Category: спорт

Categories
мэдээ спорт

Насанд хүрэгчдийн жүдо бөхийн УАШТ Өмнөговь аймагт болно

Монгол Улсад жүдо бөхийн спорт үүсэж хөгжсөний 50 жилийн ой энэ жил тохиож байгаа.

Тиймээс орон нутагт жүдо бөхийг сурталчлах, Үндэсний шигшээ баг бүрдүүлэх, тамирчдыг сонгон шалгаруулах зорилгоор Өмнөговь аймгийн Даланзадгад хотноо жүдо бөхийн 2021 оны насанд хүрэгчдийн улсын аварга шалгаруулах тэмцээнийг зохион байгуулах гэж байна.

Эрэгтэйчүүдийн 44 дэх, эмэгтэйчүүдийн 29 дэх удаагийн улсын аварга шалгаруулах тэмцээн энэ сарын 25-26-ны өдрүүдэд болно.

Тэмцээнийг Өмнөговь аймгийн Засаг даргын Тамгын газар, Өмнөговь аймгийн Биеийн тамир спортын газар, Монголын жүдо бөхийн холбоо, Өмнөговь аймгийн жүдо бөхийн холбоо, “Капитрон” банк, “Ингүүмэл энх” ХХК, “Хангай” констракшн, “Ханбогд” кашмер хамтран зохион байгуулна.

Categories
мэдээ спорт цаг-үе

“Бээжин 2022” өвлийн олимпийн бамбарын аялал үргэлжилж байна

2022 оны Өвлийн олимпийн наадмын бамбарын аялал Бээжингийн шуудан, харилцаа холбооны их сургуулиас эхэллээ. Цар тахлын улмаас өвлийн олимпын бамбарын буухиаг гурван хоног болгон богиносгожээ.

Хятадыг тойрох бамбарын буухиа нь хэдэн сар үргэлжилдэг үндэсний хэмжээний аялал бөгөөд энэ удаагийн өвлийн олимпын бамбарын буухиа 1960-аад оны сүүлчээс хойших хамгийн богино хугацаанд болж байна гэж зохион байгуулагчид тус улсад бамбарын аялал эхлэх үеэр хэлсэн байна.

1960 онд АНУ-ын “Скво хөндийд” болсон өвлийн олимпын бамбарын буухиа 19 хоног үргэлжилсэн байдаг бол энэ удаагийн өвлийн олимпын бамбар 2022 оны 2 дугаар сарын 2-оос 4-ний хооронд Бээжин, Янчин, Жанжиаку зэрэг тэмцээний гурван бүсэд зочилно. Олимпын бамбарын аялалд нийт 1200 орчим бамбар зөөгч оролцох юм байна.

Өнгөрсөн 10 дугаар сарын 18-нд Грекийн эртний хотод болсон “Бээжин 2022” бамбар асаах ёслолын ажиллагаа Хятад дахь хүний эрхийн зөрчлийг эсэргүүцсэн тэмцэгчдийн улмаас тасалдсан юм.

Уг жагсаалд оролцсон гурван жагсагчийн шүүх хурал ирэх оны хоёрдугаар сарын 3-нд буюу олимпын албан ёсны нээлтийн ёслолоос нэг хоногийн өмнө болно.

Categories
мэдээ спорт цаг-үе

“Бөртэ чоно-2021”-т өрсөлдөх нэр дэвшигчид тодорлоо

Монголын үндэсний олимпийн хорооны Тэргүүн дээд шагнал “Бөртэ Чоно-2021” гардуулах ёслолын ажиллагаа энэ сарын 13-нд болно.

Тив дэлхийн тэмцээн, уралдаанд эх орноо төлөөлөн амжилт үзүүлсэн шилдэг тамирчдыг гурван номинацад өрсөлдүүлэн шилдгүүдийг шалгаруулна.

Нэр дэвшигчдийн нэрсийг танилцуулж байна.

