Category: улс-төр

Зүүний хүчний холбооны Ерөнхийлөгч, МАН-ын Ерөнхий нарийн бичгийн дарга асан У.Хүрэлсүх Шадар сайдад зүтгэх сураг байна. Тэрбээр МАН-ын нөлөө бүхий улстөрчдийн нэгт зүй ёсоор тооцогддог нэгэн. Уугуул МАХН нэрийг МАН болгон өөрчлөхөд У.Хүрэлсүх гар бие оролцсон. Ингээд 2012 оны сонгуулийн үр дүнгээр МАН олонхын суудпал авч чадаагүй учраас У.Хүрэлсүх УИХ-ын гишүүний бүрэн эрхээсээ өөрийн хүсэлтээр татгалзаж, эхнэрээ эмчлүүлэхээр гадаад орныг зорьж байв. Тэрбээр эх орондоо ирээд “Андууд” хамтлагийн амьд хөгжмийн тоглолт хийснийг эс тооцвол нам гүмхэн байгаа ч цаагуураа улстөр дэх өөрийн байр сууриа эргүүлэн олж авахаар зэхэж байгаа бололтой. Өнөөдрийн байдлаар МАН Засгийн газарт орж ажиллах эсэхээ эцэслэн шийдээгүй ч сайд, дэд сайдын төлөөх марафон нам дотор хэзээний эхэлжээ. 2012 оны хоёрдугаар сард буюу сонгуулийн жил дуусахаас зургаахан сарын өмнө МАН-аас “Мөнгөний” гэх тодотголтой эрхмүүд дэд сайдын суудалд тухалж байсан. Тодруулбал, Эрдэс баялаг, эрчим хүчний дэд сайдаар “Монполимет” гэх алтны компаний эзэн Ц.Гарамжав, БСШУ-ны дэд сайдаар “Бишрэлт” группийн захирал Б.Ундармаа, Сангийн дэд сайдаар “Хас банк”-ны захирал Ч.Ганхуяг, Нийгмийн хамгаалал, хөдөлмөрийн дэд сайдаар “МАК”-ийн өв залгамжлагч Н.Номтойбаярыг томилж байв. Зарим эх сурвалжийн мэдээллээр 2012 оны сонгуульд ялагдал хүлээхэд нөлөө үзүүлсэн, ард иргэдийн дунд намын нэр хүндийг унагасан гэгддэг дээрх эрхмүүд одоо шинээр бүрэлдэх Засгийн газарт сайдын суудал эзэгнэхээр санаархаж байгаа аж. Түүнчлэн МАН-ын бүлгийн дэд дарга Д.Оюунхорол Боловсрол, шинжлэх ухааны сайдад зүтгэхээр гүйж яваа сурагтай. Тэгвэл давхар дээлтэй, бас “Отгонтэнгэр” хувийн сургуультай Д.Оюунхоролыг Боловсролын сайдад дэмжих нь эргэлзээтэй. Учир нь МАН-аас Засгийн газарт хамтарч ажиллавал сайдуудаа дан дээлтэй байх зарчмыг баримтлах гэнэ.

Харин өнөөдөр МАН-ын даргын дэргэдэх Зөвлөхүүдийн танхимын 16 эрхэм хуралдаж, Засгийн газарт хамтарч ажиллах эсэх асуудлыг хэлэлцэх юм байна. Тэд Засгийн газарт хамтарч ажиллавал сайдуудын томилгоо, албан тушаалын хуваарилалт ямар байхыг хэлэлцээд Бага хуралд танилцуулах аж. МАН-ын 27-р Их хурлаас байгуулагдсан Зөвлөхүүдийн танхимд МАН-аас Ерөнхий сайд, УИХ-ын дарга байсан эрхмүүд болон намын дарга нар, генсекүүд багтдаг юм байна.

