Авто спортын олимп гэгддэг “Дакар ралли 2019” олон улсын тэмцээн Перу улсын Лима хотод өчигдөр /2019.01.06/ нээлтээ хийлээ. Уламжлал ёсоор баг тамирчдыг алдаршуулж, тусгайлан зассан хүндэтгэлийн тайзнаа буюу подиумд гаргах ёслол болов. Энэхүү ёслол Лима хотын Магдалена далайн эрэгт зохион байгуулагдаж нутгийн 100 мянган иргэн оролцож халуун алга ташилт, гүн хүндэтгэлийн дор баг тамирчдыг хүндэтгэлийн тайзнаа угтан авч, үдэн гаргалаа. 41 дэх удаагийн Дакар раллид 61 орны 541 оролцогч 334 техник, 137 мотоцикл, 26 дөрвөн дугуйт, 130 автомашин, 41 ачааны машин оролцож байна. Уралдаан 10 үе шаттай, 5000км замд үргэлжлэх юм. Энэ жилийн гол онцлог нь уралдаан зөвхөн Перу улсын нутаг дэвсгэрт явагдана. Оролцогчдын хувьд Дакар раллигийн үнэмлэхүй аваргууд болох Стефан Петрхансел, Карлос Сайнз, Нессер Аль Атия, Серрил Депре, ачааны машины ангилалд ОХУ-ын Камаз Мастер багийн Николаев, Мардеев, Испанийн Ивеко багийн Де Рой, мотоциклоос Австралийн Маттиас Уалкнер, Португалийн Пауло Гонкалвес, Австралийн Тоби Прайс, Ямаха багийн Адриен Ван Беверн нар байна. Ази тивээс Япон, Хятад, Энэтхэг, Монголын баг тамирчид оролцож байна.