Category: нийгэм

Өнгөрсөн долоо хоногт Өвөрхангай аймгийн Хужирт сумын 80 жилийн ой тохиосон. Энэ үеэр Японы мэргэжлийн сумогийн их аварга Д.Дагвадорж амлаж байсныхаа дагуу нутгийнхаа бөхийн барилдаанд зодоглож, аавынхаа хүсэлтээр нутгийнхаа зон олныг баясгасан аж. Тэрээр барилдахдаа аавынхаа зааны малгайг өмсөөд гарчээ. Улсын манлай зааны олон шөвгөрсөн малгайтай залуу бөх Д.Дагвадоржийн наадамчдыг баясгасан барилдааныг харсан олон түмэн “Аавынхаа малгайг өмсөх нь зөв. Хүн аавынхаа эдэлж хэрэглэж байсан зүйлийг өмсөж эдлэх учиртай” гэж ярилцсан байна. Гэвч цөөнгүй хүн “Монгол бөх ёс жудгаа алдлаа. Улсын зааны малгайг өмсөж болохгүй. Танихгүй хүмүүс улсын заан гэж андуурна” гэх мэтээр цэц булаалдсан сурагтай.

Тэр ч бүү хэл “Монгол бөхийн дүрэм журмыг зөрчлөө. Улсын зааны малгайг хийх стандарт байдаг. Тийм дүрэм журмаар хийсэн малгайг ингээд өмсөөд олны өмнө барилдаад байж болохгүй” гэж нилээд маргалджээ. Эх сурвалжийн мэдээлснээр МҮБХ энэ үйлдэлд тун таагүй хандаж байгаа аж. Тус холбооны цэцдийн зөвлөлийн зарим хүмүүсийн яриагаар “Б.Бат-Эрдэнийн малгайг охин нь өмсөөд явж болохгүй. Х.Баянмөнхийн малгайг Б.Гантогтох өмсөөд гараад ирвэл олон нийт дургүйцнэ. Тийм л зүйл боллоо. Энэ асуудалд хариуцлага ярих болно” гэжээ. Сонирхуулахад, Дагваа аварга нутгийнхаа 80 жилд зориулан сумын хаалгыг барьж байгуулж, бөхийн барилдааны бүх байг даажээ. Мөн сумынхаа хүн эмнэлэгт түргэний машин, төрөхийн тоног төхөөрөмж зэрэг олон бэлэг гардуулсан байна.

Шувууд хэдэн мянгаараа цуглан жиргэх байгалийн өвөрмөц үзэгдэл олон жилийн турш судлаачдын анхаарлыг татсаар иржээ. Шувуу судлаачид уг үзэгдлийн учрыг тайлсан гэнэ. Эрдэмтэд график дизайн ашиглан энэ үзэгдэл хэрхэн өөрчлөгдөн хувьсаж болохыг тооцоолон гаргасан бөгөөд виртуал болон байгаль дахь шувууд хөдөлгөөн хоёрын хооронд нарийн холбоо хамаарал байгааг тогтоожээ. Мөн тус график судалгааны аргаар дамжуулан шувуудын талаарх мэдээлэл, сүрэг доторхи шувуудын зохион байгуулалт зэрэг нарийн мэдээллийг олж авах анхдагч нөхцөл бүрдэж байна гэдгийг Варвикийн их сургуулийн судлаачид онцолсон байна.

Мөн шувуудын үүсгэсэн гэрэл, сүүдрийн тусгал нь дараагийн удаад үүсгэх хэлбэржүүлэлтийн дохиог сүргийн дотор манлайлж буй шувуунд өгдөг аж. Өөрөөр хэлбэл сүрэгт багтсан шувуу нэг бүр тус тусын үүргийг гүйцэтгэж байж дүрс нэгэн цул болох гэнэ.

Нийслэлийн хэмжээнд авто замыг өргөтгөн шинэчлэх, мөн “Гудамж” төслийн хүрээнд уулзваруудыг өргөтгөх зэрэг ажил үргэлжилж байна. Үүнтэй холбоотойгоор маргааш Баянгол дүүргийн Ахуй үйлчилгээний ордны уулзварыг түр хугацаагаар хаахаар болжээ. Ингэхдээ тухайн өдрийн 05.00-07.00 цагт хүртэл  түр хаах аж. Энэ хугацаанд гүйцэтгэгч компани суурь хучилтын ажлыг хийх юм байна.

