Category: улс-төр

АН-ын сайдууд тодроод байна. Тус намын Гүйцэтгэх зөвлөл хуралдаж, сайд нараа тодруулаад буй. Засгийн газрын хэрэг эрхлэх газрын даргад УИХ-ын гишүүн С.Баярцогтыг, Гадаад хэргийн сайдад Монгол Улсын Ерөнхийлөгчийн зөвлөх Л.Пүрэвсүрэнг, Хууль зүйн сайдад Улсын ерөнхий прокурор Д.Дорлигжав, Аж үйлдвэрийн сайдад УИХ дахь Ардчилсан намын бүлгийн дарга Д.Эрдэнэбат нарыг нэр дэвшүүлсэн байна.

Боловсрол, соёл, шинжлэх ухааны сайдад Л.Гантөмөр хуучнаараа, Уул уурхайн сайдад тус яамны Төрийн нарийн бичгийн дарга Р.Жигжид, Хүн амын хөгжил, нийгмийн хамгааллын сайдад С.Эрдэнэ, Хүнс хөдөө аж ахуйн сайдад Р.Бурмаа гишүүн, Эрчим хүчний сайдад Д.Зоригтыг тус бүр нэр дэвшүүлэхээр болжээ.

МАН-ын Удирдах зөвлөл хуралдаж, сайд нараа тодруулаад байна. Шадар сайдад У.Хүрэлсүх, Хөдөлмөрийн сайдад С.Чинзориг, Байгаль орчин, ногоон хөгжил, аялал жуулчлалын сайдад Д.Оюунхорол, Зам тээврийн сайдад Н.Төмөрхүү, Сангийн сайдад Ж.Эрдэнэбат, Д.Цогтбаатарыг Барилга хот байгуулалтын сайдад нэр дэвшүүлсэн байна.

Одоо УИХ дахь МАН-ын бүлэг ээлжит бусаар хуралдаж эл асуудлыг хэлэлцээд байна.

Харин МАХН-ыхан хоёр сайдаа тодруулж чадахгүй дуншсаар байна.

УИХ дахьМАХН-МҮАН-ын Шударга ёс эвслийн бүлэгт гурван сайдын квот ногдсон. МҮАН-аас М.Энхсайханыг Монгол Улсын сайдад нэр дэвшүүлэхээр болжээ.

МАХН Батлан хамгаалах болон Эрүүл мэндийн сайдад нэр дэвшүүлэх юм. Батлан хамгаалахын сайдад Ц.Шаравдоржийг нэр дэвшүүлж магадгүй гэж яригдаад байгаа. Харин Эрүүл мэндийн сайдад Н.Удвалыг дахин дэвшүүлэх үү, эсвэл өөр нэр санал болгох уу гэдэг тодорхойгүй байна.

Монгол Улсын Ерөнхийлөгч Ц.Элбэгдорж УИХ дахь нам, эвслийн бүлгийн дарга нартшинэ Засгийн газар бүрдүүлэх ажлыг шуурхайлах чиглэл өгөв.

Засгийн газрын бүтцийг УИХ-аар эцэслэн батлаад байгаа тул бүрэлдэхүүнийг яаралтай томилж, улс орон, нийгмийн өмнө тулгамдаад байгаа асуудлуудыг шийдвэрлэх ажилд цаг хугацаа алдалгүй орох нь чухал гэсэн байр суурийг Төрийн тэргүүн илэрхийлсэн байна.

“Монголын ардчилсан хувьсгал-25” эрдэм шинжилгээний бага хурал өнөөдөр төрийн ордонд болж байна. Энэхүү хуралд Улсын Их Хурлын дарга, Ардчилсан намын дарга З.Энхболд оролцож үг хэллээ.

Тэрээр эрдэм шинжилгээний бага хуралд хүрэлцэн ирсэн хүмүүст Ардчилсан хувьсгалын 25 жилийн ойн баярын мэнд хүргээд, Монгол Улсын ардчиллын өнөөгийн бодит байдал, 25 жилийн хугацаанд бидний олсон ололт, амжилтыг шинжлэх ухааны үүднээс судалж, үнэлэх, дүгнэх нийгмийн шаардлага байгааг мэдэрч, Ардчилсан хувьсгалын 25 жилийн ойг тохиолдуулан энэхүү эрдэм шинжилгээний бага хурлыг зохион байгуулж байгаа Улс төрийн боловсролын академи, Монголын Ардчилсан холбоонд талархаж буйгаа илэрхийлэв.

