“Вакциныг түгээх, дархлаажуулах үйл ажиллагааны Үндэсний төлөвлөгөө”-ний хүрээнд ЭМЯ-нд вакцинжуулалтын онлайн сургалтыг зохион байгуулав.
Сургалтын үеэр ЭМЯ-ны төрийн нарийн бичгийн дарга Я.Амаржаргал юуны өмнө вакциныг түгээх, вакцинжуулалтад хамрагдах зорилтот бүлгийн хамралт, байршил зэргийг сдудагаагаар тогтоох шаардлагатай байгааг онцлов.
Мөн халдварын эсрэг дархлаажуулах үйл ажиллагаанд оролцох эрүүл мэндийн ажилтнуудыг дайчлан ажиллуулах хүн болон хүйтэн хэлхээний тоног төхөөрөмжийн нөөц, зохих шаардлагыг хангасан байнгын болон түр цэгийн бэлэн байдлыг хангаж ажиллах шаардлагатайг тэмдэглэлээ. Манай улсын хэмжээнд бүртгэгдсэн “Covid-19”-ийн халдварын өвчлөлийн 8.2 хувийг эрүүл мэндийн ажилтнууд эзэлж байна.
Түүнчилэн вакцины төлөвлөлт, нийлүүлэлт, чанар, аюулгүй байдал, тээвэрлэлт, хадгалалт, дархлаажуулалтын явцыг тогтмол хянахад онцгой анхаарах хэрэгтэй байна гэв. Вакцинд хамрагдсан хүн амын дунд дархлаажуулалтын дараах урвал, хүндрэлийн тандалтыг хийж, байнга мэдээлэх, цаг тутамд эргэх холбоотой ажиллахыг шаардлагатай байна гэдгийг сургалтаар онцолжээ. Мөн хүмүүсийн хүлээлтийг зохицуулах, ялангуяа вакцины эхний үе шатанд вакцины хангамж, хүртээмжийн талаар харилцаа холбоо ба олон нийтийн оролцоог дэмжих үйл ажиллагааг яг одоо эхлүүлэх, хүн амыг вакцин нэвтрүүлэхэд бэлэн болгох хэрэгтэйг онцлов.
Монгол Улс нийт хүн амын 60 хувийг дархлаажуулах ажлыг удахгүй эхлэхээр төлөвлөж байна.
ДЭМБ-ын суурин төлөөлөгч Сергей Диордица, “Дархлаажуулалтыг эхлэхээс өмнө зохион байгуулалт, хэрхэн хүргэх, холбогдох хууль тогтоомжийг судлах, эрүүл мэндийн ажилтнуудыг бүрэн сургах, дархлаажуулалтын дараа гарч болох хариу урвалыг хянах, эрсдэлийн үеийн харилцаа холбоо зэрэг бүх бэлтгэлийг хангасан байх шаардлагатай”-г хэллээ.
Тэрээр, Монгол Улсын бэлэн байдлын төлөвлөгөө болон ДЭМБ-аас хийсэн тархвар зүйн үнэлгээнд үндэслэн PFIZER вакцины эхний ээлжид хамрагдах орноор Монгол Улс сонгогдсон байна. Нэгдүгээр улиралд нийт 25.740 тун вакцин хүлээн авна. Тиймээс ДЭМБ-ын зүгээс үндэсний хэмжээний бэлтгэл ажлыг хангах хүрээнд эрүүл мэндийн ажилтнуудад зориулсан мэргэжлийн сургалтад дэмжлэг үзүүлж ажиллаж байна” гэв