Category: спорт

Олон улсын оюутны спортын холбоо “FISU” даваа гаригт “Омикрон” хувилбарын тархалтын улмаас арванхоёрдугаар сарын 11-21 өдрүүдэд Швейцарын Люцерн хотноо зохион байгуулагдахаар төлөвлөгдсөн 2021 оны өвлийн Универсиад наадмыг цуцлах шийдвэр гаргасан талаар мэдэгдлээ.

Олон улсын оюутны спортын холбооны гүйцэтгэх хороо болон “Люцерн-2021″ өвлийн Универсиад наадмын удирдах зөвлөлийн хамтарсан мэдэгдэлд “Зохион байгуулагч Швейцар улсын Засгийн газар “Омикрон” хувилбарын тархалт бүртгэгдсэн орнуудаас зочин хүлээн авахыг хориглох шийдвэр гаргасан. Улмаар 2021 оны Дэлхийн оюутны спортын өвлийн наадмыг бүр мөсөн цуцлахаас өөр аргагүй болсон явдалд гүнээ харамсаж байна” гэжээ.

Харин Олон улсын оюутны спортын холбооны Ерөнхийлөгчийн үүргийг түр орлон гүйцэтгэгч Леонз Эдер энэ талаар “Люцерн-2021 өвлийн Универсиад наадамд оролцохоор бэлтгэж байсан тамирчид, баг тамирчдаа илгээхээр зэхэж байсан дэлхийн улс орнуудын Оюутны спортын холбоод болон наадмыг тэсэн ядан хүлээж байсан үзэгч, төлөөлөгчдөөс гүнээ уучлалт гуйж байна. Ийм шийдвэрийг гаргахад үнэхээр хэцүү байлаа. Хэдий зайлшгүй нөхцөл байдлын улмаас арга хэмжээг цуцлахаас өөр сонголтгүй болсон ч Люцерн 2021 өвлийн Универсиад наадмыг зохион байгуулахад бүх зүрх сэтгэлээ зориулсан зохион байгуулагчид болон оролцогчдод чин сэтгэлээсээ спортын эв нэгдэл, талархал илэрхийлье” гэсэн юм.

Улмаар “Омикро” хувилбарын тархалтаас шалтгаалан “Люцерн-2021″ өвлийн Универсиад наадам цуцлагдсанаар 2022 оны хоёрдугаар сарын 4-22 өдрүүдэд БНХАУ-ын нийслэл Бээжин хотноо зохион байгуулагдах XXIV удаагийн өвлийн олимпын наадмыг хойшлуулах, эсвэл бүрмөсөн цуцлагдах талаар эргэлзээ бий болоод байна.

ОУОХ болон “Бээжин-2022” өвлийн олимпын наадмыг зохион байгуулах комиссын зүгээс одоогоор вирусийн шинэ мутацийн тархалттай холбоотойгоор ямар нэгэн албан ёсны байр суурь илэрхийлээгүй байгаа юм.

Сагсан бөмбөгийн ОУХМ М.Отгонбаярын спортыг хөгжүүлэх, түгээн дэлгэрүүлэх үйлсэд оруулсан хувь нэмрийг нь үнэлэн МҮОХ-ны дээд шагнал “Алтан очир” одонгоор шагналаа.

Шагналыг МҮОХ-ны ерөнхий нарийн бичгийн дарга Э.Бадар-Ууган гардуулсан юм.

М.Отгонбаяр нь нэгэн үе сагсан бөмбөгийн лигийн шилдэг тамирчдын нэг байсан бөгөөд “Бизнесийн чөтгөрүүд”, “1+11”, “Лидер”, “Азарга” багуудад тоглож, лигийн аваргаар долоон удаа тодорч байсан билээ.

Японы мэргэжлийн сумо бөхийн Кюүшюү башёгийн 15 дэх өдрийн барилдаанд 73 дахь Их аварга Тэрүнофүжи Г.Ган-Эрдэнэ, Озэки Такакэйшотой учраа таарч, түүнээс хүч бяр, ур чадвараар илүү гэдгээ харуулан ошидаши мэхээр хаяж, анх удаа нэг ч уналгүй 15 даваатай тэргүүллээ.

