхэж, өндөр барилгын орой дээрээс аюултай үйлдэл хийсэн нэгэн ажилтны тухай бичлэгийг Солонгосын хэвлэлүүд онцолж байна. БНСУ-ын Кангванду аймагт баригдаж буй нэгэн сүмийн барилга дээр ажилласан барилгачид сүүлийн дөрвөн сарын турш ажлын хөлс болох 23 сая воныг авч чадаагүй юм байна. Тиймээс өнөөдөр тус бригадын 59 настай Ким ажлынхаа хөлсийг нэхэн сүмийн орой дээр гарчээ. Тэрээр барилгын гадуур босгосон тулгуур төмрүүд дээр явж, унах гэснээ зогсч олон удаа аюултай үйлдэл хийжээ. Барилгачин Ким ийнхүү дөрвөн цаг 30 минутын турш эсэргүүцэл зарласны эцэст, 23 сая воны цалингаа бэлнээр авахаар болжээ.
Галын аюулгүй байдлын тухай хуульд нэмэлт, өөрчлөлт оруулах хуулийг УИХ-аар хэлэлцэх гэж байна. Энэ төсөлд “Шударга ёс” эвсэл байр сууриа тусгана гэж тус бүлгийн дарга Н.Батцэрэг мэдээллээ. Тэрбээр “Гал унтраах, урьдчилан сэргийлэх, хохирлыг барагдуулах зэрэг чиглэлээр тодорхой заалт оруулсан хууль болно. Улаанбаатар хотын нягтрал ихсэж, хот төлөвлөлт алдагдсан. Гэнэтийн осол гарвал гал унтраах, эд хөрөнгийг хамгаалах асуудлыг хуульчилна. Сүүлийн 10-аад жилд баригдсан барилгуудын 70 орчим хувь нь мэргэжлийн байгууллагаас галын дүгнэлт аваагүй, зөвшөөрөлгүй баригдсан. Бид энэ чиглэлээр Онцгой байдлын ерөнхий газрын албаны хүнээс мэдээлэл авсан, манай бүлгийнхэн байр сууриа нэгтгэн энэ хуульд тусгана” гэв.
Түүнээс УИХ дахь бие даагч гишүүдийн зөвлөл Албан бус бүлэг байгуулах болсон. энэ бүлэгт “Шударга ёс” эвслийн бүлгээс хэд хэдэн гишүүн орох болсон талаар ямар байр суурьтай байгааг нь тодруулахад, “Энэ талаар өнөөдөр мэдээлэл авлаа. Манай гишүүд албан бус бүлэгт орж зарим хуулийн төслүүдэд байр сууриа нэгтгэхэд татгалзах юмгүй” гэж хариулав.
АНУ-ын Ерөнхийлөгч Б.Обама энэ сарын 3-ны өдрөөс эхлэн Европын гурван улсад айлчилна. Тэдгээр улс болон Европын бусад улсад Украины асуудалтай холбогдуулан Оросыг шахах бодлогоо үргэлжүүлэхийг шаардах болно гэж “AP” агентлаг мэдээлэв.
Ерөнхийлөгч Б.Обама Польш, Бельгид айлчилсны дараа Брюссель хотноо болох “Их 7”-гийн дээд хэмжээний уулзалтад оролцоод, дараагаар Парист очиж Францын Ерөнхийлөгч Ф. Олландтай уулзах юм. ОХУ Украины хилээс цэргээ татсан боловч Украины зүүн нутагт хүчирхийлэл үргэлжилж байгаа үед шинээр сонгогдсон П.Порошенко нөхцөл байдлыг хэрхэн шийдвэрлэх нь тодорхойгүй үед Б.Обамагийн Европ дахь айлчлал болж байгаа нь онцлог юм. Украины асуудалд зарим нэг ахиц гарсан боловч, ОХУ нөхцөл байдлыг намжаах ямар нэг арга хэмжээ авахгүй байна гэж АНУ үзэж байгаа билээ. Брюсселийн “Их-7”-гийн уулзалт бол Украины асуудлаар Сочигийн “Их-8”-ын уулзалтыг цуцлан Оросоос бусад долоон улсын зохион байгуулж буй дээд хэмжээний уулзалт юм. Б.Обама энэ удаагийн дээд хэмжээний уулзалтаар Европын орнууд ОХУ-ын талаар нэгдсэн байр суурьтай байгаасай гэж найдаж байгаа. Түүнчлэн “Их-7”-гийн уулзалтаар Европыг Оросын байгалийн хийн хараат байдлаас ангижруулах арга зам болон Орост авах нэмэлт хориг арга хэмжээ зэрэг асуудлыг хэлэлцэх бололтой. АНУ, Европын Холбоо өнгөрсөн хугацаанд Оросын пүүс компани, Ерөнхийлөгч В.