Түүнчлэн хорин тавхан жилийн дотор тайван замаар ардчилалд шилжиж, өөрийн онцлогт тохирсон ардчиллыг хөгжүүлэн, ижил гараанаас эхэлсэн бусад оронд үлгэр жишээ болохуйц амжилтад хүрсэн учраас Монгол Улс Ардчилсан Орнуудын Хамтын Нийгэмлэгийг 2011-2013 оны хооронд даргаллаа. Энэ бол бидний ололт амжилт юм. Шинэ Үндсэн хуулиа баталж, хүний суурь эрх, нийгэм, улс төр, эдийн засгийн чөлөөт байдлыг тунхагласанаар 1990 оны өмнөх монгол хүн цоо шинэ үнэлэмжтэй болж чадсандаа монгол хүн бүр бахархдаг.

Сонгуулийн явц, олон ургальч байдал, Засгийн газрын үйл ажиллагаа, улс төрийн оролцоо, улс төрийн соёл, иргэний эрх чөлөө гэсэн үндсэн үзүүлэлтүүдэд тулгуурлаж ардчиллыг үнэлдэг олон улсын судалгаагаар манай орны ардчиллын индекс алгуурхан боловч жил бүр тодорхой нэгжээр урагшилж байна. Монгол Улсын авлигын индекс анх үзэхэд 120 дугаарт байсан бол хоёр хоногийн өмнөх мэдээгээр 80 дугаарт бичигдсэн байна. Хэдийгээр огцом буурсан сайн мэдээ байгаа ч авлига ардчилалд сөргөөр нөлөөлөх хэмжээнд байсаар байна. Энэ мэт олон саад бэрхшээл Монголын ардчилалд тулгарч, бэрхшээлүүд гарсаар байна.

Ардчилсан хувьсгалын ололт амжилтыг өнгөрсөн үетэйгээ харьцуулж үнэлвэл бодит байдал тодорхой болж, цаашдын хөгжил шинэ шатанд хүрэх боломж бүрдэнэ. Шинжлэх ухааны арга зүйд үндэслэсэн судалгаа, дүгнэлт, үнэлгээг эрдэмтэн, судлаачид та бүхэн л хийж чадна гэж найдаж байна.

Ардчилсан хувьсгалын ач тус, гүйцэтгэсэн түүхэн үүргийг зохиомлоор үгүйсгэх, эсвэл хэт дөвийлгөх нь шинжлэх ухаанч бус хандлага юм. Иймд ардчиллын үнэт зүйл, түүхэн үүрэг, ололт амжилтыг зөв тодорхойлж, судлахад энэхүү бага хурал чухал үүрэг гүйцэтгэнэ гэж найдаж байна хэмээн онцлон тэмдэглэлээ.

“Монголын ардчилсан хувьсгал-25” эрдэм шинжилгээний бага хуралд “Монголын ардчилал ба ардчиллах үйл явц” сэдвээр Төрийн соёрхолт нийтлэлч Б.Батбаяр, “Ардчилал ба улс төрийн хөгжил-тоон хэлээр” сэдвээр Улс төрийн боловсролын академийн Удирдах зөвлөлийн гишүүн Д.Ганбат, “Ардчиллын үнэт зүйлс, өөрчлөлт, төлөвшил” сэдвээр Сант Марал төвийн захирал Л.Сумати, “Ардчилал ба Үндсэн хуульт ёсны хөгжил” сэдвээр Монгол Улсын Ерөнхийлөгчийн хуулийн бодлогын зөвлөх Ч.Өнөрбаяр, “Монголын залуучуудын ардчиллын ойлголт, төсөөлөлд гарсан өөрчлөлт” сэдвээр ФСЭХ-ийн эрдэм шинжилгээний ажилтан, судлаач О.Хатанболд нар тус тус илтгэл тавина хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.

