Month: February 2022

Барилга, хот байгуулалтын яамны 5 тусгай зөвшөөрөл цахимжиж, e-Mongolia платформд нэгтгэгдлээ. Тодруулбал,

• Барилга, байгууламжийн зураг төсөл боловсруулах тусгай зөвшөөрөл
• Барилгын ажил гүйцэтгэх тусгай зөвшөөрөл
• Барилгын материалын үйлдвэрлэл эрхлэх тусгай зөвшөөрөл
• Хот байгуулалтын баримт бичиг боловсруулах мэргэжлийн эрх
• Өргөх байгууламж, түүний эд ангийн үйлдвэрлэл угсралт засвар үйлчилгээ үзүүлэх тусгай зөвшөөрөл зэрэг үйлчилгээг цахимаар авах боломжтой болсон байна.

Дээрх тусгай зөвшөөршлийг авахын тулд:

• www.e-mongolia.mn сайтад нэвтрэх
• Үйлчилгээ гэсэн цэс дээр дарах
• Бизнес эрхлэлт гэсэн үйлчилгээг сонгох
• Барилга, дэд бүтэц, эрчим хүч гэсэн дэд үйлчилгээг сонгоно.

Ингэснээр төрийн цахим үйлчилгээний нэгдсэн систем “e-Mongolia” -д төрийн 60 байгууллагын 611 үйлчилгээг нэгтгэгдээд байгаа юм. “e-Mongolia” нь энэ 2022 онд төрийн 100 байгууллагын 1000 гаруй үйлчилгээг цахимжуулахын зэрэгцээ 21 аймгийн нутгийн захиргааны 1200 үйлчилгээг цахимжуулахаар ажиллаж байна.

21 аймаг, нийслэлийн нийт цэцэрлэг, ерөнхий боловсролын сургуулийн багш, ажилтан, эцэг эхийн зөвлөлийн төлөөллийг хамруулсан “КОВИД-19”-ЭЭС СЭРГИЙЛЭХЭД ЭЦЭГ, ЭХИЙН ОРОЛЦОО, ДЭМЖЛЭГ” сэдэвтэй сургалт өчигдрөөс эхэлж Баянзүрх дүүргийн 10 сургууль, 10 цэцэрлэгийн нийт 60 хүний төлөөллийг оролцуулсан сургалт боллоо.

Сургалтыг НҮБ-ын Хүүхдийн сан болон АНУ-ын Олон улсын хөгжлийн агентлагын санхүүжилттэйгээр Боловсрол, шинжлэх ухааны яам, Нийгмийн эрүүл мэндийн үндэсний төв, Монголын Улаан Загалмайн нийгэмлэг хамтран хэрэгжүүлж байна.

Сургалт 14 хоногийн хугацаанд цахим хэлбэрээр орон даяар үргэлжлэх бөгөөд нийт 7100 сургагч багшийг бэлтгэнэ. “Ковид-19”-ийн халдварын үед цаашид хичээл сургалтыг тасралтгүй зохион байгуулахын тулд хүүхдийнхээ эрүүл мэндийг хамгаалах, суралцахад нь тулгарч буй сэтгэл зүйн айдас түгшүүрийг хамтдаа даван туулах, сурлагын хоцрогдлын нөхөх, арилгах, хүүхдийн хөгжлийг дэмжих чиглэлээр СУРГУУЛЬ-БАГШ-ЭЦЭГ ЭХ нягт хамтран ажиллах хэрэгцээ шаардлага урган гарч байна.

Сургалтын нээлтийн ажиллагаанд Боловсрол, шинжлэх ухааны сайдын ахлах зөвлөх М.Батгэрэл, НҮБ-ын Хүүхдийн Сангийн Суурин төлөөлөгч Эваристе Коуасси-Комлан, АНУ-аас Монгол Улсад суугаа Онц бөгөөд Бүрэн эрхт Элчин сайд Майкл С.Клечески, МУЗН-ийн Ерөнхий нарийн бичгийн дарга Н.Болормаа (цахимаар) оролцож, ковидын халдварын үед хичээл сургалтыг тасралтгүй явуулах, сурлагын хоцрогдлыг нөхөх, арилгах, хүүхдэд сэтгэл зүйн дэмжлэг үзүүлэхэд багш-хүүхэд-эцэг эхийн зөвлөлийн хамтын ажиллагаа чухал ач холбогдолтойг онцолж, оролцогчдод амжилт хүсэв.

Сургалтад оролцож буй эцэг эхчүүдэд хууль, дүрэм журам, стандарт ярихаас илүүтэйгээр гэр бүлийн орчинд хүүхдийн эрүүл мэнд, дархлааг дэмжих, хүүхдийн нийгэмшил, сэтгэл зүйд тулгарч буй сөрөг нөлөөлөл, бэрхшээлийг хүүхэдтэйгээ хамтдаа шийдвэрлэх арга зүйг зөвлөж байгаа нь энэхүү сургалтын онцлог юм.

Сургалт хуваарийн дагуу 2022 оны хоёрдугаар сарын 25-ны өдрийг хүртэл өдөр бүр үргэлжилнэ хэмээн БШУЯ-наас мэдээллээ.

Монгол Улсын Их Хурлын Хууль зүйн байнгын хорооны 2021 оны нэгдүгээр сарын 22-ны өдрийн 01 дүгээр тогтоолоор байгуулагдсан “Хүний эрхийн Үндэсний Комиссын гишүүнийг сонгон шалгаруулах” үүрэг бүхий ажлын хэсэг 2022 оны нэгдүгээр сарын 31-ний өдөр хуралдаж Хүний эрхийн Үндэсний Комиссын гишүүний сонгон шалгаруулалтад оролцохоо илэрхийлж хүсэлт гаргасан Т.Саруул, С.Дондов нарыг сонгон шалгаруулалтын оролцогчоор бүртгэсэн.

