Олон улсын эмэгтэйчүүдийн эрхийг хамгаалах өдрийг тохиолдуулан “Жендерийн тэгш байдлын төлөө хонх цохих” ёслол Монголын Хөрөнгийн биржид боллоо.
Уг арга хэмжээг Олон улсын Санхүүгийн корпораци, Монголын Хөрөнгийн Бирж, Компанийн засаглалын хөгжлийн төв, “Women Corporate Directors” Монголын салбар, МҮХАҮТ-ын дэргэдэх Бизнес Эрхлэгч Эмэгтэйчүүдийн зөвлөл хамтран зохион байгуулсан юм.
Энэхүү арга хэмжээг бизнес болон тогтвортой хөгжилд жендерийн тэгш байдлын чухлыг олон нийтэд таниулах зорилгоор дэлхийн 40 гаруй орон нэгдэж гурав дахь удаагаа зохион байгуулж байна. Гадны улс орнуудын Хөрөнгийн биржүүд, НҮБ-ын Глобал компакт, Тогтвортой хөрөнгийн биржийн санаачлага, НҮБ-ын Эмэгтэйчүүд санаачлага, ОУСК, Дэлхийн биржүүдийн холбоо, Women in ETF зэрэг байгууллагууд нэгдэн “Жендерийн тэгш байдлын төлөө хонх цохих” ёслолын арга хэмжээг өнөөдөр нэгэн зэрэг зохион байгуулжээ.
Нийгмийн амьдралд эрэгтэй, эмэгтэйчүүд тэгш оролцох, хяналт тавих, шийдвэр гаргах боломжийг бүрдүүлэх, жендэрийн тэгш байдлыг хангах бодлогыг салбар, орон нутгийн онцлог, эдийн засаг, нийгмийн хөгжлийн чиг хандлагатай нягт уялдуулах шаардлагатай байгааг албаныхан хэлж байна. Түүнчлэн жендерийн тэгш байдлыг хангахад чиглэсэн бүхий л санаачилгыг урамшуулан дэмжих, энэ чиглэлийн мэдээлэл хүртээмжтэй байх, үйл ажиллагааны ил тод байдлыг хангах нь чухал гэдэгт дээрх байгууллагуудын төлөөлөл саналаа нэгтгэлээ.