УИХ-ын чуулганы өнөөдрийн үдээс өмнөх нэгдсэн хуралдаанаар Улсийн тэмдэгтийн хураамжийн тухай хуулийн анхны хэлэлцүүлгийг хийж, Хууль зүйн байнгын хорооны танилцуулгыг сонсов.

Аж ахуйн үйл ажиллагааны тусгай зөвшөөрлийн тухай хуульд оруулсан нэмэлт, өөрчлөлтөөр гадаад улсад боловсрол эзэмшүүлэх, сургалтад хамруулахад зуучлах аж ахуйн үйл ажиллагаа эрхлэхэд Боловсрол, шинжлэх ухааны яамнаас тусгай зөвшөөрөл олгож байхаар зохицуулжээ. Гэтэл Улсын тэмдэгтийн хураамжийн тухай хуульд улсын тэмдэгтийн хураамжийн хэмжээг тусгай зөвшөөрлийн төрөл бүрээр заасан байдаг ч “гадаад улсад боловсрол эзэмшүүлэх, сургалтад хамруулахад зуучлах тусгай зөвшөөрөл” олгох хураамжийн хэмжээг тогтоосон зохицуулалт уг хуульд байдаггүй аж. Иймээс хуулийн хэрэгжилтийг хангаж, төрийн үйлчилгээг түргэн шуурхай үзүүлэх нөхцөлийг бүрдүүлэх үүднээс Улсын тэмдэгтийн хураамжийн тухай хуульд нэмэлт оруулах тухай хуулийн төслийг боловсруулжээ. Улсын тэмдэгтийн хураамжийн хэмжээг боловсролын салбарт олгогддог бусад тусгай зөвшөөрлийн хураамжийн хэмжээний дунджийг үндэслэл болгон 200 000-400 000 төгрөг байхаар тооцож хуулийн төсөлд тусгасан байна.

Байнгын хорооны танилцуулгатай холбогдуулан гишүүдээс асуулт, санал гараагүй тул зарчмын зөрүүтэй саналын томъёоллоор санал хураалт явуулж хуулийн төслийг эцсийн хэлэлцүүлэгт бэлтгүүлэхээр Хууль зүйн байнгын хороонд шилжүүлэв.

Чуулганы нэгдсэн хуралдаанаар Нийгмийн даатгалын тухай хуульд нэмэлт, өөрчлөлт оруулах тухай, Нийгмийн даатгалын сангаас олгох тэтгэвэр, тэтгэмжийн тухай хуульд нэмэлт, өөрчлөлт оруулах тухай, Нийгмийн даатгалын сангаас олгох үйлдвэрлэлийн осол, мэргэжлээс шалтгаалсан өвчний тэтгэвэр, тэтгэмж төлбөрийн тухай хуульд нэмэлт оруулах тухай, Нийгмийн даатгалын сангаас олгох ажилгүйдлийн тэтгэмжийн тухай хуульд нэмэлт, өөрчлөлт оруулах тухайхуулийн төслүүдийн хэлэлцэх эсэх асуудлыг хэлэлцэв. Энэ талаарх хууль санаачлагчийн илтгэлийг Хүн амын хөгжил, нийгмийн хамгааллын сайдын үүрэг гүйцэтгэгч С.Эрдэнэ, Нийгмийн бодлого, боловсрол, соёл, шинжлэх ухааны байнгын хорооны санал, дүгнэлтийг УИХ-ын гишүүн Д.Хаянхярваа нар танилцуулсан юм.

