Энэ удаагийн буландаа Дундговь аймгийн “Мандал” сургуулийн 3 “А”ангийн сурагч М.Цогтбаяртай ярилцлаа.
-Хичээл нь орохгүй, багштайгаа, ангийнхантайгаа уулзахгүй байх ямар байна вэ. Теле хичээлээ өдөр бүр хийж байсан уу?
-Ангийнхантайгаа уулзахгүй удахаар муухай, уйтгартай санагддаг. Хааяа ангийн найзуудаа маш их санадаг. Теле хичээлээ байнга үздэг байсан. Телевизээр гарсан теле хичээлийг заримдаа бичиж амждаггүй болохоор ээж маань компьютер дээр дахиад гаргаж өгдөг. Тэгээд зогсоогоод өөрийнхөө ойлгоогүй үлдсэн зүйлээ тэмдэглэж авдаг. Бичиж тэмдэглэсэн хичээлүүдээ өдөр өдөрт нь багшдаа шалгуулдаг байсан. Есдүгээр сарын нэгэнд хичээлдээ сууж, ангийнхантайгаа уулзана гэж бодохоор гоё байна.
-Ирээдүйд ямар мэргэжилтэй болохыг хүсдэг вэ?
-Би цагдаа болохыг хүсдэг.
-Яагаад цагдаа болохоор шийдсэн бэ. Юу нь чамд таалагдсан?
-Цагдаа хүн хянамгай ажигч байх ёстой. Мөн саадан дээгүүр явж бэлтгэл хийдэг, бас олон хүнд тусалдаг нь их таалагддаг.
-Мөрөөдөлдөө хүрэхийн тулд хичээлээ сайн хийх шаардлагатай болно шүү дээ. Ямар хичээлдээ илүү сайн бэ?
-Би дүрслэх урлаг, биеийн тамир, бас монгол хэлний хичээлдээ дуртай. Том болоод зургийн үзэсгэлэн нээнэ гэж боддог.
-Дугуйланд явдаг уу?
-Анх тамирын хичээл орж байхад багш маань намайг дуудаад “сагсан бөмбөгийн дугуйланд явах уу” гэж асууж байсан. Тэгээд сагсан бөмбөгийн дугуйланд яваад нэг болон хоёр бөмбөгийг зэрэг залах, нэг бөмбөгийг ээлжлэн залах гээд бүүр анхан шатнаас нь заалгасан. Дугуйланд яваад жил гаруй болж байгаа.
-Танайх хэдүүлээ амьдардаг вэ?
-Аав, ээж, дүүтэйгээ амьдардаг. Манай аав одоо Солонгост байдаг. Коронагаас болоод ирж чадахгүй байгаа. Харин манай ээж “Мандал” сургуулийн англи хэлний багшаар ажилладаг. Ээж маань дүү бид хоёрт ханан дээр тогтоодог самбар авч өгсөн. Түүн дээр би дүүдээ тоо, дүрс, өнгө, үсэг гээд хичээл заадаг.
-Дүүтэй байх гоё уу?
-Дүүтэй байх хамгийн гоё. Дүүгээ эрхлүүлнэ, дүүдээ тусална, хамт тоглоно, хичээл зааж өгнө гээд зөндөө зүйлийг хамт хийдэг. Бас зураг зурдаг.
-Аав ээждээ зориулж юу хэлмээр байна?
-Дүү бид хоёрыг төрүүлж өсгөсөнд маш их баярлалаа. Хайртай шүү гэж хэлмээр байна. Би мундаг хүн болоод аав ээжийнхээ ачийг заавал хариулна.