НИТХ дахь МАН-ын бүлгийн гишүүд Ц.Сандуйг огцруулах албан бичгийг өргөн барилаа. Тус бүлгийн төлөөлөгчид дээр нийслэл дэх АН-ын бүлгийн гишүүд нэмэгдэж, энэхүү шаардлагыг дэмжиж буйгаа илэрхийлжээ. НИТХ-ын 45 төлөөлөгчийн олонхи энэхүү асуудлыг дэмжиж буй бөгөөд НИТХ дахь МАН-ын бүлгийн 16 гишүүн Ц.Сандуйг огцруулах албан бичигт гарын үсгээ зурсан байна.
Өнгөрсөн лхагва гаригт хуралдсан МАН-ын Удирдах зөвлөлийн хурлаас 60 тэрбумын гэгдэх бичлэгт холбогдоод буй НИТХ-ын дарга Ц.Сандуйг албан тушаалаас нь чөлөөлж, намаас хөөх тухай шийдвэр гаргах нь гэсэн хүлээлт бий болоод байсан билээ. Эх сурвалжийн хэлж буйгаар, тус намын Удирдах зөвлөлийн хурал дээр энэ асуудал яригдаж Ц.Сандуй өөрийн бурууг хүлээсэн ч намын зарим нөхөд нь хууль хяналтын байгууллагаар асуудлыг эцэслэн шийдсэний дараа түүнд хариуцлага тооцох тухай санал гарган, авч үлджээ.