Нийгмийн даатгалын тухай хууль 1994 онд батлагдсанаас хойших хугацаанд 10 шахам удаа нэмэлт, өөрчлөлт оруулсан ч нийгмийн даатгалын одоогийн мөрдөж хуулийн зарим зүйл, заалт нь өнөөгийн хэрэгцээ, шаардлагыг зохицуулах боломжгүй болж, амьдралд хэрэглэхэд ойлгомжгүй, нөхцөл үүсгэж байгаа.Түүнчлэн даатгуулагчийн ажилласан жил, шимтгэл төлсөн хугацаа, авч байсан цалинтайгаа уялдаатай тэтгэвэр тогтоогдох зарчим, бодлого алдагдах сөрөг үр дагавар бий болж байгааг арилгах зорилгоор хуулийн холбогдох заалтыг өөрчлөн шинэчлэх зайлшгүй шаардлагын үүднээс уг хуулийн төслийг санаачлан боловсруулжээ. Нийгмийн даатгалын тухай хуульд заасан нийгмийн даатгалын сангийн төсвийн төсөл боловсруулах болон санхүүгийн тайлан гаргах, тайлагнах цагалбар нь 2013 оноос мөрдөж эхэлсэн Төсвийн тухай хуулийн заалттай зөрчилдөж байгаа тул уг хуультай нийцүүлэн нийгмийн даатгалын сангийн төсвийн төсөл зохиох, сангийн гүйцэтгэлийн тайлан гаргах, тайлагнах цагалбарыг өөрчлөхөөр хуулийн төсөлд тусгажээ. Мөн эдгээр хуулийн төслөөрдаатгуулагчийн үндсэн ажлаас гадуур давхар ажил эрхэлж авсан цалин хөлс, орлогоос ажилгүйдлийн тэтгэмжийн шимтгэл тооцохгүй байх, тэтгэврийг хөнгөлөлттэй нөхцөлөөр тогтоох хөдөлмөрийн газрын дор, хортой, халуун, хүнд нөхцөлийн ажил, мэргэжлийн жагсаалтыг батлах асуудлыг тодорхой болгох, сайн дураар даатгуулагч нь шимтгэлийг сар, улирал, хагас жилээр төлөх уян хатан нөхцөл бүрдүүлэх зэрэг зохицуулалт хийх юм байна.

Хууль санаачлагчийн илтгэл, Байнгын хорооны танилцуулгатай холбогдуулан гишүүдээс асуулт, санал гараагүй тул байнгын хорооны саналаар хуулийн төслүүдийг хэлэлцэх нь зүйтэй гэсэн саналын томъёоллоор санал хураалгахад чуулганы нэгдсэн хуралдаанд оролцсон гишүүдийн 72.5 хувь нь дэмжсэнээр хуулийн төслүүдийг анхны хэлэлцүүлэгт бэлтгүүлэхээр шилжүүллээ.

Дараа нь УИХ-ын гишүүн Д.Оюунхорол нарын нэр бүхий 17 гишүүн санаачлан боловсруулж энэ оны 5 дугаар сарын 30-ны өдөр өргөн мэдүүлсэн Нийгмийн даатгалын тухай хуульд нэмэлт, өөрчлөлт оруулах тухай хуулийн төслийнхэлэлцэх эсэх асуудлыг хэлэлцсэн юм. Энэ талаарх хууль санаачлагчийн илтгэлийг УИХ-ын гишүүн Д.Оюунхорол, Нийгмийн бодлого, боловсрол, соёл, шинжлэх ухааны байнгын хорооны санал, дүгнэлтийг УИХ-ын гишүүн А.Тлейхан нар танилцуулав.

Манай улсын эдийн засаг, хүн амын хөдөлмөр эрхлэлтэд мал аж ахуй томоохон байр эзэлдэг. Тухайлахад, дотоодын нийт бүтээгдэхүүний 10 гаруй хувийг мал аж ахуйгаас үйлдвэрлэж байгаа бол хөдөлмөр эрхэлж буй хүн амын 30 орчим хувийг малчид эзэлж, нийт өрхийн 20 орчим хувь нь зөвхөн мал аж ахуйн орлогоор амьжиргаагаа залгуулдаг малчин өрх байгаа аж. Одоо мөрдөгдөж байгаа хууль тогтоомжоор малчид нийгмийн даатгалд сайн дураар даатгуулах боломжтой ч орлогын түвшин доогуур, мал аж ахуйн үйлдвэрлэл улирлын чанартайгаас шалтгаалан сар бүр шимтгэл төлөх боломжгүйгээс даатгалд хамрагдах нь бага байдаг. Нийгмийн даатгалын байгууллагаас гаргасан мэдээллээр 25000 малчин буюу нийт малчдын 6 орчим хувь нь нийгмийн даатгалын шимтгэл төлдөг байна.