Зөвлөхүүдийн танхимын гишүүд

Н.Багабанди /Ерөнхийлөгч асан/

С.Баяр /Ерөнхий сайд асан/

Ц.Нямдорж /УИХ-ын дарга асан, Хууль зүйн сайд асан/

Сү.Батболд /Ерөнхий сайд асан/

Д.Лүндээжанцан /УИХ-ын дэд дарга асан/

Ш.Гунгаадорж /Ерөнхий сайд асан/

Д.Содном /Ерөнхий сайд асан/

Г.Очирбат /МАН-ын Ерөнхий нарийн бичгийн дарга асан/

Г.Занданшатар /МАН-ын Ерөнхий нарийн бичгийн дарга асан/

У.Хүрэлсүх / МАН-ын Ерөнхий нарийн бичгийн дарга асан/

Ё.Отгонбаяр /БСШУ-ны сайд асан/

Д.Идэвхтэн /МАН-ын бага хурлын гишүүн/

Ө.Энхтүвшин /МАН-ын дарга асан/

МАН-ынхан энэ баасан гаригт бага хурлаа хийхээр товлоод байгаа. Шинэ Ерөнхий сайд томилогдсон даруйд МАН хэвлэлийн хурал хийж, мөнхийн сөрөг хүчин байна, АН-ынхан өөрсдөө асуудлаа шийд хэмээн мэдэгдсэн. Харин Ерөнхий сайд Ч.Сайханбилэгийн илгээсэн хамтрах хүсэлт МАН-ынхны шийдвэрийг эргэж харахад нөлөөлжээ. Тиймээс ч Ерөнхий сайдын хүсэлтэд хамтрахгүй хэмээн эрс хариулт өгсөнгүй. Намын бага хурлаараа шийднэ хэмээн УИХ дахь МАН-ын бүлгийнхэн “бодолцоно” гэсэн утгатай хандлагыг илэрхийлэв. Тэгэхээр МАН, АН-тай хамтрах эсэх нь энэ баасан гаригт тодорхой болох юм. Мөн өнөөдөр 11.00 цагаас МАН-ыхан экс Ерөнхийлөгч болон Ерөнхий сайд нарт хүндэтгэл үзүүлэх уулзалтыг эхлүүлээд байна. Уулзалтыг нээлттэй зохион байгуулна гэж байсан ч гэнэт хаалттай хуралдахаар боллоо. Энэ үеэр экс удирдлагуудтай Засгийн газартай хамтрах эсэх асуудлаар санал солилцож байгаа юм. Уг уулзалтад МАН-ын удирдлагууд болон Монгол Улсын Ерөнхийлөгч асан Н.Багабанди, Ерөнхий сайд асан Ш.Гунгаадорж, Сү.Батболд, МАН-ын дарга асан Ө.Энхтүвшин, У.Хүрэлсүх, Г.Занданшатар нар уулзалт хүрэлцэн ирээд байна.

Э.ЭНХ

МАН-ын Удирдах зөвлөл хуралдаж бага хурлаа энэ баасан гаригт хуралдуулахаар товложээ. Өчигдөр хуралдсан МАН-ын бүлгээс Засгийн газрыг хамтран байгуулах саналыг хэлэлцээд эцсийн шийдвэрийг бага хурал шийднэ гэдгийг хэлсэн. МАН-ын бүлгийн дарга С.Бямбацогт “Энэ асуудлыг бүлгээр шийдэх боломжгүй. Удирдах зөвлөл хуралдаж, Бага хурлаас эцсийн шийд гарна. Харин бүлгээс Су.Батболдоор ахлуулсан ажлын хэсэг байгуулсан. Энэхүү зургаан гишүүн бүхий зөвшилцөх ажлын хэсэг нь Бага хуралд зөвшилцөл, байр сууриа илэрхийлэх болно” гэсэн юм. МАН засагт хамтран ажиллах эсэх нь шийдэгдсний дараа Засгийн газрын бүтэц бүрэлдэхүүнийг өргөн барих бололтой.

