Монголын Хөлбөмбөгийн Холбооноос жил бүр уламжлал зохион байгуулдаг 10 хүртэлх насны охид, хөвгүүдийн УАШТ-ий медалийн эзэн багууд болон шилдэг тоглогчдын нэрс тодорлоо.
Хөвгүүдийн төрөлд алтан медалийг “Дэрэн” баг авсан бол охидын төрөлд “Арвис” клубийн охид түрүүлж, аваргын тавцанд гарцгаав. Хөвгүүдийн мөнгөн медалийг “Андууд сити”, хүрэл медалийг “ДМЮ-1” хүртсэн юм. Охидын төрөлд Б.Болд дасгалжуулагчтай Хан-Уул дүүргийн баг аман хүзүүдэж, алс холоос хүрэлцэн ирсэн Архангай аймгийн охид хүрэл медалийг энгэртээ гялалзууллаа.
Шагналт байрын багууд тодорсны дараа тэмцээний хаалтын ажиллагаа болж, шилдэг тоглогчдын шагналыг гардуулав. Хөвгүүдийн төрөлд А.Билгүүн /шилдэг хаалгач/, Волф Ким /Дэрэн/ шилдэг хамгаалагч, Н.Наранбаяр /Андууд сити/ шилдэг хагас хамгаалагч, Г.Чилүгэн /ДМЮ-1/ шилдэг довтлогчийн шагналыг хүртлээ. Харин охидын төрөлд Б.Лхагвасүрэн /Архангай аймаг/ шилдэг хаалгач, С.Ганцэцэг /Арвис/ шилдэг хамгаалагч, Б.Халиунаа /Хан-Уул дүүрэг/ шилдэг хагас хамгаалагч, Б.Янжинлхам /Арвис/ шилдэг довтлогч гэсэн шагналыг тус тус хүртэж, УАШТ-ий 10 хүртэлх насныхны тэмцээн амжилттай өндөрлөлөө.