Иймд малчдын нийгмийн даатгалд хамрагдах хүрээг нэмэгдүүлэх зорилгоор шимтгэл төлөх хугацааг тэдний эрхэлж буй үйлдвэрлэлийн онцлогтой уялдуулан уян хатан зохицуулах, нийгмийн даатгалд хамрагдах, хөдөлмөрийн нөхцөлөөр тэтгэвэр тогтоолгох эрхээ хэрэгжүүлэхэд нь иргэдэд тулгарч буй саад бэрхшээлийг хууль эрх зүйн хувьд шийдвэрлэх зорилгоор УИХ-ын нэр бүхий гишүүд энэ хуулийн төслийг санаачлан боловсруулжээ. Хуулийн төсөл ньнийгмийн даатгалд сайн дураар даатгуулагч иргэний шимтгэл төлөх хугацаа,газрын дор болон хөдөлмөрийн хортой, халуун, хүнд нөхцөлд ажилласан даатгуулагчийг тодорхойлохтой холбогдсон харилцааг хамаарах юм байна. Хуулийн төсөл батлагдаж, сайн дураар даатгуулагчдын шимтгэл төлөх хугацааг уян хатан зохицуулснаар малчдын нийгмийн даатгалд хамрагдах хүрээ тэлж, нийгмийн даатгалын сангийн орлого нэмэгдэх сайн талтай гэж төсөл санаачлагчгишүүд үзэж байгаа аж.

Хууль санаачлагчийн илтгэл, Байнгын хорооны санал, дүгнэлттэй холбогдуулан УИХ-ын гишүүн Ч.Хүрэлбаатар төсөл санаачлагчаас асуулт асууж тодруулсан бол хуулийн төслийг хэлэлцэх эсэх талаар санал хэлсэн УИХ-ын гишүүн Л.Энх-Амгалан “Сүүлийн жилүүдэд малчдын тоо 20 хувиар буурч, насжилт нь хот, суурин газрынхнаас 5-7 насаар богиноссон баримт байна. Иймээс энэ хуулийн төслийг цаг алдалгүй хэлэлцэж батлах нь чухал. Энэ бол нийгмийн захиалга гэж төсөл санаачлагчийн нэгийн хувьд үзэж байгаа” гэлээ.

Ингээд хуулийн төслийг хэлэлцэх нь зүйтэй гэсэн байнгын хорооны саналаар санал хураалгахад нэгдсэн хуралдаанд оролцсон 51 гишүүний 37 нь буюу 72.5 хувь нь дэмжсэн тул хуулийн төслийг анхны хэлэлцүүлэгт бэлтгүүлэхээр Нийгмийн боддого, боловсрол, соёл, шинжлэх ухааны байнгын хороонд шилжүүлснээр чуулганы үдээс өмнөх хуралдаан завсарлалаа.

Чуулганы үдээс хойших хуралдаан 14 цагаас эхэлж, Ерөнхий сайд Ч.Сайханбилэг мэдээлэл хийх юм гэж УИХ-ын Тамгын газрын Хэвлэл мэдээлэл, олон нийттэй харилцах хэлтэс мэдээлэв.

Нийслэлийн Засаг дарга бөгөөд Улаанбаатар хотын Захирагч Э.Бат-Үүл Европын Сэргээн босголт хөгжлийн банкны Төв Ази болон Монгол Улсыг хариуцсан захирал Масару Хонма тэргүүтэй төлөөлөгчдийг хүлээн авч уулзлаа.
Уулзалтын үеэр Европын Сэргээн босголт хөгжлийн банктай Улаанбаатар хотын Хатуу хог хаягдлын менежментийн шинэчлэлийн төсөлд хамтран ажиллах санамж бичгийг байгууллаа.
Нийслэл “Нийтийн үйлчилгээний Улаанбаатар нэгтгэл” ОНӨААТҮГ-аар дамжуулан Улаанбаатар хотын хог хаягдлын үйлчилгээг шинэчилж, хог хаягдал дахин боловсруулах байгууламж барихын зэрэгцээ одоо үйл ажиллагаагаа явуулж буй хогийн цэгийн байгууламжийг сайжруулах ажлыг хийхээр төлөвлөж байна. Энэ ажлын хүрээнд Европын Сэргээн босголт хөгжлийн банк Улаанбаатар хотын хог хаягдлын менежментийн шинэчлэлийн төсөлд 12 сая хүртэлх еврогийн урт хугацааны зээлийн санхүүжилт үзүүлэхээр боллоо гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Монгол Улс, БНХАУ-ын хооронд дипломат харилцаа тогтоосны 65 жилийн ой, Монгол-Хятад найрсаг харилцаа, хамтын ажиллагааны гэрээ байгуулагдсаны 20 жилийн ойг тохиолдуулан 2014 оныг “Найрсаг солилцоо”-ны жил болгон зарлаж, БНХАУ-ын соёлын яамны хооронд энэ онд байгуулсан “Соёлын өдрүүд харилцан зохион байгуулах тухай” протоколын дагуу хоёр орны “Соёлын өдрүүд”-ийг зохион байгуулах нь ээ. “Монголын соёлын өдрүүд” 2014 оны арванхоёрдугаар сарын 5-14-ны өдрүүдэд Бээжин хотод болох бөгөөд “Тэнгэрийн эгшиг” хүндэтгэлийн тоглолт, Монголын үзэсгэлэнт байгалийг харуулсан фото зургийн үзэсгэлэнг эл өдрүүдийг тохиолдуулан урлаг сонирхогчдод хүргэхээр зэхжээ.