Путины хүрээлэлд хориг арга хэмжээ авч ирсэн бөгөөд цаашид тус улсын эдийн засгийн гол цөмд илүү чиглэсэн хориг арга хэмжээ авна хэмээн сүрдүүлэх болсон. Гэхдээ ОХУ-тай эдийн засгийн салшгүй нарийн харилцаатай Европын орнууд Оросын эдийн засгийн цөмд чиглэсэн хориг арга хэмжээ авах тал дээр маш хянамгай хандаж байгаагийн дээр Украины асуудлаар зарим нэг ахиц гарах төлөв ажиглагдаж ирсэн тул Б.Обама тэднээр нэмэлт хориг арга хэмжээ авахуулах тийм ч амаргүй байх болов уу. Б.Обама “Их-7”-гийн уулзалтын дараа Францад айлчлаад дараа нь Нормандын газардах ажиллагааны 70 жилийн ойн арга хэмжээнд оролцоно. Харин уг арга хэмжээнд ОХУ-ын Ерөнхийлөгч В.Путин Европын бусад орны төрийн тэргүүний хамт оролцох гэж байгаа нь Европ ОХУ-ыг ганцаардуулж байгаа эсэхэд Б.Обамаг эргэлзэхэд хүргэж байгаа юм. Цагаан ордноос мэдээлж буйгаар, В.Обама, В.Путин нар Нормандын газардах ажиллагааны 70 жилийн ойн арга хэмжээний үеэр болох хүндэтгэлийн үйл ажиллагаануудад хамт оролцох боловч тусдаа уулзахгүй аж. В.Путиныг хүндэтгэлийн арга хэмжээнд урьсан нь Европын орнууд болон ОХУ-ын харилцаа сэргэснийг илтгэхгүй гэж Цагаан ордныхон үзэж байгаа юм.
АНУ-ын баруун болон өмнөд нутгийн долоон муж улсад сүүлийн хэдэн жил үргэлжилсэн гангийн улмаас усны хомсдолд орсон гэж “USA Today” сонин мэдээлэв.
Калифорни, Невада, Аризона, Нью-Мексик, Канзас, Техас, Оклахома муж улсад усны хомсдол үүсээд байгаа аж. АНУ-ын Газар тариалангийн департаментын ган гачиг тандалтын төвөөс танилцуулсан материалаас харвал, Калифорни, Оклахома муж улсын гангийн байдал хамгийн хүнд түвшинд очжээ. Түүнчлэн гангийн улмаас үүссэн усны дутагдал тус улсын газар тариаланд хүнд дарамт болж байна. Тухайлбал, Техас, Оклахома, Канзас муж улсын нутгаар үргэлжилсэн тал газар нь АНУ-ын газар тариалан, үйлдвэрлэлийн 40 хувийг эзэлдэг байна. Дээрх долоон муж улсын цэвэр усны нөөц олон жилийн дунджийн 1/3 хувь хүртэл буураад байгаа юм. Цэвэр, ундны усны нөөц хомсдож байгаатай холбогдуулан Калифорни муж улсад далайн улсыг нэрж давсгүйжүүлэх байгууламж байгуулах урт хугацааны хөтөлбөр хэрэгжүүлж эхлээд байна.
Гудамж төсөл нь авто замын сүлжээний уулзваруудыг шинэчлэн засах, шинэ зам, гудамжийг бий болгож, авто замын сүлжээний нэвтрэх чадварыг нэмэгдүүлэх зорилготой. Энэ төсөл нь “Хотын төв”, гэр хороололд инженерийн дэд бүтцийг цогцоор шийдэх “Гэр хороолол”, “Хурдны зам” төсөл гэсэн гурван хэсгээс бүрддэг гэж “Гудамж” төслийн захирал Б.Батболд хэллээ. 2013 онд нийслэлд 18 уулзварын шинэчлэл, Чингэсийн өргөн чөлөө болон Хүй долоон худагийн Монгол наадмын цогцолборт 50 тэрбум төгрөгийн бүтээн байгуулалтын ажил хийжээ.
Шинэчилсэн уулзваруудаас гарч байгаа хэмнэлт, эдийн засгийн үр өгөөжийг тооцоход цаг хугацааны болон шатахууны хэмнэлт, машин техникийн эвдрэл элэгдлийн хэмнэлтээс нэг уулзварт 1-1,3 тэрбум төгрөг, нийт 19,3 тэрбум төгрөг хэмнэгдэж байна.
Энэ онд Улаанбаатар хотод 12 уулзварыг шинэчилнэ. Өргөтгөл шинэчлэл нь эхлээд байгаа 100 айлд л гэхэд зорчих хэсгийн эгнээг нэмэгдүүлэхээс гадна бүх чиглэлдээ саадгүй зорчих боломжтой болгож, хөдөлгөөний зохион байгуулалтад өөрчлөлт оруулахаар төлөвлөжээ.
