Ерөнхий сайдын захирамжаар өнгөрсөн оны арванхоёрдугаар сард байгуулагдсан Үндсэн хуульд өөрчлөлт оруулах асуудлыг судлах ажлын хэсгийн ээлжит хуралдаан өнөөдөр болсон байна.
Ажлын хэсэг Монгол Улсын Үндсэн хуульд нэмэлт өөрчлөлт оруулах асуудлаар иргэдийн санал бодлыг сонсож, судалгаа хийж буй юм.
Засгийн газраас байгуулагдсан Үндсэн хуульд нэмэлт өөрчлөлт оруулах ажлын хэсгийн бүрэлдэхүүнд Улаанбаатар бодлогын судалгааны төвийн зөвлөх М.Батчимэг, иргэн Д.Ламжав, Монголын хуульчдын холбооны ерөнхийлөгч Б.Гүнбилэг, “Легимитус” төрийн бус байгууллагын Удирдах зөвлөлийн гишүүн Н.Лувсанжав, Нэгдсэн Үндэсний байгууллагын хөгжлийн хөтөлбөрийн засаглалын багийн ахлагч Ц.Даваадулам, Шинжлэх ухааны академийн тэргүүн дэд ерөнхийлөгч Г.Чулуунбаатар, МУИС-ийн Хууль зүйн сургуулийн тэнхимийн профессор А.Эрдэнэцогт нар ажиллаж байгаа аж.