АНУ-ын сенат пүрэв гарагт Хятадын Шинжаан-Уйгарын өөртөө засах орноос импортлох бараа бүтээгдэхүүнд хориг тавилаа. Учир нь тус бүс нутагт албадан хөдөлмөр эрхлүүлж байгаа гэж БНХАУ-ын засаг захиргааг буруутган, ийнхүү зарчмын хувьд хориглох тухай хуулийн төслийг батлахаар санал хураалт явууллаа.

Энэхүү хуулийг батлахын тулд Ерөнхийлөгч Жозеф Байденаар гарын үсэг зуруулахаар тогтоомжийг Цагаан ордон руу илгээх юм. Энэ хуулийн төслийг төлөөлөгчдийн танхим аль хэдийн баталсан. Төсөлд импортын бүх барааг хамруулсан байна.

АНУ Шинжаан-Уйгарын бүс нутагт үйлдвэрлэсэн хөвөн болон боловсруулсан хөдөө аж ахуйн бүтээгдэхүүн зэрэг бүтээгдэхүүнийг импортлохыг одоогоор хориглож байна.

Мөн уг хуулийн төсөлд тухайн бүс нутгаас бүтээгдэхүүн импортлохыг хүссэн аж ахуйн нэгжүүдээс уг барааг албадан хөдөлмөргүйгээр үйлдвэрлэсэн болохыг нотлох баримт бүрдүүлэхийг үүрэг болгожээ.

Энэ сарын эхээр Жозеф Байдены засаг захиргаа Бээжингийн өвлийн олимп, паралимпыг дипломат аргаар бойкотлохоо зарласан.

АНУ-ын энэ алхам Бээжингийн эсэргүүцлийг төрүүлэх магадлал өндөр байгааг олон улсын ажиглагчид онцолж байна.

НОБГ-ын Сонгинохайрхан дүүргийн Онцгой байдлын хэлтсээс зохион байгуулж байгаа “Гал түймэр, угаарын хийн хордлогоос урьдчилан сэргийлэх хяналт шалгалт зохион байгуулах” аяныг өнөөдрөөс эхлүүллээ.

Аян ирэх оны 01 дүгээр сарын 04-нийг хүртэл үргэлжлэх бөгөөд дүүргийн Онцгой байдлын хэлтэс, Цагдаагийн газар, 43 хороодын хэсгийн ахлагч нар, УБЦТӨХК-ийн “Сонгинохайрхан дүүргийн Хэрэглэгчид үйлчлэх төв”, Таван толгой түлш ХХК-ийн ажилтан, алба хаагчид хамтран дүүргийн гэр хороолол бүхий 31 хороодын 45 мянган айл өрхөд гал түймэр, угаарын хийн хордлогоос урьдчилан сэргийлэх хяналт шалгалтыг хийж, заавар зөвлөмж өгч ажиллах юм.

Өнөөдөр 9 дүгээр хорооны 850 өрхийг хяналт шалгалтад хамруулж, галын аюулгүйн дүрэм, норм, стандартын холбогдох заалтыг зөрчсөн 527 зөрчлийг илрүүлэн 164 зөрчлийг газар дээр нь арилгуулсан байна.

Мөн 1850 иргэнд галын түймэр, газар хөдлөлт, үер, халдварт өвчнөөс урьдчилан сэргийлэх, анхны тусламж үзүүлэх, угаарын хийн хордлогоос урьдчилан сэргийлэх заавар зөвлөмж бүхий гарын авлага, санамж, сэрэмжлүүлэг материал тарааж, мэргэжил, аргазүйн зөвлөгөө өгч ажиллалаа гэж НОБГ-ын Сонгинохайрхан дүүргийн Онцгой байдлын хэлтсээс мэдээллээ.

Төрийн албаны тухай хуулийн 68 дугаар зүйл, Төрийн албан хаагчийн төлөөллийг сонгон шалгаруулах журамд заасны дагуу Төрийн албаны зөвлөлийн гишүүнд нэр дэвшүүлэх төрийн албан хаагчийн төлөөллийг сонгон шалгаруулах зарыг Төрийн албаны зөвлөлөөс зарлажээ.

Нэг. Нэр дэвшигчид тавигдах шаардлага

Сонгон шалгаруулалтад бүртгүүлэхээр хүсэлт гаргах төрийн албан хаагч хууль, тогтоомжид заасны дагуу дараах шаардлагыг хангасан байна. Үүнд:

• Дөчин таван нас хүрсэн Монгол Улсын иргэн;
• Дээд боловсролтой;
• Төрийн жинхэнэ албан тушаалд 15-аас доошгүй жил ажилласан, үүнээс эрхэлсэн түшмэлийн албан тушаалд дөрвөөс доошгүй жил ажилласан;
• Төрийн удирдлага, эдийн засаг, эрх зүй, боловсролын чиглэлээр мэргэшсэн;
• Ял шийтгүүлж байгаагүй;
• Сүүлийн нэг жилийн хугацаанд улс төрийн намын аль нэг байгууллагад сонгуульт болон бусад албан тушаал эрхэлж байгаагүй;
• Сахилгын шийтгэлээр төрийн албанаас халагдаж байгаагүй.