УИХ-ын чуулганөчигдөр нэгдсэн хуралдаанаа цаг сунган хуралдаж, Засгийн газрын бүтцийн тухай, Засгийн газрын бүрэлдэхүүний тухай болон холбогдох бусад хууль, тогтоолын төслүүдийн эцсийн хэлэлцэж баталлаа.

Хууль батлагдсанаар шинэ Засгийн газар Монгол Улсын Ерөнхий сайд, Монгол Улсын Шадар сайд, Монгол Улсын сайд, Засгийн газрын Хэрэг эрхлэх газрын дарга болон дор дурдсан асуудал эрхэлсэн нийт 19 гишүүнтэйгээр ажиллахаар боллоо.

1.Байгаль орчин, ногоон хөгжил, аялал жуулчлалын сайд;

2.Гадаад хэргийн сайд;

3.Сангийн сайд;

4.Хууль зүйн сайд;

5.Аж үйлдвэрийн сайд;

6.Батлан хамгаалахын сайд;

7.Барилга, хот байгуулалтын сайд;

8.Боловсрол, соёл, шинжлэх ухааны сайд;

9.Зам, тээврийн сайд;

10.Уул уурхайн сайд;

11.Хөдөлмөрийн сайд;

12.Хүн амын хөгжил, нийгмийн хамгааллын сайд;

13.Хүнс, хөдөө аж ахуйн сайд;

14.Эрчим хүчний сайд;

15.Эрүүл мэнд, спортын сайд;

16.Монгол Улсын сайд.

Хуралдааны төгсгөлд Улсын Их Хурлын дарга З.Энхболд Засгийн газрын бүтцийн тухай хууль батлагдсанаар Ерөнхий сайд Засгийн газрын гишүүнээр ажиллах хүмүүсийг томилуулах саналаа УИХ-д өргөн мэдүүлэх боломжтой болсныг дуулгаад 2014 оны 12 дугаар сарын 05-ны өдрийн ажлын цаг дуусахаас өмнө саналаа өргөн мэдүүлэхийг сануулсан юм.

УИХ-ын чуулганы нэгдсэн хуралдаанаар Засгийн газрын бүтэц, бүрэлдэхүүний төслийг хэлэлцэх эсэхийг шийдэв.

Монгол Улсын Ерөнхий сайд хуралдааны эхэнд Засгийн газрын бүтэц, бүрэлдэхүүнийг дагалдсан Боомтын захиргааны тухай, Тахарын тухай болон ЦЭГ-ийг татан буулгах тухай хуулийн төслийг татаж авлаа.Хэлэлцэж байгаа асуудалтай холбогдуулан гишүүн Ерөнхий сайдад асуулт тавьж, саналаа хэлсэн юм.

Гишүүд асуулт тавьж, үг хэлсний дараагаар Засгийн газрын бүтэц, бүрэлдэхүүнийг хэлэлцэх нь зүйтэй гэсэн санал хураалт явуулахад гишүүдийн 71,7 хувийн саналаар дэмжив. Ингээд Засгийн газрын бүтэц, бүрэлдэхүүний төслийг анхны хэлэлцүүлгийг хийлгэхээр Төрийн байгуулалтын байнгын хорооны хуралдаанд шилжүүллээ.