Шилдэг эмэгтэй тамирчинд нэр дэвшигчид:

  1. М.Анхцэцэг (хүндийг өргөлт) – Азийн АШТ-ий мөнгөн медальт, “Токио-2020” олимпийн наадмын IV байрын шагналт
  2. Ц.Анударь (буудлага) – Индонез, Бангладешийн ОУТ-ий мөнгө, хүрэл медальт, “Токио-2020” олимпын наадмын 10 метрийн хийн гар бууны дасгалд 9-р байрт шалгарсан
  3. З.Болортунгалаг (чөлөөт бөх) – Ази тивийн аварга, Иван Ярыгины ОУТ-ий аварга
  4. Б.Болортуяа (чөлөөт бөх) – “Токио-2020” олимпийн наадмын хүрэл медальт
  5. Б.Болор-Эрдэнэ (ширээний теннис) – Олимпийн наадамд ширээний теннисний төрлөөр анх удаа эрхээ аван өрсөлдсөн
  6. Э.Гантуяа (чөлөөт бөх) – ДАШТ-ий хүрэл медальт, Иван Ярыгины ОУТ-ий хүрэл медальт
  7. О.Гүндэгмаа (буудлага) – Токио 2020 Олимпийн наадамд оролцсон. Нийт 7 Олимпийн наадамд оролцсон Монголын анхны тамирчин
  8. Э.Даваачимэг (чөлөөт бөх) – ДАШТ-ий хүрэл медальт, Иван Ярыгины ОУТ-ий мөнгөн медальт
  9. М.Дөлгөөн (чөлөөт бөх) – Ази тивийн аварга
  10. Д.Отгонжаргал (чөлөөт бөх) – ДАШТ-ий хүрэл медальт
  11. Б.Урантунгалаг (байт харваа) – Олимпийн эрх олгох тэмцээнд V байр эзэлж, “Токио-2020” олимпын наадамд оролцсон. Дэлхийн цомын тэмцээнд 663 оноогоор улсын дээд амжилтыг шинэчлэн тогтоосон
  12. М.Уранцэцэг (жүдо) – “Токио-2020” олимпийн наадмын хүрэл медальт, ДАШТий хүрэл медальт, Тбилиси, Ташкентийн Их дуулгын аварга, Мастерс тэмцээний хүрэл медальт
  13. Б.Шоовдор (чөлөөт бөх) – ДАШТ-ий хүрэл медальт, Азийн АШТ-ий мөнгөн медальт, Иван Ярыгины ОУТ-ий аварга
  14. Б.Энххүслэн (усанд сэлэлт) – “Токио-2020” олимпийн наадмын 50 метрийн чөлөөт сэлэлтэд улсын дээд амжилтыг шинэчлэн тогтоосон

Шилдэг эрэгтэй тамирчинд нэр дэвшигчид:

  1. Ё.Басхүү (жүдо) – “Токио-2020” олимпийн VII байрын шагналт, ДАШТ-ий хүрэл, Ташкентн Их дуулгын мөнгө, Абу Дабигийн Их дуулгын хүрэл медальт
  2. Д.Батгэрэл (холимог тулаан) – 2021 онд UFC Холимог тулаанд 2 тулаан дараалан цэвэр ялалт байгуулсан
  3. Г.Ганбаяр (хөлбөмбөг) – Унгарын дээд лигт “Пушкаш” багийнхаа хамтаар мөнгөн медаль хүртсэн
  4. Э.Даваахүү (буудлага) – Индонез, Бангладешийн ОУТ-ий аварга, “Токио-2020” олимпын наадмын хийн гар бууны 10 метрийн дасгалд 12-р байр эзэлсэн
  5. Д.Дашнамжил (байт харваа) – ДАШТ-ий урьдчилсан харваанд 652 оноо авч хувийн амжилтаа шинэчлэн, 102 тамирчнаас 9-д эрэмбэлэгдсэн. Хувийн төрөлд шилдэг 16-д, холимог багийн төрөлд А.Отгонжаргалын хамтаар шилдэг наймд шалгарсан
  6. М.Лхагвагэрэл (чөлөөт бөх) – “Токио-2020” олимпийн V байрын шагналт, ДАШТ-ий хүрэл медальт
  7. Э.Лхагвасүрэн (ширээний теннис) – Олимпийн наадамд ширээний теннисний төрлөөр анх удаа эрхээ аван өрсөлдсөн
  8. Т.Тулга (чөлөөт бөх) – ДАШТ-ий хүрэл медальт, Ромын ОУТ-ий мөнгөн медальт, “Токио-2020” олимпийн наадмын оролцогч
  9. С.Моллаей (жүдо) – “Токио-2020” олимпийн мөнгөн медальт, Тель-Авивын Их дуулга тэмцээнээс мөнгөн медаль хүртсэн
  10. Б.Чинзориг (бокс) – Ази тивийн аварга, Усти над Лабем гранпри тэмцээний хүрэл медальт, ДАШТ-ий V байрын шагналт, “Токио-2020” олимпийн наадмын оролцогч
  11. Ц.Цогтбаатар (жүдо) – “Токио-2020” олимпийн хүрэл медальт, Ташкент, Тбилиси, Абу Дабигийн Их дуулгын аварга, Бакугийн Их дуулгын хүрэл медальт
  12. Э.Цэндбаатар (бокс) – “Токио-2020” олимпийн V байрын шагналт, Ази тивийн аварга, Усти над Лабем гранпри тэмцээний аварга
  13. С.Жамбалжамц (дугуй) – Дугуйчдын Ази тивийн чансааны хоёрдугаар байранд бичигдэж байгаа, Тour of Thailand тэмцээний аварга
  14. Х.Энх-Амар (бокс) – Ази тивийн аварга, Усти над Лабем гранпри тэмцээний мөнгөн медальт

