Month: February 2022

\

“Эрдэнэт- Мөнгөн өвөл 2022” аяны хүрээнд гүйлтийн цанын аймгийн аварга шалгаруулах тэмцээн өнгөрсөн амралтын өдөр “Сархиа” цанын баазад боллоо.

Тэмцээнд өсвөр үе, насанд хүрэгчдийн 7 насны ангилалд Орхон, Булган, Дархан, Төв аймаг болон “Алдар” спортын хороо, Зэвсэгт хүчний 186 дугаар ангийн нийт 78 тамирчин өрсөлдлөө. Өсвөр үеийн 10 нас хүртэл, 11-12 нас, 13-14 нас, 15-16 нас, 17-18 гэсэн таван насны ангилалд эрэгтэй, эмэгтэй тамирчид сонгомол, тэшилт гэсэн хоёр төрөлд өрсөлдсөн байна.

Харин насанд хүрэгчид 2-7,5 км-ын зайнд сонгомол төрлөөр уралдсан байна. Багийн нийт дүнгээр Төв аймаг 1-р байр, Орхон аймаг 2 дугаар байр, Булган аймаг 3 дугаар байрт оржээ.

Украины их, дээд сургуульд суралцаж байгаа оюутнууд эх орондоо ирэх хүсэлт гаргажээ. Тодруулба, өнөөдрийн байдлаар дөрвөн монгол оюутан эх орондоо буцахаар болсноо ЭСЯ-нд мэдэгдсэн байна.

Гадаад харилцааны яамнаас энэ талаар тодруулахад “Монгол Улсаас Польш Улсад суугаа Элчин сайдын яам болон Украин дахь Өргөмжит консулаараа дамжуулан тус улсад суралцаж байгаа монгол оюутнуудтай тогтмол холбоотой байж, шаардлагатай мэдээлэл, зөвлөгөө өгч байна. Өчигдөр тухайн улсад оршин суугаа, суралцаж байгаа оюутнуудтай цахим уулзалт хийсэн. Уулзалтаар тулгамдаж буй асуудал байгаа эсэх талаар ярилцахад байхгүй гэсэн хариулт өгсөн. Хэрэв асуудал үүссэн болон эх орон руугаа буцах хүсэлтэй байгаа бол ЭСЯ-нд хүсэлтээ гаргавал яаралтай буцаах, шийдвэрлэх зохицуулалт хийж байна.

Украинд Монгол Улсын 90 орчим иргэн оршин сууж байгаагаас 20 орчим нь байнгын оршин суугч иргэд байна. Харин их, дээд сургуульд энэ хичээлийн жилд 68 монгол оюутан суралцаж байгаагаас цахимаар суралцдаг зургаа оюутан эх орон руугаа буцах болсноо ЭСЯ-нд мэдэгдсэн. Эдгээр оюутнуудын билет гарсан учраас удахгүй Монголд ирнэ. Оюутан болон иргэдээс өөр нэмэлт хүсэлт ирээгүй байна.

Ямар нэгэн бүртгэлгүй, Украин улсад оршин суугаа иргэд ЭСЯ-нд заавал биечлэн очих шаардлагагүй бөгөөд энэхүү цахим шуудангаар бүртгүүлэх боломжтой. Мөн ЭСЯ-ны +48 538 286 500 дугаарын шуурхай утсаар холбогдож болно. Хэрэв Украин улс руу зорчихоор төлөвлөж буй иргэд байвал нөхцөл байдлыг харгалзан үзэхийг зөвлөж байна” гэлээ.

Өнөөдрийн байдлаар коронавируст халдвараар 764 хүн эмчилгээтэй байгаагаас 255 хүн эмнэлэгт хэвтэн эмчлүүлж байна. Халдварын тархалт Арвайхээр Х архорин,Баянгол,Сант, Есөнзүйл, Нарийн тээл сумдад өндөр байгаа аж.