Энэ цаг үед хүчээ сорьж байгаа Их аварга Тэрүнофүжи 2021 оны 6 башёгийн дөрөвт нь ийнхүү түрүүлж байгаа бөгөөд Их аварга /Ёкозүна/ цолтой 2 дахь удаагаа Японы Эзэн хааны цомыг хүртлээ. Монголоос тодорсон 5 дахь Их аварга Г.Ган-Эрдэнэ маргааш буюу 2021 оны 11 дүгээр сарын 29-нд 30 нас хүрэх юм байна.

Кюүшюү башёгийн сүүлийн өдөр Озэки Шодай, Сэкиваке Митакэүмид ошидаши мэхээр ойчиж 9 даваа, 6 унаатай башёг дуусгасан бол Митакэүми 11 даваатай өндөрлүүллээ.

Харин Комүсүби Ичиножёо А.Ичинноров 15 дахь өдрийн барилдаанд Сэкиваке Мэйсейд ошидаши мэхээр ойчиж 5 даваатай энэ башёг амжилтаа ахиулж чадалгүй дуусгав. Мөн Тамаваши Б.Мөнх-Оргил /М-6/, Комүсүби Кирибаяама Б.Лхагвасүрэнтэй барилдаж түүнд ёрикири мэхээр ойчиж 9 даваа, 5 унаатай бол Кирибаяама 6 даваатай энэ сарын тэмцээнээ дуусгаж байна.

Энэ өдөр Хошёорюү С.Бямбасүрэн /М-5/, Такарафүжи /М-4/-тэй барилдаж түүнийг уватэнаге мэхээр хаяж 7 даваа, 8 унаатай 50 хувийн амжилтаа хараахан хийж чадаагүй бол Чиёошома Г.Мөнхсайхан /М-7/ сүүлийн өдрийн барилдаанд Хокүтофүжи /М-12/-д ёрикири мэхээр унаснаар 8 даваа 7 унаатай башёг дуусгалаа.

Пара пауэрлифтингийн 2021 оны залуучууд, насанд хүрэгчдийн ДАШТ Гүрж улсын нийслэл Тбилиси хотод өчигдөр эхэллээ.

Тэмцээнп Гавьяат дасгалжуулагч Д.Баттулгын удирдлагад Хөдөлмөрийн баатар, Гавьяат тамирчин, паралимпийн аварга Э.Содномпилжээ оролцоно.

Энэ удаагийн ДАШТ “Парис-2024” паралимпийн наадмын эрх олгох эхний тэмцээн гэдгээрээ онцлогтой. Тэрээр ирэх сарын 5-нд хүч сорино.

Жюү жицүгийн УАШТ хоёр өдөр үргэлжлэн, өчигдөр шилдгүүдээ тодруулав. Тэмцээн баасан гарагт өсвөр үе, залуучууд /U8, U10, U12, U14, U16, U18/, бямба гаригт мастер, насанд хүрэгчдийн ангилалд аваргуудыг шалгаруулжээ. Энэ жилийн тэмцээнд жүдогийн цөөнгүй шилдэг оролцсон нь тэмцээнийг улам сонирхолтой, өрсөлдөөнтэй болголоо.

Улмаар жүдогийн шигшээ багийн тамирчид болох ДАШТ-ий хүрэл медальт, Гавьяат тамирчин Б.Мөнгөнчимэг, Азийн наадмын мөнгөн медальт, ОУХМ Г.Алтанбагана нар түрүүлж, жюү жицүгийн 2021 оны улсын аварга болжээ.

Тэмцээнийг Спортын төв ордны Б заалд зохион байгуулж нийт 45 клубийн 900 гаруй тамирчид ур чадвараа сорьсон байна.

Японы мэргэжлийн сумо бөхийн Кюүшюү башёгийн 14 дэх өдрийн барилдаанд 73 дахь Их аварга Тэрүнофүжи Г.Ган-Эрдэнэ, Аби /М-15/-тай учраа таарч, түүнийг ошитаоши мэхээр хаяж, башё дуусахаас 1 өдрийн өмнө түрүү бөхөөр тодорлоо.