Шилдэг багт нэр дэвшигчид:

  1. 3х3 сагсан бөмбөгийн эмэгтэй шигшээ баг – Токио 2020 Олимпийн наадамд оролцсон
  2. Атлетик 220 хөлбөмбөгийн клуб – МХБХ-ны дээд лигийн аварга, AFC CUP тэмцээний хэсгийн шатанд өрсөлдсөн
  3. Хөлбөмбөгийн эрэгтэй шигшээ баг – FIFA 2022 Азийн бүсийн сонгон шалгаруулалтад өрсөлдсөн
  4. 3×3 сагсан бөмбөгийн эрэгтэй шигшээ баг – Токио 2020 Олимпийн наадмын эрхийн төлөөх тэмцээнүүдэд оролцсон
Categories
мэдээ спорт эдийн-засаг

Төмрийн хүдрийн үнэ 8.1 хувиар өсөв

Төмрийн хүдрийн үнийн өсөлт үргэлжилж, аравдугаар сараас хойш өдрийн дүнгээр хамгийн их буюу 8.1 хувиар өслөө.

Гангийн үйлдвэрлэлээр дэлхийд тэргүүлэгч БНХАУ үл хөдлөх хөрөнгийн салбарыг чиглэсэн хатуу арга хэмжээгээ сулруулахаар төлөвлөөд байгаа юм. Ийнхүү гангийн эрэлт цаашид өснө гэсэн хүлээлт үүссэн нь голчлон нөлөөлж байна.

Үүнээс гадна БНХАУ-ын төмрийн хүдрийн импорт 11 дүгээр сард сүүлийн нэг жилийн дээд түвшинд хүрлээ. Мөн БНХАУ гангийн гарцад хязгаарлалт тогтоосны дараа төмрийн хүдрийн үнэ тавдугаар сараас хойш 50 гаруй хувиар буурчээ.

Сингапурын биржид төмрийн хүдрийн фьючерс үнэ 0.3 хувиар өсөж, тонн нь 112.9 ам.доллар болоод байна.

Categories
мэдээ спорт

“Улаанбаатар-2023” Зүүн Азийн наадам и-спорт, жүдо, бокс зэрэг 12 төрлөөр зохиогдоно

Зүүн Азийн олимпийн хороодын зөвлөлийн хурал өнөөдөр цахимаар боллоо. Хуралд Зүүн Азийн олимпийн хороодын дэд ерөнхийлөгч, БНХАУ-ын ҮОХ-ны дэд ерөнхийлөгч Ян Шуан болон тус хороонд бүртгэлтэй ҮОХ-дын төлөөлөл оролцов.

Монголын талаас МҮОХ-ны ерөнхийлөгчийн үүрэг гүйцэтгэгч Ч.Наранбаатар, МҮОХ-ны тэргүүн дэд ерөнхийлөгч, ОУОХ-ны гишүүн Б.Баттүшиг, ерөнхий нарийн бичгийн дарга Э.Бадар-Ууган, БТСУХ-ны дарга Ц.Шаравжамц, наадмын Зохион байгуулах хорооны нарийн бичгийн дарга, нийслэлийн ЗДТГ-ын Нийгмийн бодлогын хэлтсийн дарга И.Баатархүү, Улаанбаатар спорт менежмент ХК-ийн гүйцэтгэх захирал Б.Тамир болон Зохион байгуулах хорооны оролцлоо.

Хэлэлцэх асуудлын төлөвлөгөөний дагуу МҮОХ-ны тэргүүн дэд ерөнхийлөгч Б.Баттүшиг, ЗБХ-ны нарийн бичгийн дарга И.Баатархүү нар мэндчилгээ дэвшүүлж үг хэлсний дараа “Улаанбаатар-2023” Зүүн Азийн залуучуудын наадмын бэлтгэл ажлын явцын тайлан мэдээллийг сонсож, улмаар наадам зохиогдох хугацаа болон спортын төрлүүдийг эцэслэн баталлаа.