УИХ дахь Ардчилсан намын бүлэг өнөөдөр хуралдсаныхаа дараа сэтгүүлчдэд ээлжит мэдээллээ хийлээ. АН -ын бүлэг гурван асуудал хэлэлцжээ. Шинээр томилогдсон Ерөнхий сайдын парламентад суудал бүхий нам, эвслийн бүлгүүдэд хүргүүлсэн хамтран засаг байгуулах саналд анхаарал хандуулан хэлэлцүүлэг өрнүүлсэн байна. Бүлгийн дарга Д.Эрдэнэбат “Улс төрийн нам, эвслийн бүлгүүдтэй зөвшилцөх ажил өнөөдрөөс эхэлж байна. Намын эрх ашгийг хойноо гаргаад улс орны эрх ашгийг бодож ийм шийдэлд хүрсэн. Хуримтлагдсан олон асуудлыг шийдвэрлэх шаардлага, засаглалыг бэхжүүлэх, улс орны хэмжээний томоохон төслүүдийг амжилттай хэрэгжүүлэх, гацаанаас гаргахын тулд улс төрийн ойлголцол, тогтвортой байдал хэрэгтэй. Иймдээ ч эдгээр асуудлыг амжилттай шийдвэрлэх хамгийн чухал угтвар нөхцлийг улс төрийн тогтвортой байдал, УИХ-ын дийлэнх олонхийн дэмжлэг хэмээн албан бичигт дурдсан. МАН засагт орохгүй гэх албан ёсны байр сууриа одоогоор илэрхийлээгүй. Улс орны эрх ашгийг нам хүчний эрх ашгийн эхэнд тавьсан энэ саналыг эрүүлээр авч үзнэ байх” хэмээн онцолсон юм.

УИХ-ын гишүүн О.Баасанхүүд иргэдийн зүгээс АТГ-аар шалгагдаж байгаа хэрэг заавал нийгмээс тусгаарлагдах шаардлага байна уу гэсэн агуулгатай гомдол санал ихээр ирээд байгаа аж. О.Баасанхүү гишүүн ийм шалтгаанаар АТГ-т хүсэлт гаргаж, албан бичиг явуулжээ. Албан бичгийг бүрэн эхээр нь хавсаргалаа.

Монгол Улсын Ерөнхий сайд Ч.Сайханбилэг МАН-д хамтран ажиллах, Засгийн газар хамтран байгуулах санал хүргүүлсэн. Ерөнхий сайдын тавьсан асуудлыг УИХ дахь МАН-ын бүлгийн хурлаар хэлэлцэж, АН-тай зөвшилцөх ажлын хэсэг байгуулсан байна. Уг ажлын хэсэгт Су.Батболд, Н.Номтойбаяр, Я.Содбаатар, Ө.Энхтүвшин Ж.Энхбаяр, Ё.Отгонбаяр нар багтжээ. Ажлын хэсгийн ахлагчаар УИХ-ын гишүүн Су.Батболд ажиллах аж. Энэ ажлыг хэсэг, засгат хамтран орох эцсийн шийд гаргахгүй, гишүүдээ мэдээллээр хангаж ажиллах зорилготой байгуулагдсан гэнэ.

Монгол Улсын 2015 оны Төсвийн тухай хууль, нийслэлийн Засаг даргын 2013-2016 оны үйл ажиллагааны хөтөлбөрийн дагуу иргэдийн оролцоотойгоор боловсруулсан нийслэлийн 2015 оны төсвийн төслийг хуулийн дагуу Нийслэлийн ИТХ-д өргөн барьж, 2014 оны 11 дүгээр сарын 25-ны өдөр хуралдах нийслэлийн ИТХ-ын Тэргүүлэгчдийн ээлжит хуралдаан хэлэлцүүлэхээр боллоо. Үүний дараа нийслэлийн ирэх оны төсвийн төслийг НИТХ-ын 11 дүгээр сарын 28-ны өдрийн ээлжит чуулганы хуралдаанаар нэгдүгээр хэлэлцүүлэг, 12 дугаар сарын 04-ний хуралдаанаар хоёрдугаар хэлэлцүүлэгт оруулахаар төлөвлөж байна. Мөн дээрх хуралдаанаар нийслэлийн 2015 оны төсвийн төсөлтэй хамтатган нийслэлийн 2014 оны зорилтын хэрэгжилт, нийслэлийн эдийн засаг, нийгмийн 2015 оны зорилт, нийслэлийн өмчөөс 2015 онд хувьчлагдах хуулийн этгээд, эд хөрөнгийн жагсаалт батлах, Өмчийн концессын зүйлийн жагаалт, 2015 оны газар зохион байгуулалтын төлөвлөгөөг батлах асуудлыг хэлэлцэнэ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Хууль зүйн яамны Төрийн бичгийн дарга Ж.Баярцэцэг Хүн худалдаалахтай тэмцэх асуудлаар хамтран ажиллах тухай Монгол Улсын Засгийн газар, БНХАУ-ын ЗЗОБ Макаогийн Засгийн газар хоорондын 2010 оны хэлэлцээрийн хүрээнд Монголд айлчилж буй Бүгд Найрамдах Хятад Ард Улсын Засаг захиргааны онцгой бүс Макаогийн Олон нийтийн аюулгүй байдлын цагдаагийн газрын дэд дарга Лай Камкун тэргүүтэй төлөөлөгчдийг өнөөдөр Хууль зүйн яаман дээр хүлээн авч уулзав.