Мэдэгдэл

Харилцаа холбооны зохицуулах хороо нь Монгол Улсын холбогдох хууль тогтоомжийн дагуу мэдээллийн технологи, шуудан, харилцаа холбооны салбарт үйл ажиллагаа эрхлэгчдийн үйл ажиллагаанд Монгол Улсын болон Олон Улсын эрхзүйн баримт бичгийн дагуу хяналт, зохицуулалт хийх эрх бүхий бие даасан, 19 жилийн түүхтэй байгууллага юм. Гэвч сүүлийн үед вэб сайт, мэдээлэх хэрэгсэлээр www.amjilt.com вэб сайтын Монгол Улсаас хандах хандалтыг хязгаарласантай холбоотойгоор тус хорооны удирдлага, хамт олон, үйл ажиллагааны талаар олон нийтэд сөрөг мэдээлэл ихээр цацагдсан.

Энэхүү мэдээлэлд тус байгууллагын хуулиар олгогдсон бие даасан байдлыг болон өнгөрсөн хугацаанд хийж хэрэгжүүлсэн ажлуудыг үгүйсгэж, хэн нэгэн эрх бүхий  байгууллага, албан тушаалтанд үйлчилдэг мэтээр олон нийтэд сөрөг мэдээлэл түгээсэнд тус хорооны зүгээс харамсаж байна. Иймд тус хорооны зүгээс өөрийн байр суурийг илэрхийлж байна. Үүнд:

1. Монгол Улсын “Харилцаа холбооны тухай хууль”-ийн 12.3-д заасны дагуу тус хороо нь веб сайтын үйл ажиллагааг бүртгэж, хуулинд заасан эрх хэмжээний хүрээнд холбогдох зохицуулалтыг хийдэг. Уг хуулийн хүрээнд 2011 онд “Тоон контентийн үйлчилгээний ерөнхий нөхцөл шаардлага”, 2013 онд “Монголын сайтын холбоо” болон “Мэдээллийн сайтуудын ассоциаци”-тай хамтран тус хорооноос “Сайтууд дахь сэтгэгдлийн харилцааг зохицуулах журам”-ыг батлан гаргасан. Энэхүү үндсэн зохицуулалт нь вэб сайтууд контентоо бэлтгэх, түгээхдээ Монгол Улсын хуулийн хүрээнд ажиллах, цахим орчинд зөв, соёлтой хэрэглээг нийтэд дэлгэрүүлэх, хэвшүүлэхэд чиглэсэн.

Тус хороо нь Оюуны Өмчийн Газар, Цагдаагийн Ерөнхий Газар, Шударга Өрсөлдөөн Хэрэглэгчийн Төлөө Газар, Хэрэглэгчийн Эрх Ашгийг Хамгаалах Нийгэмлэг зэрэг холбогдох байгууллагуудтай хамтран ажилладаг бөгөөд Монгол Улсын “Зохиогчийн эрх болон түүнд хамаарах эрхийн тухай хууль”, “Садар самуунтай тэмцэх тухай хууль”, “Хүүхдийн эрхийг хамгаалах тухай хууль”, “Зар сурталчилгааны тухай хууль”, Эрүүгийн хууль”, “Өрсөлдөөний тухай хууль”, “Хэрэглэгчийн эрхийг хамгаалах тухай хууль”, тус хорооноос баталсан дээр дурдсан журам, нөхцөл, шаардлагыг зөрчсөн нь холбогдох эрх бүхий байгууллагын дүгнэлтээр 2012,  2013 онуудад зөрчил гаргасан веб сайтуудын Монгол улсаас хандах хандалтыг хязгаарлах хүртэл арга хэмжээг авч байсан.

Гэсэн хэдий ч зарим нэгэн вэб сайт, мэдээлэх хэрэгсэл болон нийгмийн сүлжээгээр Монгол Улсын холбогдох хууль тогтоомж, нөхцөл шаардлагыг биелүүлэхгүй олон нийтэд мэдээлэл түгээхдээ бодитой бус, нотлох баримтгүй, сэтгүүлчийн ёс зүйгүй, аливаа асуудалд нэг талыг баримталж, хэт туйлшрах, улс төржүүлэх хандлага гаргах зэрэг хууль, журамд үл нийцэх үйлдлүүдийг хийж байгаа нь нууц биш юм.