Зүүн Азийн залуучуудын наадам спортын үндсэн 9-10 төрөлтэй байдаг. Үүн дээр зохион байгуулах орны зүгээс 2-3 спортыг санал болгох боломжтой. Манай улсын зүгээс и-спорт, чөлөөт бөх, боксын төрлийг санал болгосныг Зүүн Азийн олимпын хороодын зөвлөл дэмжин батлав.

Ингэснээр “Улаанбаатар-2023” Зүүн Азийн залуучуудын наадам хөнгөн атлетик, бадминтон, сагсан бөмбөг (3х3 болон 5х5), хөлбөмбөг, жүдо, усанд сэлэлт, ширээний теннис, таеквондо, волейбол, и-спорт, чөлөөт бөх, бокс гэсэн 12 төрлөөр зохиогдохоор болов.

Түүнчлэн наадмыг 2023 оны наймдугаар сарын 12-19-ны хооронд найман өдрийн турш зохион байгуулах санал оруулсныг мөн дэмжин баталлаа.

Дүрмийн дагуу наадам зохион байгуулах улсын ҮОХ-ны тэргүүн Зүүн Азийн олимпын хороодын дэд ерөнхийлөгч байдаг. Тиймээс өнөөдрийн хурлаар МҮОХ-ны тэргүүн дэд ерөнхийлөгч Б.Баттүшигийг Зүүн Азийн олимпын хороодын дэд ерөнхийлөгчөөр сонгов. Мөн МҮОХ-ны ерөнхийлөгчийн үүрэг гүйцэтгэгч Ч.Наранбаатарыг Зүүн Азийн олимпын хороодын зөвлөлийн гишүүнээр сонголоо.

Categories
мэдээ спорт

ОУХМ С.Жамбалжамц “Tour of Thailand” уралдаанд түрүүлэв

ОУХМ Сайнбаярын Жамбалжамц “Tour of Thailand” уралдааны аварга болж Монголын дугуйн спортын түүхэнд шинэ хуудас нээсэн амжилтын эзэн боллоо.

Тэрбээр Малайзын мэргэжлийн “Terengganu” багийн тамирчин бөгөөд Спортын төв сургуулиас төрөн гарсан, “Алдар” спорт хороонд бүртгэлтэй, 2021 Азийн чансааны 2 дугаар байрт шалгарсан, холбооны 2021 чансааг тэргүүлэгч дугуйчин билээ.

Тайландын олон улсын олон өдрийн уралдаан нь Олон улсын дугуйн холбоо /ОУДХ/-ны 2.1 ангилал буюу хагас мэргэжлийн багууд оролцдог гэдгээрээ онцлог юм. Монголын дугуйчид ийм ангиллын тэмцээний үе шат /этап/-уудад түрүүлж байсан боловч нийлбэр дүнгээр анх удаа ийнхүү аварга болж байна.

Монголын дугуй холбоо 2022 онд анхны мэргэжлийн багийг байгуулснаар ОУДХ-ны 2.1 ангиллын бүхий л тэмцээнүүдэд орох эрхтэй болж олимпын наадамд оролцох эрхийн оноог цуглуулах боломжтой болж байгаа юм.

Categories
мэдээ спорт

МҮОХ-ны гишүүдийн ээлжит бус хурал энэ сарын 20-нд болно

Монголын үндэсний олимпийн хорооны гишүүдийн ээлжит бус хурал энэ сарын 20-нд зохион байгуулагдана.

Тус хорооны гүйцэтгэх зөвлөл өнгөрсөн арваннэгдүгээр сарын 17-нд хуралдаж, тухайн сарын 30-нд товлоод байсан хурлаа дахин хойшлуулж, дээрх өдрийг сонгосон юм.

Уг хурлаар ирэх олимпийн мөчлөгт МҮОХ-г удирдах бүрэлдэхүүн (ерөнхийлөгч, тэргүүн дэд ерөнхийлөгч, дэд ерөнхийлөгч, Гүйцэтгэх зөвлөлийн гишүүд)-ийг сонгох юм.

Categories
мэдээ спорт

БНСУ-ын жүдогийн аварга Ан Чанрим зодог тайлав

Дэлхийн аварга, олимпийн хүрэл медальт Өмнөд Солонгосын алдарт жүдоч Ан Чанрим их спортоосоо зодог тайлж буйгаа зарлалаа.