Ажлын хэсгийн хуралдаанаар Хүний эрхийн Үндэсний комиссын гишүүнд нэр дэвшигч Т.Саруул, С.Дондов, өмнө нь оролцогчоор бүртгэгдсэн Эрүүдэн шүүхээс урьдчилан сэргийлэх асуудал хариуцсан гишүүнд нэр дэвшигч Я.Цэлмэн, Б.Өнөрмаа, Ч.Отгончулуун нартай хийх томилгооны сонсголыг 2022 оны хоёрдугаар сарын 17-ны өдөр 11:00 цагаас хийхээр тогтсон.

Томилгооны сонсголд оролцох хүсэлтэй иргэн, хуулийн этгээд, хэвлэл мэдээллийн байгууллага, олон нийтийн байгууллага “Томилгооны сонсголд оролцогчийн бүртгэлийн хуудас”-ыг бөглөж 2022 оны хоёрдугаар сарын 16-ны өдрийн 17.00 цагаас өмнө galsanbatb@parliament.mn имэйл хаяг руу явуулах боломжтой аж.

Томилгооны сонсгол явуулахтай холбогдуулан иргэд, олон нийт нэр дэвшигчдийн мэдээлэлтэй танилцаж, сонирхож буй асуулт, санал, хүсэлтээ ажлын хэсгийн 51-267155 утсаар болон дээрх имэйл хаяг руу ирүүлэх боломжтой.

Хүний эрхийн үндэсний комиссийн гишүүнд нэр дэвшигч С.Дондов:

Эрдмийн зэрэг:
1984-1989 онд Монгол Улсын Их сургууль, Хууль зүйн сургуульд эрх зүйч

Ажилласан байдал:

– 1989-1991 онд Баянхонгор аймгийн өмгөөлөгчдийн зөвлөлд Өмгөөлөгч
– 1991-1996 онд Баянхонгор аймгийн өмгөөлөгчдийн зөвлөлийн Дарга
– 1996-2002 онд Нийслэлийн өмгөөлөгчдийн зөвлөлд Өмгөөлөгч
– 2002-2010 онд Хүний эрх хөгжил төв ТББ-д Хүний эрхийн хөтөлбөрийн Зохицуулагч
– 2010 оноос Нийслэлийн өмгөөлөгчдийн холбоонд Өмгөөлөгч

Хүний эрхийн үндэсний комиссийн гишүүнд нэр дэвшигч Т.Саруул:

Эрдмийн зэрэг, цол:
– 1992-1996 он Улсын Багшийн Их Сургуулийн Орхон аймаг дахь салбар сургуулийн Гадаад хэлний сургуульд Англи-Орос хэлний орчуулагч /Бакалавр/
– 2001-2006 он Монгол Улсын Их сургууль, Хууль зүйн сургуульд эрх зүйч /Бакалавр/
– 2010-2013 он ХБНГУ, Оснабрюкийн их сургуульд Хууль зүйн магистр /LL.M/
– 2010-2012 он ХБНГУ, Оснабрюкийн их сургуульд Улс төрийн магистр /M.А/

Ажилласан байдал:
– 1996-1998 онд МУИС-ийн Орхон аймаг дахь салбар сургуульд Англи хэлний багш
– 2007-2009 онд GCE ХХК, Хуулийн зөвлөх
– 2009-2010 онд GT’s Адвокатс Хуулийн зөвлөх
– 2013.05-2013.06 сард Хууль зүйн үндэсний хүрээлэнд Судлаач
– 2013.06-2013.08 сард Шүүхийн ерөнхий зөвлөлд Гадаад харилцааны хэлтэст Даргын үүрэг гүйцэтгэгч
– 2013-2015 онд Хууль зүйн үндэсний хүрээлэнд Бодлогын Судлаач
– 2014 оноос Түгээмэл эрх хөгжил ТББ-ын Тэргүүн
– 2019 оноос Эко соёл сан ТББ-ын Тэргүүн
– Өмгөөлөгч

Авлигатай тэмцэх газрын Мөрдөн шалгах хэлтэс 2022 оны хоёрдугаар сарын 7-11-ний өдрүүдэд гэмт хэргийн шинжтэй 23 гомдол, мэдээлэл хүлээн авч, нийт 90 гомдол, мэдээллийг шалгав. Үүнээс 28 гомдол, мэдээлэлд хэрэг бүртгэлтийн хэрэг нээж, 22 гомдол, мэдээлэлд хэрэг бүртгэлтийн хэрэг нээхээс татгалзах саналтайгаар прокурорт шилжүүлсэн бөгөөд одоогоор 38 гомдол, мэдээллийг хянан шалгаж байна.

Түүнчлэн эрүүгийн 579 хэрэгт мөрдөн байцаалтын ажиллагаа явуулснаас 10 хэргийг шүүхэд шилжүүлэх, 16 хэргийг хаах, 1 хэргийг харьяаллын дагуу шилжүүлэх саналтай прокурорт шилжүүлэв. Мөрдөн шалгах ажиллагаанд одоогоор 552 хэрэг шалгагдаж байна.

Өнгөрсөн долоо хоногт Хөгжлийн банкны зээл олголт, төлөлтийг шалгах эрүүгийн хэрэгт зарим объектод нэгжлэгийн ажиллагаа явуулж, Гэмт хэрэг үйлдэгдсэн шалтгаан, нөхцөлийг арилгуулахаар Мөрдөгчийн мэдэгдэл хоёрыг бичиж, холбогдох байгууллагуудад хүргүүлжээ.