Мөн Энэбишийн өргөн чөлөө, ахуйн үйлчилгээний уулзвар болон “Цэцэг” төвийн уулзварыг дөрвөн замын уулзвар болгон өргөтгөснөөр автозамын ачаалал тодорхой хэмжээгээр буурна гэж тооцоолжээ.
Хурдны зам дэд төслийн хүрээнд “Туул” болон “Сэлбэ” хурдны замын техник, эдийн засгийн үндэслэл, байгаль орчны ерөнхий болон нарийвчилсан үнэлгээг хийсэн байна. Зургадугаар сарын 16-нд гүйцэтгэх компаниудтай гэрээ байгуулж, замын ажил эхэлнэ гэж “Гудамж” төслийн захирал хэллээ гэж Засгийн газрын Хэвлэл мэдээлэл, олон нийттэй харилцах албанаас мэдээллээ.
Японы амттан үйлдвэрлэдэг компани хөхний хэмжээг томруулдаг жигнэмэг үйлдвэрлэжээ. ”F Cup” жигнэмэгийн найрлагад “Pueraria Mirifica” гэдэг ургамал орсон байна. Тайландад ургадаг энэ ургамалд хөхний хэмжээнд нөлөөлдөг эстроген даавартай адил “Miroestrol” молекул байдаг аж.
Тус компанийн мэдэгдсэнээр, эмэгтэйчүүд энэ жигнэмэгээс өдөрт нэгээс хоёрыг идвэл хөхний хэмжээ нь аяндаа томрох боломжтой гэнэ.
Гэхдээ эстроген болон хөхний хэмжээ хоорондоо холбоотой болох нь тогтоогдсон ч “Pueraria Mirifica” агуулсан ямар нэг зүйл идвэл хөхний хэмжээ адил томорно гэсэн баталгаа байхгүй аж.
Нийтийн тээврийн кондукторууд өнөөдрөөс оюутнуудыг визагаар зорчуулахгүй гэж, мөнгө нэхэж байгаа тухай мэдээлсэн билээ. Монголын оюутны холбооныхны тайлбарласанаар “Оюутнуудын нийтийн тээврийн нөхөн олговрыг төрөөс зургадугаар сарын 30 хүртэл олгосон байдаг учраас энэ сарыг дуустал том оврын автобусаар үнэгүй зорчих эрхтэй” гэв. Харин долдугаар сарын 1-нээс оюутнууд нийтийн тээврээр үйлчлүүлэхдээ тасалбараа авах юм байна.
АН-ын нэрээ ард түмнээс санал авч, УИХ-д суусан Ж.Батзандан гишүүн байнга л намынхаа бодлого шийдвэрийн эсрэг дуугарч, популист хэмээх тодотголтой болсон. Тэрбээр сайд н арын давхар дээлийг долдугаар сарын 1-нээс эхлэн тайлах хүсэлтэй байсан дөрвөн гишүүний нэг байсан. Энэ удаад Н.Батбаяр сайдыг огцруулах МАН-ын саналыг дэмжчихсэн цохиж явна цаана чинь.
УИХ дахь МАН-ын бүлгийн ээлжит бус хуралдаанаар Эдийн засгийн хөгжлийн сайд Н.Батбаярыг огцруулахаар шийдвэрлэсэн. Харин Байнгын хорооны хуралдааны үеэр гишүүдийн олонх нь Н.Батбаяр сайдыг огцруулах үндэслэл хангалтгүй гэж үзснээр тэрбээр сайд суудалдаа үлдэх магадлалтай болоод байгаа. Харин УИХ-ын гишүүн Ж.Батзандан тэргүүтэй гишүүд эсэргүүцэж Эдийн засгийн хөгжлийн сайдыг огцруулах нь зүйтэй гэжээ.
Ж.Батзандан гишүүн хэлэхдээ ”Би огцруулах асуудал анх яригдаж байх үед хамгаалж байсан. Харин энэ удаа хамгаалж чадахгүй. Н.Батбаяр сайд Засгийн эрх авсанаас хойш цалин тэтгэвэр, тэтгэмжийг нэмэгдүүлэх талаар ямар ч арга хэмжээ авсангүй, төгрөгийн ам.доллартай харьцах ханш 30 орчим хувиар суларсан. Өргөн хэрэглээний бараа, бүтээгдэхүүний үнэ бодит амьдрал дээр 30 орчим хувь өсөж, улмаар иргэдийн худалдан авах чадвар эрс муудаж, ард иргэдийн амьдралд хүндээр тусаж байна. Чанаргүй зээл 2013 оны 11 дүгээр сарын эцэст 572,5 тэрбум төгрөг болж, өмнөх оны мөн үеийнхээс 274 тэрбум төгрөг буюу 91,8 хувиар өссөн тул огцруулах шаардлагатай” гэж тайлбарлаж байх юм.