Холбогдох байгууллагуудын хамтын ажиллагааны хүрээнд зохицуулах хороо нь дээр дурьдсан хуулиуд болон тус хорооноос батлан гаргасан нөхцөл шаардлагыг биелүүлж ажиллах тухай анхааруулгыг 2013 онд хууль, тогтоомжийн хүрээнд үйл ажиллагаа явуулахгүй байсан нэр бүхий веб сайтууд болон www.amjilt.com веб сайтад удаа дараа хүргүүлж байсан болно.

amjilt.com сайт нь 2012 онд Монгол Улсын “Зохиогчийн эрх болон түүнд хамаарах эрхийн тухай хууль”-ийн 12 дугаар зүйлийг зөрчсөн тул Монгол улсаас хандах хандалтаа хязгаарлуулж байсан.

2. Түүнчлэн тус хороо нь Монгол Улсын Харилцаа холбооны тухай хууль, Мэдээллийн ил тод байдал ба мэдээлэл авах эрхийн тухай хууль болон холбогдох эрх зүйн баримт бичгийн хүрээнд аж ахуйн нэгж байгууллага, иргэд, үйлчилгээ эрхлэгч, хэрэглэгчдийн зүгээс ирсэн аливаа өргөдөл, гомдлыг хүлээн авч шийдвэрлэн ажилладаг. Энэхүү ажлын хүрээнд  зарим аж ахуйн нэгжийн үйл ажиллагааны талаар amjilt.com сайтад гүтгэлгийн чанартай ташаа мэдээлэл нийтэлж байгаа талаарх гомдлыг холбогдох байгууллагын дүгнэлтийн хамт тус хороонд ирүүлсэн. Иймд Зохицуулах хороо нь amjilt.com сайтын удирдлагуудтай холбогдон энэхүү мэдээллийн үнэн бодитой эсэхийг нягтлан үзэх, хэрэв баталгаатай эх сурвалжгүй мэдээлэл бол уг мэдээллийг залруулах талаар шаардлага тавьсан боловч уг тавьсан шаардлагыг биелүүлээгүй. Иймд тус хорооны зүгээс гомдлыг хоёр тал эцэслэн шийдвэрлэж, холбогдох хууль хяналтын байгууллагаар нотлогдох хүртэл энэхүү сайтын Монгол улсаас хандах хандалтыг түр хязгаарласан болно. Гэвч өдий хүртэл amjilt.com веб сайтаас өөрийн гаргасан мэдээллийн талаарх тайлбар мэдээллийг тус хороонд ирүүлээгүй байгаа болно. Сүүлийн үед олон нийтийн зүгээс вэб сайт, мэдээлэх хэрэгсэлийн нийгэмд түгээж буй мэдээллийн агуулга нь хэн нэгнийг гүтгэн доромжилсон, улс төржсөн, сөрөг мэдээлэл ихтэй, ерөнхийдөө нийгэмд сөрөг хандлага төрүүлэхүйц агуулгатай байна гэсэн гомдол байнга гарч байгаа ба цаашид ч энэ төрлийн гомдол нэмэгдэх хандлагатай байна.

3. Хүн бүр үг хэлэх, үзэл бодлоо чөлөөтэй илэрхийлэх, хэвлэн нийтлэх эрх чөлөө эдлэх эрхтэй байдаг хэдий ч энэ эрх чөлөөг эдлэхдээ бусдын эрх, нэр хүндийг хүндэтгэх, үндэсний аюулгүй байдал, нийгмийн хэв журам, ёс суртахуунд халдахгүй байх үүрэг, хариуцлагыг давхар хүлээдэг ба энэ нь ардчилсан нийгмийн үндсэн зарчим юм. Түүнчлэн хэвлэл мэдээллийн хэрэгслийн нэг чухал үүрэг хариуцлага нь олон нийтийг соён гэгээрүүлэх, танин мэдүүлэх, үнэн бодит мэдээллээр хангах байдаг.

Тус хорооны хувьд цахим орчин дахь мэдээллийн хэрэгслийг зохицуулахдаа дээрх зарчмыг баримталж, Монгол Улсын холбогдох хуулиудын дагуу нийтийн ашиг сонирхлын төлөө ажилладаг. Зарим улс орнуудын хувьд хэвлэл мэдээллийн зохицуулалтыг өөрийн зохицуулалтаар буюу хэвлэл мэдээллийн байгууллага эсхүл дундын холбооны баталсан дүрэм журмаар шийдвэрлэх зарчимд тулгуурладаг ч энэхүү зохицуулалтын болон өөрийн зохицуулалтын үндсэн зарчим нь нийгмийн хариуцлага, нийтийн ашиг сонирхолтой шууд хамааралтай байдаг. Иймээс төр нь олон нийтийн эрх ашгийг хамгаалах үүднээс ямар ч зохицуулалтын зарчим мөрдөгдөж байсан ч тодорхой хүрээнд хяналт тавьж ажиллах үүрэгтэй байдаг.