Энэ цаг үед барилдаж байгаа ганц Их аварга Тэрүнофүжи башёгийн сүүлийн өдрийн барилдаанд Озэки Такакэйшотой барилдана.

Кюүшюү башёгийн хоёр Озэки цолтнууд болох Шодай, Такакэйшо нар энэ өдөр учраа таарч Озэки Такакэйшо цүкидаши мэхээр давж 12 даваа, 2 унаатай байгаа бол Шодай 9 даваа, 5 унаатай башёг үргэлжлүүлж байна.

Харин Тамаваши Б.Мөнх-Оргил /М-6/, Сэкиваке Митакэүмитэй барилдаж түүнд хатакикоми мэхээр ойчиж 9 даваа, 5 унаатай амжилттай барилдаж байна.

Энэ өдөр Хошёорюү С.Бямбасүрэн /М-5/, Комүсүби Кирибаяама Б.Лхагвасүрэнтэй барилдаж түүнийг ёрикири мэхээр хаяж 6 даваа, 8 унаатай байгаа бол Кирибаяама 5 даваа, 9 унаатай энэ башёд амжилт тааруухан явна. Мөн Комүсүби Ичиножёо, энэ өдөр Хүкүтофүжи /М-12/-тэй барилдаж, түүнд цүкиотоши мэхээр унаснаар 5 даваа, 9 унаатай болов.

Чиёошома Г.Мөнхсайхан /М-7/ Ютакаяама /М-13/-тай учраа таарч түүнийг уватэнаге мэхээр хаяснаар 8 даваа, 6 унаатай болж 50 хувийн амжилтаа хийгээд байна.

Өвлийн олимпийн эрх авахаар өрсөлдөж буй цанын тамирчид өдгөө Швейцарт бэлтгэлээ базааж байна.

ОУХМ Б.Ачбадрах, Д.Мөнхгэрэл, А.Энхтуул, О.Золбаяр, Б.Номин-Эрдэнэ нар тус улсыг зорьсон бөгөөд Швейцарын залуучуудын шигшээ багийн дасгалжуулагч Марко Айсеншмидийн удирдлага дор бэлтгэл хийж буй юм.

Манай цаначид ирэх арванхоёрдугаар сараас олимпийн эрхийн оноо олгох цуврал тэмцээнүүдэд оролцож эхэлнэ.

Тухайлбал, 3-5-нд Олон улсын цанын холбоо (FIS)-ны цуврал тэмцээнд оролцох бол 10-13-нд Давост болох Дэлхийн цомын ээлжит гараа, 10-21-нд оюутны ДАШТ, 28-30-нд FIS-ийн ээлжит цувралд тус тус оролцохоор төлөвлөжээ. Харин нэгдүгээр сарын 16-нд тамирчдын эцсийн чансаа гарсны дараа манай улс цанын төрлөөр хэдэн тамирчинтай олимпод оролцох нь тодорхой болох юм.

Монгол Улсад орчин цагийн шинжлэх ухааны салбар үүсэж хөгжсөний түүхт 100 жилийн ойн хүндэтгэлийн хурал боллоо. 1921 оны 11 дүгээр сард Ардын Засгийн газраас Судар бичгийн хүрээлэнг байгуулах нугалбар бичгийг Богд хаанд өргөн мэдүүлж, хүрээлэнгийн захирлаар Онхуд овогт С.Жамъян гүнг томилон ажиллуулснаар манай улсад орчин цагийн шинжлэх ухааны байгууллагын суурь тавигдсан түүхтэй.

УИХ-ын дарга Г.Занданшатар шинжлэх ухааны түүхт ойн баярын үг хэлж, Монгол Улсын Ерөнхийлөгч У.Хүрэлсүх, Монгол Улсын Ерөнхий сайд Л.Оюун-Эрдэнэ нар илгээлт ирүүллээ.

Энэ үеэр “Монгол Улсын шинжлэх ухааны тогтолцооны хувьсал”, “Бүтээлч санаачилга ба төр-хувийн хэвшлийн хамтын ажиллагаа” зэрэг илтгэлүүд тавигдлаа.