Уулзалтын үеэр Хууль зүйн яамны Төрийн бичгийн дарга Ж.Баярцэцэг, Хүн худалдаалах гэмт хэрэгтэй тэмцэх, мэргэжлийн удирдлагаар хангах чиг үүрэг бүхий Дэд зөвлөлийн тэргүүний хувьд Монгол Улсад хүн худалдаалах гэмт хэрэгтэй тэмцэх, гэрч хохирогчийг хамгаалах чиглэлээр хийгдэж буй хууль, эрх зүйн шинэчлэл, хэрэгжүүлж буй арга хэмжээний талаар танилцуулж харилцан санал солилцов. Түүнчлэн Хүн худалдаалахтай тэмцэх асуудлаар хамтран ажиллах тухай Монгол Улсын Засгийн газар, БНХАУ-ын ЗЗОБ Макаогийн Засгийн газар хоорондын 2010 оны хэлэлцээрийн хүрээнд Макаогийн Олон нийтийн аюулгүй байдлын цагдаагийн газартай хүн худалдаалах гэмт хэргээс урьдчилан сэргийлэх, гэмт этгээдийг олж тогтоох, гэмт этгээдэд хариуцлага хүлээлгэх, хохирогчдыг хамгаалах чиглэлээр харилцан шуурхай мэдээлэл солилцож хамтын ажиллагаагаа бэхжүүлэхийн ач холбогдлыг тэрбээр цохон тэмдэглэв.

БНХАУ-ын ЗЗОБ Макаогийн Олон нийтийн аюулгүй байдлын цагдаагийн газрын төлөөлөгчид Цагдаагийн ерөнхий газрын Зохион байгуулалттай гэмт хэрэгтэй тэмцэх газар, Тахарын ерөнхий газар, Шүүхийн шинжилгээний үндэсний хүрээлэн, Нийслэлийн цагдаагийн газрын дэргэдэх Түр хамгаалах байр, Хүйсийн тэгш эрхийн төвийн хамгаалах байрны үйл ажиллагаатай танилцаж төрийн бус байгууллагуудын төлөөлөлтэй уулзана.

УИХ дахь МАХН-МҮАН-ын Шударга ёс эвслийн бүлэг өнөөдрийн ээлжит хуралдаанаараа Ерөнхий сайдаас ирүүлсэн Засгийн газарт хамтран ажиллах саналыг хэлэлцжээ. Эвсэл нам тус бүр дээрээ асуудлыг ярьж, эргэн Шударга ёс эвслийн бүлэг дээрээ саналаа нэгтгэх шийдэлд хүрсэн байна. Бүлгийн гишүүд маргааш ээлжит бус хуралдаан зарлаж саналаа нэгтгэх аж.

УИХ-ын дарга З.Энхболд өнгөрсөн долоо хоногт Монгол Улсын Ерөнхий сайд Ч.Сайханбилэгт Засгийн газрын бүрэлдэхүүнийг 14 хоногийн дотор УИХ-д оруулж шийдвэрүүлэхийг үүрэг болгосон. Энэ дагуу Ерөнхий сайд Ч.Сайханбилэг УИХ-д суудалтай намуудад хамтран ажиллах хүсэлтээ илэрхийлжээ. Ерөнхий сайдын илгээсэн бичгийг дор хавсаргалаа.