Энэхүү өөрийн зохицуулалт нь өндөр хөгжилтэй, хууль эрхзүйн болон хэвлэл мэдээллийн орчин нь тогтвортой улс орнуудад амжилттай хэрэгждэг. Харин буурай болон хөгжиж буй улсуудын хувьд, хууль эрх зүйн орчин нь харьцангуй төлөвшөөгүй нөхцөлд өөрийн зохицуулалтад даатгаж орхих нь дэндүү хариуцлагагүй үйлдэл болох бөгөөд энэ нь эргээд нийгэмд ялангуяа хүүхэд, өсвөр залуу үеийнхэнд сөрөг нөлөө үзүүлдэг байна.

Иймд Харилцаа холбооны зохицуулах хорооны зүгээс цахим орчны мэдээллийн хэрэгслийн зохицуулалтын орчинг боловсронгуй болгох, хууль тогтоомжийг мөрдүүлэх чиглэлээр холбогдох байгууллагуудтай хамтран ажиллаж, шаардлагатай арга хэмжээг авч ажиллах болно гэдгээ үүгээр мэдэгдэж байна.

ХАРИЛЦАА ХОЛБООНЫ ЗОХИЦУУЛАХ ХОРОО

Сүхбаатар аймгийн Эрдэнэцагаан сумын нутаг дэвсгэрт байрлах “Баян-Эрч” ХХК-ий нүүрсний уурхайн хамгаалалтын албаны ажилтан 22, 32, 62 настай гурван хүн архины хордлогоор нас барсан хэрэг гарсан. Тэдэнтэй хамт байсан 18 настай нэг иргэн Сүхбаатар аймгийн Эрдэнэцагаан сумын Эрүүл мэндийн төвд эмчилгээ хийлгэж байгаа аж. Нас барсан иргэдийн уусан зүйл нь хүнсний зориулалтын бус, метилийн спирт болох нь тогтоогджээ. Энэ хэрэгтэй холбогдуулан мэргэжлийн хяналтын байгууллага хууль хяналтынхантай хамтарч хяналт шалгалтаа үргэлжлүүлж буй юм байна.

Өнгөрсөн тавдугаар сард Өвөрхангай аймгийн Хархорин сум дахь хорих 423 дугаар анги руу ачигдсан “Гал үндэстэн” холбооны тэргүүн Ц.Мөнхбаярыг өнгөрсөн баасан гаригаас бямба гаригт шилжих шөнө Зайсан дахь 401 дүгээр ангид авчирчээ. Эх сурвалжийн мэдээлснээр, шүүхийнхэн “Дээрээс ирсэн шийдвэр. Хотод аваачиж эмчилгээ хийнэ” гэсэн тайлбар хэлсэн байна. Ц.Мөнхбаяр Хархорины хориход очсоноосоо хойш эмчлүүлэх тухай хүсэлт гаргаагүй бөгөөд өнгөрсөн баасан гаригт эсэргүүцэл үзүүлсэн ч хүлээж аваагүй аж. Тиймээс “Биеийн байдал нь хэвийн байхад эмчилгээ хийнэ гэсэн нь цаанаа учиртай асуудал” хэмээн холбооны гишүүд нь ХЭҮК-д ханджээ. Ц.Мөнхбаяртай хамт ял сонссон С.Дашцэрэнг биеийн байдлын улмаас хотод шилжүүлсэн байна. Дархан-Уул аймагт хуваарилагдсан тэрээр элэгний өвчтэй хэмээн Зайсан дахь 401 дүгээр ангийн эмнэлэгт хүргэгджээ.

Нэрт хөлбөмбөгчин Кристиан Рональдогийн найз бүсгүй, загвар өмсөгч Ирина Шейк монгол цустайгаа мэдэгджээ. Тэрээр саяхан “Vogue” сэтгүүлд өгсөн ярилцлагадаа “Би өөрийгөө орос хүн гэж танилцуулахад тэд ер итгэдэггүй. Чи бразил хүн шиг л харагддаг гэцгээдэг. Үнэндээ бол миний аав татар хүн. Өөрөөр хэлбэл аав маань бараг л монгол хүн гэсэн үг. Тиймээс би гадна төрхөөрөө аавыгаа дуурайсан бор арьстай. Хүмүүст “Би оросын тагнуул юм аа” гэж хошигнодог” хэмээн ярьжээ. Дашрамд сонирхуулахад тэрээр энэ сарын 25-нд нээлтээ хийх Грекийн бурхдын нэг Геркулесийн тухай өгүүлэх кинонд гол дүр бүтээсэн байна.