Өдгөө 27 настай тэрбээр өөрийн цахим хуудастаа “Би энэ жил зодог тайлж байгаа учир 2021 он миний Солонгосын шигшээ багт өнгөрүүлж буй сүүлийн жил болж байна. Намайг дэмждэг IJF болон дэлхий даяарх жүдогийн нийгэмлэгтээ баярлалаа. Одоо би амьдралаа гэр бүл, аз жаргал, эрүүл мэнддээ зарцуулах болно. Би одоо сайн дасгалжуулагч болж, олимпийн алтан медальтнуудыг бэлтгэмээр байна. Би хилийн чинадад ажиллахад нээлттэй тул хэрэв хамтарч ажиллахыг хүсвэл надтай цахим шуудангаар холбогдоорой. Мөн зөвлөгөө, сургалт хийх сонирхолтой байгаа тул надтай холбогдоорой” гэжээ.

Японы домогт Шохэй Онотой хүчтэй өрсөлдөөнийг үзүүлдэг байсан Ан Чанрим ийнхүү зодог тайллаа. Япон гаралтай Ан Чанримийн тухайд 2015, 2017 онуудын дэлхийн аваргаас хүрэл медаль хүртэж, 2018 онд Шохэй Оно аваргыг гэмтэлтэй байх үеэр Бакугийн дэлхийн аваргад түрүүлж байв. Мөн тэрбээр 2018 оны Азийн наадмын шигшээд Онотой учраа таарч ялагдан, мөнгөн медаль хүртсэн түүхтэй.Тэрбээр олимпоос хойш тэмцээн уралдаанд оролцоогүй бөгөөд хамгийн сүүлд Ц.Цогтбаатартай барилдаж, ялагдал хүлээсэн.

Categories
мэдээ спорт

Мөсөнд авиралтын шилдгүүд тодорлоо

“Karakorum ice festival” мөсөнд авиралтын цомын төлөөх тэмцээн Орхон голын Улаан цутгалангийн хүрхрээн дээр энэ сарын 4-5-нд болж, шилдгүүдээ шалгаруулав.

Тэмцээний дүнг танилцуулахад, мэргэжлийн, эрэгтэй хурдны төрөлд:

I байр: ОУХМ Д.Баасандорж, “Хайрхан аялагч” клуб

II байр: ОУХМ Н.Хэрлэн, “Сутайн бор” клуб

III байр: Спортын мастер Ч.Мандахбаяр, “УБ аялагч” клуб

Мэргэжлийн, эмэгтэй хурдны төрөлд:

I байр: Н.Сэлэнгэ, “Сутайн бор” клуб

II байр: Гэрэлчимэг, “УБ аялагч” клуб

III байр: Ц.Энхжаргал, “Саммит” клуб

Сонирхогчид, эрэгтэй хурдны төрөлд:

I байр: Б.Итгэл, “Сутайн бор” клуб

II байр: Б.Батчулуун, “Сутайн бор” клуб

III байр: Б.Амгалантөгс, “Сутайн бор” клуб

Сонирхогчид, эмэгтэй хурдны төрөлд:

I байр: Э.Баярчимэг, “УРСА” клуб

II байр: Б. Батцэцэг

III байр: М.Оюунчимэг, “УБ аялагч” клуб

Тус тэмцээний “KARAKORUM” цомын эзнээр “Хайрхан аялагч” клубийн тамирчин, ОУХМ Д.Баасандорж, “Сутайн бор” клубын тамирчин, спортын дэд мастер Н.Сэлэнгэ нар шалгарсан байна.

Categories
мэдээ спорт

ДАШТ-д өрсөлдөх шатарчид тодорлоо

Сонгон шалгаруулалтаас дэлхийн аваргын болзлыг хангасан дараах тамирчид Казахстаныг зорихоор болжээ.

Тодруулбал, эрэгтэй төрөлд олон улсын Их мастер Г.Мөнхгал, Үндэсний шигшээ багийн тамирчин, олон улсын Их мастер У.Насанжаргал, олон улсын Их мастер Д.Батсүрэн, эмэгтэй төрөлд Үндэсний шигшээ багийн тамирчин, олон улсын Их мастер, эмэгтэй Их мастер Б.Мөнгөнтуул, Үндэсний шигшээ багийн тамирчин, олон улсын Их мастер Т.Мөнхзул, эмэгтэй Их мастер А.Энхтуул, эмэгтэй олон улсын мастер С.Отгонжаргал, эмэгтэй ФИДЕ мастер Б.Алтантуяа, ФИДЕ мастер Э.Хулан нар ДАШТ-д эх орноо төлөөлөн оролцоно.