Хөгжлийн банкны зээлтэй холбоотой асуудлаар АТГ-аас өнөөдөр /2022.02.10/ мэдээлэл хийлээ. Энэ үеэр Авлигатай тэмцэх газрын Хэвлэл мэдээлэл, олон нийттэй харилцах ажилтан, комиссар Н.Тэмүүлэн “Хөгжлийн банкнаас ирүүлсэн хугацаа хэтэрсэн, чанаргүй ангилалд хамаатуулсан 52 зээл нь Хөгжлийн банкны тухай хууль, зээлийн бодлогын баримт бичигт нийцүүлж олгосон эсэх, зээл олгосон албан тушаалтнууд нь зээлдэгчдэд давуу байдал бий олгосон эсэх, ААН байгууллагуудаас авилга авсан эсэх мөн төрд хохирол учруулсан эсэхэд мөрдөн шалгах ажиллагааг эхлүүллээ.
Хөгжлийн банкинд учирсан хохирлыг арилгуулахаар дараах арга хэмжээнүүдийг авч хэрэгжүүлж байна. Үүнд, зээлийн зарцуулалтыг шалгаж зориулалтын бусаар ашигласан тохиолдолд гэрээг цуцлах, эргэн төлүүлэх, зээлдэгч компанийн болон тухайн компанийн хувьцаа эзэмшигчдийн хувийн хөрөнгө, дансыг захиран зарцуулах эрхэд хязгаарлалт тогтоох, ААН болон эздийн нуугдмал хөрөнгийг илрүүлж битүүмжлэх, төрд учирсан хохирлыг барагдуулах чиглэлээр мөрдөн шалгах ажиллагааг төлөвлөн явуулж байгаа юм. Энэ хугацаанд 8.5 тэрбум төгрөгийн зээл эргэн төлөгдсөн.
186 үл хөдлөх хөрөнгө, 124 тээврийн хэрэгсэл, 1 үйлдвэрийн барилга, 1 лиценз, 13 дансыг битүүмжилж захиран зарцуулах эрхийг хязгаарласан” гэлээ.