Дэлхийн хоёрдугаар дайны үед 645 хятад хүний амийг хороож, 724 хүнийг эрүүдэн шүүж байсан Японы цэргийн гэмт хэрэгтний мэдүүлгийг нийтэд дэлгэжээ.

 Дэлхийн хоёрдугаар дайны үеийн Японы цэргийн гэмт хэрэгтнүүдийн 45 мэдүүлгийг Хятадын Засгийн газар цуврал болгон нийтэд дэлгэхээр ажиллаж байгаа. Энэ удаад Хятадын гэмгүй иргэдийг хоморголон хороож, эрүүдэн шүүж байсан цэргийн гэмт хэрэгтнүүдийн нэг болох Оно Тайжигийн мэдүүлгийг цахим хуудсаар дамжуулан олонд дэлгэсэн байна. 1934 онд Манжуурын цагдаагийн ажилд туслахаар томилогдон Хятадад очсон Оно 

Тайжи 1954 онд хэргээ хүлээн мэдүүлэг өгөхдөө , анх 1935 онд баригдсан 20 хятад хүнийг зодож занчиж, усанд дүрж, дүүжлэх зэргээр эрүүдэн шүүсэн гэжээ. Түүнчлэн хүний тархиар эм хийж уудаг байсан тухайгаа ч мэдүүлсэн байна. Оно Тайжи гэгч нь 1945 оноос хойш 10 гаруй жилийн хугацаанд 645 хятад хүнийг хороож, 724 хүнийг эрүүдэн тамлан, энгийн иргэдийн 47 орон сууцыг галдан шатааснаа хүлээсэн байна.

Баянхонгор аймгийн Засаг дарга мотоциклийг замын хөдөлгөөнд оролцуулахыг түр хориглох тухай захирамж гаргажээ. Учир нь тус аймагт энэ сарыг 21-нээс 27-ны өдрүүдэд Ламын гэгээн Лувсанданзанжанцаны түмэн өлзий гийсний түүхт 375 жилийн ой, Ламын гэгээний наймдугаар дүр Данзанжамбалчойжишэнин гэгээнтэнд бат оршил өргөх ёслол, даншиг наадам, Төвийн бүсийн Их хурд-2014″ хурдан морины уралдаан болох юм.

Баяр наадмын үеэр иргэд, наадамчдын аюулгүй байдлыг хангах, гэмт хэрэг, зөрчил, ослоос урьдчилан сэргийлэх зорилгоор наадмын өдрүүдэд Баянхонгор хот, Дуурсахын хөндий болон Эрдэнэцогт сумын Жанжны 4 дүгээр багийн Баянзүрхийн хонхор орчмоор мотоцикльтой иргэдийг замын хөдөлгөөнд оролцохыг түр хориглосон байна.

Увс аймгийн Цагдаагийн газар, Онцгой байдлын хэлтэс хамтран иргэдийн аюулгүй байдлыг хангах зорилгоор Увс нуур болон Хяргас нуурын эргээр морьтой эргүүл ажиллуулж эхэлжээ. Нуурт ойрхон сумдын холбогдох байгууллагын албан хаагчдыг байнгын эргүүлээр ажиллуулахаар болсон байна. Гол мөрөн, нуур ус элбэгтэй Увс аймгийн ард иргэд зуны дэлгэр цаг ирсэнтэй холбогдуулан агаарт гарч амарч зугаалах, архидан согтуурах явдал ихэсчээ. Хууль сахиулах байгууллагууд нойр хоолоо хасан эрчимтэй ажиллаж байгаа ч иргэд өөрсдөө аюулгүй байдлаа хангаж сонор сэрэмжтэй байх шаардлагатай байгаа юм. Усны түвшин өдрөөс өдөрт нэмэгдэж байгаа энэ эгзэгтэй үед иргэд аль болох нуурт орохгүй байх, зайлшгүй тохиолдол гарахад гүн рүү нь орохгүй байхыг тус аймгийн Онцгой байдлын хэлтэс болон Цагдаагийн газраас иргэддээ анхааруулжээ.