Нийслэлийн төв цэвэрлэх байгууламжийн засвар өнөөдөр эхэлнэ. Энэ хүрээнд Байгаль орчин, ногоон хөгжил, аялал жуулчлалын сайд Д.Оюунхорол болон албаны бусад хүмүүс өчигдөр Төв цэвэрлэх байгууламж дээр очин, байдалтай нь танилцлаа. БОНХАЖ-ын сайд Д.Оюунхорол, бохирдол ихтэй усыг Туул голд цутгаж болохгүй тухай Усны тухай хуулийн заалтыг сануулж, уг асуудалд хяналт тавьж ажиллахыг Ус сувгийн удирдах газрын дарга С.Үнэнд үүрэг болголоо. Цаашид Төв цэвэрлэх байгууламжийг шинээр барих асуудалд Засгийн газар онцгой анхаарал хандуулж, төсөв төлөвлөгөөнийхөө хамгийн эхэнд оруулах ёстой гэж хэллээ. Төв цэвэрлэх байгууламжийн засварын ажлын бэлтгэл өчигдөр 00:00 цагаас эхэлсэн бол өнөөдөр 10.00 цагт тэг зогсолт хийж, засварын ажлыг эхлүүллээ. Энэ үеэр архи, пиво болон арьс ширний үйлдвэрүүдийн хэрэглээний усыг хязгаарлахаар болжээ. БОНХАЖ-ын сайдцэцэрлэг, сургууль, талх, сүү, сүүн бүтээгдэхүүний үйлдвэрүүд болон иргэдийн хэрэглээний усыг таслахгүй гэж онцоллоо. Засварын ажлыг 24 цагт багтаан хийхээр төлөвлөжээ. Засвар хийх хугацаанд бохир усанд 50 хувийн цэвэршүүлэлт хийж Туул голд цутгах аж. Төв цэвэрлэх байгууламжийн засварт 40 сая төгрөг зарцуулах юм байна.