Сүүлийн 24 цагийн хугацаанд 21 хүнээс халдвар илэрсэн бөгөөд нийт халдвар авсан хүний тоо 21810 болж, үүнээс 21103 тохиолдол бүрэн эдгэрчээ. Нас баралт 61 байна. Вакцины II тунд 81720, III тунд 28491, IV тунд 1785 хүн хамрагдаад байна.

Нийслэлийн Байгаль орчны газраас мэдээлснээр Сүхбаатар, Чингэлтэй, Сонгинохайрхан дүүргийн нутаг дэвсгэрээс 52 бодгаль монгол тарвагыг барьж Багануур дүүргийн нутагт дэвсгэрт шилжүүлжээ.

Улмаар нутагшилтын байдлыг хянан тоо толгойн өсөлтөд мониторинг хийж байна.

Сүүлийн жилүүдэд суурьшил газрын бүс тэлж буйтай холбоотойгоор тарваганы тархац нутаг хумигдаж, идэш тэжээл хайн хотын бүс рүү орж ирэх тохиолдол их гарах болжээ. Үүнтэй холбоотойгоор Нийслэлийн байгаль орчны газар БОАЖЯ-наас тархац нутаггүй болж буй монгол тарвагыг шилжүүлэн нутагшуулах зөвшөөрлийг авч Улаанбаатар хотын суурьшлын бүсэд тархац нутаггүй болсон монгол тарвагыг ийнхүү нүүлгэн шилжүүлсэн байна.

Ташрамд дурдахад, Нийслэлийн Байгаль орчны газар “Агнуур судлалын нийгэмлэг” ТББ-тай хамтран нийслэлийн Баянзүрх, Сонгинохайрхан, Сүхбаатар дүүргийн нутаг дэвсгэрт туруутан амьтны нягтшил бүхий 3 байршил газарт 4 тонн хужир, 150 боодол өвс тавьж техникийн арга хэмжээ аваад байна.

Ерөнхий сайд Л.Оюун-Эрдэнэ улс төрийн намын санхүүжилттэй холбоотой хуулийг Ерөнхийлөгч өргөн барих гэж буй талаар мэдээлэл өглөө.

Тэрбээр “Намын дүрмийг дарга, ерөнхий нарийн бичгийн дарга ч бай бүгд дагах ёстой. Ингэж байж улс төрийн нам шаардлага тавьж чаддаг, төрийг цэвэр тунгалаг болгохын төлөө хичээх ёстой. Намуудын хувьд нэр дэвшилт, сахилга хариуцлагын томоохон шаардлага тавьдаг, иргэний нийгмийн байгууллагуудтай хамтарч ажилладаг, шахаж чаддаг энэ зүйл рүү орж байж, авлигын индексээ бууруулж, төрийн үйлчилгээ илүү хүнд сурталгүй болно.

Мөн хөрөнгө оруулалт татна. Эдийн засгаа илүү том болгоход улс төр саад болж болохгүй. Тиймээс энэ асуудалд хатуу байр суурь баримтлах болно.

Улс төрийн намын санхүүжилтийг цэгцлэх ёстой. Цаашид УИХ-д хамгийн бага зардлаар сонгогддог жишиг рүү явах нь зөв. Иргэдийг төлөөлөхдөө мөнгөтэй, мөнгөгүй гэсэн ялгаатай байдлыг арилгаснаар илүү шударга засаглал тогтдог. Тиймээс улс төрийн намын санхүүжилттэй холбоотой эрх зүйн зохицуулалтыг Ерөнхийлөгч өргөн барина гэсэн мэдээлэлтэй байна. Улс төрийн нам бодлогын нам байх тал дээр МАН түрүүлж томоохон алхам хийнэ” гэв.

Ковидын үед хөнгөн хэлбэрээр өвдсөн тохиолдолд гэрээр эмчилгээг хэрхэн хийх талаар ЧД-ийн 19-р хорооны “Ундах-Ирээдүй” ӨЭМТ-ийн Их эмч Ж.Алтантуул зөвлөлөө.