Монголын хуульчдын холбооны гишүүд ирэх Баасан гаригт “Иргэдэд тусалъя” нэртэй хууль зүйн үнэ төлбөргүй зөвлөгөө өгөх өдөрлөг зохиох гэж байна. Энэ талаар өнөөдөр мэдээлэл хийлээ.
Энэхүү өдөрлөгийг дөрөв дэх жилдээ зохион байгуулж байгаа бөгөөд энэ сарын 27-нд Чингисийн талбайд болох юм. Жилдээ ганц удаа зохион байгуулдаг энэ арга хэмжээний үеэр 21 аймаг, нийслэлийн зургаан дүүрэгт байрлах өмгөөлөгчид үнэ төлбөргүй зөвлөгөө өгөх гэнэ. Тус өдөрлөгт нийт 23 байгууллага оролцож, иргэдэд үйлчлэх ажээ.
Иргэд ихэвчлэн газрын тухай, хөдөлмөрийн тухай хуулийн маргаантай асуудлаар хандаж, хууль зүйн зөвлөгөө авдаг гэдгийг албаныхан онцолсон юм.
Монголын хуульдын холбооны өмгөөлөгчдийн хорооны тэргүүн Д.Түвшинтамир “Иргэд хуулийн зөвлөгөө авахаар ирэхдээ маргаантай асуудлынхаа материалуудыг авч ирэхгүйгээр амаараа яриад байдаг. Тийм учраас иргэдийг хууль зүйн зөвлөгөө авахдаа өөрт тулгарсан асуудалтай холбоотой холбогдох нотлох баримтаа авч ирэх хэрэгтэй” гэдгийг сануулав.
Хуульчдын нэг удаагийн хууль зүйн зөвлөгөөний ханш 20 мянган төгрөгөөс 10 мянган ам.доллар хүртэл хэлбэлздэг байна.