Хоёр. Бүрдүүлэх баримт бичиг

Сонгон шалгаруулалтад бүртгүүлэх төрийн албан хаагч дараах баримт бичгийг бүрдүүлнэ. Үүнд:

• Сонгон шалгаруулалтад бүртгүүлэхээр бичгээр гаргасан хүсэлт;
• Төрийн албан хаагчийн анкет;
• Иргэний үнэмлэхийн хуулбар, эх хувийн хамт;
• Төрсний гэрчилгээ түүнтэй адилтгах баримт бичгийн хуулбар, эх хувийн хамт;
• Их, дээд сургууль төгссөн гэрчилгээний хуулбар, эх хувийн хамт;
• Нийгмийн даатгалын дэвтэр болон ажил эрхлэлтийг тодорхойлох бусад баримт бичгийн хуулбар, эх хувийн хамт;
• Мэргэшүүлэх сургалтад хамрагдсаныг баталгаажуулсан гэрчилгээ, эх хувийн хамт;
• Төрийн албаны тухай хууль болон Төрийн албан хаагчийн төлөөллийг сонгон шалгаруулах журамд заасан Төрийн албаны зөвлөлийн гишүүнд тавигдах шаардлага, ур чадвар нэг бүрийг хэрхэн хангасан талаар гаргасан тайлбар, нотлох баримт; (ур чадварыг эзэмшсэн тухай тайлбарт төрийн албанд ажиллахдаа журамд заасан ур чадваруудыг ашиглан тулгамдсан ямар асуудлыг шийдвэрлэхийн тулд ямар арга хэмжээ авч хэрэгжүүлсэн, улмаар ямар үр дүнд хүрсэн талаар тодорхой баримттай тусгана.)
• Төрийн албаны холбогдолтой судалгааны ажил, эрдэм шинжилгээний бүтээлийн жагсаалт (нотлох эх сурвалжийг заасан байх).

Гурав. Сонгон шалгаруулалтад оролцох хүсэлтийг хүлээн авах ба бүртгэх

Сонгон шалгаруулалтад бүртгүүлэхээр гаргасан хүсэлт болон бүрдүүлсэн баримт бичгийг Засгийн газрын XI байрны 302 тоот өрөөнд 2021 оны 12 дугаар сарын 23-ны өдрийн 17:30 цаг хүртэл хүлээн авч бүртгэх юм байна.

Олон Улсын Таеквондогийн холбоо /ITF/-ны 55 жилийн ойн нэрэмжит “Өсвөрийн болон Мастер ангиллын дэлхийн аварга шалгаруулах тэмцээн” Беларусь Улсын нийслэл Минск хотод энэ оны 12 дугаар сарын 11-18-ны өдрүүдэд зохион байгуулагдаж байна.

Энэхүү тэмцээнд “Хүч” спорт хорооны хоёр тамирчин оролцсон бөгөөд ахмад тамирчин, цагдаагийн ахмад С.Төрбаяр “Мастер ангиллын 50-59 насны хувийн тулааны -80 кг жин”-д амжилттай өрсөлдөн “Алтан медаль” хүртэж, дэлхийн аваргаар шалгарлаа.

Тэмцээнд амжилттай оролцож, “Дэлхий аварга”-аар шалгарсан танд баяр хүргэж, цаашдын ажил хөдөлмөр, спортод амжилт хүсье.

Монгол Улсын Ерөнхийлөгчийн зарлигаар Монголын 3х3 сагсан бөмбөгийн холбооны Үндэсний шигшээ багийн тамирчин ОУХМ Д.Ганзул, Б.Болор-Эрдэнэ нар Төрийн Дээд шагнал “Алтан гадас” одонгоор шагнагдлаа.

Азийн хөгжлийн банкнаас хэрэгжүүлсэн “Гэр хорооллыг хөгжүүлэх, хөрөнгө оруулалтыг дэмжих хөтөлбөр”төслийн хүрээнд дэд бүтцийн зургаан төв байгуулах ажлын эхний шат амжилттай хэрэгжээд байгаа. Азийн хөгжлийн банк, Европын хөрөнгө оруулалтын банкны хөнгөлөлттэй зээлээр хэрэгжүүлж буй дээрх төсөл хөтөлбөр гурван үе шаттайгаар 10 жилийн хугацаанд хэрэгжинэ.

Төслийг амжилттай үргэлжлүүлж, санхүүжилтийг тасалдуулахгүй байх талаар Нийслэлийн Засаг даргын орлогч Ж.Сандагсүрэн Азийн хөгжлийн банкны Суурин төлөөлөгчийн газрын хот байгуулалтын салбарын тэргүүлэх мэргэжилтэн Арно Хекманнтай уулзлаа. Арно Хекманн “Хөтөлбөрийн үргэлжлэл болох орлогод нийцсэн “Ногоон орон сууцны төсөл” нь гэр хорооллыг хөгжүүлэхэд чухал ач холбогдолтой. Иргэдийн орлогод нийцсэн, ногоон орон сууц барьж, гэр хорооллын 100 га талбайг нүүрсхүчлийн ялгаруулалт багатай, уур амьсгалын өөрчлөлтөд тэсвэртэй, орлогын холимог бүрдэл бүхий оршин суугчидтай, эко орчин бүрдүүлэн хөгжүүлэхээр зорьж байна” хэмээсэн юм.

Нийслэлийн Засаг даргын орлогч Ж.Сандагсүрэн “Төсөл хэрэгжүүлэх явцад үнийн өсөлт гарч санхүүжилтийн тал дээр зарим нэг асуудал үүссэн ч үүнийг шийдвэрлэхээр нийслэлийн удирдлагууд онцгой анхааран ажиллаж байгаа. Энэ бол нийслэл дангаараа шийдэх асуудал биш тул Сангийн яамтай хэлэлцээрийн түвшинд ажиллаж байна. Дэд төвүүд байгуулахын тулд зөвхөн дэд бүтэц, зам, барилга, байгууламж бариад зогсох биш, сургалтын төв байгуулж, ажлын байр нэмэгдүүлэх нь чухал юм” гэлээ.