Төрийн байгуулалтын байнгын хорооны хуралдаанаар Засгийн газрын бүтэц бүрэлдэхүүний тухай болон холбогдох бусад хууль, тогтоолын төслүүдийн хэлэлцэх эсэх асуудлыг хэлэлцэж байна.

Хэлэлцэх асуудлын талаар Ерөнхий сайд Ч.Сайханбилэг танилцууллаа. Тэрээр танилцуулгадаа Шинэ Засгийн газрын бүтцээр 464 орон тоо хэмнэгдэх бөгөөд 13 тэрбум төгрөгийг хэмнэх тооцоо байгаа гээд эдийн засгийн хямралтай байгаа энэ үед төсвийг хэмнэсэн бодлого баримталж Засгийн газрын бүтцийг оруулж ирж байна гэсэн юм. Мөн Монгол улсын сайд гэсэн орон тоог шинээр буй болгож томоохон хөтөлбөр төслүүдийг хариуцуулах нь зөв гэж үзсэн гэдгээ хэллээ. Үүний хүрээнд саяхан байгуулагдсан Тахарын албыг татан буулгах ёстой гэдгийг тэрбээр энэ үеэр мөн танилцууллаа.

Үүний дараа хэлэлцэж буй асуудалтай холбогдуулан гишүүдийн асуултад Ерөнхий сайд Ч.Сайханбилэг хариулж байна. Шинээр өргөн барьсан Засгийн газрын төрийн захиргааны тогтолцооноос Тахарын албыг хасах саналыг Ерөнхий сайд гаргасан юм. Харин энэ талаар Хууль зүйн сайд үүрэг гүйцэтгэгч Х.Тэмүүжин “Цагдаагийн байгууллага гэрчийг гэм хэрэгтэнтэй адилхан үзэх хэмжээнд ачааллаа дийлэхгүй байгаа энэ үед Тахарын алба байх ёстой. Ер нь яагаад энэ албыг татан буулгах болов. МАН-тай хийсэн тохироо байв уу. Цагдаагийн байгууллага чинь одоо хэвийн үйл ажиллагаагаа явуулахад 1250 орон тоо дутуу явж байгаа. Үүнийг өмнөх засгийн газрын Ц.Нямдорж сайд ч хэлж байсан. Гэтэл ийм хүрэлцээгүй байгууллага дээр Тахарын албаны гэрч, хохирогчийг хамгаалах чиг үүргийг нэмж байгаа үед дийлэхгүй. Гэрч хохирогчийг, шүүх үйл ажиллагааны хэвийн үйл ажиллагааг хангах чиг үүргийг байхгүй болгож болохгүй шүү дээ” гэсэн байр суурийг илэрхийлсэн бол УИХ дахь АН-ын бүлгийн дарга Д.Эрдэнэбат гэрч хохирогчыг хамгаалах бүтэц нь ахицтай шинэ зүйл байсан. Тахарын албаны тухай хуулийг бүхэлд нь хүчингүй болгож болохгүй гээд “Тахарын алба 500 гаруй ажилчинтай үйл ажиллагаа нь жигдрээд явж байсан. Уг албыг татан буулгах нь буруу” хэмээсэн юм.

Төрийн байгуулалтын байнгын хорооны хуралдаан үргэлжилж байна.

Өнөөдөр НИТХ-ын тэргүүлэгчдийн хурлаар Нийслэлийн 2015 оны төсвийн эцсийн хэлэлцүүлгийг хийж батална.

Нийслэлийн 2015 оны төсвийн төслийн эцсийн хэлэлцүүлгтэй хамтатган нийслэлийн эдийн засаг, нийгмийн 2015 оны зорилт, нийслэлийн өмчөөс 2015 онд хувьчлагдах хуулийн этгээд, эд хөрөнгийн жагсаалт батлах, Өмчийн концессын зүйлийн жагаалт, 2015 оны газар зохион байгуулалтын төлөвлөгөөг хэлэлцэх юм байна.